ముంబై: బాలీవుడ్ నటుడు అక్షయ్ కుమార్, నిర్మాత సంజయ్ లీలా భన్సాలీకి లీగల్ నోటీసు పంపించాలని ఇండియన్ మెడికల్ అసోసియేషన్(ఐఎంఏ) నిర్ణయించింది. 'గబ్బర్ ఈజ్ బ్యాక్' సినిమాలో వైద్యవృత్తిని కించపరిచేలా చూపించారని, పవిత్రమైన వైద్య వృత్తిపై ప్రజలకు నమ్మకం పోయేలా సన్నివేశాలున్నాయని ఐఎంఏ తెలిపింది.
 
 అక్షయ్, భన్సాలీకి మంగళవారం లీగలు నోటీసు ఇస్తామని ఐఎంఏ గౌరవ కార్యదర్శి డాక్టర్ కేకే అగర్వాల్ తెలిపారు. మెడికల్ ప్రొఫెషన్ దేవాలయం లాంటదని... రాజకీయాలు, పోలీసులు ఇతర వృత్తులకు భిన్నమైనదని పేర్కొన్నారు. ఇలాంటి వృత్తి గురించి సినిమాలో చూపించాలనుకున్నప్పుడు జాగ్రత్తగా వ్యవహరించాలని అన్నారు. వైద్యవృత్తిని కించపరిచేలా ఉన్న దృశ్యాలను తొలగించాలని డిమాండ్ చేశారు. కాగా 'గబ్బర్' సినిమా చాలా బాగుందని ఢిల్లీ సీఎం అరవింద్ కేజ్రీవాల్ కితాబిచ్చారు.
  


 దాదాపు నాలుగు దశాబ్దాల కెరీర్‌లో కథానాయకునిగా, సహాయ నటునిగా, ప్రతినాయకునిగా సుమన్ ఎన్నో పాత్రలు చేశారు. దేవుడి పాత్రల్లో కూడా ఆయన మెప్పించిన వైనాన్ని మర్చిపోలేం. ‘గబ్బర్ ఈజ్ బ్యాక్’ సినిమాతో ఆయన హిందీ చిత్రసీమలోకి అడుగుపెట్టారు. తమిళ చిత్రం ‘రమణ’ ఆధారంగా తెలుగు దర్శకుడు క్రిష్ దర్శకత్వంలో అక్షయ్‌కుమార్, శ్రుతీహాసన్ జంటగా రూపొందిన  ఈ చిత్రంలో సుమన్ ప్రతినాయకునిగా నటించారు.
  
   శుక్రవారం ఈ చిత్రం ప్రేక్షకుల ముందుకొస్తున్న సందర్భంగా సుమన్ మాట్లాడుతూ -‘‘రజనీకాంత్‌గారి ‘శివాజీ’లో నేను విలన్‌గా నటించిన విషయం తెలిసిందే. ఆ చిత్రం హిందీలోనూ విడుదలైంది. అప్పుడు అక్కణ్ణుంచి చాలా అవకాశాలు వచ్చాయి కానీ, ఓ మంచి చిత్రం ద్వారా పరిచయం అయితే బాగుంటుందనుకున్నా. ‘గబ్బర్ ఈజ్ బ్యాక్’ సరైన సినిమా అనిపించి, అంగీకరించాను. అక్షయ్‌కుమార్‌కీ మార్షల్ ఆర్ట్స్ తెలుసు.
  
   నాకూ వచ్చు. దాంతో ఫైట్ సీన్స్‌ని చాలా సహజంగా చేశాం. నాకు తెలిసి భారతీయ సినిమాలో రిస్క్ తీసుకుని ఫైట్స్ చేసేది అక్షయ్‌కుమారే. ఆయన అంత సులువుగా ఎవర్నీ అభినందించరట. ఆయనే స్వయంగా ‘ఈ వయసులో మీరు బాగా ఫైట్స్ చేస్తున్నారు’ అని నన్ను ప్రశంసించడం మరిచిపోలేను. ఈ ఏడాది హిందీ రంగానికి పరిచయం కావడం ఓ విశేషం అయితే, ఏకకాలంలో నాలుగు దక్షిణాది భాషల్లో రూపొందిన ‘రెడ్ అలర్ట్’లో నటించడం మరో విశేషం’’ అన్నారు.
  


 పుడుతూనే నోట్లో బంగారు స్పూన్తో పుట్టిన అమ్మాయి.. శ్రుతిహాసన్. అప్పటికే విశ్వవిఖ్యాత నటుడైన కమల్హాసన్ కూతురిగా ఆమెకు అందుబాటులో లేని సౌకర్యాలంటూ ఏమీ లేవు. దానికి తోడు ఇప్పుడు టాప్ హీరోయిన్గా ఆమె సొంత సంపాదన కూడా చాలానే ఉంటోంది. ఏసీ కార్లు ఒకటి కాదు.. రెండు మూడైనా సమకూర్చుకోగలదు. కానీ అలాంటి శ్రుతి.. ముంబై నగరంలో మెట్రో రైలు ఎక్కి తిరిగింది. ముంబై మహానగరంలో ట్రాఫిక్ సమస్య చాలా ఘోరంగా ఉంటుందని, దాన్నుంచి తప్పించుకోడానికి ఆమె మెట్రో రైలు ఎక్కింది.. ఆ ప్రయాణం చాలా బాగుందని గురువారం ట్వీట్ చేసింది. తాజాగా శ్రుతిహాసన్ నవరతన్ కూల్ టాల్కం పౌడర్ ప్రకటనలో కూడా పాల్గొంది. ఆ ఫొటోను ఆమె రీట్వీట్ చేసింది.
 
 ప్రస్తుతం శ్రుతిహాసన్ 'గబ్బర్ ఈజ్ బ్యాక్' సినిమా చేసింది. అందులో అక్షయ్ కుమార్ సరసన నటించింది. క్రిష్ దర్శకత్వం వహించిన ఈ సినిమాను సంజయ్ లీలా భన్సాలీ, వయాకామ్ 18 మోషన్ పిక్చర్స్ కలిసి నిర్మించారు. 2002లో విడుదలైన రమణ అనే తమిళ సినిమాకు ఇది రీమేక్. ఈ సినిమాలో కరీనా కపూర్ కూడా ఓ ప్రత్యేక పాత్రలో నటించింది. ఈ సినిమా శుక్రవారం విడుదల కానుంది.
  
 
 Took the metro this morning in Mumbai and I must say I'm impressed !!
 — shruti haasan (@shrutihaasan) April 30, 2015
  
  


 చెన్నై: ప్రముఖ సినీ నటుడు, నిర్మాత కమల్ హాసన్, ఆయన కుమార్తె నటి శృతిహాసన్ మే 1న పోట్లాడనున్నారు. తండ్రి కూతుళ్లు పోట్లాడటమేమిటని అనుకుంటున్నారా.. మరేం లేదండి.. మే 1న వారిద్దరు నటించిన వేర్వేరు చిత్రాలు విడుదల కాబోతున్నాయి. కమల్ హాసన్ నటించి నిర్మించిన చిత్రం 'ఉత్తమ విలన్' మే1న విడుదల కానుండగా అదే రోజు శృతి హాసన్ హీరోయిన్గా నటించిన హిందీ చిత్రం 'గబ్బర్ ఈజ్ బ్యాక్' కూడా అదే రోజు విడుదల కానుంది. ఈ చిత్రంలో హీరోగా అక్షయ్ కుమార్ నటించాడు.
  
 దీంతో ఒకే రోజు విడుదల కానున్న ఈ తండ్రి కూతుళ్ల చిత్రాల్లో ఏ చిత్రం బాక్సాఫీస్ వద్ద పోరాడి ఎక్కువ వసూళ్లు సాధిస్తుందోనని సినీ వర్గాలు చర్చించుకుంటున్నాయి. అంతేకాకుండా, ఎన్నడూ లేనిది తొలిసారి తన తండ్రి సినిమాతోపాటు తన చిత్రం కూడా విడుదల అవుతుండగా శృతిహాసన్ ఎంతో ఉత్సాహంతో ఆరోజు కోసం ఎదురు చూస్తోందట.


 సూపర్ స్టార్ అక్షయ్‌కుమార్ నటిస్తున్న తాజా చిత్రం ‘గబ్బర్ ఈజ్ బ్యాక్’ రిలీజ్‌కు ముందే సంచలనం రేపుతోంది. కారణం... విభిన్నంగా ఉన్న పోస్టర్స్. ఇందులో అక్షయ్ సరసన స్వీటీ బ్యూటీ శృతిహాసన్, కలల రాణి కరీనా కపూర్ హీరోయిన్లుగా చేస్తున్నారు. మూవీలోని ‘తేరీ మేరీ కహానీ’ సాంగ్‌లో కరీనా స్టిల్ ఒకటి బయటకు వచ్చింది. అక్షయ్‌తో కలసి పాడే రొమాంటిక్ పాట ఇది. ఇందులో అమ్మడు ఇలా ‘ఫ్యూజన్ లుక్’లో కేక పుట్టిస్తోంది. పింక్ కుర్తీ, బ్లూ జీన్స్, బ్రౌన్ బూట్స్‌తో పాటు చంకీ జ్యువెలరీ ధరించి మతి పోగొడుతోంది బేబో! ఈ అందాలను ఆస్వాదించాలంటే మే ఒకటి దాకా ఆగాల్సిందే!