సాక్షి, మదనపల్లె : అన్నమయ్య జిల్లాలోని మదనపల్లె పట్టణానికి సంబంధించి కొత్త మాస్టర్‌ ప్లాన్‌ సిద్ధమైంది. అమృత్‌ పథకంలో భాగంగా పలమనేరు, కుప్పం, మదనపల్లె పట్టణాభివృద్ధి సంస్థ(పీకేఎం–ఉడా) ఆధ్వర్యంలో స్కై గ్రూప్‌ కన్సల్టెంట్‌ సహకారంతో జీఐఎస్‌(జియోగ్రఫిక్‌ ఇన్ఫర్మేషన్‌ సిస్టం) ఆధారిత మాస్టర్‌ప్లాన్‌–2041 రూపకల్పన జరిగింది. ప్రతి 20 ఏళ్లకు ఒకసారి రూపొందించే మాస్టర్‌ప్లాన్‌ను పెరుగుతున్న జనాభా, ట్రాఫిక్, పట్టణ భవిష్యత్‌ అవసరాలను దృష్టిలో ఉంచుకుని సమగ్రంగా తయారుచేయించారు. దీనికి సంబంధించి డ్రాఫ్ట్‌ మాస్టర్‌ప్లాన్‌ను ప్రజల పరిశీలన కోసం 15 రోజుల పాటు పీకేఎం–ఉడా కార్యాలయంలో ప్రదర్శనకు ఉంచి అభ్యంతరాలు తెలపాల్సిందిగా కోరారు. ఈ క్రమంలో చేయాల్సిన మార్పులపై సుమారు 25వరకు అర్జీలు అందాయి. వీటిని క్షేత్రస్థాయిలో పరిశీలించి సవరణ చేసిన ప్లాన్‌ను డైరెక్టరేట్‌ ఆఫ్‌ టౌన్‌ అండ్‌ కంట్రీప్లానింగ్‌(డీటీసీపీ)కు పంపుతామని, అక్కడి నుంచి అనుమతులు వచ్చిన వెంటనే కొత్త మాస్టర్‌ప్లాన్‌ ఆధారంగా చేసుకుని నిర్మాణాలకు అనుమతులు మంజూరు చేస్తారు. మాస్టర్‌ ప్లాన్‌కు సంబంధించిన పూర్తి వివరాలతో ప్రత్యేక కథనం.  జిల్లాలో అతిపెద్ద పట్టణం మదనపల్లె. 35వార్డులు, 44 వార్డు సచివాలయాలు, 14.2 చదరపు కిలోమీటర్ల విస్తీర్ణం ఉంటుంది. సుమారు 2లక్షలకు పైగా జనాభా ఉన్నారు. పట్టణంలో గృహ, వాణిజ్యసముదాయాల నిర్మాణాలకు సంబంధించి జీఓ.ఎం.ఎస్‌.నెం.447, మున్సిపల్‌ అడ్మినిస్ట్రేషన్‌.5.10.2001న ఆమోదించిన మాస్టర్‌ప్లాన్‌ను ఆధారంగా చేసుకుని అనుమతులు మంజూరుచేస్తున్నారు. ప్రతి 20 ఏళ్లకు ఒకసారి మున్సిపాలిటీకి సంబంధించి మాస్టర్‌ప్లాన్‌ను రూపొందించి, క్షేత్రస్థాయిలో అమలుకు ముందు డ్రాఫ్ట్‌ప్లాన్‌ను ప్రజల పరిశీలనకు ఉంచి, అభ్యంతరాలను పరిగణనలోకి తీసుకుని డీటీసీపీ అనుమతులతో అమలుచేయాల్సి ఉంటుంది. మదనపల్లె మున్సిపాలిటీకి సంబంధించి రానున్న 20 ఏళ్లలో ప్రజల భవిష్యత్‌ అవసరాలను దృష్టిలో పెట్టుకుని అమృత్‌ పథకం కింద అధునాతన సాంకేతికత సహాయంతో జియోగ్రాఫిక్‌ ఇన్ఫరేషన్‌ సిస్టమ్‌(జీఐఎస్‌) పరిజ్ఞానాన్ని వినియోగించి డ్రాఫ్ట్‌ మాస్టర్‌ప్లాన్‌–2041ను సిద్ధంచేశారు.   రూపకల్పన జరిగిందిలా..  మాస్టర్‌ప్లాన్‌ రూపకల్పనలో భాగంగా స్కై గ్రూప్‌ ఏజెన్సీ వారు మొదట పట్టణాన్ని క్షేత్రస్థాయిలో సర్వే నిర్వహించారు. పట్టణ అభివృద్ధి దృష్ట్యా మెయిన్‌రోడ్లు ఎంత వెడల్పు ఉండాలో అంచనా వేసుకున్నారు. మున్సిపల్‌ లిమిట్స్‌లో రెసిడెన్షియల్, కమర్షియల్, మిక్స్‌డ్‌ యూజ్, ఇండస్ట్రియల్, పబ్లిక్, సెమీపబ్లిక్, రిక్రియేషన్‌ జోన్లను గుర్తించారు. గతానికి, ఇప్పటికి చేయాల్సిన మార్పులను గుర్తించి, వాటిని కొత్త మాస్టర్‌ప్లాన్‌లో పొందుపరిచారు. పట్టణంలో ప్రస్తుతం ఉన్న మున్సిపల్‌ పరిధి 14.20 చదరపు కిలోమీటర్ల విస్తీర్ణాన్ని అలాగే కనపరుస్తూ విస్తరణ చేయాలనుకుంటే భవిష్యత్తులో ఇబ్బందులు తలెత్తకుండా ఏఓఐ(ఏరియా ఆఫ్‌ ఇంటరెస్ట్‌) కింద అన్నివైపులా మూడుకిలోమీటర్ల రేడియస్‌ పెంపుతో 37.26 చదరపుకిలోమీటర్లతో మాస్టర్‌ ప్లాన్‌ సిద్ధం చేశారు.   కొత్త మాస్టర్‌ ప్లాన్‌లో మార్పులు   పట్టణంలోని కోమటివానిచెరువు పాతమాస్టర్‌ప్లాన్‌లో రిక్రియేషన్‌ గ్రీన్‌లో ఉండేది. కొత్తప్లాన్‌లో చెరువుచుట్టూ ప్రాంతాన్ని బఫర్‌జోన్‌గా మార్చారు. గతంలో రెసిడెన్షియల్‌ ఏరియాగా ఉన్న కదిరిరోడ్డు, చౌడేశ్వరిగుడి పరిసరప్రాంతాలు, గొల్లపల్లెరోడ్డు, నిమ్మనపల్లెరోడ్డు, సీటీఎంరోడ్డు, బెంగళూరురోడ్డు, పుంగనూరురోడ్డు ప్రాంతాలన్నీ కమర్షియల్‌లోకి మార్పు జరిగాయి. ఇన్నాళ్లు వీటిలో రెసిడెన్షియల్‌ ప్లాన్‌ తీసుకుని కమర్షియల్‌ నిర్మాణాలు జరపాలంటే టౌన్‌ప్లానింగ్‌ అధికారుల నుంచి ఇబ్బందులు ఎదురయ్యేవి. ఇకపై ఆ సమస్య ఉండదు. రెడ్డెప్పనాయుడు కాలనీలో కొంతభాగం ఇండస్ట్రియల్‌ ఏరియాలో ఉండేది. ప్రస్తుతం దాన్ని రెసిడెన్షియల్‌ జోన్‌లోకి మార్చారు. పట్టణంలోని ప్రధాన రహదారులన్నీ ట్రాఫిక్‌ రద్దీ దృష్ట్యా 40–60 అడుగుల మాస్టర్‌ ప్లాన్‌ రోడ్స్‌గా ఏర్పాటుచేశారు. 60అడుగుల రోడ్లను 80–100 అడుగులుగా, పట్టణం మీదుగా వెళుతున్న స్టేట్‌ హైవేను 100 అడుగుల రోడ్లు చేయాలని ప్రతిపాదనలు పెట్టారు. (క్లిక్‌: థ్యాంక్యూ.. సీఎం సార్‌)  సమగ్రంగా పరిశీలించాకే ఫైనల్‌ ప్లాన్‌ ఖరారు.. పట్టణ మాస్టర్‌ప్లాన్‌–2041కు సంబంధించి ప్రధానంగా పట్టాభూములను రిక్రియేషన్‌ జోన్‌లో పెట్టారని, వాటిని డిలీట్‌ చేయాల్సిందిగా, ఇండస్ట్రియల్‌ ఎస్టేట్‌లో అనుమతిలేని లేఔట్లను మార్చమని, రోడ్ల వెడల్పు మార్చాల్సిందిగా, జోనింగ్‌లకు సంబంధించి, ఎగ్జిస్టింగ్‌ రోడ్లను మాస్టర్‌ప్లాన్‌రోడ్డుగా చేయమని అభ్యంతరాలు వచ్చాయి. వాటిని పీకేఎం–ఉడా అధికారులకు పంపాం. వారు క్షేత్రస్థాయిలో పరిశీలించి నిర్ధారించుకున్నాక సవరణలు చేసి డీటీసీపీ అనుమతులకు పంపి ఫైనల్‌ మాస్టర్‌ప్లాన్‌ను ప్రకటిస్తారు.       – కే.ప్రమీల, మున్సిపల్‌ కమిషనర్, మదనపల్లె

మదనపల్లె టౌన్‌: బైక్‌ అదుపు తప్పి డివైడర్‌ను ఢీకొనడంతో.. ఓ యువకుడు మృతి చెందగా, సోదరుడు తీవ్ర గాయాల పాలయ్యాడు. ఈ సంఘటన మదనపల్లె పట్టణం కదిరి రోడ్డులో ఆదివారం ఉదయం చోటుచేసుకుంది. వన్‌టౌన్‌ పోలీసులు తెలిపిన మేరకు వివరాలు ఇలా ఉన్నాయి. మదనపల్లె అప్పారావు తోటకు చెందిన అయూబ్‌బాషా కదిరి రోడ్డులోని నీరుగట్టువారిపల్లె టమాట మార్కెట్‌ వద్ద బిర్యానీ హోటల్‌ నడుపుతున్నాడు. బిర్యానీకి అవసరమైన మసాలాను తీసుకురావాలని తన ఇద్దరు కుమారులు ఆరీఫ్, అమీర్‌ఖాన్‌(18)కు చెప్పాడు. వారు బైక్‌పై తీసుకెళ్తుండగా మార్గంమధ్యలోని సంఘం ఫంక్షన్‌ హాల్‌ వద్ద అదుపు తప్పి డివైడర్‌ను ఢీకొంది. వారు ఇద్దరూ తీవ్రంగా గాయపడ్డారు. 108 సిబ్బంది స్థానిక జిల్లా ఆసుపత్రికి తరలించగా.. అమీర్‌ఖాన్‌ మృతి చెందాడు. పోలీసులు కేసు నమోదు చేసి, దర్యాప్తు చేస్తున్నారు.  

సాక్షి, మదనపల్లె టౌన్‌: గుర్తుతెలియని వ్యక్తులు తమ ఇంటివద్ద చేతబడి చేసి భయాందోళనకు గురి చేస్తున్నారని, వారి నుంచి ప్రాణహాని ఉందని ఓ వ్యక్తి వన్‌టౌన్‌ పోలీసులకు ఫిర్యాదు చేశాడు. పోలీసుల కథనం మేరకు వివరాలు.. పట్టణంలోని కోటవీధికి చెందిన మురళి ఇంటి ముందు బుధవారం రాత్రి మేకులు కొట్టి ఉన్న దుస్తులతో తయారు చేసిన బొమ్మ, నిమ్మకాయలు, నాలుగు కోడిగుడ్లు, మట్టికుండను ఉంచి ఇంటిముందు కుంకుమ చల్లి వెళ్లారన్నారు. అయితే గురువారం ఉదయం బాధితుని కుటుంబీకులు ఇంటి నుంచి బయటకు రాకుండా ఉండడంపై తమకు సమాచారం రావడంతో అక్కడికి చేరుకుని మున్సిపాలిటీ సిబ్బందితో వాటిని తీసివేయించామని తెలిపారు. జరిగిన ఘటనపై బాధితుడి నుంచి వివరాలు సేకరించామన్నారు. ఇలాంటి చర్యలకు ఎవరైనా పాల్పడితే వారిపై కేసులు నమోదు చేసి అరెస్టు చేస్తామన్నారు. పూర్తిస్థాయిలో విచారణ చేపట్టి త్వరలోనే నిందితులను అరెస్టు చేస్తామని ఆయన చెప్పారు.   చదవండి: (ఆకాష్‌ మిర్చి: రూటే సపరేటు.. కిలో రూ.120 నుంచి రూ.140)

సాక్షి, మదనపల్లె‌: ఓ 15 ఏళ్ల బాలికను ఓ యువకుడు మాయమాటలతో తీసుకెళ్లాడు. బాలిక కనబడటం లేదని బంధువులు పోలీసులకు ఫిర్యాదు చేశారు. ఈ నేపథ్యంలో ఆ బాలికను ఎక్కడెక్కడో తీసుకెళ్లిన ఆ యువకుడు తిరిగి తీసుకు వచ్చి  వదలి వెళ్లాడు. దీంతో బాలిక జీవితాన్ని అన్యాయం చేశాడని బంధువులు మళ్లీ పోలీస్‌ స్టేషన్‌ గడప ఎక్కడంతో ఓ పార్టీ నేత (వైఎస్సార్‌ సీపీ కాదు) రంగప్రవేశం చేశారు. రూ.30వేలు ఇప్పిస్తామంటూ బాలిక శీలానికి వెలకట్టారు. రాజీ‘బేరం’చేశారు. అయితే తమవారినే పోలీస్‌ స్టేషన్‌కు రప్పిస్తావా? అంటూ ఆ నేత సోదరుడు ఫిర్యాదుదారులపై రెచ్చిపోయాడు. కొందరిని వెంటేసుకుని బాధితులపై బుధవారం రాత్రి రాళ్లతో దాడి చేసి గాయపరిచాడు. బాధితుల కథనం మేరకు..శివాజీనగర్‌లో తల్లిదండ్రులు లేని 15 ఏళ్ల బాలికను అదే ప్రాంతానికి చెందిన హరీష్‌ (30)అనే యువకుడు మాయమాటలతో తీసుకెళ్లిపోయాడు. దీంతో 20వ తేదీన ఆ బాలిక బంధువులు పోలీసులకు ఫిర్యాదు చేశారు. ఈ నేపథ్యంలో హరీష్‌ ఆ బాలికను కొన్నిరోజుల పాటు ఎక్కడెక్కడో తిప్పి మదనపల్లె బస్టాండు వద్ద వదలి వెళ్లిపోయాడు. ఇంటికి చేరిన బాలిక జరిగిన విషయాల గురించి చెప్పడంతో అనంతరం ఆ బాలిక బంధువులు, సోదరి టూటౌన్‌ పోలీసుల దృష్టికి తీసుకెళ్లారు. బాలికను కిడ్నాప్‌ చేసి తీసుకెళ్లి జీవితాన్ని నాశనం చేశాడని, న్యాయం చేయాలని కోరారు. బాలికను పోలీసులు తహశీల్దార్‌ ఎదుట బుధవారం హాజరుపరిచారు.  (ప్రియుడితో కలిసి భర్తను హతమార్చిన భార్య) ఇది తెలుసుకున్న హరీష్‌ మిత్రుడు, అప్పటికే రాజీ‘బేరం’ కుదిర్చిన నేత సోదరుడు మరికొందరితో కలిసి బుధవారం రాత్రి బాధితుల ఇంటిపై రాళ్లతో దాడి చేసి చితకబాదారు. ఈ దాడిలో పెద్ద రెడ్డెమ్మ(30), చిన్న రెడ్డెమ్మ(21) గాయపడ్డారు. దీంతో వారు గురువారం టూటౌన్‌ పోలీసులకు ఫిర్యాదు చేశారు. బాలికను కిడ్నాప్‌ చేసి ఐదు రోజుల పాటు సోమలలో ఉన్నారని, దీనిపై స్థానిక నాయకుడొకరు పంచాయితీ చేసి , రాజీకి రాకుంటే ఇబ్బందులు తప్పవని బెదిరించడంతో స్టేషన్‌ నుంచి వెళ్లిపోవాల్సి వచ్చిందని వాపోయారు. వీరి గుట్టును బయట పెట్టినందుకు తమపై దాడి చేశారని, వీరి నుంచి ప్రాణహాని ఉందని, వారిపై చర్యలు తీసుకుని తమకు న్యాయం చేయాలని పోలీసులను కోరారు. 

సాక్షి, చిత్తూరు: వేరుశనగ పంటను కోళ్లు నాశనం చేస్తున్నాయని సోమవారం రెండు వర్గాలు గొడవ పడ్డాయి. ఈ గొడవ తారాస్థాయికి చేరి కర్రలతో పరస్పర దాడులకు దిగడంతో ఆరుగురు తీవ్రంగా గాయపడ్డారు. వారిలో ఒకరి పరిస్థితి విషమంగా ఉంది. పోలీసుల కథనం మేరకు.. కురబలకోట మండలం, జంగావారిపల్లెకు చెందిన చిన్నారెడ్డి పెరటి కోళ్లు అదే ఊరికి చెందిన వెంకటరమణ వ్యవసాయ పొలంలోని శనగ పంటను నాశనం చేస్తున్నాయంటూ ఆయన కుటుంబ సభ్యులు సోమవారం ఉదయం దూషించారు. అదే సమయంలో అటుగా పొలం వద్దకు వెళుతున్న రైతు చిన్నరెడ్డెప్ప(60) వారు తననే తిడుతున్నారని గొడవకు దిగాడు. ఇరువురి మధ్య వాగ్వాదం తారాస్థాయికి చేరడంతో వెంకటరమణ వర్గీయులు సుధాకర్‌(35) చిన్నరెడ్డెప్పపై కర్రలతో దాడికి పాల్పడ్డారు. దాడి విషయం తెలుసుకున్న చిన్నరెడ్డెప్ప కుటుంబ సభ్యులు రెడ్డిశేఖర్, మంగమ్మ, రత్నమ్మలు అక్కడికి చేరుకుని వారిపై ప్రతిదాడికి దిగారు. ఇరువర్గాల దాడుల్లో ఆరుగురు తీవ్రంగా గాయపడ్డారు. వారిని 108 వాహనంలో మదనపల్లె జిల్లా ఆస్పత్రికి రలించారు. చిన్నరెడ్డెప్ప పరిస్థితి విషమంగా ఉందని డాక్టర్లు తిరుపతికి రెఫర్‌ చేశారు. వెంకటరమణ, సుధాకర్, రెడ్డిశేఖర్, మంగమ్మ, రత్నమ్మ మదనపల్లెలో చికిత్స పొందుతున్నారు. ఘటనపై కేసు నమోదుచేసి దర్యాప్తు చేస్తున్నట్లు ముదివేడు పోలీసులు తెలిపారు. (చెత్తకుప్ప పక్కనే అందమైన అమ్మాయిని చూసి.. )

సాక్షి, మదనపల్లె టౌన్‌ : మహిళ హత్య కేసు మిస్టరీ వీడింది. వివాహేతర సంబంధాలపై భార్య రోజూ నిలదీస్తోందనే ఆగ్రహంతో కట్టుకున్నోడే హంతకుడయ్యాడు. కత్తితో గొంతు కోసి దారుణంగా భార్యను హతమార్చాడు. నిందితుడు అంజాద్‌(36)ను శనివారం టూటౌన్‌ పోలీసులు అరెస్టు చేసినట్లు డీఎస్పీ ఎం.చిదానందరెడ్డి, సీఐ రాజేంద్రనాథ్‌ యాదవ్‌ విలేకరులకు వెల్ల డించారు. వారి కథనం.. స్థానిక తారకరామా సినిమా థియేటర్‌ సమీపంలోని నర్సింగ్‌హోం వీధిలో నివాసం ఉంటున్న దంపతులు అంజాద్, తహశీన్‌లది ఓ సాధారణ కుటుంబం. అంజాద్‌ మౌజాన్‌గా పని చేయడమే కాకుండా దుకాణం పెట్టుకుని మంత్రతంత్రాలు, క్షుద్ర పూజలు చేస్తూ సంపాదిస్తూ కుటుంబాన్ని పోషిస్తున్నాడు. వీరికి మూడేళ్ల లోపు వయసున్న ముగ్గురు పిల్లలు కూడా ఉన్నారు. తన దుకాణానికి వచ్చిపోయే వారికి మంత్రాలు, తంత్రాలతో పాటు తాయత్తులు కడుతూ మహిళలతో వివాహేతర సంబంధాలు పెట్టుకున్నాడు. ఇది తెలుసుకున్న తహశీన్‌ తన భర్తను పలుమార్లు మందలించినా అతడి తీరు మారలేదు.  విషయం తెలుసుకున్న ఇందిరానగర్‌లో నివాసం ఉంటున్న అంజాద్‌ తల్లి గురువారం ఉదయం కొడుకు, కోడలి వద్దకు వచ్చి ఇద్దరినీ మందలించింది. అయినా వారిద్దరూ ఆమె ఎదుటే మరోసారి గొడవ పడ్డారు. దీంతో వారికి సర్దిచెప్పలేక ఆమె తిరిగి ఆదే రోజు సాయంత్రమే తిరిగి ఇంటికి వెళ్లిపోయింది. అంజాద్‌ తన భార్య పరువు తీస్తోందని, ఆమె అడ్డు తొలగించుకోవాలని వ్యూహరచన చేశాడు. ఈ మేరకు తన ముగ్గురు పిల్లలను గురువారం సాయంత్రం ఇంటికి సమీపంలోని ఓ ట్యూషన్‌కు పంపేశాడు. ఇంట్లో ఒంటరిగా ఉన్న భార్యను పదునైన కత్తితో కిరాతకంగా గొంతుకోసి హతమార్చాడు. అనంతరం ఎవరో ఆగంతకులు ఇంట్లో చొరబడి ఈ దురాగతానికి ఒడిగట్టారంటూ కథ అల్లాడు. రక్తపు మడుగులో పడివున్న భార్యను కాపాడేందుకు 108కు ఫోన్‌చేయాలని స్థానికులను కోరాడు. 108 సిబ్బంది అక్కడికి వచ్చే సరికే తహశీన్‌ చనిపోయిందని వారు వెనుదిరిగారు. సమాచారం అందడంతో టూటౌన్‌ పోలీసులు అక్కడికి చేరుకుని పరిశీలించారు. అంజాద్, కుటుంబ సభ్యులు చెప్పే పొంతన లేని సమాధానాలపై పోలీసులు అనుమానించారు.  చిత్తూరు నుంచి వేలి ముద్రల నిపుణులు, డాగ్‌ స్క్వాడ్‌ బృందం సంఘటనా స్థలంలో కీలక ఆధారాలు సేకరించింది. 24 గంటల వ్యవధిలోనే కేసును ఛేదించారు. తహశీన్‌ను ఆమె భర్తే కడతేర్చినట్లు విచారణలో తేలింది. ఈ హత్యకు ఎవరెవరు సహకరించారో దర్యాప్తులో తేలాల్సి ఉందని డీఎస్పీ చెప్పారు. హత్యకేసును గంటల వ్యవధిలోనే ఛేదించిన టూటౌన్‌ సీఐ, వన్‌ టౌన్‌ సీఐ తమీమ్‌ అహ్మద్, ఎస్‌ఐలు ఈ.బాబు, హరి హర ప్రసాద్‌తో పాటు సిబ్బందిని డీఎస్పీ అభినందించి రివార్డులు ప్రకటించారు. 

సాక్షి, మదనపల్లె టౌన్‌ : మదనపల్లెలో తీవ్ర సంచలనం రేకెత్తించిన వివాహిత హత్య కేసును పోలీసులు గంటల వ్యవధిలోనే ఛేదించినట్లు విశ్వసనీయ సమాచారం. ఈ కేసును సవాలుగా తీసుకున్న డీఎస్పీ ఎం.చిదానంద రెడ్డి, టూటౌన్‌ సీఐ రాజేంద్రనాథ్‌ యాదవ్‌తో పాటు చిత్తూరు నుంచి వచ్చిన వేలిముద్రల నిపుణులు, డాగ్‌ స్క్వాడ్‌ బృందానికి దర్యాప్తులో కీలక ఆధారాలు లభించాయి. హతురాలి భర్తే ఆమెను గొంతు కోసి కడతేర్చినట్లు పోలీసులు ఓ నిర్థారణకు వచ్చినట్లు తెలిసింది. నిందితులను పోలీసులు అదుపులోకి తీసుకుని తమదైన శైలిలో విచారణ సాగిస్తున్నారని సమాచారం. స్థానిక తారకరామ సినిమా థియేటర్‌ రోడ్డు (నర్సింగ్‌ హోమ్‌ వీధి)లోని ఓ ఇంటిలో మూడవ అంతస్తులో కాపురం ఉంటున్న మౌజ్‌ షేక్‌ అంజాద్‌ భార్య ఎస్‌.తహశీన్‌ (28) గురువారం రాత్రి ఇంటిలోనే దారుణ హత్యకు గురవడం విదితమే. పోలీసులు ఈ హత్య ఛేదనకు అన్నిరకాల సాంకేతిక పద్ధతులు ఉపయోగించారు. తెల్లవారు జామున 12.20కి చిత్తూరు నుంచి వచ్చిన వేలిముద్రల నిపుణులు, డాగ్‌ స్క్వాడ్‌ బృందం హత్య జరిగిన ఇంటిలో క్షుణ్ణంగా వేలిముద్రలు సేకరించారు. అనంతరం పోలీస్‌ జాగిలం తహశీన్‌ మృతదేహం వద్ద వాసన చూసి అక్కడి నుంచి తారకరామ సినిమా థియేటర్‌ రోడ్డు, వారపు సంత వరకు పరుగులు తీసింది. అక్కడి నుంచి తిరిగి మహిళ హత్యకు గురైన ఇంటి వద్దకే చేరుకుంది. అక్కడే కొంతసేపు చుట్టూ చక్కర్లు కొట్టింది. అదే సమయంలో తహశీన్‌ భర్త అంజాద్‌ అక్కడే కూర్చుని ఉండడంతో పోలీసులు అనుమానంతో అతడిని అదుపులోకి తీసుకుని విచారణ చేశారు. క్లూస్‌ టీమ్‌ సేకరించిన వేలిముద్రలు, ఇతర ప్రాథమిక ఆధారాలతో కేసు దర్యాప్తు వేగవంతం చేశారు. ఈ ఆధారాల మూలంగా అంజాదే నిందితుడని తేల్చినట్టు తెలియవచ్చింది. ఈ హత్య వెనుక ఇంకా ఎవరెవరు ఉన్నారో తెలుసుకునే పనిలో పోలీసులు నిమగ్నమయ్యారు.  హత్యకు గురైన తహశీన్‌ (ఫైల్‌) కన్నీరుమున్నీరైన తహశీన్‌ తల్లిదండ్రులు తమ కుమార్తె తహశీన్‌ దారుణ హత్యకు గురైందనే సమాచారం అందడంతో కొత్తపల్లె పంచాయతీ ఈశ్వరమ్మ ఇళ్ల నుంచి మహ్మద్, షాహీనా దంపతులు నర్సింగ్‌ హోమ్‌ వీధికి చేరుకున్నారు. రక్తపు మడుగులో పడి ఉన్న కుమార్తె మృతదేహాన్ని చూసి కన్నీరుమున్నీరయ్యారు. తహశీన్‌ ముగ్గురు బిడ్డలను పట్టుకుని భోరున విలపించడం పలువురినీ కంటతడి పెట్టించింది. షాహీనా ఫిర్యాదు మేరకు పోలీసులు హత్య కేసు నమోదు చేశారు. మృతదేహాన్ని స్థానిక ప్రభుత్వ ఆస్పత్రి మార్చురీకి తరలించారు. అంజాద్‌ క్షుద్రపూజలు చేసేవాడా..? హతురాలు తహశీన్‌ భర్త అంజాద్‌ పట్టణంలోని పలు మసీదుల్లో మౌజ్‌గా పనిచేయడమే కాకుండా క్షుద్ర పూజలు చేసేవాడని ప్రచారంలోకి వచ్చింది. పోలీసులు ఆ కోణంలో కూడా దర్యాప్తు చేస్తున్నారు. అంజాద్‌ ఇంటికి రకరకాల కొత్త వ్యక్తులు వచ్చేవారనీ క్షుద్రపూజలు తన ఇంటిలోనే కాకుండా అవసరమైతే పిలిచిన వారి ఇళ్లకు కూడా వెళ్లి చేసేవాడని తెలిసింది. ఈ నేపథ్యంలో మతి చలించిన అంజాద్‌ భార్యను కిరాతకంగా హతమార్చాడనే అనుమానాలు వ్యక్తమవుతున్నాయి. 

మదనపల్లె టౌన్‌ : మదనపల్లె పట్టణ నడిబొడ్డున ఓ మహిళ గురువారం రాత్రి దారుణ హత్యకు గురైంది. ఇంట్లో ఒంటరిగా ఉన్న సమయంలో గుర్తు తెలియని దుండగులు మహిళను అతి కిరాతకంగా గొంతుకోసి చంపారు. ఈ హత్య పథకం ప్రకారమే జరిగినట్లు పోలీసుల అనుమానం వ్యక్తం చేస్తున్నారు. మదనపల్లెలో తీవ్ర కలకలం రేపిన ఈ దారుణ హత్యకు సంబంధించి డీఎస్పీ ఎం.చిదానందరెడ్డి, టూటౌన్‌ సీఐ రాజేంద్రనాథ్‌యాదవ్‌ విలేకర్లకు తెలిపిన వివరాలు ఇలా ఉన్నాయి.. పట్టణంలోని తారకరామ సినిమా థియేటర్‌ వీధి (నర్సింగ్‌ హోం సందు)లో ఓ అద్దె ఇంటిలోని మూడో అంతస్థులో ముతవల్లి (మతగురువు) షేక్‌ అంజాద్,  భార్య ఎస్‌.తహశీన్‌ (28) కాపురం ఉంటున్నారు. వీరికి ముగ్గురు పిల్లలు తయూబ్‌(3), తలాల్‌(2), తాయూబ(1) ఉన్నారు. గురువారం ఇందిరానగర్‌లో ఉంటున్న అంజాద్‌ తల్లి పర్వీన్‌ తన కోడలు, మనవళ్లు, మనవరాలిని చూడటానికి ఇందిరానగర్‌ నుంచి వారి వద్దకు వచ్చింది. ఆమెను కొడుకు, కోడలు ఆ రోజంతా గౌరవంగా చూసుకున్నారు. సాయంత్రం చీకటి పడగానే పర్వీన్‌ తిరిగి ఇందిరానగర్‌కు వెళ్లాలని కొడుకుకు చెప్పింది. వెంటనే ఆయన తన పిల్లలను ట్యూషన్‌లో వదిలి, తల్లిని తన ద్విచక్రవాహనంలో ఎక్కించుకుని ఇందిరానగర్‌కు వెళ్లినట్లు సమాచారం. ఆ సమయంలో ఇంట్లో ఒంటరిగా తహశీన్‌ను ఎవరో కత్తితో గొంతుకోసి చంపారు. ట్యూషన్‌ పూర్తవగానే పిల్లలను ఇంటికి తీసుకొచ్చిన ఆయా, రక్తపు మడుగులో పడివున్న తహశీన్‌ను చూసి కేకలు పెట్టింది. స్థానికులు విషయాన్ని అంజాద్‌కు ఫోన్‌లో సమాచారం అందించారు. అదేవిధంగా 108కు ఫోన్‌ చేయడంతో సిబ్బంది గోపి, అమర అక్కడికి చేరుకున్నారు. తహశీన్‌ను పరిశీలించి, ఆమె మృతిచెందినట్లు తెలిపారు. కుమార్తె మరణవార్త తెలుసుకున్న తహశీన్‌ తల్లిదండ్రులు ఘటనా స్థలానికి చేరుకుని కన్నీరుమున్నీరయ్యారు.  హత్యపై అన్నీ అనుమానాలే.. తహశీన్‌ హత్యపై పలు అనుమానాలు వ్యక్తం అవుతున్నాయి. హత్య జరిగిన వెంటనే రక్తపుమరకలను తుడిపేయడానికి నిందితులు బకెట్‌తో నీళ్లు తెచ్చి జగ్గుతో కడిగే ప్రయత్నం చేసినట్లు ఆనవాళ్లు ఉన్నాయి. అలాగే పెనుగులాటలో మహిళ కుడికాలి వెండి మెట్టె, మెడలోని బంగారు బొట్టు గొలుసు ఆమె మృతదేహానికి సమీపంలో చెల్లాచెదురుగా పడి ఉన్నాయి. అంతే కాకుండా రక్తపు మరకలున్న కాళ్లతో నిందితులు ఇళ్లంతా తచ్చాడినట్లు స్పష్టమైన గుర్తులు కనిపిస్తున్నాయి. పడక గదికి ఆనుకుని ఉన్న బీరువా తెరచి రెండు మూడు చీరలు బయటకు తీసి కిందపడేసి వెళ్లినట్లు చిత్రీకరించారని పోలీసులు అనుమానం వ్యక్తం చేస్తున్నారు. అంతేకాకుండా తలుపుకు గడియ పెట్టే చోట కూడా రక్తపు మరకలు అంటుకుని ఉండడంతో హత్యపై పలు అనుమానాలు వ్యక్తం అవుతున్నాయి. హత్యను దొంగతనం చేయడానికి వచ్చిన దుండగులు చేసి ఉంటే, ఆమె కొత్త వ్యక్తులను చూడగానే కేకలు వేయడం, లేదా పెనుగులాడిన ఆనవాళ్లు గానీ, తోపులాట జరిగినట్లు గానీ కనిపించేదని పోలీసులు చెబుతున్నారు. ముఖ్యంగా ప్రాణాపాయం నుంచి బయటపడటానికి ఆపదలో ఉన్న ఎవరైనా పోరాడినట్లు కనిపించకపోవడంతో హత్యపై పోలీసుల అనుమానాలు బలపడుతున్నాయి. కుటుంబ సభ్యుల పనేనా? ఇంట్లో ఒంటరిగా ఉన్న మహిళ హత్య వెనుక కుటుంబ సభ్యుల హస్తమేమైనా ఉందా అన్న కోణంలో పోలీసులు విచారిస్తున్నారు. హత్యకు పాల్పడినవారు ఎంతటి వారైనా వదలిపెట్టే ప్రసక్తే లేదని చెబుతున్నారు. సంఘటనా స్థలంలో లభించిన కొన్ని కీలక ఆధారాలతో దర్యాప్తును వేగవంతం చేస్తున్నట్లు చెప్పారు.  

మదనపల్లె :  పేదలు నివసించే ప్రాంతమని వివక్ష చూపుతూ, కనీసం ఓటు అడిగేందుకు రాకపోవడంతో మూకుమ్మడిగా అందరూ కలిసి ఓట్లు వేసేందుకు వెళ్లమని పోలింగ్‌ను బహిష్కరించిన సంఘటన పట్టణంలోని విజయనగర్‌ కాలనీలో జరిగింది. గురువారం మధ్యాహ్నం 12.30 గంటల ప్రాంతంలో స్థానిక విజయనగర్‌ కాలనీ సిమెంట్‌ రోడ్డు ప్రాంతంలో సుమారు 100 మందికి పైగా మహిళలు ఓటు వేసేందుకు వెళ్లకుండా రోడ్డుపై నిరసన వ్యక్తం చేశారు. ఈ సందర్భంగా వారు మాట్లాడుతూ 2, 3 వార్డుల పరిధిలో తమ కాలనీ వస్తుందని, ఎన్నికల ప్రచారంలో భాగంగా ప్రధాన పార్టీల అభ్యర్థులు ఓటు అడిగేందుకు తమ వార్డులకు రాలేదన్నారు. నాయకులు వస్తే వారికి తమ సమస్యలను చెప్పి, గెలిచిన తర్వాత పరిష్కరించమని అడుగుదామనుకుంటే ఎవరూ అటువైపు చూడకపోవడంతో మా ఓట్లు వారికి అవసరం లేదనుకున్నారేమోనని ఓటుకు వెళ్లడం మానుకున్నామని చెప్పారు.      

సాక్షి, రామసముద్రం : చిత్తూరూ జిల్లా మదనపల్లె మండలం రామసముద్రంలో మామిడి పూత విరగబూసింది. తీవ్ర వర్షాభావంతో చాలా వరకు మామిడి చెట్లు నీరు లేక ఎండిపోయాయి. కొందరు రైతులు అష్టకష్టాలు పడుతూ నీరు అందిస్తున్నారు. అలాగే మందులు పిచికారీ చేసి కంటికి రెప్పలా కాపాడుకుంటున్నారు. ఈ క్రమంలో మామిడి పూత బాగా పూయడంతో రైతులు సంతోషం వ్యక్తం చేస్తున్నారు. మండలంలో సుమారు 250 ఎకరాల్లో మామిడి తోటలు ఉన్నాయి. ప్రస్తుతం చెట్లలో పూత, పిందె విరగబూసింది. పూత, పిందె రాలిపోకుండా నిలిస్తే మంచి దిగుబడి వస్తుందని, మామిడి ధరలు ఆశాజకంగా ఉంటాయని రైతులు భావిస్తున్నారు.


 - మదనపల్లెలో జోరుగా నీటి వ్యాపారం
 - ఒక్కో ట్యాంకర్ నీళ్లు రూ.700లు
 - రోజుకు 650 ట్రిప్పుల నీళ్ల కొనుగోళ్లు
 - నెలకు రూ.83 లక్షల ఖర్చు
 జిల్లాలో పడమటి మండలాల ప్రజలు గుక్కెడు నీళ్లు దొరకక అల్లాడుతున్నారు. తప్పని పరిస్థితుల్లో ట్యాంకర్లపై ఆధారపడుతున్నారు. ట్యాంకర్ల యజమానులు రోజుకో రేటు చొప్పున అడ్డం గా దోచేస్తున్నారు. మదనపల్లె పట్టణంలో నెలకు రూ.7.3 కోట్ల మేర నీటి వ్యాపారం సా గుతోందంటే ఇక్కడి పరిస్థితి ఏ స్థాయిలో ఉందో అర్థం చే సుకోవచ్చు.
  
 మదనపల్లె : మదనపల్లె పట్టణంలో నీటి వ్యాపారం జోరుగా సాగుతోంది. నాలుగేళ్లుగా వర్షాలు లేకపోవడంతో మంచినీటి బోర్లు, బావులన్నీ దాదాపుగా ఎండిపోయాయి. పట్టణవాసులు ట్యాంకర్ల ద్వారా నీళ్లు కొనుగోలుచేసి గొంతుతడుపుకోవాల్సి వస్తోంది. మదనపల్లెలో పట్టణంలో మొత్తం 300 ప్రైవేట్ ట్యాంకులు ఉన్నాయి. ఇందులో మున్సిపల్ అధికారులు 112 ట్యాంకులు వినియోగించుకుంటున్నారు. రోజుకు 650 ట్రిప్పులను 13 సంపులకు నింపుతున్నారు. ఒక్కో ట్రిప్పునకు రూ.430 చొప్పున ప్రైవేటు ట్యాంకర్లకు చెల్లిస్తున్నారు. ఈ లెక్కన రోజుకు దాదాపు రూ.2.79 లక్షలు వెచ్చించాల్సి వస్తోంది. అంటే నెలకు దాదాపుగా రూ.83 లక్షలపైమాటే ఖర్చుచేస్తున్నారు.
 
 ట్యాంకర్ల యజమానులకు డబ్బేడబ్బు మదనపల్లె పట్టణంలో దాదాపు 200 దాకా ప్రయివేట్ ట్యాంక ర్లు ఉన్నాయి. ఒక్కో ట్యాంకర్ నీళ్లు రూ.600 నుంచి రూ.700 వరకు విక్రయిస్తున్నారు. ఒక్కో ట్యాంకరు రోజుకు 15 ట్రిప్పులు వరకూ తోలుతుంటాయి. ఈ లెక్కన 200 ట్యాంకర్లు 3000 ట్రిప్పుల వరకు తోలుతుంటాయి. ఇలా రోజుకు దాదాపు రూ.24 లక్షల వరకు గడిస్తున్నారు. అంటే నెలకు రూ.6.3 కోట్లుదాకా రాబడి వస్తోంది. పట్టణం మొత్తం మీద ఒక్క మంచినీటి కోసమే దాదాపు 7.13 కోట్ల దాకా వెచ్చించాల్సి వస్తోంది.
 
 మున్సిపల్ కొళాయిలు ఉన్నా..
 మున్సిపల్ పవర్ బోర్లు 264 ఉండగా వాటిలో 70 మాత్రమే పనిచేస్తున్నాయి. 140 హ్యాండ్ బోర్లకుగాను 55 మాత్రమే పనిచేస్తున్నాయి. ఇక కొళాయిలు ఉన్నా అంతంతమాత్రమే. అందులో 10, 15 రోజులకోసారిగానీ నీరు రాని పరిస్థితి.
 
 ఎంతకు కొనుగోలు చేస్తారంటే..
 ట్యాంకర్ యజమానులు బోర్ల వద్ద ట్యాంకరు నీరు రూ.300 చొప్పున కొనుగోలు చెస్తారు. అదే ట్యాంకరు నీరు కరెంటు లేకపోతే జనరేటర్ ద్వారా నింపితే రూ.350 చొప్పున బోర్ల యజమానులు వసూలు చేస్తుంటారు. అక్కడి నుంచి పట్టణంలో దాదాపు 10 నుంచి 15 కిలోమీటర్ల వరకూ నీటిని సరఫరా చేస్తారు. ట్యాంకరు నిర్వాహకులు డ్రైవర్ బత్తా, డీజిల్ ఖర్చు, మెయింటెనెన్స్ కలిపి ట్యాంకరు నీటిని రూ.700 చొప్పున విక్రయిస్తున్నారు.
  
 నీళ్లు కొనలేకపోతున్నాం..
 ట్యాంకరు నీటికి రూ700 వెచ్చించాల్సి వస్తోంది. తాగునీటి సమస్య కొన్నేళ్లుగా ఉన్నా ఏ ఒక్కరూ పట్టించుకోవడంలేదు. పాలకులు, అధికారుల హామీలు నీటిమూటలుగా మారుతున్నాయి.
  - కుమార్, మదనపల్లె