న్యూఢిల్లీ: చిన్న, మధ్య తరహా సంస్థలు తమ లాభాలను పెంచుకోవడానికి, మార్కెటింగ్‌ వ్యయాలను తగ్గించుకోవడానికి, కొత్త మార్కెట్లలో విస్తరించడానికి ఈ–కామర్స్‌ ఎంతగానో తోడ్పడుతోందని కేంద్ర ఎంఎస్‌ఎంఈ శాఖ సహాయ మంత్రి భాను ప్రతాప్‌ సింగ్‌ వర్మ తెలిపారు. చిన్న వ్యాపారాలు తమ మేనేజ్‌మెంట్‌ నైపుణ్యాలను, టెక్నాలజీని మరింతగా మెరుగుపర్చుకోవాలని ఆయన సూచించారు. పరిశ్రమల సమాఖ్య సీఐఐ నిర్వహించిన భారతీయ ఎంఎస్‌ఎంఈల సదస్సులో పాల్గొన్న సందర్భంగా మంత్రి ఈ విషయాలు చెప్పారు. ఎంఎస్‌ఎంఈలు దేశీయంగా ఉపాధి కల్పనలోనూ, తయారీ కార్యకలాపాలను విస్తరించడంలోనూ కీలక పాత్ర పోషిస్తున్నాయని ఆయన తెలిపారు. 5 లక్షల కోట్ల డాలర్ల ఎకానమీ లక్ష్యాన్ని సాధించే క్రమంలో వాటిపై మరింతగా దృష్టి పెట్టాల్సిన అవసరం ఉందని వర్మ చెప్పారు.   ఎంఎస్‌ఎంఈలకు ప్రభుత్వ చేయూత.. కరోనా మహమ్మారి కష్టకాలంలో కూడా చిన్న పరిశ్రమలు ఎదురొడ్డి నిల్చాయని మంత్రి తెలిపారు. కొన్ని యూనిట్లు ఆర్థిక కష్టాలతో మూతబడే పరిస్థితికి వచ్చినా ప్రభుత్వం జోక్యం చేసుకుని తగు తోడ్పాటునివ్వడంతో గట్టెక్కాయని ఆయన చెప్పారు. ఎంఎస్‌ఎంఈలను ఆదుకునేందుకే కేంద్రం ఎమర్జెన్సీ క్రెడిట్‌ లైన్‌ గ్యారంటీ స్కీమ్‌ను (ఈసీఎల్‌జీఎస్‌) ఆవిష్కరించినట్లు మంత్రి వివరించారు. దీని కింద చిన్న సంస్థలకు రూ. 3.1 లక్ష కోట్ల మేర నిధులను కేటాయించినట్లు ఎంఎస్‌ఎంఈ శాఖ కార్యదర్శి బీబీ స్వెయిన్‌ తెలిపారు. డీ2సీ మార్కెట్‌ నివేదిక ఆవిష్కరణ.. కార్యక్రమంలో పాల్గొన్న సందర్భంగా ప్రాక్సిస్, షిప్‌రాకెట్, సీఐఐ సంయుక్తంగా రూపొందించిన భారత డీ2సీ మార్కెట్‌ నివేదికను మంత్రి ఆవిష్కరించారు. దీని ప్రకారం ఆన్‌లైన్‌లో ఆర్డర్లు తీసుకుని నేరుగా కస్టమర్లకు పంపే చాలా మటుకు డీ2సీ (డైరెక్ట్‌ టు కస్టమర్స్‌) సంస్థలకు ఢిల్లీ, బెంగళూరు, ముంబై ప్రధాన సరఫరా, డిమాండ్‌ హబ్‌లుగా ఉంటున్నాయి. 2022 ఆర్థిక సంవత్సరంలో నిత్యావసరాలు మొదలైన ఉత్పత్తుల మార్కెట్‌ పరిమాణం 571 బిలియన్‌ డాలర్లుగా, ఆభరణాల మార్కెట్‌ 82 బిలియన్‌ డాలర్లు, దుస్తులు.. పాదరక్షలు 81 బిలియన్‌ డాలర్లు, ఎలక్ట్రానిక్స్‌ మార్కెట్‌ 9.4 బిలియన్‌ డాలర్లుగా ఉండవచ్చని నివేదిక అంచనా వేసింది.

సాక్షి, న్యూఢిల్లీ: కొత్త వ్యవసాయ చట్టాలను రద్దు చేయాలనే ప్రధాన డిమాండ్‌తో రైతు సంఘాలు చేపట్టిన ఆందోళన మరో మలుపు తిరిగింది. ఈ చట్టాల రద్దుకు బదులుగా కొన్ని సవరణలు చేస్తా మంటూ కేంద్రం ప్రకటించడం, పలు దఫాలుగా జరిగిన చర్చలు విఫలం కావడంతో రైతు సంఘాలు సుప్రీంకోర్టు తలుపుతట్టాయి. మూడు కొత్త సాగు చట్టాల రాజ్యాంగబద్ధతను సవాలు చేస్తూ భారతీయ కిసాన్‌ యూనియన్‌ భాను(బీకేయూబీ) సుప్రీంకోర్టులో పిటిషన్‌ వేసింది. బీకేయూబీ అధ్యక్షుడు భాను ప్రతాప్‌సింగ్‌ శుక్రవారం ఈ విషయం తెలిపారు. మూడు చట్టాల రాజ్యాంగబద్ధతను, చెల్లుబాటును ప్రశ్నిస్తూ ఆర్జేడీ ఎంపీ మనోజ్‌ ఝా, డీఎంకే రాజ్యసభ సభ్యుడు తిరుచ్చి రవి, ఛత్తీస్‌గఢ్‌ కిసాన్‌ కాంగ్రెస్‌ నేత రాకేశ్‌ వైష్ణవ్‌ తదితరులు గతంలో సుప్రీంకోర్టులో ఆరు పిటిషన్లు దాఖలు చేశారు. వీటిని పరిశీలించిన న్యాయస్థానం అక్టోబర్‌ 12న కేంద్ర ప్రభుత్వానికి జవాబు చెప్పాలంటూ నోటీసులు జారీ చేసింది. ఈ చట్టాల అమలుపై స్టే విధించాలని కోరుతూ భారతీయ కిసాన్‌ పార్టీ నవంబర్‌లో పిటిషన్‌ వేసింది. ఈ పిటిషన్లన్నింటిపై డిసెంబర్‌ చివరి వారంలో సుప్రీంకోర్టు విచారణ జరిపే అవకాశం ఉంది. ఏకపక్షంగా ఆమోదించారు.. పార్లమెంట్‌లో పూర్తిస్థాయిలో చర్చ జరపకుండానే కేంద్ర ప్రభుత్వం ఏకపక్షంగా బిల్లులను ఆమోదించి, సాగు చట్టాలను తీసుకొచ్చిందని భాను ప్రతాప్‌సింగ్‌ తన పిటిషన్‌లో పేర్కొన్నారు. రైతు సంఘాల వాదనలను ఏమాత్రం పట్టించుకోలేదన్నారు. సర్కారు నిర్ణయం వల్ల రైతులు కార్పొరేట్‌ సంస్థల దయాదాక్షిణ్యాలపై ఆధారపడాల్సి వస్తుందని ఆందోళన వ్యక్తం చేశారు. ఈ చట్టాలు ముమ్మాటికీ ఏకపక్షం, రాజ్యాంగ విరుద్ధం, రైతు వ్యతిరేకమని తెలిపారు. తిరుచ్చి రవి దాఖలు చేసిన పిటిషన్‌లో సుప్రీంకోర్టు కూడా ఇంప్లీడ్‌ కావాలని భాను ప్రతాప్‌సింగ్‌ అభ్యర్థించారు. చర్చలకు సిద్ధం: ఏఐకేఎస్‌సీసీ రైతుల సమస్యలపై ప్రభుత్వంతో చర్చలకు తామెప్పుడూ సిద్ధమేనని అఖిల భారత రైతు పోరాట సమన్వయ కమిటీ (ఏఐకేఎస్‌సీసీ) స్పష్టం చేసింది. చర్చల నుంచి రైతు సంఘాల నేతలు అర్ధాంతరంగా వెళ్లిపోయారంటూ కేంద్ర వ్యవసాయ మంత్రి నరేంద్రసింగ్‌ తోమర్‌ చేసిన వ్యాఖ్యలను ఖండించింది. ఢిల్లీ శివారులోని సింఘు, టిక్రీ, గాజీపూర్, పల్వాల్‌లోని ధర్నా ప్రాంతాలకు దేశవ్యాప్తంగా రైతులు తరలి వస్తున్నారని తెలి పింది. డిసెంబరు 15న ముంబైలో, 16న కోల్‌కతా లో నిరసనలు నిర్వహించనున్నట్లు ఏఐకేఎస్‌సీసీ తెలిపింది. సంఘ వ్యతిరేక శక్తులతో జాగ్రత్త సాగు చట్టాలపై పోరు సాగిస్తున్న రైతులు అప్రమత్తంగా ఉండాలని కేంద్రం హెచ్చరించింది. సంఘ వ్యతిరేక, వామపక్ష, మావోయిస్టు శక్తులు చొరబడి ఉద్యమాన్ని పక్కదారి పట్టించే ప్రమాదముందని పేర్కొంది. వేర్వేరు ఆరోపణల కింద అరెస్టయిన హక్కుల కార్యకర్తలను విడుదల చేయాలంటూ టిక్రి వద్ద జరుగుతున్న నిరసనల్లో కొందరు ప్లకార్డులు ప్రదర్శించడంపై వ్యవసాయ మంత్రి తోమర్‌ ఈ మేరకు అప్రమత్తం చేశారు.   14న పంజాబ్‌లో కాంగ్రెస్, ఆప్‌ నిరసనలు సాగు చట్టాల రద్దు కోసం పోరాడుతున్న రైతులకు అండగా నిలుస్తామని కాంగ్రెస్, ఆమ్‌ ఆద్మీ పార్టీ ప్రకటించాయి. రైతులకు మద్దతుగా 14వ తేదీన పంజాబ్‌లో రాష్ట్రస్థాయి నిరసన కార్యక్రమాలు నిర్వహిస్తామని తెలిపాయి. రైతుల డిమాండ్ల విషయంలో బీజేపీ నిర్లక్ష్యంగా వ్యవహరిస్తోందని సమాజ్‌వాదీ పార్టీ అధ్యక్షుడు అఖిలేష్‌ యాదవ్‌ మండిపడ్డారు. వారికి సంఘీభావంగా 14న ఉత్తర ప్రదేశ్‌లోని అన్ని జిల్లా కేంద్రాల్లో శాంతియుతంగా బైఠాయింపులు నిర్వహిస్తామని వెల్లడించారు. 11వ రోజుకు చేరిన ఆందోళనలు కొత్త సాగు చట్టాలను వ్యతిరేకిస్తూ ఢిల్లీ–నోయిడా సరిహద్దులో రైతులు సాగిస్తున్న ఆందోళన శుక్రవారం 11వ రోజుకు చేరుకుంది. ఢిల్లీ–ఉత్తరప్రదేశ్‌ను కలిపే ఈ సరిహద్దు వద్ద రైతుల నిరసనల కారణంగా అధికారులు వాహనాల రాకపోకలను పాక్షికంగా నిలిపివేశారు. ఒకవైపు మాత్రమే వాహనాలను అనుమతిస్తున్నారు. 700 జిల్లాల్లో ప్రచారం.. 100 ప్రెస్‌మీట్లు.. వాస్తవాల వివరణకు బీజేపీ నిర్ణయం న్యూఢిల్లీ:  వ్యవసాయరంగంలో తీసుకువచ్చిన మూడు కొత్త చట్టాలతో ఒనగూరే లాభాలను ప్రజలకు వివరించాలని బీజేపీ నిర్ణయించింది. ఈ చట్టాలతో రైతన్నలకు లబ్ధి కలుగుతుందే తప్ప ఎలాంటి నష్టం ఉండబోదని తెలియజేయనుంది. ఇందుకోసం దేశవ్యాప్తంగా పెద్ద ఎత్తున అవగాహనా కార్యక్రమాలు నిర్వహించనుంది. త్వరలో 100 మీడియా సమావేశాలు, 700కు పైగా జిల్లాల్లో ప్రజలతో భేటీలు, ప్రచార కార్యక్రమాలు తలపెట్టింది. ఈ ప్రచార పర్వంలో కేంద్ర మంత్రులు సైతం పాల్గొంటారని, కొత్త చట్టాల గురించి ప్రజలకు సవివరంగా తెలియజేస్తారని, సందేహాలను నివృత్తి చేస్తారని బీజేపీ వర్గాలు చెబుతున్నాయి. గ్రామీణ ప్రాంతాల్లో రచ్చబండ కార్యక్రమాలను ఏర్పాటు చేయనున్నట్లు వెల్లడించాయి. కొత్త చట్టాలకు వ్యతిరేకంగా అన్నదాతల ఆందోళన ఉధృతం అవుతుండడం, ప్రతిపక్షాలు సైతం ఒక్కతాటిపైకి వస్తుండడంతో బీజేపీ అప్రమత్తమైంది. సాగు చట్టాలపై ప్రజల్లో నెలకొన్న అపోహలు తొలగించి, వాస్తవాలను వివరించాలని నిర్ణయానికొచ్చింది. ఇప్పటికే ఈ చట్టాల ప్రయోజనాలపై ప్రధాని సహా పార్టీ నేతలు పలుమార్లు ప్రజలకు వివరణలు ఇచ్చారు. సాగు చట్టాల విషయంలో ప్రతిపక్షాలు అసత్య ప్రచారం చేస్తూ రైతులను రెచ్చగొడుతున్నాయని బీజేపీ నేతలు మండిపడుతున్నారు.


 కావలి: సుప్రీంకోర్టు ఉత్తర్వులను ఉల్లఘించి మున్సిపల్ చైర్‌పర్సన్‌గా బాధ్యతలు ఎలా తీసుకుంటారని అలేఖ్యకు, ఆమెను ఆ పదవిలో ఎలా ఉండనిచ్చారని మున్సిపల్ కమిషనర్ భానుప్రతాప్‌కు సోమవారం కోర్టు ధిక్కారణ నోటీసులను జారీ చేసింది. వైఎస్సార్‌సీపీ నుంచి 13 వార్డు కౌన్సిలర్‌గా పి.అలేఖ్య, 3వ వార్డు నుంచి పోటీచేసిన తోట వెంకటేశ్వరావులు మున్సిపల్ చైర్‌పర్సన్ ఎన్నికల్లో వైఎస్సార్‌సీపీ విప్‌ను ధిక్కరించి టీడీపీలో చేరారు.
 
 మున్సిపల్ చైర్‌పర్సన్‌గా అలేఖ్య ఎన్నికయ్యారు. దీనిపై వైఎస్సార్‌సీపీ వర్గీయులు ఎన్నికల ప్రిసైడింగ్ ఆఫీసర్‌కు పిర్యాదు చేశారు. తర్వాత హైకోర్టు సింగిల్ బెంచ్ ఉత్వర్వుల మేరకు అలేఖ్య, తోట వెంకటేశ్వరావులపై ఎన్నికల ప్రిసైడింగ్ ఆఫీసర్ అనర్హత వేటు వేశారు. ఆ ఉత్వర్వులపై అలేఖ్య, తోట వెంకటేశ్వర్లు హైకోర్టు డివిజన్ బెంచ్‌ను ఆశ్రయించి స్టే తెచ్చుకున్నారు. ఆస్టేను డిసెంబర్‌లో హైకోర్టు ఫుల్ బెంచ్ నిలుపదల చేసి అనర్హత వేటును కొనసాగిస్తూ ఉత్తర్వులు ఇచ్చింది.
 
 అయితే దీనికి సంబంధించి మరలా నోటీసులు జారీ చేసి విచారణ జరిపి నివేదికను ఇవ్వాలని కావలి ఆర్డీఓ, ఎన్నికల ప్రిసైడింగ్ ఆఫీసర్‌కు ఉత్వర్వులిచ్చింది. తర్వాత అలేఖ్య, తోట వెంకటేశ్వరావులు సుప్రీంకోర్టును ఆశ్రయించారు. జనవరిలో దీనికి సంబంధించి అనర్హత వేటుపై మరలా విచారణను చేపట్టాలన్న ఆర్డీఓ ఉత్తర్వులపై మాత్రమే స్టేను విధిస్తూ సుప్రీం కోర్టు ఉత్వర్వులు ఇచ్చినట్లు వైఎస్సార్‌సీపీ నేతలు చెబుతున్నారు. కానీ జనవరి 26న మున్సిపల్ చైర్‌పర్సన్‌గా అలేఖ్య బాధ్యతలు స్వీకరించారు.
 
 ఆసమయంలో మున్సిపల్ కమిషనర్ భానుప్రతాప్ కూడా అక్కడ ఉన్నారు. ఈ నేపథ్యలో కోర్టు ఉత్తర్వులను ఉల్లఘించారంటూ వైఎస్సార్‌సీపీ నేతలు సుప్రీంను ఆశ్రయించారు. దీనిపై కోర్టు ఉత్తర్వులను ధిక్కారిస్తూ బాధ్యతలు ఎలా స్వీకరించారు..? దానిపై రెండు వారాల్లో వివరణ ఇవ్వాలని సుప్రీంకోర్టు ఉత్తర్వులను జారీ చేసిందని వైఎస్సార్‌సీపీ సేవాదళ్ రాష్ట్ర సంయుక్త కార్యదర్శి కేతిరెడ్డి జగదీశ్వర్‌రెడ్డి తెలిపారు. మున్సిపల్ కమిషనర్ భానుప్రతాప్ మాత్రం సుప్రీం ఉత్వర్వులపై న్యాయ సలహాను తీసుకున్నామని చెబుతున్నారు.