హైదరాబాద్: తెలంగాణ పీసీసీ అధ్యక్షడు పొన్నాల లక్ష్మయ్యపై కాంగ్రెస్ పార్టీ సీనియర్ నాయకుడు, మాజీ ఎమ్మెల్యే కోమటిరెడ్డి వెంకటరెడ్డి శనివారం హైదరాబాద్లో నిప్పులు చెరిగారు. పీసీసీ అధ్యక్షుడు పొన్నాల లక్ష్మయ్యకు పార్టీని సమీక్షించే అర్హత లేదని అన్నారు. ఇటీవల జరిగిన శాసనసభ ఎన్నికల్లో ఓడిపోయిన ఆయన పార్టీని ఎలా సమీక్షిస్తారని ప్రశ్నించారు.
 పీసీసీ సమీక్షా సమావేశాలతో ఒరిగేదేమీ లేదని తెలిపారు. పొన్నాల వెంటనే రాజీనామా చేసి కొత్తవారికి అవకాశం ఇవ్వాలని ఈ సందర్బంగా వెంకటరెడ్డి డిమాండ్ చేశారు. ఇదే అంశాన్ని తాము తమ పార్టీ అధినేత్రి సోనియా గాంధీ దృష్టికి తీసుకువెళ్తామని కోమటిరెడ్డి వెంకటరెడ్డి స్పష్టం చేశారు.  
  


 చిత్తూరు జిల్లాకు చెందిన మాజీ ఎమ్మెల్యే కలికిచర్ల ప్రభాకర్ రెడ్డి మంగళవారం టీడీపీ తీర్థం పుచ్చుకున్నారు. హైదరాబాద్లో టీడీపీ ప్రధాన కార్యాలయంలో పార్టీ అధ్యక్షుడు చంద్రబాబు సమక్షంలో ప్రభాకర్ రెడ్డి టీడీపీలో చేరారు. మాజీ ముఖ్యమంత్రి, జై సమైక్యాంధ్ర అధ్యక్షుడు ఎన్.కిరణ్ కుమార్ రెడ్డికి కలికిచర్ల ప్రభాకర్ రెడ్డి సమీప బంధువు కావడం గమనార్హం.
  
 కిరణ్ కుమార్ రెడ్డికి కలికిచర్ల ప్రభాకర్ రెడ్డి వరుసకు బావమరిది అవుతారు. అయితే కృష్ణా జిల్లాకు చెందిన సీనియర్ కాంగ్రెస్ నాయకులు పిన్నమనేని వెంకటేశ్వర రావు, మండలి బుద్ధ ప్రసాద్లు బుధవారం టీడీపీ కండువా కప్పుకోనున్న విషయం విదితమే.