న్యూఢిల్లీ: భారత్‌సహా 100కు పైగా దేశాలు రాబోయే కొన్ని దశాబ్దాల్లో అధిక ఆదాయ దేశాలుగా అవతరించడంలో తీవ్ర అవరోధాలను ఎదుర్కొంటున్నాయని ప్రపంచబ్యాంక్‌ నివేదిక ఒకటి పేర్కొంది. అమెరికా తలసరి ఆదాయంలో పావుశాతానికి చేరుకోవడానికి భారత్‌కు దాదాపు మరో 75 ఏళ్లు పట్టవచ్చని కూడా నివేదిక విశ్లేషించింది. చైనా విషయంలో 10 సంవత్సరాలు, ఇండోనేషియా విషయంలో 70 సంవత్సరాలు పడుతుందని కూడా నివేదిక పేర్కొంది. ‘వరల్డ్‌ డెవలప్‌మెంట్‌ రిపోర్ట్‌ 2024: ది మిడిల్‌ ఇన్‌కమ్‌ ట్రాప్‌’ అనే శీర్షికన వెలువరించిన నివేదికలో కొన్ని ముఖ్యాంశాలు.. → అమెరికా తలసరి ఆదాయం (నామినల్‌) ప్రస్తుతం దాదాపు 80,000 డాలర్లు ఉంటే, భారత్‌ విషయంలో ఈ విలువ దాదాపు 2,500 డాలర్లు. → 2023 చివరి నాటికి 1,136 డాలర్ల నుంచి 13,845 డాలర్ల మధ్య తలసరి కలిగిన 108 ప్రధాన దేశాలను పరిశీలిస్తే 600 కోట్ల ప్రజలు నివసిస్తున్నారు. ప్రపంచ జనాభాలో వీరు 75 శాతం. ఈ దేశాల్లో ప్రతి ముగ్గురిలో ఇద్దరు తీవ్ర పేదరికంలో నివసిస్తున్నారు. → మున్ముందు ఆయా దేశాలు గతం కంటే కఠినమైన సవాళ్లను ఎదుర్కొనే అవకాశం ఉంది. వేగంగా పెరుగుతున్న వృద్ధాప్య జనాభా, పెరుగుతున్న రుణాలు, తీవ్రమైన భౌగోళిక, రాజకీయ, వాణిజ్య ఘర్షణలు అలాగే పర్యావరణానికి హాని కలిగించకుండా ఆర్థిక పురోగతిని వేగవంతం చేయడంలో పెరుగుతున్న కష్టాల వంటివి ఇక్కడ ముఖ్యమైనవి. → ఇంకా అనేక మధ్య–ఆదాయ దేశాలు ఇప్పటికీ గత దశాబ్ద కాల అనుభవాలతో పురోగతికి ప్రణాళికలను రూపొందించుకుంటున్నాయి. ప్రధానంగా పెట్టుబడిని విస్తరించేందుకు రూపొందించిన విధానాలపై ఆధారపడి ఉన్నాయి. ఇది కేవలం మొదటి గేర్‌లో కారును నడపడం, దానిని వేగంగా వెళ్లేలా చేయడానికి ప్రయతి్నంచడం వంటిది. – ఇదే పరిస్థితి కొనసాగితే, చాలా అభివృద్ధి చెందుతున్న దేశాలు ఈ శతాబ్దం మధ్య నాటికి తగిన సంపన్న సమాజాలను సృష్టించే రేసును కోల్పోతాయని ప్రపంచ బ్యాంక్‌ గ్రూప్‌ చీఫ్‌ ఎకనామిస్ట్, డెవలప్‌మెంట్‌ ఎకనామిక్స్‌ సీనియర్‌ వైస్‌ ప్రెసిడెంట్‌ ఇండెరి్మట్‌ గిల్‌ అన్నారు. → అధిక అధిక ఆదాయ స్థితికి చేరుకోవడానికి దేశాలు వాటి పరిస్థితులకు అనుగుణంగా క్రమక్రమంగా మరింత అధునాతన విధానాలను అవలంబించవలసి ఉంటుంది. → 1990 నుండి కేవలం 34 మధ్య–ఆదాయ ఆర్థిక వ్యవస్థలు మాత్రమే అధిక–ఆదాయ స్థితికి మారాయి. వాటిలో దాదాపు 10 దేశాలు యూరోపియన్‌ యూనియన్‌ ఏకీకరణ నేపథ్యంలోనో లేక ముందే ఆయా దేశాల్లో కనుగొన్న చమురు క్షేత్రాల నుంచి ప్రయోజనం పొందడం కారణంగానో అధిక ఆదాయ దేశాలుగా మారగలిగాయి.ఎకానమీలో భారత్‌ ఐదవ స్థానం అయినా... 25.5 ట్రిలియన్‌ డాలర్లతో అమెరికా ప్రస్తుతం ప్రపంచంలో అతిపెద్ద ఎకానమీగా కొనసాగుతోంది. ప్రపంచం మొత్తం జీడీపీలో పావుశాతం వాటాను కలిగి ఉంది. ఇక 17.9 శాతం ప్రపంచ జీడీపీ వాటాతో 18 ట్రిలియన్‌ డాలర్ల ఎకానమీగా చైనా రెండవ స్థానంలో ఉంది. తరువాతి స్థానాల్లో జపాన్‌ (4.2 ట్రిలియన్‌ డాలర్లు), జర్మనీ (4 ట్రిలియన్‌ డాలర్లు)లు ఉన్నాయి. కాగా, 2022 నాటికి భారత్‌ ఎకానమీ బ్రిటన్, ఫ్రాన్స్‌ను అధిగమించగా, త్వరలో జర్మనీని అధిగమించే అవకాశం ఉందన్న అంచనాలు ఉన్నాయి. ప్రస్తుత దేశ ఎకానమీ విలువ 3.6 ట్రిలియన్‌ డాలర్లు. ఐదవ అతిపెద్ద ఆర్థిక వ్యవస్థగా ఉన్నప్పటికీ తలసరి ఆదాయంలో దేశం చాలా వెనుకబడి ఉంది. అభివృద్ధి చెందిన దేశమంటే...ప్రస్తుతం భారత్‌ తలసరి ఆదాయం దాదాపు 2,500 డాలర్లు. 2031 ఆర్థిక సంవత్సరం భారత్‌ తలసరి ఆదాయం 4,500 డాలర్లకు పెరగాలన్నది లక్ష్యం. ఇదే జరిగితే దేశం ఎగువ మధ్య–ఆదాయ దేశాల క్లబ్లో ప్రవేశిస్తుంది. ప్రస్తుతం అనుసరిస్తున్న ఆర్థిక సూత్రాల ప్రకారం... తలసరి ఆదాయం 1,036 డాలర్ల నుంచి 4,045 డాలర్ల మధ్య ఉన్న దేశాన్ని దిగువ మధ్య తరగతి ఆదాయ దేశంగా పరిగణిస్తారు. 4046 డాలర్ల నుంచి 12,535 డాలర్ల మధ్య ఆదాయ దేశాలను ఎగువ మధ్య తరగతి ఆదాయ దేశాలుగా పేర్కొంటారు. ఆ స్థాయి ఆదాయం దాటితే అది అభివృద్ధి చెందిన దేశంగా మారుతుంది.

ప్రపంచవ్యాప్తంగా ఖర్జూరాన్ని ఇష్టంగా  తినేవారి సంఖ్య అధికంగానే ఉంది. రంజాన్ మాసంలో ఖర్జూరానికి డిమాండ్ మరింత పెరుగుతుంది. ఇది ఆరోగ్యానికి  ఎంతో మేలు చేస్తుందని చెబుతారు. ఇది మన శరీరానికి శక్తిని అందిస్తుంది. ఉపవాసం ఉండేవారికి తగిన బలాన్ని అందిస్తుంది. ఖర్జూరం తినడం వల్ల జీర్ణవ్యవస్థ మెరుగ్గా పనిచేస్తుంది. రంజాన్‌ మాసంలో ఉపవాసం ఉండేవారు ఖర్జూరంతో ఉపవాసాన్ని విరమించడానికి ఇదే ప్రధాన కారణం.  అయితే మన తినే ఖర్జూరాలు ఏ దేశం నుండి వచ్చాయనేది చాలా కొద్దిమందికి మాత్రమే తెలుసు.  అలాగే ఏ దేశం అత్యధికంగా ఖర్జూరాన్ని ఉత్పత్తి చేస్తుందనేది కూడా చాలామందికి తెలియదు. ఆ విషయాలు ఇప్పుడు తెలుసుకుందాం. ముస్లిం దేశాలు అత్యధికంగా ఖర్జూరాన్ని ఉత్పత్తి చేస్తాయి.  ప్రపంచంలోనే అత్యధికంగా ఖర్జూరాన్ని ఉత్పత్తి చేసే దేశం ఈజిప్ట్‌. ఈ దేశంలో ఏడాదికి దాదాపు 1,733,432 టన్నుల ఖర్జూరాన్ని ఉత్పత్తి చేస్తారు. ఖర్జూరం ఉత్పత్తిలో సౌదీ అరేబియా రెండవ స్థానంలో ఉంది. ఇక్కడ ఏడాదికి 1,610,731 టన్నుల ఖర్జూరం ఉత్పత్తి అవుతుంది. ఏడాదిలో 1,247,403 టన్నుల ఖర్జూరాలు పండే అల్జీరియా ఈ జాబితాలో మూడో స్థానంలో ఉంది. నాల్గవ స్థానంలో ఇరాన్  ఉండగా, ఇక్కడ ఒక సంవత్సరానికి 1,030,459 టన్నుల ఖర్జూరం ఉత్పత్తి అవుతుంది. ఈ జాబితాలో పాకిస్తాన్ ఐదవ స్థానంలో ఉంది. ఇక్కడ ఏడాదికి 7,32,935 టన్నుల ఖర్జూరం పండుతుంది. ఈ దేశాల నుంచి విదేశాలకు ఖర్జూరాలు ఎగుమతి అవుతాయి. 


 పరిష్కారాలు కనుగొనడంలో భారత్ కీలక పాత్ర పోషించాలి
 - డిజిటల్ విప్లవంతో అవినీతికి చెక్
 - ప్రధాని నరేంద్ర మోదీ వ్యాఖ్యలు
 - డిజిటల్ ఇండియా వీక్ ప్రారంభం
 సాక్షి, న్యూఢిల్లీ: ప్రపంచ దేశాలకు ప్రస్తుతం సైబర్ యుద్ధాల నుంచి ముప్పు పొంచి ఉందని ప్రధాని నరేంద్ర మోదీ వ్యాఖ్యానించారు. ఈ నేపథ్యంలో ఈ ‘రక్తపాతరహిత యుద్ధాన్ని’ సమర్థంగా ఎదుర్కొనడాన్ని భారత ఐటీ నిపుణులు సవాలుగా స్వీకరించాలని, పరిష్కార మార్గాలను కనుగొనడంలో కీలక పాత్ర పోషించాలని ఆయన పిలుపునిచ్చారు.
 
 ఇందుకు కావాల్సిన సామర్థ్యం భారత ఐటీ రంగానికి ఉందని మోదీ చెప్పారు. బుధవారం ఇక్కడ డిజిటల్ ఇండియా వీక్‌ను ప్రారంభించిన సందర్భంగా ఆయన ఈ విషయాలు తెలిపారు. అవినీతిని అంతమొందించేందుకు, పారదర్శకమైన.. సమర్ధమంతమైన పాలన అందించేందుకు, పేద-ధనిక వర్గాల మధ్య వ్యత్యాసాలను రూపుమాపేందుకు దేశంలో డిజిటల్ విప్లవం రావాల్సిన అవసరం ఉందని మోదీ పేర్కొన్నారు. ఈ-గవర్నెన్స్ నుంచి ఎం-గవర్నెన్స్ దిశగా మళ్లాల్సి ఉంటుందన్నారు. ‘ఎం-గవర్నెన్స్ అంటే మోదీ గవర్నెన్స్ అని కాదు.
 
 మొబైల్ గవర్నెన్స్ అని అర్థం’ అంటూ ఆయన వ్యాఖ్యానించి నవ్వులు పూయించారు. భారత ఐటీ సామర్థ్యాలను కొనియాడిన మోదీ.. స్టార్టప్ సంస్థలు సాధిస్తున్న విజయాలను ప్రత్యేకంగా ప్రస్తావించారు. ఈ సం దర్భంగా భారత్‌నెట్, డిజిటల్ లాకర్, ఉపకారవేతనాల పోర్టల్, డిజిటల్ ఇండియా పుస్తకాన్ని ప్రధాని ఆవిష్కరించారు.  అరుణ్ జైట్లీ, రవి శంకర్ ప్రసాద్ తదితర మంత్రులతో పాటు పలువురు పారిశ్రామిక దిగ్గజాలు ఈ కార్యక్రమంలో పాల్గొన్నారు. పేదరికాన్ని రూపుమాపే దిశగా భారత్ 8-10 శాతం వృద్ధి రేటు సాధించాల్సిన అవసరం ఉందని ఆర్థిక మంత్రి అరుణ్ జైట్లీ ఈ సందర్భంగా చెప్పారు.
  
 సైబర్ నేరాలపై ఆందోళన..
 అంతకంతకూ పెరిగిపోతున్న సైబర్ నేరాలు ప్రపంచ దేశాలకు ఆందోళనకరంగా మారాయని మోదీ పేర్కొన్నారు. ‘పదో క్లాసో.. పన్నెండో క్లాసు చదువుకున్న వారు.. మనకు వేల కిలో మీటర్ల దూరంలో ఉండి కూడా జస్ట్ ఒక్క క్లిక్‌తో మన బ్యాంకు ఖాతాల్లో డబ్బును స్వాహా చేసేస్తున్నారు’ అని ఆయన చెప్పారు. ‘ప్రపంచంపై సైబర్ యుద్ధ మేఘాలు ఆవరించి ఉన్నాయి. దీనిపై ప్రపంచం ఆందోళనగా ఉంది. ఈ సమస్యను పరిష్కరించడంలో భారత్ చాలా కీలక పాత్ర పోషించాల్సి ఉంది. అయితే, వినూత్నమైన, విశ్వసనీయమైన పరిష్కార మార్గాలతో ప్రపంచాన్ని కాపాడగలిగే సత్తా భారత్‌కి ఉందా అన్న సందేహాలు ఉండొచ్చు. కానీ పుష్కలంగా టాలెంట్ ఉన్న భారత్ ఈ పని ఎందుకు చేయలేదు? కచ్చితంగా సాధించగలదు. మానవాళి మొత్తం ప్రశాంతంగా ఉండేలా చూసేందుకు మనం ఈ సవాలును ధైర్యంగా స్వీకరించాలి’ అని మోదీ ఉద్బోధించారు. దేశ భద్రతలో సైబర్ సెక్యూరిటీ కూడా భాగం కావాలని ఆయన చెప్పారు.
  
 డిజైన్ ఇన్ ఇండియా...
 దేశీయంగా ఎలక్ట్రానిక్స్ ఉత్పత్తుల తయారీని ప్రోత్సహించేందుకు అన్ని విధాలుగా తోడ్పాటు అందిస్తామని ప్రధాని చెప్పారు. స్టార్టప్ సంస్థలకు పూర్తి తోడ్పాటు అందిస్తామని, యువత కొంగొత్త ఆవిష్కరణలపై దృష్టి పెట్టాలని ఆయన సూచించారు. మేక్ ఇన్ ఇండియా నినాదం ఎంత ముఖ్యమో డిజైన్ ఇన్ ఇండియా కూడా అంతే ముఖ్యమైనదన్నారు. పారిశ్రామిక విప్లవాన్ని భారత్ అందుకోలేకపోయి ఉండొచ్చు గానీ.. ఐటీ విప్లవం విషయంలో వెనుకబడిపోదని మోదీ పేర్కొన్నారు.