సాక్షి, నల్లగొండ క్రైం : ప్రేమించిన వ్యక్తి పెళ్లికి నిరాకరించడంతో యువతి ఉరేసుకొని ఆత్మహత్య చేసుకున్న సంఘటన శుక్రవారం వెలుగులోకి వచ్చింది. పోలీసులు, కుటుంబ సభ్యులు తెలిపిన వివరాల ప్రకారం.. నిడమనూరు మండలంలోని బొక్క ముంతలపాడు గ్రామానికి చెందిన మనీష(25) తల్లి నాగేంద్రమ్మతో కలిసి పట్టణంలోని సాగర్‌ రోడ్డులో అయ్యప్పగుడి సమీపంలో నివాసం ఉంటున్నారు. నాగేంద్రమ్మ కూరగాయల వ్యాపారం చేస్తూ కుమార్తెను ఎమ్మెస్సీ వరకు చదివించింది. సమీప బంధువు అయిన మిర్యాలగూడ మండలం అన్నపురెడ్డి గూడేనికి చెందిన బోదల రాజేశ్, మనీషలు నాలుగేళ్లుగా ప్రేమించుకున్నారు. పెళ్లి చేసుకుంటానని మనీష కుటుంబసభ్యులకు రాజేశ్‌ భరోసా ఇచ్చాడు. అయితే ఆలస్యం అవుతుండడంతో పెళ్లి విషయమై స్పష్టత ఇవ్వాలని మనీష కుటుంబ సభ్యులు తమ ఇంటికి పిలిచి అడిగారు. తన కుటుంబ సభ్యులను ఒప్పిస్తానని కొంతసమయం పడుతుందని చెప్పాడు. దీనికితోడు ఇతర సంబంధాలు చూస్తే చెడగొడుతున్నాడు. ఈ క్రమంలో గురువారం సాయంత్రం తల్లి ఇంట్లో లేని సమయంలో మనీష చున్నీతో ఉరేసుకొని ఆత్మహత్య చేసుకుంది. ఇంటికి వెళ్లిన తల్లి తలుపు కొట్టినా తెరవక పోవడంతో సమీపంలోని వారితో కలిసి డోర్‌ను తొలగించి వేలాడుతున్న కూతురు మృతదేహాన్ని కిందికి దింపారు. స్వగ్రామంలో అంత్యక్రియలు నిర్వహించారు. విషయం పోలీసులకు చేరడంతో తల్లిని వివరాలు అడిగి తెలుసుకోగా పెళ్లి విషయం ప్రస్తావించానని, రాజేశ్‌తో ప్రేమ వ్యవహారం ఉందని, పెళ్లి సంబంధాలను చెడగొట్టడంతోపాటు అతడు పెళ్లి చేసుకోలేదని తెలిపింది. అయితే తన కమార్తె ఆత్మహత్యకు రాజేశ్‌యే కారణమని మృతురాలి తల్లి పోలీసులకు ఫిర్యాదు చేసింది. ఈమేరకు కేసు నమోదు చేసుకొని దర్యాప్తు చేస్తున్నట్లు వన్‌ టౌన్‌ ఎస్సై సందీప్‌రెడ్డి తెలిపారు. 

తణుకు: ప్రేమించి పెళ్లి చేసుకుంటానని మోసం చేసి తనను శారీరకంగా అనుభవించి ముఖం చాటేస్తున్నాడని ఆరోపిస్తూ యువతి తన ప్రియుడి ఇంటి ముందు బైఠాయించింది. తణుకు మండలం దువ్వ గ్రామానికి చెందిన జవ్వాది మాధురినాగనవ్య అనే యువతి అదే గ్రామానికి చెందిన లంకదాసు శివగణేష్‌ ఏడాదిగా ప్రేమించుకుంటున్నారు. తణుకులోని ఒక సెల్‌ దుకాణంలో వీరిద్దరూ పనిచేస్తుండగా వీరి మధ్య ప్రేమ చిగురించింది. అయితే పెళ్లి చేసుకోవడానికి నిరాకరిస్తున్నాడనే నెపంతో ఫిబ్రవరిలో శివగణేష్‌పై తణుకు రూరల్‌ పోలీసుస్టేషన్‌లో ఆమె ఫిర్యాదు చేసింది.  దీనిపై కేసు నమోదు చేసిన పోలీసులు గణేష్‌ను అరెస్టు చేసి రిమాండ్‌కు తరలించారు. ఇటీవల బెయిల్‌పై వచ్చిన గణేష్‌ కేసు వాపసు తీసుకోకపోతే చంపేస్తానని బెదిరిస్తున్నాడంటూ యువతి ఆరోపిస్తోంది. శీతలపానీయాల్లో మత్తుమందు కలిపి తనను శారీరకంగా అనుభవించాడని ఆమె ఆరోపణలు చేస్తోంది. గణేష్‌ తండ్రి బాబూరావు సైతం పెళ్లి చేస్తానని మాట ఇచ్చి ఇప్పుడు మాటతప్పారని చెబుతోంది.  మరోవైపు గ్రామానికి చెందిన ఓ టీడీపీ నాయకుడు సైతం తనకు ఫోన్‌ చేసి చంపేస్తానని బెదిరిస్తున్నాడని బాధితురాలు కన్నీటి పర్యంతమవుతోంది. తనకు ప్రాణహాని ఉందని తనకు న్యాయం జరిగే వరకు పోరాటం కొనసాగిస్తానని ఆమె స్పష్టం చేస్తోంది. తణుకు సర్కిల్‌ ఇన్‌స్పెక్టర్‌ కేఏ స్వామి, రూరల్‌ ఎస్సై సీహెచ్‌వీ రమేష్‌లు సంఘటనా స్థలానికి చేరుకుని బాధితురాలి నుంచి వివరాలు సేకరించారు. గణేష్‌ కుటుంబసభ్యులు అందుబాటులో లేరు.    


 ప్రియుడి ఇంటి ముందు ఆందోళన
 బాధితురాలిది నల్లగొండ జిల్లా రెడ్డిగూడెం
 
 తాడిపత్రి రూరల్‌(అనంతపురం) : తెలంగాణ యువతి పెళ్లి కోసం తను ప్రేమించిన ఆంధ్రప్రదేశ్‌ యువకుడి ఇంటి వద్ద ఆందోళనకు దిగింది. వివరాల్లోకెళితే.. అనంతపురం జిల్లా తాడిపత్రి మండలం గంగాదేవిపల్లికి చెందిన చంద్రకాంత్‌రెడ్డి బీటెక్‌ చదివాడు. ఆరేళ్ల క్రితం హైదరాబాద్‌లో సాఫ్ట్‌వేర్‌ ఇంజినీర్‌గా ఉద్యోగంలో చేరాడు. ఆ సమయంలో అదనపు కోర్సు కోసం శిక్షణ కేంద్రానికి వెళ్లాడు. ఎంబీఏ చదివిన నల్లగొండ జిల్లా రెడ్డిగూడెంకు చెందిన చైతన్య అనే యువతి కూడా అదే కేంద్రంలో శిక్షణ తీసుకుంటోంది. అలా ఏర్పడిన వీరి పరిచయం కాస్తా ప్రేమకు దారితీసింది.
 
 మూడు నెలల నుంచి చంద్రకాంత్‌రెడ్డి చైతన్యతో మాట్లాడటం మానేశాడు. కనిపించకుండా తిరుగుతున్నాడు. ఆఖరికి ఫోన్‌కూడా రిసీవ్‌ చేసుకోవడం లేదు. దీంతో చైతన్య శుక్రవారం గంగాదేవిపల్లికి చేరుకుంది. ఆ సమయంలో ప్రియుడు గ్రామంలో లేడు. దీంతో ఆమె ప్రియుడి ఇంటి వద్ద ఆందోళనకు దిగింది. చంద్రకాంత్‌రెడ్డికి ఇష్టం ఉంటే పెళ్లి చేసుకో.. మా ఇంటి ముందుకు ఎందుకు వచ్చావు అంటూ చైతన్యతో చంద్రకాంత్‌ కుటుంబసభ్యులు మండిపడ్దారు. తనను పెళ్లి చేసుకుంటానని హామీ ఇచ్చేంతవరకూ ఇక్కడి నుంచి కదిలేది లేదని ఆమె భీష్మించింది. ఈ విషయంపై బాధితురాలి నుంచి ఎటువంటి ఫిర్యాదూ అందలేదని రూరల్‌ ఎస్‌ఐ నారాయణరెడ్డి పేర్కొన్నారు.