మాస్కో: రష్యా ఐలాండ్‌ సఖాలిన్‌లో ఘోర ప్రమాదం జరిగింది. ఐదు అంతస్తుల అపార్ట్‌మెంట్‌లోని ఓ బ్లాక్‌ కుప్పకూలింది. ఈ ఘటనలో 9 మంది దుర్మరణం చెందారు. మరొకరు శిథిలాల కింద చిక్కుకున్నారు. అధికారులు అత్యవసర సేవలు చేపట్టారు. మిగిలిన వ్యక్తిని కనిపెట్టే పనిలో నిమగ్నమయ్యారు. అయితే అపార్ట్‌మెంట్‌లోని బ్లాక్‌లో 20 లీటర్ల వంటగ్యాస్ సిలిండర్ పేలడం వల్లే ఈ ప్రమాదం సంభవించినట్లు అధికారులు ప్రాథమిక అంచనాకు వచ్చారు. ఈ ఘటనపై విచారణ చేపట్టినట్లు తెలిపారు. చదవండి: ప్రపంచాన్ని ఆశ్చర్యంలో ముంచెత్తిన కిమ్‌!

కీవ్‌: రష్యా శనివారం రాత్రి ఉక్రెయిన్‌పై జరిపిన రాకెట్‌ దాడిలో 15 మంది చనిపోయారు. రాకెట్‌ దాడితో డొనెట్‌స్క్‌ ప్రావిన్స్‌ చాసివ్‌ యార్‌ పట్టణంలోని అపార్టుమెంట్‌ కుప్పకూలింది. శిథిలాల కింద మరో 20 మంది చిక్కుకుని ఉంటారని అధికారులు చెబుతున్నారు. దాడులకు రష్యా విరామం పాటిస్తుందని భావిస్తున్న క్రమంలో తాజా ఘటన చోటుచేసుకోవడం గమనార్హం. జూన్‌ 21వ తేదీన క్రెమెన్‌చుక్‌లోని షాపింగ్‌ మాల్‌పై రష్యా జరిపిన క్షిపణి దాడిలో 19 మంది మృత్యువాతపడిన విషయం తెలిసిందే. సైనిక సంబంధ లక్ష్యాలపైనే దాడులు చేపడుతున్నట్లు చెప్పుకుంటున్న రష్యా తాజా ఘటనపై ఎటువంటి ప్రకటన చేయలేదు. రష్యా అనుకూల వేర్పాటు వాదుల ప్రాబల్యమున్న డోన్బాస్‌ ప్రాంతంలోని లుహాన్‌స్క్‌ ప్రావిన్సుపై పట్టు సాధించిన రష్యా బలగాలు మరో ప్రావిన్స్‌ డొనెట్‌స్క్‌లో పాగానే లక్ష్యంగా కదులుతున్నాయి. ఇలా ఉండగా, ఎటువంటి పోరాట నైపుణ్యం లేని ఉక్రెయిన్‌ పౌరులతో కూడిన మొదటి బృందం బ్రిటన్‌కు చేరుకుంది. మొత్తం 10 వేల మందికి శిక్షణ ఇవ్వడమే లక్ష్యమని యూకే తెలిపింది.  

కర్ణాటక,శివాజీనగర: బెంగళూరులో ఒక భవనం క్షణాల్లో కుప్పకూలింది. మంగళవారం రాత్రి 9:15 గంటల సమయంలో ఈ సంఘటన జరిగింది. అందరూ చూస్తూ ఉండగానే పేకమేడలా నేలరాలింది. ప్రమాదాన్ని ఊహించి జనం ముందే భవనాన్ని ఖాళీ చేయడంతో పెద్ద గండం తప్పినట్లయింది.  వివరాల్లోకి వెళితే.. నగరం నడిబొడ్డున ఎస్‌సీ రోడ్డు, కపాలి థియేటర్‌ వెనుకభాగంలో ఈ సంఘటన చోటుచేసుకుంది. థియేటర్‌ను కూల్చి కొత్త భవనం నిర్మాణ పనులు చేపట్టారు. పక్కనే నాలుగు అంతస్తుల భవనం ఉండగా దానిని లాడ్జ్, హోటల్‌గా ఉపయోగించేవారు. ఇటీవల భారీ వర్షాలు కురవడం, భవనం సమీపంలోనే కొత్త కట్టడానికి తవ్వకాలు జరుగుతుండడంతో ఈ పాత భవంతి కూలినట్లు భావిస్తున్నారు.  ఈ సంఘటనను కొందరు స్థానికులు తమ మొబైల్‌ఫోన్లలో చిత్రీకరించగా, వైరల్‌ అయ్యింది. అదృష్టవశాత్తు ప్రమాద సమయంలో భవనంలో ఎవరూ లేకపోవడంతో ప్రాణనష్టం తప్పింది. పక్క భవనం ఇంజనీర్‌ ముస్తఫాను పోలీసులు అరెస్ట్‌ చేసినట్లు తెలిసింది. మేయర్‌ గౌతంకుమార్‌ జైన్‌  పరిశీలించారు.   


 తైవాన్: 'నేను నా భార్యకోసం చూస్తున్నాను. ఆమెను గుర్తించేవరకు అలసిపోను' ఇవి తైవాన్లో భూకంపం బారినపడి కుప్పకూలిపోయిన భవంతి శిథిలాలకింద తన భార్యను గాలిస్తున్న ఓ వ్యక్తి మాటలు. తైవాన్ లో భారీ భూకంపం సంభవించి ఓ పెద్ద భవనం కుప్పకూలిన విషయం తెలిసిందే. ఈ భవనం శిథిలాలను తొలగించేందుకు సహాయక చర్యలు కొనసాగుతున్నాయి. ఆదివారం కొన ప్రాణంతో తల్లడిల్లుతున్న ఓ వ్యక్తిని సురక్షితంగా బయటకు తీశారు. అతడిని వెంటనే ఆస్పత్రికి తరలించారు. మరో 130మంది శిథిలాల కిందే ఉన్నట్లు అధికారులు అనుమానిస్తున్నారు.
 
 24గంటలుగా సహాయక చర్యలు ముమ్మరంగా సాగుతున్నాయి. ఆదివారం హువాంగ్ కువాంగ్ వెయ్ అనే వ్యక్తిని బయటకు తీశారు. అగ్నిమాపక సిబ్బంది, పోలీసులు, సైనికులు, స్వచ్ఛంద సేవకులు, స్థానికులు శిథిలాలను తొలగించే పనుల్లో నిమగ్నమయ్యారు. సహాయక చర్యల్లో పాల్గొన్న ఓ వ్యక్తి ఉద్వేగంగా మాట్లాడుతూ'ఆమె నా ఫోన్ కాల్స్ కు స్పందించడంలేదు. నేను నా ఎమోషన్స్ను నిలువరించుకొని స్తిమితంగా ఉండేందుకు ప్రయత్నిస్తున్నాను. ఆమెను గుర్తించేవరకు నేను పోరాడుతునే ఉంటాను' అని తన భార్యను శిథిలాల కింద కోల్పోయిన ఓ వ్యక్తి భావోద్వేగంతో అన్నాడు.