సాక్షి, సిటీబ్యూరో: ముఖ్యమంత్రి రాక కోసం..కట్టుదిట్టమైన భారీ భద్రత. చీమ చిటుక్కుమన్నా వెంటనే తెలిసేలా సాంకేతిక పరిజ్ఞానం వినియోగం. అడుగడుగునా పోలీసుల మోహరింపు.అయినా..మంగళవారం గన్‌పార్క్‌ వద్ద.. ఒక్క సారిగా కలకలం రేగింది. తెలంగాణ రాష్ట్ర అవతరణ ఉత్సవం సందర్భంగా గన్‌పార్క్‌లో అమరవీరుల స్థూపం వద్ద నివాళి అర్పించి తిరిగి వెళుతున్న సీఎం కేసీఆర్‌ వాహనాన్ని జీహెచ్‌ఎంసీ ఉద్యోగి రూపంలో వేచి ఉన్న హన్మంతునాయక్‌ అనే యువకుడు అడ్డుకున్న తీరు ఒక్కసారిగా ఉలిక్కిపడేలా చేసింది. నల్లగొండ జిల్లా దేవరకొండ సమీపంలోని చింతచెట్టుతండాకు చెందిన హన్మంతునాయక్‌(28) డిగ్రీ పూర్తి చేసి ఒకసారి ఎస్‌ఐ పరీక్షలకు కూడా హాజరయ్యాడు. (సీఎంకు కానుకగా తెలంగాణ యాపిల్‌ తొలి కాత.. ) గత మూడునెలలుగా జీహెచ్‌ఎంసీ డిజాస్టర్‌ రెస్పాన్స్‌ ఫోర్స్‌లో ఔట్‌సోర్సింగ్‌ పద్ధతిన డ్రైవర్‌గా చేరి విధులు నిర్వహిస్తున్నాడు. కరోనా కారణంగా చాలాకాలంగా సెలవులో ఉన్న హన్మంతు వారం క్రితమే విధుల్లో చేరి, ఈ రోజు ఉదయం ఆఫీసుకు వెళ్లి సంతకం పెట్టి అధికారులకు తెలియకుండానే గన్‌పార్క్‌కు చేరుకున్నాడు. అయితే సీఎం రాక సందర్భంలో వర్షం వస్తే ఆయనకు గొడుకుపట్టే నిమిత్తం ఇద్దరు జీహెచ్‌ఎంసీ సిబ్బందిని కూడా అందుబాటులో ఉంచటంతో వారి పక్కనే హన్మంతు వెళ్లి నిల్చుని సీఎం కోసం వెయిట్‌ చేశాడు. సీఎం నివాళి అర్పించి వాహనంలో ఎక్కి కూర్చున్న తర్వాత వాహనం పది మీటర్ల దూరం ప్రయాణించి అసెంబ్లీ వైపు మళుతున్న సమయంలో హఠాత్తుగా ‘ఉద్యోగం, డబుల్‌ బెడ్రూం ఇల్లు కావాలి’ అంటూ అరుస్తూ ...వాహనానికి అడ్డంపడిపోయాడు. ఊహించని పరిణామంతో క్షణం పాటు తత్తరపాటుకు గురైన సిబ్బంది హన్మంతును పక్కకు లాగి సీఎం వాహనాన్ని ముందుకు పంపారు. స్వగ్రామంలో టీఆర్‌ఎస్‌ కార్యకర్తే... ఎల్బీనగర్‌లోని బీఎన్‌రెడ్డి నగర్‌లో నివాసం ఉంటున్న హన్మంతుకు భార్య, ముగ్గురు పిల్లలున్నారు. స్వగ్రామంలో ఆయన టీఆర్‌ఎస్‌ కార్యకర్తగా పనిచేశారు. అయితే ప్రభుత్వ ఉద్యోగం, సొంత ఇళ్లు కావాలంటూ హన్మంతు ఏకంగా సీఎం కాన్వాయ్‌నే అడ్డుకోవటంతో ఉన్న ఉద్యోగం కూడా ఊడే పరిస్థితి నెలకొంది. హన్మంతును అదుపులోకి తీసుకున్న పోలీస్‌లు అతన్ని సుదీర్ఘంగా ప్రశిస్తున్నారు. రాత్రి వరకూ కేసు నమోదు చేయలేదు. జీహెచ్‌ఎంసీ అధికారులు సైతం అతన్ని తొలగిస్తున్నట్లు కూడా ప్రకటన చేయకుండా ఉన్నత స్థాయి నుంచి వచ్చే ఆదేశాల కోసం ఎదురుచూస్తున్నారు. మొత్తంగా మంగళవారం  యంత్రాంగాన్ని కలవరపాటుకు గురి చేసిన ఈ ఘటనలో పోలీస్‌ల భద్రతా వైఫల్యం కూడా కొట్టొచ్చినట్లు కనిపించింది.

సాక్షి, బెంగళూరు: ముఖ్యమంత్రి బీఎస్‌ యడియూరప్ప కాన్వాయ్‌లో ఒక వాహనం బోల్తా పడగా డ్రైవర్‌ గాయపడ్డాడు. మంగళవారం ఉదయం 11 గంటల సమయంలో సీఎం యడి యూరప్ప, ఆయన కార్యదర్శి సెల్వకుమార్‌ తుమకూరు బయలుదేరారు. సీఎం యడియూరప్పతో పాటు సెల్వకుమార్‌ ఒకే కారులో కూర్చున్నారు. సెల్వకుమార్‌కు చెందిన ఇన్నోవా కారు వారి వెనుక ఖాళీగా వస్తోంది. యశవంతపుర ఉపరితల వంతెనపై అతివేగంతో వచ్చి అదుపు తప్పి డివైడర్‌ను ఢీకొని అవతలి వైపు రోడ్డులో వెళ్తున్న క్యాంటర్, ఆటోను ఢీకొంది. ప్రమాదంలో ఇన్నోవా డ్రైవర్‌ వినయ్‌తో పాటు ఇతర వాహనాల్లో మరో ఇద్దరికి గాయాలయ్యాయి. వారిని చికిత్స నిమిత్తం ఆస్పత్రికి తరలించారు. ఇన్నోవా ముందుభాగం నుజ్జునుజ్జయింది. ఎయిర్‌బ్యాగు తెరచుకోవడంతో డ్రైవర్‌ గాయాలతో బయటపడ్డాడు. అయితే అతి వేగం కారణంగానే వాహనం అదుపు తప్పి బోల్తా పడిందని పోలీసులు తెలిపారు. సీఎం యథావిధిగా తుమకూరు వెళ్లిపోయారు. ప్రమాదంతో అరగంట పాటు వాహనాల రాకపోకలకు అంతరాయం ఏర్పడింది.  ఫ్లై ఓవర్‌పై స్తంభించిన ట్రాఫిక్‌

పట్నా/బక్సార్‌: బిహార్‌ సీఎం నితీశ్‌ కుమార్‌ కాన్వాయ్‌పై గుర్తు తెలియని వ్యక్తులు రాళ్ల దాడికి పాల్పడ్డారు. వికాస్‌ సమీక్షా యాత్రలో భాగంగా ఆయన శుక్రవారం బక్సార్‌ జిల్లా డుమ్రావ్‌ వైపు వెళ్తుండగా నందన్‌ గ్రామం దగ్గర్లో దళితవాడలో తాము పడుతున్న ఇబ్బందులను గమనించేందుకు రావాలని కేకలు వేస్తూ కొందరు సీఎం వాహన శ్రేణిపైకి రాళ్లు విసిరారు. ఈ ఘటనలో సీఎంసహా ఎవరూ గాయపడలేదు. రాళ్లను ఎవరు, ఎందుకు విసిరారో తెలియాల్సి ఉంది. కొందరు కావాలనే ఇలాంటి ఘటనలకు పాల్పడుతున్నారంటూ అధికార జేడీయూ.. ఆర్జేడీపై విమర్శలు చేసింది. 


 మెట్‌పల్లి : మంత్రి ఈటల రాజేందర్‌ కాన్వాయ్‌లో ఉన్న టీఆర్‌ఎస్‌ నాయకుల కార్లు ఒకదానికొకటి ఢీకొన్నాయి. ఎస్సారెస్పీ నీటిని విడుదల చేయడానికి మంత్రి బుధవారం ఉదయం బయలు దేరారు. కాన్వాయ్‌ మెట్‌పల్లికి చేరుకోగానే అందులోని ఒక డ్రైవర్‌ ఆకస్మాత్తుగా బ్రేక్‌ వేసి వాహనాన్ని ఆపాడు. దీంతో దాని వెనుక ఉన్న నాలుగు కార్లు ఒకదానికొకటి ఢీకొన్నాయి. ఈ సంఘటనలో కార్లు పాక్షికంగా దెబ్బతిన్నాయి. వాహనాల్లో ఉన్న నాయకులకు ఎలాంటి ప్రమాదం జరగలేదు.