యువ క్రికెటర్లను గుర్తించి, వారిలోని టాలెంట్‌ను వెలికి తీసేందుకు పాకిస్థాన్‌ క్రికెట్‌ బోర్డు ఓ సరికొత్త ప్రయోగానికి శ్రీకారం చుట్టింది. పాకిస్తాన్ సూపర్‌ లీగ్‌ (పీఎస్‌ఎల్‌) తరహాలో పాకిస్తాన్ జూనియర్ క్రికెట్‌ లీగ్‌ను తీసుకొచ్చేందుకు ప్రణాళికలు సిద్ధం చేస్తోంది. ఈ టోర్నీని ఈ ఏడాది అక్టోబర్ 1 నుంచి 15 వరకూ లాహోర్ వేదికగా నిర్వహించేందుకు వేగంగా పావులు కదుపుతోంది. ఈ నేపథ్యంలో జూనియర్‌ క్రికెట్‌ లీగ్‌పై ఆ దేశ వెటరన్‌ ఆటగాడు మహ్మద్‌ హఫీజ్‌ సంచలన కామెంట్స్‌ చేశాడు. 19 ఏళ్లు కూడా నిండని కుర్రాళ్లతో క్రికెట్‌ ఆడించడం చైల్డ్‌ లేబర్‌తో సమానమని వ్యాఖ్యానించాడు. జూనియర్ క్రికెట్ లీగ్ అనే ఐడియా పాక్‌లో క్రికెట్ వ్యవస్థని నాశనం చేస్తుందని అన్నాడు. యువ క్రికెటర్లకు ఇలాంటి వేదిక పాక్షికంగా లాభం చేకూర్చినప్పటికీ.. భవిష్యత్తులో మానసికంగా, శారీరకంగా సమస్యలు ఎదుర్కొనేలా చేస్తుందని తెలిపాడు. యుక్త వయసులో షార్ట్‌ క్రికెట్‌ ఆడటం వల్ల కుర్రాళ్లు బేసిక్స్‌ దగ్గరే ఆగిపోతారని, సుదీర్ఘ ఫార్మాట్‌ ఆడటం వారి కెరీర్‌ ఎదుగుదలకు తోడ్పడుతుందని అభిప్రాయపడ్డాడు. కాగా, భారత్‌లో జరిగే ఐపీఎల్‌లో ఆడాలంటే కుర్రాళ్ల వయసు కనీసం 19 ఏళ్లు నిండి ఉండాలన్న నిబంధన అమల్లో ఉన్న విషయం తెలిసిందే. ఒక వేళ ఆటగాడి వయసు 19 దాటకపోతే, అతనికి లిస్ట్‌ ఏ మ్యాచ్‌లు ఆడిన అనుభవమైనా ఉండాలి. ఈ నిబంధన కారణంగా భారత అండర్ 19 వరల్డ్ కప్ 2022 హీరోలు రఘువంశీ, మానవ్ పరాఖ్, సిద్ధార్థ్ యాదవ్ ఈ ఏడాది ఐపీఎల్‌ ఆడే అవకాశాన్ని కోల్పోయారు.  చదవండి: టీమిండియా విండీస్‌ పర్యటన షెడ్యూల్‌ ఖరారు..!

న్యూఢిల్లీ: భారత క్రికెట్ నియంత్రణ మండలి (బీసీసీఐ) శుక్రవారం కొత్త జూనియర్ సెలక్షన్ కమిటీని ప్రకటించింది. ఈ కమిటీకి చైర్మన్‌గా తమిళనాడు రంజీ జట్టు మాజీ కెప్టెన్‌ శ్రీధరన్‌ శరత్‌ను నియమించింది. సౌత్ జోన్ నుంచి శ్రీధరన్‌ శరత్‌, వెస్ట్ జోన్ నుంచి పాథిక్ పటేల్, సెంట్రల్ జోన్ నుంచి హర్విందర్ సింగ్ సోధి, ఈస్ట్ జోన్ నుంచి బెంగాల్ మాజీ ఫాస్ట్ బౌలర్ రణదేబ్ బోస్  ప్రాతినిధ్యం వహిస్తారని బీసీసీఐ పేర్కొంది.  ఇదిలా ఉంటే, జూనియర్ సెలక్షన్ కమిటీ చైర్మన్‌గా ఎంపికైన శ్రీధరన్‌ శరత్‌.. తమిళనాడు తరఫున 139 మ్యాచ్‌లు ఆడారు. ఇందులో 27 సెంచరీలు, 42 అర్ధ సెంచరీల సాయంతో  8700 పరుగులు(51 సగటులో) చేశాడు. శ్రీధరన్‌ శరత్‌ తమిళనాడు తరపున 100 రంజీ మ్యాచ్‌లు ఆడిన తొలి క్రికెటర్‌గా గుర్తింపు పొందారు. శ్రీధరన్‌ శరత్‌ నేతృత్వంలోని కొత్త సెలెక్షన్ కమిటీ త్వరలో అండర్-19 ప్రపంచకప్‌ జట్టును ఎంపిక చేయాల్సి ఉంది. అండర్ -19 ప్రపంచకప్ వచ్చే ఏడాది వెస్టిండీస్‌లో జరుగనుంది.  చదవండి: గంటల వ్యవధిలో పాక్‌ క్రికెట్‌కు మరో షాక్‌.. ?


 
 చెన్నై : శ్రీలంక అండర్-15 క్రికెట్ టీమ్ చెన్నై నుంచి స్వదేశానికి వెనుతిరిగింది. భద్రతా కారణాలరీత్యా జూనియర్ క్రికెటర్లు ఆడకుండానే ఇంటిముఖం పట్టారు.  అండర్-15 టోర్నమెంట్లో పాల్గొనేందుకు గత రాత్రి కొలంబో నుంచి 16మంది జట్టు సభ్యులు చెన్నై చేరుకున్న విషయం తెలిసిందే. అయితే ఆటగాళ్లకు భద్రత కల్పించలేమని తమిళనాడు పోలీసులు చేతులెత్తేశారు.
 
 షెడ్యూల్ ప్రకారం ఈ టోర్నమెంట్ స్థానిక నెహ్రు స్టేడియంలో ఈనెల 4వ తేదీ నుంచి 7వ తేదీ వరకూ జరగాల్సి ఉంది. ముఖ్యమంత్రి జయలలితపై అనుచిత వ్యాసాన్ని ప్రచురించిన శ్రీలంక రక్షణ శాఖ ధోరణిపై  తమిళనాడు అట్టుడుకుతున్న విషం తెలిసిందే. రాష్ట్రవ్యాప్తంగా ఆగ్రహం పెల్లుబుకుతున్న నేపథ్యంలో శ్రీలంక ఆటగాళ్లకు రక్షణ కల్పించలేమని పోలీసులు స్పష్టం చేశారు.
 (ఇంగ్లీషు కథనం ఇక్కడ చదవండి)