న్యూఢిల్లీ: గ్రామీణ ప్రాంత ప్రజలకు బ్యాంకింగ్‌ సేవలను మరింత చేరువ చేసేందుకు హెచ్‌డీఎఫ్‌సీ బ్యాంకు ప్రణాళికను సిద్ధం చేసింది. అందులో భాగంగా తన బ్యాంకింగ్‌ కరస్పాండెట్ల సంఖ్యను రెట్టింపు చేయాలని యోచిస్తోంది. దేశంలో మారుమూల ప్రాంతాల్లో ఉన్న ప్రతి కస్టమర్‌కు ఉత్తమ బ్యాంకింగ్‌ సేవలను అందించేందుకు ప్రయత్నిస్తున్నట్లు హెచ్‌డీఎఫ్‌సీ బ్యాంక్‌ సీనియర్‌ అధికారి సమిత్‌ భగత్‌ పేర్కొన్నారు. ప్రస్తుతం పనిచేస్తున్న 11వేల మంది కరస్పాండెట్లకు మరో అదనంగా 14వేల మందిని నియమిస్తామని తెలిపారు. ఇక గ్రామీణ ప్రాంతాల్లోని వారు కొత్త ఖాతాను తెరవడం, ఫిక్స్‌డ్‌ డిపాజిట్లు చేయడం, పేమెంట్‌ ప్రొడెక్ట్‌లు, లోన్‌ క్లోజింగ్‌ లాంటి సదుపాయాలను ఇంటి వద్ద నుంచే పొందవచ్చని ఆమె వివరించారు. అలాగే కరస్పాండెంట్ల వ్యవస్థను మరింత బలపరించేందుకు, విస్తరించేందుకు ప్రభుత్వ కామన్‌ సర్వీసు సెంటర్లతో ఒప్పందాన్ని కుదుర్చుకునే యత్నాలు చేస్తున్నట్లు ఆమె తెలిపారు.  

సాక్షి, హైదరాబాద్‌: రైల్వేకు, సరుకు రవాణాదారుకు మధ్య పరస్పర సహకారం కొనసాగితే గతేడాది సాధించిన రికార్డుకంటే మెరుగైన ఫలితం సాధించే అవకాశం ఉంటుందని దక్షిణ మధ్య రైల్వే జీఎం గజానన్‌ మాల్యా ఆశాభావం వ్యక్తం చేసారు. దక్షిణ మధ్య రైల్వే 2018–19 ఆర్థిక సంవత్సరానికిగాను భారతీయ రైల్వే లోని అన్ని జోన్‌లకంటే ఉత్తమ స్థాయిలో సరుకు రవాణా చేసిన రికార్డును పురస్కరించుకొని సరుకు రవాణాలో క్రియాశీలక భాగస్వామ్యంగా ఉన్న పరిశ్రమల అధికారు లు, ప్రతినిధులు, ఇతర కంపెనీలను గురువారం సికింద్రాబాద్‌ రైల్‌నిలయంలో సన్మానించింది. జీఎం మాట్లాడుతూ జోన్‌లోని అధికారులు, సరుకు వినియోగదారు మధ్య విశ్వసనీయ సంబంధాలు, సమర్థవంతమైన కార్యాచరణ అమలు చేయడం, అందుబాటులోని గూడ్స్‌ వ్యాగన్ల వినియోగంతో సరుకు రవాణాలో అత్యధిక రికార్డు సాధించిందన్నారు. వినియోగదారుల ప్రతిస్పందన విలువైందని, వాటిని రైల్వే పరిగణనలోనికి తీసుకుంటుందని అన్నారు. గణనీయ స్థాయిలో సరుకు రవాణా సామర్థ్యాన్ని పెంచే కొత్త మార్గాలైన, డబ్లింగ్‌/ట్రిప్లింగ్‌ మార్గాలు, విద్యుదీకరణ వంటి మౌళిక సదుపాయాల గురించి వివరించారు. జోన్‌ చేసిన సరుకు రవాణాలో ఎరువు, ఐరన్‌ వోర్, ఆహార ధాన్యాలే కాకుండా బొగ్గు (55%), సిమెంట్‌ (23%) తొలి 2 స్థానాల్లో నిలిచాయని అన్నారు. బొగ్గు ఉత్పత్తి సంస్థల్లో సింగరేణి, విద్యుత్‌ ఉత్పత్తి కంపెనీల అవసరాలు తీరుస్తూ మొత్తం సరుకు రవాణాలో 39%, కేవలం బొగ్గు రవాణాలో 71% నమోదు చేసిందన్నారు. సమావేశంలో సీఎండీ ప్రభాకరరావు, ఏపీ జెన్‌కో చైర్మన్‌ అజయ్‌ జైన్, సింగరేణి కంపెనీ ఎలక్ట్రికల్‌ మెకానికల్‌ డెరైక్టర్‌ ఎస్‌.శంకర్‌ పాల్గొన్నారు.   


 నూనెపల్లె: బ్యాంక్‌ కరెస్పాండెంట్లతో (బీసీ) గ్రామీణ ప్రాంతాల  ప్రజలకు బ్యాంకింగ్‌ సేవలు అందిస్తామని ఆంధ్రప్రగతి గ్రామీణ బ్యాంక్‌ రీజనల్‌ మేనేజర్‌ జి. శివశంకర్‌ రెడ్డి తెలిపారు. స్థానిక నేషనల్‌ బీఎడ్‌ కళాశాలలో సోమవారం నంద్యాల రీజియన్‌ బ్యాంక్‌ కరెస్పాండెంట్లకు ఏపీజీబీ కడప ప్రాంతీయ కార్యాలయ మేనేజర్‌ రాజేశ్వరరెడ్డి అధ్యక్షతన బ్యాంక్‌ లావాదేవీలపై శిక్షణా శిబిరం నిర్వహించారు. ఈ సందర్భంగా శివశంకర్‌ రెడ్డి మాట్లాడుతూ బ్యాంక్‌ సేవలు అందాలంటే బీసీలే కీలకం అన్నారు.   ఇప్పటికే రుణాల రికవరీలు, నోటీసుల జారీ తదితర బాధ్యతలు వారికి అప్పగించామని చెప్పారు. అనంతరం క్యాస్‌లెస్‌ లావాదేవీలు సాగించిన బీసీలను సత్కరించారు. సమావేశంలో ఏపీజీబీ కార్యాలయ సీనియర్‌ మేనేజర్‌ రవిమోహన్, మేనేజర్లు మద్దిలేటి, సుల్తానా, టెక్నీషియన్లు రవిప్రకాష్, భాస్కర్,  పాల్గొన్నారు.