ఇస్లామాబాద్‌: పాకిస్తాన్ మాజీ మంత్రి, ఇమ్రాన్ ఖాన్‌కు అత్యంత సన్నిహితుడిగా పేరున్న ఫవాద్ చౌదరి లైవ్ టీవీ షోలో బోరున విలపించారు. దేశద్రోహం కేసులో అరెస్టై ఇటీవలే బెయిల్‍పై విడుదలైన ఆయన.. జైలు జీవితాన్ని తలుచుకుని కన్నీటి పర్యంతమయ్యారు. ఇందుకు సంబంధించిన వీడియో సామాజిక మాధ్యమాల్లో వైరల్‌గా మారింది. పాకిస్తాన్ ఎన్నికల సంఘం అధికారులను బెదిరించారనే ఆరోపణలతో ఫవాద్ చౌదరిపై దేశద్రోహం కేసు నమోదు చేసి కొద్ది రోజుల క్రితం అరెస్టు చేశారు.  తాను జైలులో ఉన్నప్పుడు జీవితం ఎలా ఉందని, కుటుంబసభ్యుల పరిస్థితి ఏంటని టీవీ యాంకర్ ఫవాద్‌ను ప్రశ్నించారు. తనను అరెస్టు చేసినప్పుడు పోలీసులు వ్యవహరించిన తీరుపై ఫవాద్ ఆవేదన వ్యక్తం చేశారు. తన చేతికి సంకెళ్లు, మొహానికి ముసుగు వేసి కోర్టుకు తీసుకెళ్లారని, ఫోన్ కూడా లాక్కున్నారని చెప్పారు. ఆ ఫోన్ ఇంకా తనకు తిరిగి ఇవ్వలేదన్నారు. జైల్లో ఉన్నప్పుడు కుమారులు తనను చూసేందుకు వచ్చినప్పుడు చాలా బాధేసిందని చెప్పుకొచ్చారు. ఈక్రమంలోనే బోరున విలపించారు. కన్నీటిని చేతులతో తుడుచుకుంటూనే మాట్లాడారు. ఫవాద్‌కు ఇస్లామాబాద్ కోర్టు బెయిల్ మంజూరు చేయడంతో ఆయన జైలు నుంచి విడుదల అయ్యారు. మరోసారి బెదిరింపు వ్యాఖ్యలు చేయొద్దనే షరతుతో న్యాయస్థానం ఆయనకు బెయిల్ మంజూరు చేసింది. చదవండి: రోడ్డెక్కిన అమెరికాలోని గూగుల్‌ ఉద్యోగులు..


 లండన్‌: టీవీ లైవ్ ఇంటర్వ్యూ చేస్తూ మహిళను అనుచితంగా తాకినందుకు ఓ ప్రముఖ జర్నలిస్టుపై తీవ్ర విమర్శలు వెల్లువెత్తుతున్నాయి. ఇందుకు సంబంధించిన వీడియో ప్రస్తుతం సోషల్‌ మీడియాలో వైరల్‌గా మారింది. బీబీసీ జర్నలిస్ట్‌ బెన్‌ బ్రౌన్‌ ఇంగ్లండ్‌ లోని బ్రాడ్‌ఫోర్డ్‌లో నార్మన్‌ స్మిత్‌ అనే వ్యక్తిని ఇంటర్వ్యూ చేస్తున్నారు. లేబర్‌ పార్టీ మేనిఫెస్టో విడుదల సందర్భంగా కొన్ని కీలక విషయాలపై వీరు చర్చిస్తున్నారు. ఇంతలో బెన్‌ బ్రౌన్‌కు పరిచయం ఉన్న ఓ మహిళ అక్కడికి వచ్చింది.
  
 ఇంటర్వ్యూ జరుగుతుండగానే బొటనవేలుతో సక్సెస్‌ అంటూ చూపిస్తూ అతడిని పలకరించింది. లైవ్ ఇంటర్వ్యూకు సమస్య తలెత్తుతుందని భావించిన బ్రౌన్‌ వెంటనే ఆ మహిళను కాస్త పక్కకు జరుగు అంటూ అసభ్యకర రీతిలో టచ్ చేస్తూ ఆమెను వెనక్కి జరిపాడు. అనుకోని సంఘటనతో కంగుతిన్న మహిళ వెంటనే తేరుకుని, బెన్‌ బ్రౌన్‌ను ఒక్క దెబ్బకొట్టి మరీ అక్కడినుంచి వెళ్లిపోయింది. ఎంత బిజీ పనులలో ఉన్నా మహిళల పట్ల ఆ తరహాలో అసభ్యంగా ప్రవర్తించకూడదని, మహిళలను అలా తాకవద్దంటూ నెటిజన్లు కామెంట్లు చేస్తున్నారు. బెన్ మాత్రం అనుకోకుండా అలా జరిగిపోయిందని, ఉద్దేశపూర్వకంగా చేయలేదని వివరణ ఇచ్చుకున్నా అలా ప్రవర్తించడం ముమ్మాటికీ తప్పేనంటూ హితవు పలికారు.