కాకతీయ ఉత్సవాలపై స్పష్టత వచ్చేనా...‘గ్రేటర్ వరంగల్’ ఆశ నెరవేర్చేనా... టెక్స్‌టైల్ పార్క్’కు భూ లభ్యత ఫైనల్ అయ్యేనా...
  
 పారిశ్రామిక కారిడార్‌కు ముందడుగు పడేనా...
 రైల్వే వ్యాగన్’ భూ సమస్య కొలిక్కి వచ్చేనా...
 కోచ్ ఫ్యాక్టరీ ఏర్పాటుపై మౌనం వీడేనా...
  
 వరంగల్ : ముఖ్యమంత్రి కె.చంద్రశేఖరరావు మరోసారి జిల్లాకు వస్తున్నారు. అభివృద్ధి, ప్రభుత్వ పథకాల అమలు తీరుతెన్నులపై సమీక్ష కోసం సోమవారం ఆయన జిల్లాకు రాను న్నారు. తెలంగాణ ముఖ్యమంత్రిగా బాధ్యతలు చేపట్టిన ఆరు నెలల్లోనే కేసీఆర్ జిల్లాకు వస్తుండడం ఇది మూడోసారి. ప్రజాకవి కాళోజీ జయంతి ఉత్సవాల నేపథ్యంలో సెప్టెంబర్ 9, కొమురవెల్లి మల్లికార్జునస్వామి కల్యాణం సందర్భంగా ఈ నెల 21న ముఖ్యమంత్రి కేసీఆర్ జిల్లాకు వచ్చారు. రెండుసార్లు ప్రత్యేక కార్యక్రమాల కోసం వచ్చి వెళ్లారు. ఈ పరిస్థితుల్లో జిల్లా అభివృద్ధి ప్రణాళికలపై సమీక్షించలేకపోయూరు. ఈ క్రమంలో అభివృద్ధిపై సమీక్ష కోసమే ప్రత్యేకంగా సోమవారం జిల్లాకు వస్తున్నారు. ముఖ్యమంత్రి కేసీఆర్... తాజా పర్యటనపై జిల్లా ప్రజల్లో ఆశలు పెరుగుతున్నాయి. ప్రధానంగా పారిశ్రామిక కారిడార్, కాకతీయ ఉత్సవాలు, వరంగల్ నగర అభివృద్ధి ప్రణాళికలపై సీఎం ప్రధానంగా దృష్టి పెట్టనున్నట్లు అధికారులు చెబుతున్నారు.
  
 పారిశ్రామిక కారిడార్...
 
 తెలంగాణ పారిశ్రామిక అభివృద్ధి అంతా వరంగల్ కేంద్రంగానే ఉంటుందని రాష్ట్ర ప్రభుత్వం చెబుతోంది. హైదరాబాద్-వరంగల్-భూపాలపల్లి ప్రాంతాలను కలుపుతూ పారిశ్రామిక కారిడార్ ఏర్పాటు ప్రతిపాదన దశలో ఉంది. హైదరాబాద్-వరంగల్ నగరాల మధ్య పారిశ్రామిక అభివృద్ధికి వేగంగా చర్యలు తీసుకుంటున్నట్లు ప్రభుత్వం ప్రకటించింది. గోదావరి నది నుంచి నీటిని, సింగరేణి బొగ్గును వనరులుగా వినియోగించుకోవచ్చని పేర్కొంటోంది. కరెంట్ ఉత్పత్తికి సంబంధించి సింగరేణి కొత్తగా చేపట్టనున్న గనులు జిల్లాలోనే ఉన్నాయి. వీటితో రాష్ట్ర ప్రభుత్వం కొత్తగా విద్యుత్ ఉత్పత్తి కేంద్రాలను ఏర్పాటు చేయాలని భావిస్తోంది. ఇలా అన్ని వనరులతో పరిశ్రమల ఏర్పాటుకు అనువుగా 31,334 ఎకరాల భూములు ఉన్నాయని జిల్లా యంత్రాంగం ఆగస్టులోనే నిర్ధారించింది. జిల్లాలో ప్రస్తుతం ఒక్క భారీ పరిశ్రమ లేదు. టెక్స్‌టైల్ పార్క్ ఏర్పాటుతో ఈ వెలితి తీరుతుందని జిల్లా ప్రజలు కోటి ఆశతో ఉన్నారు. టెక్స్‌టైల్ పార్కు ఏర్పాటుకు అవసరమైన 500 ఎకరాల లభ్యతను సీఎం కేసీఆర్ ఏరియల్ సర్వేలో గుర్తించే అవకాశం ఉంది. టెక్స్‌టైల్ పార్క్ అధ్యయనం కోసం ఎంపీ, ఎమ్మెల్యేలను ఇతర రాష్ట్రాలకు వెళ్లాలని స్వయంగా ఆయన ఆదేశించారు. దీంతో ఈ పరిశ్రమ ఏర్పాటుపై జిల్లా ప్రజల్లో ధీమా పెరుగుతోంది. భూపాలపల్లి ప్రాంతంలోనే కొత్తగా విద్యుత్ ఉత్పత్తి కేంద్రాల ఏర్పాటు చేసే అంశం పరిశీలనలో ఉంది. ఉక్కు పరిశ్రమ ఏర్పాటు బయ్యారంలో కాకుండా మహబూబాబాద్ పరిసరాల్లో లేదా ఖమ్మం జిల్లాలో ఏర్పాటు చేయాలనే ప్రతిపాదనలు ఉన్నాయి. ప్రస్తుతం ప్రతిపాదనల దశలో ఉన్న మణుగూరు-రామగుండం రైల్వే లేను ఏర్పాటు అయితే బొగ్గు ఆధారిత పరిశ్రమలు మరికొన్ని జిల్లాలో కొలువుదీరే అవకాశం ఉంది. ఆంధ్రప్రదేశ్ విభజన చట్టంలో జిల్లాలో రైల్వే కోచ్ ఫ్యాక్టరీ ఏర్పాటు ప్రతిపాదన ఉంది. దీనిపై స్పష్టత రావడంలేదు. ఐదేళ్ల క్రితం మంజూరైన రైల్వే వ్యాగన్ వర్క్‌షాప్ ఏర్పాటుకు అవసరమైన భూమిని అప్పగించే విషయంలో ఆలస్యమవుతుండడంతో ఈ ప్రాజెక్టు వెళ్లిపోయే పరిస్థితి నెలకొంది. ఈ క్రమంలో చేపట్టిన కేసీఆర్ పర్యటనలో భూ సేకరణపై స్పష్టత వచ్చే అవకాశం ఉంది.
 
 కాకతీయ ఉత్సవాలు...
 
 వచ్చే ఏడాది జనవరి 9, 10, 11 తేదీల్లో  కాకతీయ ఉత్సవాలను జాతీయస్థాయిలో నిర్వహించేందుకు రాష్ట్ర ప్రభుత్వం సిద్ధమైంది. ముఖ్యమంత్రి కేసీఆర్ సమీక్షలో దీనిపై అధికారికంగా నిర్ణయం తీసుకునే అవకాశం ఉంది. కాకతీయ పాలకురాలు రుద్రమాదేవి పట్టాభిషిక్తురాలై 800 ఏళ్లు పూర్తయిన సందర్భంగా రాష్ట్ర ప్రభుత్వం 2013 డిసెంబర్ నుంచి 2014 డిసెంబర్ వరకు నిర్వహించిన కాకతీయ ఉత్సవాలను నిర్వహించింది. ఇవి తూతుమంత్రంగానే జరిగాయి. ఉత్సవాల ప్రారంభోత్సవం, ముగింపు కార్యక్రమాలు మాత్రమే కాస్త చెప్పుకునే విధంగా నిర్వహించారు. సమైక్య రాష్ట్రంలో నిధుల కొరత కారణంగా కాకతీయ ఉత్సవాలు వెలవెలబోయాయని, ప్రత్యేక రాష్ట్రం ఏర్పడితే కాకతీయ ఉత్సవాలను ఘనంగా నిర్వహిస్తామని ఉద్యమనేతగా కె.చంద్రశేఖరరావు పలుమార్లు హామీ ఇచ్చారు. ఇచ్చిన మాట మేరకు ముఖ్యమంత్రి హోదాలో కేసీఆర్ కాకతీయ ఉత్సవాలు నిర్వహణపై స్పష్టత ఇస్తారో వేచి చూడాల్సిందే.
  
 వరంగల్... గ్రేటరయ్యేనా !
 
 హైదరాబాద్ తర్వాత తెలంగాణలో పెద్ద నగరంగా ఉన్న వరంగల్ అభివృద్ధికి ప్రత్యేక ప్రణాళిక రూపొందించాలని ముఖ్యమంత్రి ఇప్పటికే జిల్లా అధికారులను ఆదేశించారు. సమీక్ష సమావేశం సందర్భంగా వరంగల్ నగరం అభివృద్ధికి కచ్చితమైన ప్రణాళికలను ఖరారు చేసే అవకాశాలు ఉన్నాయని అధికారులు చెబుతున్నారు. ఎన్నికల ప్రచారంలో టీఆర్‌ఎస్ అధినేత కేసీఆర్... వరంగల్ నగరాన్ని హైదరాబాద్‌తో సమానంగా అభివృద్ధి చేస్తామని ప్రకటించారు. నగర జనాభా 10 లక్షలకు చేరుకున్నా... ఇప్పటికీ మౌలిక వసతుల విషయంలో దయనీయంగా ఉంది.  వరంగల్ నగరపాలక సంస్థను గ్రేటర్ వరంగల్‌గా మార్చాలనే డిమాండ్ ఐదేళ్లుగా పెరుగుతోంది. వరంగల్‌కు గ్రేటర్ హోదా కల్పిస్తే కీలక ప్రాజెక్టులకు వరంగల్ నగరం అర్హత పొందుతుంది. తాగునీటి సరఫరా, అండర్ గ్రౌండ్ డ్రెరుునేజీ, వీధి దీపాలు, రవాణా వ్యవస్థ, ఆర్థిక స్థితిగతులు, కంప్యూటరీకరణ, మౌళిక వసతుల కల్పన వంటి అంశాలకు అనేక రకాలు నిధులు వచ్చే ఆస్కారం ఉంది.  2010 నుంచి గ్రేటర్ అంశం తెరపైకి వచ్చింది. గత పాలక వర్గాలు గ్రేటర్ కోసం తీర్మానం చేసి రాష్ట్ర ప్రభుత్వానికి పంపించాయి. 2012 మార్చిలో నగర శివారులోని 42 గ్రామ పంచాయతీలను రద్దు చేస్తూ రాష్ట్ర పంచాయతీ రాజ్ శాఖ ఉత్తర్వులు జారీ చేసింది. అవే గ్రామాలను నగర  పాలక సంస్థలో విలీనం చేసుకుంటున్నట్లు రాష్ట్ర పురపాలక ప్రకటించింది. గ్రేటర్ హోదాకు అవసరమైన అన్ని అర్హతలు ఉన్నా... ప్రభుత్వం ఉత్తర్వులు జారీ చేయడంలేదు. గ్రామాల విలీనం, డివిజన్ల పునర్విభజన ప్రక్రియ అడ్డంకులతో వరంగల్ నగరపాలక సంస్థకు ఇటీవల ఎన్నికలు సైతం జరగలేదు. పాలకవర్గం లేక అభివృద్ధి కుంటుపడింది.
  
  సీఎం పర్యటన షెడ్యూల్
 
  ఉదయం 10.50 గం. : హైదరాబాద్‌లో తన నివాసం నుంచి బయలుదేరుతారు..
 11.00    :    బేగంపేట ఎరుుర్‌పోర్టుకు చేరుకుంటారు..
 11.05    :    హెలికాప్టర్‌లో బయలుదేరుతారు..
 11.30    :    హన్మకొండ ఆర్ట్స్ కాలేజీ గ్రౌండ్‌లో దిగుతారు. ప్రతిపాదిత రింగురోడ్డు, సమీప ప్రాంతాలనే ఏరియల్  సర్వే చేస్తారు..
 12.00    :    కలెక్టరేట్‌లో సమీక్ష సమావేశం..
 2.00    :    ‘కెప్టెన్’ ఇంట్లో మధ్యాహ్న భోజనం..
 3.00    :    కెప్టెన్ ఇంటి నుంచి బయలుదేరుతారు..
 3.10    :    చింతగట్టు, జయగిరి సమీపంలోని టెక్స్‌టైల్ పార్కు ప్రతిపాదిత స్థలం సందర్శన..
 3.30    :    అక్కడి నుంచి రిటర్న్..
 4.00    :    ఆర్ట్స్ కాలేజీకి చేరుకుంటారు..
 4.05    :    హెలికాప్టర్‌లో హైదరాబాద్‌కు  తిరుగు పయనం.
  


 క్షేత్రస్థాయిలోనే భూ సమస్యల సత్వర పరిష్కారానికి కలెక్టర్ నిర్ణయం పిటిషన్‌లను రెవెన్యూ గ్రీవెన్స్‌లోనే ఇవ్వాల్సి ఉంటుంది. ఇందుకోసం అన్ని ఏర్పాట్లు పూర్తయ్యాయి.
  ఆ గ్రీవెన్స్‌లో ఎవరుంటారు?
  జిల్లాలోని ఖమ్మం, కొత్తగూడెం, పాల్వంచ, భద్రాచలం ఆర్డీవో కార్యాలయాల్లో ప్రతి సోమవారం జరిగే ఈ గ్రీవెన్స్ కార్యక్రమంలో రెవెన్యూ ఉన్నతాధికారులంతా పాల్గొంటారు. ఆర్డీవోతో పాటు రెవెన్యూ డివిజన్ పరిధిలోనికి వచ్చే తహశీల్దార్లంతా హాజరవుతారు. వీరితో పాటు అన్ని మండలాలకు చెందిన సర్వేయర్లు కూడా అక్కడే ఉంటారు. జిల్లాలో భూ అంశాలను సమన్వయపరిచే జాయింట్ కలెక్టర్ కూడా ఈ కార్యక్రమానికి హాజరవుతారు. అయితే, ఆయన ప్రతి వారం ఒక్కో ఆర్డీవో కార్యాలయానికి వెళ్లి గ్రీవెన్స్‌లో పాల్గొంటారు. అంటే నెలకోసారి ఒక ఆర్డీవో కార్యాలయంలో జరిగే గ్రీవెన్స్‌కు ఆయన హాజరవుతారు. అక్కడే ఉన్నతాధికారులతో ఆ నెలలో వచ్చిన ఫిర్యాదులు, వినతులను పరిశీలించి సమీక్ష జరుపుతారు.
 
  పరిష్కరించే అంశాలేంటి?
  ఈ గ్రీవెన్స్‌లో రెవెన్యూ శాఖకు సంబంధించిన అంశాల పిటిషన్లు తీసుకుంటారు. ముఖ్యంగా భూ సమస్యలకు ప్రాధాన్యం ఉంటుంది. సర్వే కాని భూములు, పట్టా పుస్తకాలు ఇవ్వనివి, ఈ పహాణీలు లేనివి, కుటుంబ సభ్యుల వివాదాలు, ప్రైవేటు వ్యక్తులతో వివాదాలు, రిజిస్ట్రేషన్ల సమస్యలకు ఈ గ్రీవెన్స్‌లో పిటిషన్లు తీసుకుంటారని అధికారులు చెపుతున్నారు. వీటితో పాటు రెవెన్యూ శాఖకు సంబంధించిన అన్ని సమస్యలపై ఇక్కడ దరఖాస్తులు ఇవ్వవచ్చు.
 
  ఆర్డీవో కార్యాలయాల్లోనే ఎందుకు..?
  వాస్తవానికి గ్రీవెన్స్‌డే కింద పిటిషన్ ఇచ్చి జిల్లా కలెక్టర్ దృష్టికి తమ సమస్యను తీసుకెళ్లాలంటే కలెక్టరేట్‌కు తప్పనిసరిగా రావాల్సి వచ్చేది. ఇప్పుడు ఆర్డీవో కార్యాలయాల్లోనే రెవెన్యూ గ్రీవెన్స్‌ను నిర్వహించడం ద్వారా బాధితుల విలువైన సమయం, డబ్బు వృథా కావనేది అధికారుల ఆలోచన. మళ్లీ ఆ సమస్య పరిష్కారం కాకపోయినా ఖమ్మం వరకు వచ్చే పనిలేకుండా ఆర్డీవో కార్యాలయంలోనో, తహశీల్దార్ కార్యాలయంలోనో వాకబు చేసుకోవచ్చు.
 
  దీంతోపాటు ప్రతి వారం కలెక్టరేట్‌లో గ్రీవెన్స్ పిటిషన్‌ల సంఖ్య కూడా తగ్గుతుంది. తద్వారా పిటిషన్‌ల పరిష్కారం సులభమవుతుంది. మరోవైపు ఆర్డీవో కార్యాలయాల్లో పిటిషన్లు ఇవ్వడం ద్వారా క్షేత్రస్థాయిలోనే సమస్యలు పరిష్కరించుకోవచ్చు. ఒకవేళ సమస్య పరిష్కారం కాకుంటే.. పిటిషన్‌దారుడు స్థానిక అధికారులకే పిటిషన్ ఇచ్చాడు కనుక తన పిటిషన్ ఏమైందని అధికారులను ప్రశ్నించవచ్చు. మరోవైపు రెవెన్యూ అధికారుల పనితీరు కూడా సమీక్షల్లో వెల్లడయ్యే అవకాశం ఉంది.
 
 ఆర్డీవో కార్యాలయాల్లోనూ పరిష్కారం కాని పక్షంలో కలెక్టర్ దృష్టికి ప్రభుత్వ అధికారులే సమస్యను తీసుకువస్తారు. ముఖ్యంగా భూసమస్యలు జిల్లాలో ఎక్కువగా ఉన్నాయని గ్రీవెన్స్‌డే పిటిషన్‌లు చెపుతున్నాయి. ఈ సమస్యలపై ప్రతినెలా 4వేల వరకు పిటిషన్లు వస్తున్నాయని అంచనా. ఈ సమస్యలన్నింటినీ ఆర్డీవో కార్యాలయాల స్థాయిలో పరిష్కరించేందుకే ఈ కార్యక్రమం ఏర్పాటు చేస్తున్నట్టు జిల్లా ఉన్నతాధికారులు చెపుతున్నారు.