గ్రహాంతరవాసుల ఉనికిపై మరోసారి అమెరికా వరుస ప్రకటనలకు దిగుతోంది. అమెరికా జాతీయ అంతరిక్ష పరిశోధన సంస్థ నాసా(National Aeronautics and Space Administration).. గ్రహాంతరవాసుల జాడకు సంబంధించిందిగా చెప్తూ ఓ ఫొటోను రిలీజ్‌ చేసింది. తాజాగా యూఎస్‌ స్పేస్‌ కమాండ్.. 2014లో భూమిని ఢీ కొట్టిన ఓ ఉల్కను.. ఇంటర్ స్టెల్లర్‌గా ధృవీకరించింది. ఈ మేరకు పెంటగాన్‌ సైతం ప్రకటన చేయడం విశేషం. ఈ నేపథ్యంలో ఇప్పుడు నాసా సైతం ఓ మిస్టరీ ఫొటోను విడుదల చేసి.. ఏలియన్ల ఉనికిపై ఆసక్తిని రేకెత్తిస్తోంది.  అంగారక గ్రహాంపై గుర్తు తెలియని ముద్రలకు సంబంధించిన ఫొటోను ఇన్‌స్టాగ్రామ్‌ రిలీజ్‌ చేయగా.. అది ముమ్మాటికీ ఏలియన్లకు సంబంధించిందేనన్న చర్చ ఊపందుకుంది. మార్టిన్ క్రేటర్‌లోని ఆ గుర్తుల్ని హైరెజల్యూషన్‌ ఇమేజింగ్‌ ద్వారా క్యాప‍్చర్‌ చేసింది నాసా. ఇన్‌స్టాగ్రామ్‌లో ఇందుకు సంబంధించిన ఫొటోను షేర్‌ చేయగా.. ఫాలోవర్ల మధ్య జోరుగా చర్చ నడుస్తోంది.  View this post on Instagram A post shared by NASA (@nasa) ఏలియన్ల ఉనికి తెలుస్తుందా? 2017లో భూమిని తాకిన ఓ శకలాన్ని.. ‘ఒయూమువామువా’గా నామకరణం చేశారు. సాంకేతిక పరిశోధనలతో.. అది ఇంటర్‌ స్టెల్లర్‌(నక్షత్రాల మధ్య) ఆబ్జెక్ట్‌గా తేలింది. అయితే.. అంతకంటే ముందే 2014 జనవరిలో ఓ ఉల్క భూమిని తాకింది. తాజాగా దీనిని కూడా ఇంటర్‌ స్టెల్లర్‌ ప్రాజెక్టుగానే ధృవీకరించింది అమెరికా స్పేస్‌ కమాండ్‌. మరో సౌర వ్యవస్థ నుంచి దూసుకొచ్చిన ఈ స్పేస్‌ రాక్‌ను హార్వార్డ్‌ ఖగోళ పరిశోధకులు అమీర్‌ సిరాజ్‌, అబ్రహం లియోబ్‌లు పరిశోధనలు జరిపి.. ఇంటర్‌ స్టెల్లర్‌ ఆబ్జెక్ట్‌గా నిర్ధారించారు. దీంతో 2017లో భూమిని తాకిన ‘ఒయూమువామువా’ను రెండో ఇంటర్‌ స్టెల్లర్‌ ఆబ్జెక్ట్‌గా తేల్చినట్లు అయ్యింది. 6/ “I had the pleasure of signing a memo with @ussfspoc’s Chief Scientist, Dr. Mozer, to confirm that a previously-detected interstellar object was indeed an interstellar object, a confirmation that assisted the broader astronomical community.” pic.twitter.com/PGlIOnCSrW — U.S. Space Command (@US_SpaceCom) April 7, 2022         అటువంటి ఇంటర్‌ స్టెల్లర్(నక్షత్రాల మధ్య) శకలాలు.. గ్రహాంతర జీవుల ఉనికిని ఇతర ప్రాంతాలకు మోసుకెళ్తాయని పరిశోధకులు నమ్ముతారు. ఇంటర్‌ స్టెల్లర్‌ మెటోర్స్‌ అనేవి ఇతర గ్రహాల వ్యవస్థ, అక్కడి ప్రాణుల ఉనికిని తెలుసుకునేందుకు ఉపయోగపడుతుంది. అంతేకాదు విశ్వంలో జీవరాశి(పాన్‌స్పెర్మియా) గురించి తెలియజేసేందుకు మధ్యవర్తిత్వం లాగా అవి పని చేస్తాయని అబ్రహం లోయిబ్‌ అంటున్నారు. అయితే.. 2014 ఉల్క సంగతి ఏమోగానీ.. ఒయూమువామువా మాత్రం ఆస్టరాయిడ్‌ అనడం కంటే.. ఏలియన్‌ టెక్నాలజీకి సంబంధించిన వస్తువుగా దాదాపు నిర్ధారణ అయినట్లు చెప్తున్నారు. హాలీవుడ్‌లో ఇంటర్ స్టెల్లర్ మూవీ.. అదే ఏడాది నవంబర్‌లో రిలీజ్‌ కావడం కొసమెరుపు.


 సినిమా స్క్రిప్ట్‌ల్లో బాపు సినిమా స్క్రిప్ట్ ప్రత్యేకమైనది. ఇంచక్కా ప్రతి సన్నివేశానికి బొమ్మలు వేసి స్క్రిప్టు బుక్‌లో ముందే సినిమా చూపిస్తారు. ఇలా చాలా తక్కువ మంది మాత్రమే బొమ్మలతో స్క్రిప్ట్‌లు తయారు చేసుకుంటారు. ‘ఇన్‌సెప్షన్’ నుంచి ఇటీవలి ‘ఇంటర్‌స్టెల్లార్’  చిత్రాల దాకా హాలీవుడ్‌లో తనదైన ముద్ర వేసిన దర్శకుడు క్రిస్టఫర్ నోలన్. ఈ దిగ్దర్శకుడు కూడా స్క్రిప్ట్‌ను స్కెచ్‌లుగా మార్చే కళాకారుడే. ఈ విషయాన్ని ఆయనే స్వయంగా వెల్లడించారు.  
 
 ట్రైబె కా చిత్రోత్సవాల్లో ముఖ్య అతిథిగా పాల్గొన్న క్రిస్టఫర్ మాట్లాడుతూ ‘‘మూలకథ  కూడా రాసుకోను. అంతా స్కెచ్ వర్కే ఉంటుంది. దీంతో కథలో తర్వాత ఏం జరుగుతుంది అన్న విషయంపై నాకు పూర్తి అవగాహన ఉంటుంది. ఇదే నా శైలి. నా ‘మెమొంటో’ చిత్రానికి మాత్రమే స్క్రిప్ట్ రాసుకున్నాను. మిగతా వాటన్నిటికీ ఇలస్ట్రేషన్స్ వేసుకున్నా’’ అని చెప్పారు.


 ‘బర్డ్‌మ్యాన్’, ‘ది గ్రాండ్ బుడాపెస్ట్ హోటల్’లకు నాలుగేసి అవార్డులు... ‘విప్‌ల్యాష్’కు 3  
  సహజత్వానికి ప్రాధాన్యమిచ్చిన ‘బాయ్‌హుడ్’కు ఒకే అవార్డు
  స్పెషల్ ఎఫెక్ట్స్‌లో ‘ఇంటర్‌స్టెల్లార్’... సౌండ్ ఎడిటింగ్‌లో ‘అమెరికన్ స్నైపర్’లకు పట్టం
  ఉత్తమ విదేశీ భాషా చిత్రం... పోలెండ్‌కు చెందిన ‘ఇదా’
  
  ప్రతిష్ఠాత్మకమైన ఆస్కార్ అవార్డుల ప్రదానోత్సవం ఆదివారం రాత్రి (భారత కాలమానం ప్రకారం సోమవారం ఉదయం) అంగరంగ వైభవంగా సాగింది. చిరుజల్లులు కురుస్తున్నప్పటికీ ఈ అవార్డు ప్రదానోత్సవ వేదిక వద్ద తారల సందడి తగ్గలేదు. హాలీవుడ్‌కూ, అక్కడ కష్టాలు పడే నటీనటులకూ అద్దం పట్టిన వ్యంగ్యభరిత హాస్య చిత్రం ‘బర్డ్ మ్యాన్’ ఈసారి ఆస్కార్ అవార్డుల్లో ‘ఉత్తమ చిత్రం’గా ఎంపికైంది. ‘ఉత్తమ చిత్రం’తో పాటు ‘ఉత్తమ దర్శకుడు’, ‘ఉత్తమ ఛాయాగ్రహణం’, ‘ఉత్తమ ఒరిజినల్ స్క్రీన్‌ప్లే’తో కలిపి, మొత్తం 4 విభాగాల్లో ‘బర్డ్‌మ్యాన్’ చిత్రం ఈ 87వ వార్షిక అకాడెమీ అవార్డుల్లో విజయకేతనం ఎగురవేసింది.
  
   ‘ది గ్రాండ్ బుడాపెస్ట్ హోటల్’ సంగీతం, ప్రొడక్షన్ డిజైన్, మేకప్, కాస్ట్యూవ్‌ు డిజైన్ విభాగాలు నాలుగింటిలో ఉత్తమంగా నిలిచింది. ఇక, ‘విప్‌ల్యాష్’ చిత్రం ఎడిటింగ్, సౌండ్ మిక్సింగ్, ఉత్తమ సహాయ నటుడి విభాగాలు మూడింటిలో విజేత అయింది. ఉత్తమ చిత్రం విభాగంలో నామినేట్ అయిన ఎనిమిది సినిమాలూ కనీసం ఒక్కో అవార్డును గెలుచుకున్నాయి. అయితే, అందరూ ఎన్నో ఆశలు పెట్టుకున్న ‘బాయ్‌హుడ్’ చిత్రం మాత్రం ఒకే ఒక్క అవార్డుతో సంతృప్తిపడాల్సి వచ్చింది. ఒక చిన్న పిల్లవాడు పన్నెండేళ్ళ పైచిలుకు వయసు దాకా పెరిగే క్రమాన్ని అదే నటీనటులతో, కాలాన్ని లెక్క చేయక ‘బాయ్‌హుడ్’గా రూపొందించిన రిచర్డ్ లింక్‌లేటర్‌కు నిరాశ ఎదురైంది.
  
  అలాగే, అమెరికన్లు పెద్ద పీట వేస్తారనుకున్న ‘అమెరికన్ స్నైపర్’కూ ఒకే అవార్డు (సౌండ్ ఎడిటింగ్) దక్కింది. నిరుడు ‘గ్రావిటీ’తో ఉత్తమ సినిమాటోగ్రాఫర్‌గా ఎంపికైన ఎమాన్యుయెల్ లుబెజ్కీ ఈసారి ‘బర్‌‌డ మ్యాన్’తో మళ్ళీ ఆస్కార్ గెలవడం విశేషం. అయితే, ఉత్తమ నటన విభాగాల్లో మొత్తం శ్వేత జాతీయులనే నామినీలుగా ఎంచుకున్నారనే విమర్శలు... రాజకీయాలున్నాయనే గుసగుసలు... ఆత్మహత్యల నివారణ, ప్రభుత్వ నిఘా లాంటి అంశాలపై ఉపన్యాసాల మధ్య ఈ ఉత్సవం సాగడం గమనార్హం. ఈసారి అవా ర్డులందుకొన్న చిత్రాల్లో ‘అమెరికన్ స్నైపర్’, ‘ది థీరీ ఆఫ్...’, ‘ఇమిటేషన్ గేమ్’ లాంటివన్నీ నిజజీవిత వ్యక్తుల ఆధారంగా రూపొందినవే కావడం విశేషం.
  
  ఉత్తమ చిత్రం: బర్డ్‌మ్యాన్
  ‘బర్డ్ మ్యాన్’ (లేదా ‘ది అనెక్స్‌పెక్టెడ్ వర్చ్యూ ఆఫ్ ఇగ్నోరెన్స్’) సినిమా అమెరికన్ వ్యంగ్యభరిత హాస్య - నాటకీయ చిత్రం. వరుసగా అనేక చిత్రాల్లో సూపర్‌హీరో ‘బర్డ్‌మ్యాన్’గా పాత్రపోషణ చేసి సుపరిచితుడై, తెర మరుగైన రిగ్గన్ థామ్సన్ అనే హాలీవుడ్ నటుడి పాత్ర చుట్టూ ఈ చిత్ర కథ తిరుగుతుంది. అతను బ్రాడ్‌వేలో సొంత నాటకం ద్వారా ఒక సీరియస్ నటుడిగా మళ్ళీ తన స్థానాన్ని సుస్థిరం చేసుకోవాలని ఆశిస్తాడు. అయితే, పేరుతో పాటు అహంకారం కూడా ఎక్కువున్న ఒక సినీ తార కూడా తన తారాగణంలో ఉండడంతో థామ్సన్‌కు ఎదురైన ఇబ్బందులేమిటి? వగైరా అంశాలతో వ్యంగ్యభరిత హాస్యం రంగరించిన సినిమా ఇది. రెండు గంటల నిడివి గల ఈ చిత్రం గత ఏడాది అక్టోబర్ 17న అమెరికాలో విడుదలైంది. తాజా ఆస్కార్ అవార్డుల్లో మొత్తం 9 విభాగాల్లో ఈ చిత్రం నామినేట్ అయింది. ‘ది గ్రాండ్ బుడాపెస్ట్ హోటల్’కు కూడా 9 విభాగాల్లో నామినేటైంది. చివరకు చెరి నాలుగేసి విభాగాల్లో ఆస్కార్ అవార్డులు గెలుచుకున్నాయి.
  
  ఉత్తమ దర్శకుడు: అలెగ్జాండ్రో గొంజాలెజ్ ఇనారిట్ (చిత్రం: ‘బర్డ్ మ్యాన్’)
  యాభై ఒక్క సంవత్సరాల అలెగ్జాండ్రో సినీ దర్శకుడు, రచయిత, నిర్మాత. మెక్సికోలో జన్మించిన ఆయన 17 ఏళ్ళ వయసులో అట్లాంటిక్ సముద్రంపై సరకుల రవాణా నౌకలో ప్రయాణం సాగించారు. చిన్న వయసులో చేసిన ఆ ప్రయాణాలు సినీ రూపకర్తగా తనపై అమిత ప్రభావాన్ని చూపాయని ఆయనే చెబుతుంటారు. తాను చూసిన ప్రదేశాలను నేపథ్యాలుగా ఎంచుకోవడం ఆయన అలవాటు. ఆయన తీసిన సినిమాలు ‘అమోరెస్ పెర్రోస్’ (2000), ‘21 గ్రామ్స్’ (2003), ‘బాబెల్’ (2006), ‘బ్యూటిఫుల్‌‘ (2010), తాజా ‘బర్డ్ మ్యాన్’ (2014)లు ప్రపంచవ్యాప్తంగా ఆదరణనూ, అవార్డుల్నీ అందుకోవడం విశేషం. ‘బర్డ్ మ్యాన్’కు ఉత్తమ దర్శకుడిగా ఆస్కార్ గెలుచుకోవడం అందుకు తాజా ఉదాహరణ. ఒక మెక్సికన్ సినీ రూపకర్తకు ఉత్తమ దర్శకుడిగా ఆస్కార్ అవార్డు రావడం వరుసగా ఇది రెండోసారి. గత ఏడాది ‘గ్రావిటీ’ చిత్రం ద్వారా ఆ ఘనత సాధించిన అల్ఫాన్సో క్యువారోన్ కూడా మెక్సికనే!
  
  ఉత్తమ నటుడు: ఎడ్డీ రెడ్‌మెయిన్ (చిత్రం: ‘ది థీరీ ఆఫ్ ఎవ్రీథింగ్’)
  ప్రపంచ ప్రఖ్యాత భౌతికశాస్త్రవేత్త స్టీఫెన్ హ్యాకింగ్ జీవితాన్ని ఆధారంగా చేసుకొని తీసిన ‘ది థీరీ ఆఫ్ ఎవ్రీథింగ్’లో హ్యాకింగ్ పాత్రకు చాలా శ్రమించి, ప్రాణం పోశారు - నటుడు ఎడ్డీ రెడ్‌మెయిన్. హ్యాకింగ్ మాజీ భార్య రాసిన జ్ఞాపకాల పుస్తకం ఆధారంగా అల్లుకున్న కథతో ఈ సినిమా తీశారు. కేవలం 33 ఏళ్ళ వయసులో ఆయన పోషించిన ఈ నిజజీవిత పాత్ర అందరి ప్రశంసలనూ అందుకుంది. అత్యంత సహజంగా సాగిన ఈ పాత్రపోషణకు ఇప్పటికే ఉత్తమ నటుడిగా ‘గోల్డెన్ గ్లోబ్’, ‘బాఫ్తా’తో సహా పలు అవార్డులందుకున్న ఈ ఇంగ్లీషు నట, గాయక, మోడల్‌కు ఆస్కార్ తాజా విజయం. ఉత్తమ నటుడి విభాగంలో ‘బర్డ్ మ్యాన్’లోని టైటిల్ పాత్రధారి మైకేల్ కీటన్‌తో పోటీ పడి, ఆస్కార్‌ను గెలిచారు ఎడ్డీ. లండన్‌లో పుట్టి పెరిగిన ఎడ్డీ ఇరవయ్యేళ్ళ వయసులోనే రంగస్థలంపై నటుడిగా ఓనమాలు దిద్దారు. ‘ది గుడ్ షెపర్డ్’, ‘లే మిజరబుల్స్’ లాంటి పలు చిత్రాల్లో నటించిన ఎడ్డీకి టెలివిజన్ నటనలోనూ అనుభవం ఉంది. రంగస్థలం, టీవీ, సినిమా - మూడింటిలోనూ తనదైన ముద్ర వేయడం విశేషం. ఆస్కార్ అందుకున్న ఎడ్డీని స్టీఫెన్ హ్యాకింగ్ అభినందించారు.  
  
  ఉత్తమ నటి: జూలియన్ మూర్ (చిత్రం: ‘స్టిల్ ఎలైస్’)
  పిన్న వయసులోనే అల్జీమర్స్ వ్యాధి వచ్చి, బాధకు గురైన మహిళగా ‘స్టిల్ ఎలైస్’ చిత్రంలో చూపిన నటన జూలియన్ మూర్‌కు ఆస్కార్ కిరీటాన్ని అలంకరించింది. భావోద్వేగపరంగా సమస్యలకు గురైన మహిళల పాత్రలను పోషించడంలో మూర్ దిట్ట. ఆ రకంగా 54 ఏళ్ళ ఈ అమెరికన్ నటి, పిల్లల పుస్తకాల రచయిత్రి ఇప్పటికి అయిదు సార్లు నటనా విభాగంలో ఆస్కార్‌కు నామినేట్ అయ్యారు. తొలిసారిగా ఉత్తమ నటిగా ఆస్కార్ అందుకున్నారు. పిల్లల కోసం ఆమె రాసిన పుస్తకాల్లో కొన్ని ‘బెస్ట్ సెల్లర్స్’ ఉండడం విశేషం.  
  
  టూ మచ్ బాబూ...
  వ్యాఖ్యాతలు ఎంత జోరుగా ఉంటే వేడుకలు అంత పసందుగా సాగుతాయి. ఈ ఏడాది ఆస్కార్ అవార్డ్స్ వేడుకకు నీల్ ప్యాట్రిక్ హ్యారిస్ వ్యాఖ్యాతగా వ్యవహరించారు. ‘ఇవాళ హాలీవుడ్ బెస్ట్ అండ్ వెటైస్ట్.... ఐ మీన్ బ్రైటెస్ట్ పీపుల్‌కి అవార్డులు ప్రదానం చేయబోతున్నాం’ అని వేడుక ఆరంభంలోనే చర్చకు తావిచ్చే మాటలు మాట్లాడారు నీల్. ఈ ఏడాది నామినేషన్స్‌లో నల్ల జాతికి చెందినవారికి ప్రముఖ విభాగాల్లో స్థానం కల్పించలేదనే వివాదం నెలకొంది. ఈ నేపథ్యంలో ‘బెస్ట్ అండ్ వెటైస్ట్’ అని ప్రసంగం మొదలుపెట్టి, అంతలోనే వెటైస్ట్ అంటే బ్రైటెస్ట్ అని మాట మార్చాడు. ఇక,  ‘బర్డ్ మ్యాన్’ చిత్రం గురించి మాట్లాడేటప్పుడు అందులోని సన్నివేశాన్ని తలపించే విధంగా లో దుస్తుల్లో వేదిక పైకి వచ్చాడు నీల్. ప్రపంచవ్యాప్తంగా కోట్ల మంది వీక్షించే ఈ ప్రతిష్ఠాత్మక వేడుకలో ఇలా చేయడం ‘టూ మచ్ బాబూ’ అన్నవాళ్లూ ఉన్నారు.
  
  విజేతల పేర్లు వీరిద్దరికే తెలుసు!
 ఆస్కార్ అవార్డ్ విజేతలను ఎంపిక చేయడమనే వ్యవహారం అంత సులువు కాదు. అకాడమీ ఆఫ్ మోషన్ పిక్చర్ ఆర్ట్స్ అండ్ సెన్సైస్‌లో మొత్తం 6,100 మంది సభ్యులు ఉంటారు. వీళ్లందరూ వేసిన ఓట్లే విజేతలను నిర్ణయిస్తాయి. మూడేళ్లకు ముందు ఓటింగ్ విధానం మొత్తం పేపర్ వర్క్‌తోనే సాగేది. కానీ, ఆ తర్వాత ఎలక్ట్రానిక్ పద్దతిలో ఓట్లు వేయడం మొదలైంది. సభ్యులందరి ఓట్లను చివరికి పరిగణనలోకి తీసుకునేది ఇద్దరే వ్యక్తులు. వాళ్లే.. ‘ప్రైస్‌వాటర్ హౌస్ కూపర్స్’ ఆడిటింగ్ సంస్థకు చెందిన ‘బ్రియాన్ కల్లినన్, మార్తా రూయిజ్’.
 విజేతలను కూడా నిర్ణయించేది వీళ్లే. గత మంగళవారంతో ఓటింగ్ ముగిసింది. 24 శాఖలకు సంబంధించి 6,000 పై చిలుకు ఓట్లు ఉంటాయి. ఈ ఓట్లు లెక్కించి, విజేతలను శుక్రవారం నిర్ణయిస్తారు. 24 శాఖలకు సంబంధించిన విజేతలను నిర్ణయించిన తర్వాత ఒక్కో విజేత పేరుని ఒక్కో కార్డులా తయారు చేస్తారు. వాటిని ఆయా శాఖ పేరు ముద్రించిన కవర్లలో భద్ర పరుస్తారు. ఈ 24 కవర్లను రెండు బ్రీఫ్‌కేసులలో పెడతారు. ఒకవేళ పొరపాటున ఈ బ్రీఫ్‌కేసులు పోతే..? అందుకే విజేతలను నిర్ణయించిన బ్రియాన్ కల్లినన్, మార్తా రూయిజ్‌లువారి పేర్లను తమ మనసులో గుర్తుంచుకుంటారు.
  
  అది అవార్డు కమిటీ నిబంధన. విజేతల ఎంపిక పూర్తయ్యి, బ్రీఫ్‌కేసులు రెడీ అయిన క్షణం నుంచీ ఈ ఇద్దరినీ సెక్యుర్టీ గార్డులు వెన్నంటే ఉంటారు.  ఆస్కార్ అవార్డు వేడుక ముగిసే వరకు ప్రకృతి అవసరాలు మినహా కాపలాదారుల కనుసన్నల్లోనే ఈ ఇద్దరూ ఉండాలి. చివరి నిమిషం వరకూ విజేతల వివరాలు బ్రియాన్, మార్తాలకు తప్ప వేరే ఎవ్వరికీ తెలియదు.
  నామినీలకూ 'కోట్లు'!
  పోటీలో అందరూ గెలవాలని ఎక్కడా ఉండదు. గెలిచినవాళ్లకు ఆనందం, గెలవనివాళ్లకు బాధ కూడా సహజమే. అందుకే, నామినేషన్‌తో సరిపెట్టుకున్నవారికి కొంతలో కొంత ఊరట ఇచ్చే విధంగా ఆస్కార్ అవార్డ్ కమిటీ వారికి ఒక్కొక్కరికీ లక్షా 68 వేల డాలర్లు (సుమారు కోటి రూపాయలకు పైగా) విలువ చేసే బహుమతులు ఇచ్చింది. వీటిని ఓ పెద్ద బ్యాగ్‌లో ఉంచి ఇస్తారు.
  
  అందులో ఏమేం ఉంటాయంటే... బ్రాండెడ్ స్ప్రే, సోప్  లిప్ గ్లాస్  హెర్బల్ టీ, యాపిల్స్  స్త్రీలకు బ్రాండెడ్ మణికట్టు గొలుసు, పురుషులకు మంచి టైలు  అలెక్సిస్ సెలెజ్కీ అనే ఫిజికల్ ట్రైనర్ దగ్గర పది సెషన్స్ ఉచిత శిక్షణ  చర్మ, కేశ సంరక్షణకు సంబంధించిన సౌందర్య సాధనాలు హోమ్ స్పా సిస్టమ్  ఓ ఐదు నక్షత్రాల హోటల్‌లో మూడు పగలు, రెండు రాత్రులు గడిపే సౌకర్యం లగ్జరీ రైల్ ట్రిప్  ఓ జ్యోతిష్కుడు నామినీల ఇంటికెళ్లి ఈ ఏడాది వారి జాతకం ఎలా ఉందో చెప్పే వెసులుబాటు. ఇలా పలు రకాల బహుమతులు ఉంటాయి.
  
  ఎర్ర గులాబీలు
  ‘‘అందమైన భామలు.. లేత మెరుపు తీగలు.. ముట్టుకుంటే మాసిపోయె వన్నెల అందాలు...’’ అందాల భామలను చూసినప్పుడు ఈ పాట గుర్తుకు రావడం ఖాయం. ఆస్కార్ వేడుకలో ఎర్ర తివాచీపై ఒయ్యారాలు పోయిన అందగత్తెలను చూసి, ఇంగ్లిష్‌వాళ్లు ఏం పాటేసుకున్నారో కానీ.. మన తెలుగువాళ్లు మాత్రం ఈ పాట పాడుకోకుండా ఉండలేరు. ప్రతి ఏడాదీ ఆస్కార్ అవార్డ్స్ వేడుకలో రెడ్ కార్పెట్‌పై ‘కాట్ వ్యాక్’ చేసే నటీమణులను వీక్షించడానికి చాలామంది టీవీలకు కళ్లప్పగించేస్తారు. ఈసారి కూడా అదే జరిగింది. చూపులు తిప్పుకోవడం కష్టమైందట. నిజమే కదూ...
  
  విజేతలు వీరే!
  ఉత్తమ చిత్రం: బర్డ్‌మ్యాన్
  ఉత్తమ నటుడు: ఎడ్డీ రెడ్‌మెయిన్
  ఉత్తమ నటి: జూలియన్ మూర్
  ఉత్తమ సహాయ నటుడు: జె.కె. సిమ్మన్స్ (‘విప్‌ల్యాష్’)
  ఉత్తమ సహాయనటి: ప్యాట్రీషియా ఆర్క్వెట్టె (బాయ్‌హుడ్)
  ఉత్తమ యానిమేటడ్ మూవీ: ‘బిగ్ హీరో సిక్స్’
  ఉత్తమ సినిమాటోగ్రఫీ: ఎమాన్యుయెల్ లుబెజ్కీ (‘బర్డ్‌మ్యాన్’)
  ఉత్తమ వస్త్రాలంకరణ: మిలెనా కానొనెరో (ది గ్రాండ్ బుడాపెస్ట్ హోటల్)
  ఉత్తమ దర్శకుడు: అలె గ్జాండ్రో ఇనారిట్ (బర్డ్‌మ్యాన్)
  ఉత్తమ డాక్యుమెంటరీ ఫీచర్:   సిటిజన్ ఫోర్  
  ఉత్తమ డాక్యుమెంటరీ షార్ట్ సబ్జెక్ట్: క్రైసిస్ హాట్‌లైన్ - వెటరన్స్ ప్రెస్ వన్  ఉత్తమ కూర్పు: టామ్ క్రాస్ (‘విప్‌ల్యాష్’)
  ఉత్తమ విదేశీ భాషా చిత్రం: పోలండ్ చిత్రం ‘ఇదా’
  ఉత్తమ మేకప్ - కేశాలంకరణ: ఫ్రాన్సెస్ హానన్, మార్క్ కౌలియర్ (ది గ్రాండ్ బుడాపెస్ట్ హోటల్)
  ఉత్తమ ఒరిజినల్ స్కోర్: ది గ్రాండ్ బుడాపెస్ట్ హోటల్ (అలెగ్జాండ్రె డెస్‌ప్లాట్)
  ఉత్తమ ఒరిజినల్ సాంగ్: గ్లోరీ... (చిత్రం ‘సెల్మా’)
  ఉత్తమ ప్రొడక్ష న్ డిజైన్: ది గ్రాండ్ బుడాపెస్ట్ హోటల్ (ఆడమ్ స్టాక్‌హొజెన్, అన్నా పినోక్)
  ఉత్తమ యానిమేటెడ్ లఘుచిత్రం: ‘ఫీస్ట్’ (ప్యాట్రిక్ ఓస్బోర్న్, క్రిస్టీనా రీడ్)
  ఉత్తమ లైవ్ యాక్షన్ షార్ట్ ఫిల్మ్: ‘ది ఫోన్ కాల్’ ( మ్యాట్ కిర్క్‌బీ, జే మ్స్ లూకాస్)
  ఉత్తమ సౌండ్ ఎడిటింగ్: ‘అమెరికన్ స్నైపర్’ (ఏలన్ రాబర్ట్ ముర్రే బుబ్ అస్మాన్)
  ఉత్తమ సౌండ్ మిక్సింగ్: ‘విప్‌ల్యాష్’ (క్రెగ్‌మాన్, బెన్ విల్కిన్స్, థామస్ కర్లే)
  ఉత్తమ విజువల్ ఎఫెక్ట్స్: ‘ఇంటర్‌స్టెల్లార్’  (పాల్ ఫ్రాంక్లిన్, ఆండ్రూ లాక్లే, ఇయాన్ హంటర్, స్కాట్ ఫిషర్)
  ఉత్తమ ఎడాప్టెడ్ స్క్రీన్‌ప్లే: ‘ది ఇమిటేషన్ గేమ్’ (గ్రాహమ్ మూర్)
  బెస్ట్ ఒరిజినల్ స్క్రీన్‌ప్లే: అలె గ్జాండ్రో ఇనారిట్ (‘బర్డ్‌మ్యాన్’)
  


 87వ ఆస్కార్ అవార్డుల్లో ఉత్తమ విజువల్ ఎఫెక్ట్స్ అవార్డును ' ఇంటర్ స్టెల్లర్' అనే చిత్రం దక్కించుకుంది. ఈ చిత్రంతో క్యాప్పటన్ అమెరికా దివింటర్ సోల్జర్, డాన్ ఆప్ ది ప్లానెట్ ఆఫ్ ది ఏప్స్, గార్డియన్స్ ఆఫ్ ది గెలాక్సీ, ఎక్స్ మెన్ డేస్ ఆఫ్ ది ఫ్యూచర్ పాస్ట్ పోటీపడ్డాయి. ఇంటర్ స్టెల్లర్ చిత్రానికి క్రిస్టోఫర్ నోలాన్ దర్శకత్వం వహించారు. అలాగే యానిమేటెడ్ ఫ్యూచర్ ఫిల్మ్ అవార్డును 'బిగ్ హీరో 6' దక్కించుకుంది.  
 
 ఇక ఉత్తమ సినిమాటోఫోగ్రఫీ చిత్రంగా 'బర్డ్మాన్' నిలిచింది. ఈ అవార్డును ఆడం స్టాక్ హౌసెన్, అన్నా పిన్నాక్ అందుకున్నారు. ఆస్కార్ అవార్డుల ప్రధానోత్సవం సందర్భంగా పలువురు ప్రముఖ హాలీవుడ్ నటులు, ఇతర ముఖ్యులకు నివాళులర్పించారు. ముఖ్యంగా హాలీవుడ్ లెజెండ్ మెరిల్ స్ట్రీప్తోపాటు ఇతరులను గుర్తు చేసుకున్నారు.


  ఇంటర్ స్టెల్లార్
  హైదరాబాద్ నుండి విజయవాడ... అంతర్‌నగర ప్రయాణం - ఇంటర్‌సిటీ!
  భారతదేశం నుండి అమెరికా... అంతర్జాతీయ ప్రయాణం - ఇంటర్నేషనల్ జర్నీ!
  మరి, మన సౌర కుటుంబం నుండి మరో సౌర కుటుంబానికి ప్రయాణం...?
  అది - ‘ఇంటర్‌స్టెల్లార్’ ప్రయాణం!
  
  బూడిద  తుపాన్లు, ఆమ్ల వర్షాలు, చెదపట్టిన పంటలు - అలా మనిషి మనుగడ సాగించ లేని ప్రమాద స్థితిలో భూమి. మళ్లీ భూమి లాంటి మరో గ్రహం వెతికే ప్రయాణమే - తాజా హాలీవుడ్ సంచలనం ‘ఇంటర్‌స్టెల్లార్’  కథావస్తువు. కూపర్ ఒక రైతు. పూర్వాశ్రమంలో నాసా పెలైట్. అతనికి పదేళ్ల కూతురు మర్ఫి. పదిహేనేళ్ల కొడుకు టామ్. భార్య లేదు. ఏదో అతీతశక్తి ఆ గదిని ఆవహించిందని మర్ఫి నమ్ముతుంది. ఆ అతీతశక్తి గురుత్వాకర్షణ తరంగాల ద్వారా ఒక సందేశాన్ని పంపుతుంది. ఆ సందేశం తండ్రీ కూతుళ్లని రహస్యంగా నడుస్తున్న నాసా కేంద్రానికి చేరేలా చేస్తుంది. ప్రొఫెసర్ జాన్ బ్రాండ్ ఆధ్వర్యంలో ఆ నాసా కేంద్రం పని చేస్తూంటుంది.
  
  విశ్వంలో వామ్‌హోల్స్ ఉన్నాయని, వాటిని ‘వాహకం’లా వాడుకుని కొత్త గ్రహాలకు చేరే అవకాశం ఉందని చెబుతాడు బ్రాండ్. ఆ విధంగా ఇప్పటికే ముగ్గురు వ్యోమగాములు మిల్లర్, ఎడ్మండ్, మాన్ మూడు గ్రహాల్ని కనుక్కొన్నారని, వాటిని దర్శించారని, ఆ ముగ్గురి పేర్లే ఆ గ్రహాలకు పేర్లుగా పెట్టారని చెబుతాడు. ఈ మూడు గ్రహాలు గార్గాంటా అనే కృష్ణబిలం (బ్లాక్ హోల్) చుట్టూ పరిభ్రమిస్తుంటాయి. ఆ గ్రహాల డాటాను సేకరించమని, ఆ మూడింటిలో ఏ ఒక్క గ్రహంపైనైనా మనిషి మనుగడకు అనువుగా ఉందేమో కనుక్కు రమ్మని కూపర్‌కు జాన్‌బ్రాండ్ చెబుతాడు. బ్రాండ్ కూతురు, జీవశాస్త్ర నిపుణురాలు అయిన అమెలా, మరో ఇద్దరు వ్యోమగాములు, మరో రెండు రోబోలు టర్స్, కేస్‌లతో కలిసి ఎండ్యూరెన్స్ అనే స్పేస్ షిప్ (అంతరిక్ష నౌక) ద్వారా కూపర్ అంతరిక్షయానం చేస్తాడు.
  
  అయితే బ్రాండ్ దగ్గర రెండు ప్రతిపాదనలుంటాయి. మనిషి మనుగడ సాగించగల గ్రహాన్ని వెతకడం ప్లాన్-ఎ. అలా మూడు గ్రహాలు మనిషి మనుగడకు అనుకూలం కాని పక్షంలో తమ వెంట తీసుకెళ్లిన, ఫలదీకరించిన వివిధ రకాల జీవుల పిండాల్ని ఆ గ్రహాలపై మనగలిగేలా చేయడం ప్లాన్-బి. కూపర్‌కి ప్లాన్-బి ఇష్టం ఉండదు. ఆ గ్రహాలపై డాటా సేకరించడం, తిరిగి భూమిని చేరుకొని తన కూతుర్ని కలుసుకోవడం అనేది అతని కోరిక. ప్రత్యక్షంగా బయటపడకపోయినా జాన్‌బ్రాండ్‌కు ప్లాన్-ఎ ఫలించదని నమ్మకం. అతని ఆశ అంతా ప్లాన్-బి మాత్రమే. తప్పకుండా తిరిగి వస్తానని మాట ఇచ్చి బయలుదేరతాడు కూపర్. వెళ్లేముందు తన చేతి వాచిని కూతురికి ఇస్తాడు. తండ్రి వెళ్లడం ఇష్టం లేని మర్ఫి ఆ చేతి వాచిని విసిరి కొడుతుంది. అదొక పుస్తకాల అల్మారాలో పడిపోతుంది.
  
  కూతురి జ్ఞాపకాలతో కూపర్ బయలుదేరతాడు. వీరు ప్రయాణిస్తున్న స్పేస్ షటిల్‌ని ఒక రాకెట్, రోదసిలో విడిచిపెడుతుంది. అప్పటికే భూమి చుట్టూ పరిభ్రమిస్తున్న ఎండ్యూరెన్స్ అనే అంతరిక్ష నౌకను స్పేస్ షటిల్ అతుక్కొంటుంది. అక్కడ నుండి ఎండ్యూరెన్స్ అంతరిక్ష నౌక వేగంగా రోదసియానం చేస్తుంది. మన శనిగ్రహం దాటగానే వామ్‌హోల్‌ని గుర్తిస్తారు. ఒక వైపు దూరి మరోవైపు వెలుపలకి వచ్చే సొరంగ మార్గం లాంటిదే వామ్‌హోల్. ఒక విశ్వం నుండి మరో విశ్వానికి తక్కువ సమయంలో ఈ వామ్‌హోల్ ద్వారా ప్రయాణించవచ్చు. అలా ప్రయాణించి అవతలి వైపుకు చేరుతుంది ఎండ్యూరెన్స్ అంతరిక్షనౌక.
  
  అక్కడ నుండి షటల్ ద్వారా మిల్లర్ గ్రహాన్ని చేరుతారు. గ్రావిటేషనల్ టైమ్ డైలేషన్ (గురుత్వాకర్షణ ఎక్కువగా ఉన్న చోట సమయం నెమ్మదిగా గడుస్తుంది). మిల్లర్ గ్రహంపై ఒక గంట సమయం, మన భూమి మీద 7 సంవత్సరాలతో సమానం. ఆ గ్రహం అంతా సముద్రమే. అక్కడ దిగి డాటా సేకరించే సమయంలో కనీవినీ ఎరుగని భారీ అల ముంచెత్తుకు రావడంతో తిరుగు ప్రయాణమౌతారు. అలా మిల్లర్‌కి వెళ్లి ఇలా ఎండ్యూరెన్స్ తిరిగి చేరడానికి వారికి 3 గంటల సమయం పడుతుంది. అప్పటికి భూమి మీద 23 సంవత్సరాలు గడిచాయి. కూపర్ కూతురు మర్ఫి పెద్దదై, నాసాలో బ్రాండ్ దగ్గర అసిస్టెంట్ సైంటిస్ట్‌గా పని చేస్తుంటుంది. కొడుకు టామ్ పెద్దవాడై పెళ్లి చేసుకొని తన సంతానాన్ని వీడియో ట్రాన్స్‌మిషన్ ద్వారా తండ్రి కూపర్‌కి పరిచయం చేస్తాడు.
  
  ఆ క్షణం కూపర్ మానసిక సాంత్వన పొందుతాడు. వీలైనంత త్వరగా మిషన్‌ను పూర్తి చేయాలనుకుంటాడు. మిగిలిన రెండు గ్రహాల్లో ఏదో ఒక గ్రహం వెళ్లడానికే ఫ్యూయల్ (ఇంధనం) ఉంటుంది. ఇంతలో మాన్ గ్రహం నుండి సంకేతాలు రావడంతో ఆ గ్రహంపై వాలతారు. దీర్ఘనిద్రలో ఉన్న డా. మాన్‌ని నిద్రలేపుతారు. ఆ గ్రహం అంతా గడ్డకట్టిన మంచు ముక్కలా ఉంటుంది. అక్కడ 67 గంటలు పగలు, 67 గంటలు రాత్రి. ఆ గ్రహం మనిషి బ్రతకడానికి అనువైన స్థలం అని డా. మాన్ నమ్మబలుకుతాడు. ఏమైనా తను తిరిగి భూమిని చేరాలని కూపర్ చెబుతాడు. అది డా. మాన్‌కు నచ్చదు. కూపర్ ఆక్సిజన్ పైప్‌ను తొలగించి వైజర్ (హెల్మెట్ ముందున్న పారదర్శక గాజుపలక)ను పగలగొట్టి చంపే ప్రయత్నం చేస్తాడు డా. మాన్. ఆ గ్రహం కూడా మానవాళికి పనికిరాదని అర్థమైపోతుంది. అతి కష్టం మీద కూపర్, అమెలీలు అక్కడ నుండి బయటపడతారు. ఈ లోపు మాన్ మరో షటిల్‌తో ఎండ్యూరెన్స్‌ని చేరి అతుక్కోవాలని చూస్తాడు. కానీ పాస్‌వర్డ్ తెలియక ప్రమాదానికి గురై పేలిపోతాడు.
  
  ఇప్పుడు కూపర్‌కి రెండు లక్ష్యాలు. కానీ ఒక్కటే సాధించగలడు. వెనక్కి కూతురి దగ్గరకు వెళ్లడమా లేదా మూడో గ్రహం ఎడ్‌మండ్ చేరడమా. కానీ అమెలీ లక్ష్యం మాత్రం సుస్పష్టం. అది ఎడ్‌మండ్ గ్రహాన్ని చేరడమే. కూపర్‌కి ఆమె ఆంతర్యం అర్థమయ్యాక తను విడిపోవాలనుకుంటాడు. విడిపోయేముందు అమెలీని ఎడ్‌మండ్ వైపు పయనమయ్యేలా ‘స్లింగ్‌షాట్’ ఆపరేషన్ చేస్తారు (ఇంధనం ఖర్చు కాకుండా ఒక గ్రహపు గురుత్వాకర్షణ శక్తిని ఉపయోగించుకొని వేగంగా ప్రయాణించే ప్రక్రియే ‘స్లింగ్ షాట్’). ఆమె అలా ఎడ్‌మండ్ వైపు ప్రయాణం అవుతుండగా, కూపర్ ఒక్కడే ఆ ఎండ్యూరెన్స్ నుండి విడిపోయి విశ్వంలో పడిపోతాడు.
  
  అలా విడిపోవడం మూలాన ఇంధన ఖర్చు తగ్గించినవాడవుతాడు. అంతేకాక ఎడ్‌మండ్ గ్రహం కూడా మానవాళికి పనికి రాకపోతే ప్లాన్-బి అమలు చేయాలి. అది అతనికి ఇష్టం లేదు. అన్నిటికన్నా ప్రధానం  మాట ఇచ్చినట్లుగా కూతుర్ని కలవడం. అందుకే విశ్వంలో పడి పోయాడు. అలా విశ్వంలో ప్రయాణిస్తుండగా వామ్‌హోల్ లాంటి మరో గొట్టంలో పడి పోతాడు. అయితే అది వామ్‌హోల్‌లా లేదు. ఫోర్ డెమైన్షనల్ హైపర్ క్యూబ్ (టెస్సిరాక్ట్). ఆ క్యూబ్‌లో భూత, వర్తమానాలు బంధించబడి ఉంటాయి. తన కూతురు చిన్నప్పటి దృశ్యాలు మొదలు పెద్దయ్యేంత వరకు ప్రతిదీ క్షుణ్ణంగా కనబడుతుంది.
  
  ఇక్కడ భూమి మీద బ్రాండ్ అవసాన దశలో, తన పరిశోధనలో సింగులారిటీ మిస్ అయ్యిందని, ఇక భూమి మీద మనిషి అంతరించి పోవాల్సిందేనని చెప్పి మరణిస్తాడు. మానవాళిని ఏ విధంగాైనె నా సరే భూమి నుంచి ఖాళీ చేయించాలన్న మర్ఫీని ఆ విషయం కలవరపెడుతుంది. అదే సమయంలో హైపర్ క్యూబ్‌లో కూతురి మర్ఫీ గది దగ్గరకు కూపర్ చేరి బుక్ షెల్ఫ్‌ని కదుపుతాడు. వాచి కింద పడుతుంది. ఆ వాచ్ లోని టైం ఒక ఈక్వేషన్‌కు ఆధారంలా తోస్తుంది. భూమ్యాకర్షణ శక్తి నుండి మానవాళి తప్పించుకొని విశ్వంలో బతకడానికి ఆధారం దొరుకుతుంది. ఆ హైపర్ క్యూబ్ నుండి వెలువడ్డాక కూపర్ స్పృహ కోల్పోతాడు.
  
  అప్పటికి మానవాళి స్పేస్ ఫారింగ్ సొసైటీ (అంతరిక్షంలో నివసించగల సంఘం)గా అవతరించి ఉంటుంది. కూపర్ కళ్లు తెరిచేసరికి శనిగ్రహం ఆవరణలో ఓ స్పేస్ స్టేషన్ హాస్పిటల్‌లో ఉంటాడు. చూడటానికి 40 ఏళ్ల వయసులా ఉన్న కూపర్ వయసు అప్పటికి 124 ఏళ్లు. అక్కడ 95 ఏళ్ల తన కూతుర్ని కలుస్తాడు. ఆమె వృద్ధురాలై అవసాన దశలో ఉంటుంది. ఎడ్‌మండ్ గ్రహానికి వెళ్లి అమెలీని కలవాల్సిందిగా తండ్రిని కోరుతుంది మర్ఫి. కూపర్ తిరిగి ఎడ్‌మండ్‌కి ప్రయాణమవుతాడు.
  
  విశ్లేషణ: ఈ సినిమాలో వాస్తవం ఎంత, కల్పన ఎంత? అంటే... వాస్తవం ఒక ఆధారం మాత్రమే! మిగతా అంతా కల్పనే... అత్యద్భుతమైన కల్పన. మాటలకందని ఊహాశక్తి. దానికి దృశ్యరూపమిచ్చిన క్రిస్టఫర్ నోలన్‌కు వెయ్యి వీరతాళ్లు వేయొచ్చు.విశ్వంలో కృష్ణబిలాలు (బ్లాక్ హోల్స్) ఉన్నాయని రూఢి అయింది. అయితే వామ్‌హోల్స్ ఉంటాయని ఇంకా రూఢి కాలేదు. కాంతిని కూడా మింగేయగల శక్తి కృష్ణబిలానిది. అయితే కాంతివేగం కంటే తక్కువ వేగంతో వామ్‌హోల్స్ ప్రయాణం చేయొచ్చు అన్నది కల్పన. అది నిజమే కాబోలు అన్నంత గొప్పగా తెరపై ఆవిష్కరించారు.
  
  గ్రావిటేషనల్ టైమ్ డిలేషన్ - అంటే విశ్వంలో మనం ఒక చోట కూర్చుని రెండు వేరు వేరు గ్రహాలపై గాని, గ్రహ కూటముల వద్దగాని గడియారాల్ని పరికించి చూస్తే సమయంలో మార్పుంటుంది. గురుత్వాకర్షణ శక్తి ఎక్కువగా ఉన్నచోట టైమ్ నెమ్మదిగా గడుస్తుంది. లేని చోట వేగంగా గడుస్తుంది. దీన్ని ఆధారం చేసుకొని మిల్లర్ గ్రహంపై మూడు గంటల సమయం, భూమి మీద 21 సంవత్సరాలతో సమానం అని చెబుతారు. భూమి మీద మర్ఫి, టామ్‌లు పెద్దవాళ్లై ఉంటారు. కానీ కూపర్, అమెలీలు యవ్వనంలోనే ఉంటారు. ఇది అందమైన, తెలివైన కల్పన. మనమిక్కడ ఆదివారంలో ఉన్నా అమెరికా వాళ్లు శనివారంలోనే ఉంటారు. కానీ ఏకకాలంలో శని, ఆదివారాల్ని భూవాసులు అనుభవిస్తున్నట్లు ఆకాశంలో కూర్చుని చూసేవాడికి తెలుస్తుంది. ఇదీ అంతే!
  
  ఈ సినిమాలో మరో అద్భుతం ఎండ్యూరెన్స్ స్పేస్ షిప్. దాని ఆకారం, అది పని చేసే విధానం రెండూ అద్భుతాలే. అతి దగ్గర్లోనే అలాంటి నిజమైన స్పేష్‌షిప్‌ని చూస్తామనిపిస్తోంది. ఇంటర్నేషనల్ స్పేస్ స్టేషన్‌ని ఆధారం చేసుకొని ఎండ్యూరెన్స్ అనే స్పేస్‌షిప్‌ని డిజైన్ చేశారు.
  
  టార్స్ అనే రోబో కోసమైనా ఈ సినిమా చూడాలి. ఒక ఆరడుగుల బీరువాలా ఉండే టార్స్ సున్నితమైనవాడు, విధేయుడు, రక్షకుడు. సినిమా చూస్తున్నంత సేపు టార్స్‌ని ఒక మిషన్‌లా చూడము. ఒక మనిషిని చూస్తున్నట్లు చూస్తాము. దాంతో అనుబంధం పెంచుకుంటాం.
  
  మిల్లర్ నీటి గ్రహంపై డాటా సేకరించే విధానం. భారీ అల నుండి తప్పించుకొనే విభాగం. అలాగే మాన్ గ్రహంపై చివరి నిమిషంలో ల్యాండర్ (షటిల్)ని అందుకొనే సన్నివేశాలు అద్భుతం... మరో మాట లేదు. టార్స్ ఎక్కడ మిస్ అవుతాడో అని మనం కంగారు పడిపోతాము.
  
  డా. మాన్ దొంగగా ఎండ్యూరెన్స్‌ని డాక్ చేయాలనుకొని ప్రమాదంలో పడి పేలిపోతాడు. ఆ సమయంలో ఒక చక్రం ఆకారంలో చుట్టూ 12 క్యాప్సూల్స్ కలిగిన స్పేష్‌షిప్ ఎండ్యూరెన్స్ పాక్షికంగా దెబ్బతిని భూచక్రంలా గిర్రున తిరుగుతుంది. అంత వేగంగా తిరుగుతున్న స్పేస్‌షిప్‌తో అంతే వేగంగా తిరుగుతూ కూపర్ ప్రయాణిస్తున్న షటిల్‌ని లాక్ చేసే సన్నివేశం పరమాద్భుతం. వర్ణించలేం... చూడాల్సిందే.
  
  చివరగా ఫోర్ డెమైన్షనల్ హైపర్ క్యూబ్ లాంటి ప్రదేశం... అందులో కూపర్ చిక్కుకున్న విధానం. తన కూతురి భూత వర్తమానాల దృశ్యాలు మాటలకందవు. ఇలా తీయడం ఎలా సాధ్యం అని జుట్టు పీక్కోవాల్సి వస్తుంది. ఇదంతా కల్పనే కదా అనుకున్నా, నువ్వు నమ్మి తీరాల్సిందే అని ఆ దృశ్యాలు సవాలు విసురుతాయి.
  
  దర్శకుడు క్రిస్టఫర్ నోలన్, సంగీత దర్శకుడు హాన్స్ జిమ్మర్‌కి సింగిల్ పేజీలో కథ ఇచ్చి సంగీతం కంపోజ్ చేయమన్నాడట. అది చదివి థీమ్‌ని కంపోజ్ చేసి వినిపించాడట జిమ్మర్. గ్రీన్ మ్యాట్‌లు, బ్లూ మ్యాట్‌లు లేకుండా ముందుగానే గ్రాఫిక్స్ డిజైన్ చేసి వాటిని డిజిటల్ ప్రొజెక్టర్స్‌తో లొకేషన్‌లో ప్రొజెక్ట్ చేసి ఈ సినిమాని షూట్ చేశారు. గ్రాఫిక్స్ మీద ఆధారపడకుండా స్పేస్‌షిప్ లోపలి భాగం అంతా నిజంగానే నిర్మించారు. అంచేత ఐమ్యాక్స్ కెమేరా కదలికలకు ఇబ్బంది రావడంతో కెమేరామెన్ ఐమ్యాక్స్ కెమేరాను రీ డిజైన్ చేసుకొని వాడారు.
  
  ‘ఇంటర్‌స్టెల్లార్’ సినిమా ప్రాజెక్ట్ నిజానికి 2006లో ప్రారంభమైంది. అప్పుడు దర్శకుడు స్టీవెన్ స్పీల్‌బర్గ్. ఈ సినిమాకు నాలుగేళ్ళు రైటర్‌లాగా పనిచేశారు జొనాథన్ నోలన్. కాలిఫోర్నియా ఇన్‌స్టిట్యూట్ ఆఫ్ టెక్నా లజీలోరిలెటివిటి థియరీని అభ్యసించాడు. ఇంతలో పారమౌంట్ పిక్చర్స్ నుండి స్పీల్‌బర్గ్ తప్పుకోవడంతో మరో దర్శకుడు కావాల్సి వచ్చింది. జొనాథన్ నోలన్ తన సోదరుడు క్రిస్టఫర్ నోలన్‌ను రికమెండ్ చేశాడు. అలా 2012లో ఈ సినిమా పట్టాలెక్కింది. కూపర్‌గా నటించిన మాథ్యూ మెక్ కనౌగీ, తూరు మర్ఫీ (మెక్కింగి ఫో)తో నటించిన సన్నివేశాలు అత్యంత భావోద్వేగాలకు గురి చేస్తాయి. ఒకానొక దశలలో కూపర్ ప్రయాణం ఆపేసి కూతురితో ఉండచ్చు కదా అనేంతగా వీరిద్దరి మధ్య బంధాన్ని పటిష్ఠం చేశాడు దర్శకుడు. డా. మాన్ ప్రవర్తన ఈ సినిమాలో కాస్త వింతగా ఉంటుంది. అతను కూపర్‌ని చంపే ప్రయత్నం చేయకుండా ఉండి ఉంటే బాగుండనిపిస్తుంది. ఏది ఏమైనా ఇది అద్భుత దృశ్య భాండాగారం. చూడండి. మూడు గంటలపాటు అంతరిక్షంలో విహరించండి.
  
  విచిత్ర కథల... వెండితెర మెజీషియన్: క్రిస్టఫర్ నోలన్ హాలీవుడ్‌లో సుప్రసిద్ధ దర్శకుడు. ‘మెమెంటో’ (మన ‘గజిని’ సినిమాకు మూలం ఇదే), ‘బ్యాట్‌మన్ బిగిన్స్’, ‘ది డార్క్ నైట్’, ‘ఇన్‌సెప్షన్’ లాంటి అపురూప చిత్రాలను అందించింది ఆయనే. అద్భుతమైన ఊహాశక్తితో అంతు చిక్కని కథాంశాలను తెరకెక్కించడం ఆయన ప్రత్యేకత. ఆయన ప్రతి సినిమా ఒక పజిల్... కానీ, ప్రేక్షకులకు యమ క్రేజ్.
  
  విడుదల:
  2014 నవంబర్ 5 (యూఎస్‌ఎ)
  దర్శకుడు: క్రిస్టఫర్ నోలన్
  సినిమా నిడివి: 169 నిమిషాలు
  నిర్మాణ వ్యయం: 165 మిలియన్ డాలర్లు (దాదాపు 1,000 కోట్ల రూపాయలు)
  ఇప్పటి వరకూ వసూళ్లు: 597.2 మిలియన్ డాలర్లు (దాదాపు 3,700 కోట్లు)
  
   మదన్ (‘ఆ నలుగురు’ ఫేం) సినీ రచయిత  దర్శకుడు