సాక్షి, విజయవాడ : గెలుపోటముల మధ్య నిర్ణాయకంగా నిలిచే వ్యక్తుల్లో పోలింగ్‌ ఏజెంట్‌ ఒకరు. పోలింగ్‌ జరిగే సమయంలో ఏజెంట్‌ అనుక్షణం అప్రమత్తతోపాటు సమయస్ఫూర్తితో వ్యవహరించాలి. లేని పక్షంలో ప్రత్యర్థి పార్టీ ఏజెంట్‌ పరిస్థితిని తమకు అనుకూలంగా మలచుకొని పోలింగ్‌లో అక్రమాలకు తెరతీసే పెను ప్రమాదం ఉంది. పోలింగ్‌లో ఏజెంట్‌ పాత్ర కీలకంగా కాబట్టి ఏజెంట్లుగా ఉండే వారు చట్టబద్ధంగా వారు చేయవలసిన విధులపై పూర్తి అవగాహన కలిగి ఉండాలి. ఓటింగ్‌ యంత్రాల ద్వారా జరుగుతుంది కావున తాజాగా అమలులో ఉన్న  నియమ నిబంధనలు తెలుసుకోవాలి. ఏదైనా సందేహాలు ఉంటే అధికారిని అడిగి వాటిని నివృత్తి చేసుకోవాలి.  పోలింగ్‌ ఏజెంట్‌ అర్హతలు పోలింగ్‌ ఏజెంటుకు ఫలానా విద్యార్హతలు ఉండాలి అనే నిబంధన చట్టంలో లేదు. పోలింగ్‌ ఏజెంట్‌ స్థానికుడై ఉన్నందున ఆ బూత్‌లో నమోదైన ఓటర్లను గుర్తించే అవకాశం ఉంటుంది. దీని వలన దొంగ ఓట్లు పోలవకుండా అరికట్టడంలో పోలింగ్‌ సిబ్బందికి సహకరించవచ్చు. పోలింగ్‌ ఏజెంట్లుగా నియమితులైన వారు ఆ పోలింగ్‌ స్టేషన్‌ పరిధిలో నివాసితులై ఉండాలి. నిర్ణీత పోలింగ్‌ సమయానికి ఒక గంట ముందుగానే  పోలింగ్‌ స్టేషన్‌కు చేరుకోవాలి. దీని వలన పోలింగ్‌ ప్రక్రియకు సంబంధించి ప్రిసైడింగ్‌ అధికారి వివరించే ప్రాథమిక అంశాలను తెలసుకోవచ్చు. చట్ట పరంగా పోలింగ్‌ ఏజెంట్‌ ఫలానా సమయానికి హాజరు కావాలన్న నిబంధన లేదు. ఏజెంట్‌ ఎప్పుడు వచ్చినా ప్రిసైడింగ్‌ అధికారి పోలింగ్‌ కేంద్రంలోకి అనుమతించాల్సిందే. పోలింగ్‌ ఏజెంట్‌ వద్ద విధిగా ఉండాల్సిన మెటీరియల్‌ అధికారికంగా ధ్రువపరిచిన ఎన్నికల జాబితా కాపీని ఏజెంట్‌ పోలింగ్‌ స్టేషన్‌లోకి తీసుకెళ్లవచ్చు.  పోలింగ్‌ ప్రక్రియ పూర్తిగా ముగిసే వరకు ఏజెంట్‌గానీ రిలీఫ్‌ ఏజెంట్‌గానీ టిక్కులు పెట్టిన ఓటర్ల జాబితాను పోలింగ్‌ స్టేషన్‌ వెలుపలకు తీసుకెళ్లటం నిషిద్ధం. ఓటర్ల జాబితాలో ఓటు వేసిన లేదా ఓటువేయని వారి సీరియల్‌ నంబర్లను పేర్కొంటూ ఏజెంట్‌ వెలుపలకు స్లిప్పులు పంపించవచ్చు.   పోలింగ్‌ ఏజెంట్‌ తన నియామక పత్రాన్ని విధిగా ప్రిసైడింగ్‌ అధికారికి సమర్పించాలి. అలా సమర్పించటానికి ముందుగా అన్ని రకాలుగా చెక్‌ చేసుకోవాలి.  పోలింగ్‌ స్టేషన్‌లోకి ప్రవేశం పొందిన ఏజెంటుకు ప్రిసైడింగ్‌ అధికారి పాస్‌ అందజేస్తారు. దానిని వినియోగించుకొని ఏజెంట్‌ రాకపోకలు సాగింవచ్చు. పోలింగ్‌స్టేషన్‌ లేదా స్టేషన్‌కు 100 మీటర్ల పరిధిలో పార్టీ జెండాను సూచించే ఎలాంటి బ్యాడ్జి ఏజెంట్లు ధరించకూడదు. అభ్యర్థి పేరు మాత్రం కనిపించేలా బ్యాడ్జి కట్టుకోవచ్చు.   పోలింగ్‌ ఏజెంట్ల ప్రధాన విధులు పోలింగ్‌ స్టేషన్‌లో తనని నియమించిన అభ్యర్థి ప్రయోజనాలను కాపాడటమే ఏజెంట్‌ విధుల్లో అత్యంత ప్రధానమైనది. ఒకరికి బదులు మరొకరు దొంగ ఓట్లు వేయటానికి ప్రయత్నిస్తే వారి గుర్తింపును సవాల్‌ చేయవచ్చు.  దొంగ ఓటు వేసే వారిని ప్రిసైడింగ్‌ అధికారి వద్ద నిరూపించాలి. పోటీ చేసే ప్రతి అభ్యర్థి ప్రతి పోలింగ్‌ బూత్‌కు ఒక పోలింగ్‌ ఏజెంట్లను ఇద్దరు రిలీఫ్‌ ఏజెంట్లను నియమించుకోవచ్చు. ఎవరు పోలింగ్‌ స్టేషన్‌లో ఉంటారో వారే పోలింగ్‌ ఏజెంటుగా పరిగణించబడతారు.  రిలీఫ్‌ ఏజెంట్‌ అయినప్పటికీ పోలింగ్‌ కేంద్రంలో వారు విధుల్లో ఉన్నంతసేపు ఏజెంటుకు ఉండే హక్కులు, బాధ్యతలు ఉంటాయి. పోలింగ్‌ జరిగే రోజు మధ్యాహ్నం 3 గంటల తరువాత మాత్రం ఏ పోలింగ్‌ ఏజెంట్‌ పోలింగ్‌ స్టేషన్‌ను విడిచి వెళ్లటానికి అనుమతించరు. మధ్యాహ్నం 3 గంటల తరువాత రిలీఫ్‌ ఏజెంట్లను అనుమతించరు.


 నల్లజర్ల రూరల్, న్యూస్‌లైన్ : రాష్ట్ర వ్యాప్తంగా జరిగిన ఎంపీటీసీ, జెడ్పీటీసీ ఎన్నికల ఫలితాలు మం గళవారం వెలువడ్డాయి. ఎన్నికల్లో గెలుపొందిన అభ్యర్థులు గ్రామీణ ప్రాంతాల అభివృద్ధి, ప్రజా సంక్షేమ కోసం తమ విధులు, బాధ్యతలను నిర్వర్తించాల్సి ఉంటుంది.
  
  ఎంపీటీసీల విధులు, బాధ్యతలు
  ఎంపీటీసీగా ఎన్నికైన వ్యక్తి మొదటి మూడు మండల పరిషత్ సమావేశాల్లోపు ప్రమాణ స్వీకారం చేయకపోతే సభ్యత్వం రద్దవుతుంది.
  అలాగే వరుసగా మూడు సమావేశాలకు హాజరుకాక పోయినా నోటీసులు జారీచేసి సభ్యతాన్ని రద్దు చేస్తారు.
  మండల పరిషత్‌ను ప్రశ్నించే హక్కు వీరికి ఉంది.
  మండల పరిషత్ సమీక్షా సమావేశాలకు హాజరై తాను ప్రాతినిధ్యం వహించే ప్రాంతాల అభివృద్ధికి సూచనలు చేయవచ్చు. సమస్యలను సమావేశం దృష్టికి తీసుకురావచ్చు.
  గ్రామ అవసరాలను గుర్తించి నిధులు రాబట్టేందుకు ప్రతిపాదించవచ్చు.
  అభివృద్ధి పనుల్లో అవకతవకలు జరుగుతుంటే ప్రశ్నిం చడమే కాక విషయూన్ని అధికారుల దృష్టికి తీసుకెళ్లవచ్చు.
  తమ పరిధిలోని పాఠశాలలను పరిశీలించి విద్యా ప్రమాణాలు మెరుగుదలకు సూచనలు చేయవచ్చు.
  మండల పరిషత్ నిధులు సద్వినియోగం అయ్యేలా సూచించవచ్చు.
  ఎంపీటీసీ సభ్యుడు తాను ప్రాతి నిధ్యం వహించే ప్రాదేశికం పరిధిలో అన్ని పంచాయతీ సమావేశాల్లో పాల్గొనవచ్చు. సూచనలు, సలహాలు ఇవ్వవచ్చు. ఓటు హక్కు ఉండదు.
  మండల పరిషత్ నుంచి నిధులు తెచ్చి ఆయా గ్రామాల అభివృద్ధికి కృషి చేయవచ్చు.
  మండలంలో ఎన్నికైన ఎంపీటీసీల్లో ఒక రిని మండల పరిషత్ అధ్యక్షుడి గానూ, మరొకరిని ఉపాధ్యక్షడిగా ఎన్నుకుంటారు.
  స్థానిక సంస్థల ఎమ్మెల్సీ ఎన్నికల్లో ఎంపీటీసీకి ఓటు హక్కు ఉంటుంది.
  జడ్పీటీసీల విధులు, బాధ్యతలు
  జడ్పీటీసీగా ఎన్నికైన వ్యక్తి వరుసగా మూడు జిల్లా పరిషత్ సమావేశాలకు హాజరుకాక పోతే సభ్యత్వం రద్దవుతుంది.
  మండల పరిషత్ సమావేశంలో ఎక్స్‌అఫిషియో సభ్యుడిగా ఉంటూ సూచనలు, సలహాలు ఇవ్వవచ్చు. జిల్లా పరిషత్‌లో రెగ్యులర్ సభ్యుడిగా ఉంటారు.
  అభివృద్ధి పనులకు జిల్లా పరిషత్ ద్వారా నిధులు మంజూరు చేయించవచ్చు. జిల్లా పరిషత్‌లో నిధుల కొరత ఉంటే రాష్ట్ర ప్రభుత్వాన్ని డిమాండ్ చేయవచ్చు.
  జెడ్పీ నిధులు, విధులను ప్రశ్నించే హక్కు జెడ్పీటీసీ సభ్యుడికే ఉంటుంది.
  రహదారులు, తాగునీటి సమస్యలు, ప్రభుత్వ భవనాల మరమ్మతులకు నిధులు రాబట్టవచ్చు.
  ప్రభుత్వం నుంచి తలసరి గ్రాంటు జిల్లా పరిషత్‌కు మంజూరవుతుంది. ఈ నిధులతో వారు ప్రాతినిధ్యం వహించే మండలం అభివృద్ధికి కృషి చేయవచ్చు.
  రాజకీయ కారణాలతో నిధుల కేటాయింపులో చైర్మన్ వివక్ష చూపితే ప్రశ్నించే హక్కు ఉంటుంది.
  మండల స్థాయిలో ఐసీడీఎస్, డ్వాక్రా, ఉపాధి హామీ తదితర పనులు పరి శీలించి అభివృద్ధికి తోడ్పడవచ్చు. ఆయా అంశాల్లో చోటు చేసుకున్న అవకతవకలపై జిల్లా సమావేశంలో అధికారుల దృష్టికి తీసుకెళ్లవచ్చు.
  స్థానిక సంస్థల ఎమ్మెల్సీ ఎన్నికల్లో జడ్పీ టీసీ సభ్యునికి ఓటు హక్కు ఉంటుంది.