సాక్షి ప్రతినిధి, కరీంనగర్‌: శాంతి భద్రతలకు విఘాతం కలిగించే ఘటనలు ఉత్పన్నమైనపుడు, పరిస్థితులను తమ ఆ«దీనంలోకి తెచ్చుకునేందుకు పోలీసులు స్వతంత్రంగా నిర్ణయం తీసుకునే అధికారాలను కొత్త నేర న్యాయ చట్టాలు కల్పించనున్నాయి. గతంలో ఇలాంటి మెజిస్టీరియల్‌ పవర్స్‌ కేవలం జిల్లా కలెక్టర్లు, ఆర్డీవోల చేతిలో ఉండేవి. ఉదాహరణకు 144 సెక్షన్‌ అమలు చేయాలన్నా వారి అనుమతి తప్పనిసరి. కానీ, ఇప్పుడు ఆ అధికారాలను జిల్లాల్లో ఎస్పీలకు, నగరాల్లో డీసీపీ ర్యాంకు అధికారులకు కల్పిస్తూ కొత్త న్యాయ నేర చట్టాలను రూపొందించారు. ఈ చట్టాలు దేశవ్యాప్తంగా జూలై 1 నుంచి పూర్తిస్థాయిలో అమలుకానున్నాయి. ఈ నేపథ్యంలో కరీంనగర్‌ కమిషనరేట్‌తోపాటు రాష్ట్రవ్యాప్తంగా ఉన్న అన్ని పోలీసు యూనిట్లలో కొత్త చట్టాలపై రేపటితో శిక్షణ కార్యక్రమాలు ముగియనున్నాయి. కానిస్టేబుళ్ల నుంచి ఇన్‌స్పెక్టర్‌ ర్యాంకు ఆఫీసర్ల వరకు సంబంధిత యూనిట్‌ పరిధిలో శిక్షణ ఇస్తున్నారు. ఏసీపీ ఆపై ర్యాంకు అధికారులకు మాత్రం తెలంగాణ పోలీసు అకాడమీ (టీజీపీఏ)లో ట్రైనింగ్‌ ఇచ్చారు. కొత్తగా ఏ మార్పులు రానున్నాయి? జూలై 1 నుంచి ఐపీసీ, సీఆర్‌పీసీ, ఇండియన్‌ ఎవిడెన్స్‌ యాక్ట్‌లన్నీ కాలగర్భంలో కలిసిపోనున్నాయి. ఐపీసీ స్థానంలో భారతీయ న్యాయ సంహిత (బీఎన్‌ఎస్‌), సీఆర్‌పీసీ స్థానంలో భారతీయ నాగరిక్‌ సురక్ష సంహిత (బీఎన్‌ఎస్‌ఎస్‌), ఇండియన్‌ ఎవిడెన్స్‌ యాక్ట్‌ స్థానంలో భారతీయ సాక్ష్యా అధియాం (బీఎస్‌ఏ)లు రాబోతున్నాయి. బ్రిటిష్ కాలంలో రూపొందించిన ఈ చట్టాలను మరింత బలోపేతం చేయడం, శాస్త్రీయ పద్ధతిలో మెరుగైన విధానంలో దర్యాప్తు జరపడం, నేరాలకు కఠిన శిక్షలు విధించడం, సెక్షన్లు లేని కొన్ని రకాల నేరాలకు ప్రత్యేక సెక్షన్లు తీసుకురావడం, దర్యాప్తు కాలానికి నిర్దేశిత కాలపరిమితి విధించడం, వీలైనంత త్వరగా బాధితులకు న్యాయం చేకూర్చడం వంటి లక్ష్యాలతో కొత్త నేర న్యాయ చట్టాలకు అంకురార్పణ జరిగింది. పెట్టీ నేరాలకు కమ్యూనిటీ సర్విస్‌.. కొత్త నేర న్యాయ చట్టాల ప్రకారం.. ఇకపై చిన్నతరహా (పెట్టీ క్రైమ్స్‌) నేరాలకు సమాజ సేవ చేసేలా శిక్షలు రూపొందించారు. ఉదాహరణకు న్యూసెన్స్, ఈవ్‌ టీజింగ్, డ్రంక్‌ అండ్‌ డ్రైవ్, కొట్లాటలు తదితర చిన్న నేరాలకు గతంలో జైలు, జరిమానాలు ఉండేవి. కొత్త చట్టాల ప్రకారం.. కమ్యూనిటీ సర్విస్‌ (సమాజసేవ) చేసేలా తీర్పులు రానున్నాయి.మనిషి మానసికంగా పరివర్తన చెందేలా ఈ శిక్షలు ఉండనున్నాయి. దీనిపై ఓ పోలీసు అధికారి మాట్లాడుతూ.. డ్రంక్‌ అండ్‌ డ్రైవ్‌లో పట్టుబడ్డ వారికి తాగి నడిపితే జరిగే నష్టాలపై ప్రచారం, ఈవ్‌ టీజింగ్‌ చేస్తే మహిళల ఔన్నత్యం తెలియజేసేలా నిందితుల్లో సామాజిక, మానసిక మార్పునకు దారి తీసేలా తీర్పులు వస్తాయని అభిప్రాయపడ్డారు. కొత్త సెక్షన్లు.. భారీ శిక్షలు గతంలో అనేక నేరాలను నమోదు చేసేందుకు ప్రత్యేక సెక్షన్లు ఉండేవి కావు. ఉదాహరణకు గొలుసు దొంగతనాలు, మూకదాడులు, హిట్‌ అండ్‌ రన్, ఉగ్రవాద కార్యకలాపాల్లో సరిగ్గా సరిపోయే సెక్షన్లు ఉండేవి కావు. కానీ, జూలై 1 నుంచి ఇలాంటి నేరాలకు తగిన సెక్షన్లు రాబోతున్నాయి. వాటి ఆధారంగా గతంలో విధించిన జైలు శిక్ష కంటే రెట్టింపు కూడా ఉండనుంది. ఉదాహరణకు గతంలో హిట్‌ అండ్‌ రన్‌ కేసుల్లో గరిష్టంగా మూడేళ్లు జైలు శిక్ష పడేది. తాజా చట్టాలతో గరిష్టంగా పదేళ్లు జైలు శిక్ష పడనుంది. » పోలీసు కస్టడీ కూడా మరింత పెరగనుంది. గరిష్టంగా 15 రోజుల వరకు నిందితులను రిమాండ్‌లోకి తీసుకోవచ్చు. రిమాండ్‌ అయిన 60 రోజుల్లోగా ఎప్పుడైనా తీసుకునే వెసులుబాటు పోలీసులకు కలగనుంది. » దర్యాప్తులో శాస్త్రీయ, నిపుణులు ఇచ్చే రిపోర్టులకు పెద్దపీట వేయనున్నారు. » కేసు దర్యాప్తును కూడా నిర్దేశిత కాలంలో పూర్తి చేయనున్నారు. ఉదాహణకు పోక్సో, మహిళలకు సంబంధించిన కేసుల్లో 60 రోజుల్లో దర్యాప్తు పూర్తి చేయాలి. మిగిలిన కేసుల్లో 90 రోజుల్లో దర్యాప్తు పూర్తి చేసి చార్జిïÙటు దాఖలు చేయాల్సి ఉంటుంది. ప్రత్యేకపరిస్థితుల్లో మాత్రం ఈ కాలపరిమితికి మినహాయింపు దక్కనుంది. »ఇక స్టేషన్‌ పరిధితో సంబంధం లేకుండా ఎక్కడ నుంచైనా జీరో ఎఫ్‌ఐఆర్‌ నమోదు, ఆన్‌లైన్‌లో వారంట్‌ జారీ » పిల్లలు, వికలాంగులు, వృద్ధులు, అనారోగ్యం ఉన్న వారు స్టేషన్‌ హాజరు నుంచి మినహాయింపు పొందవచ్చు.


 ప్రభుత్వ ప్రతిపాదనలపై విముఖత వ్యక్తం చేసిన పురపాలక శాఖ
 అధికారాలను జిల్లా కలెక్టర్ల వద్దే ఉంచాలంటూ సర్కారుకు విజ్ఞప్తి
  
 హైదరాబాద్: ప్రార్థనా మందిరాల నిర్మాణానికి అనుమతులిచ్చే అధికారాన్ని జిల్లా కలెక్టర్ల నుంచి మున్సిపల్ కమిషనర్లకు బదలాయించాలని ప్రభుత్వం సూత్రప్రాయంగా నిర్ణయించింది. అయితే, ఈ ప్రతిపాదనల పట్ల రాష్ట్ర పురపాలక శాఖ మాత్రం విముఖతతో ఉంది. మున్సిపల్ కమిషనర్లకు బాధ్యతలు అప్పగిస్తే సమస్యలొస్తాయని ప్రభుత్వానికి నివేదించింది. క్రైస్తవ సంస్థల నుంచి వచ్చిన అభ్యర్థనల మేరకు చర్చిల నిర్మాణాలకు అనుమతులిచ్చే బాధ్యతలను మునిసిపల్ కమిషనర్లు, పంచాయతీ కార్యదర్శులకు బదలాయించాలని ప్రభుత్వం సూత్రప్రాయంగా నిర్ణయిం చింది. ఈ మేరకు ఆదేశాలు జారీ చేసేందుకు సంబంధిత ప్రతిపాదనలు సమర్పించాలని మున్సిపల్, పంచాయతీరాజ్ శాఖలకు ఇటీవల సీఎం కార్యాలయం కోరింది. దీనిపై పంచాయతీరాజ్, గ్రామీణాభివృద్ధి శాఖ సానుకూలంగా స్పందించి ఈ మేరకు ఆదేశాలు సైతం జారీ చేసింది.
 
 అయితే, పురపాలక శాఖ మాత్రం ఈ నిర్ణయం పట్ల ఆందోళన వ్యక్తం చేస్తూ ప్రభుత్వానికి లేఖ రాసింది. ప్రార్థనా మందిరాలకు అనుమతులిచ్చే బాధ్యతలను మున్సిపల్ కమిషనర్లకు అప్పగిస్తే పురపాలనకు సంబంధించిన ఇతర  బాధ్యతలు కుంటుపడతాయని అభిప్రాయపడింది. ఎలాంటి నిర్ణయాలైనా తీసుకునే విధంగా జిల్లా కలెక్టర్ల చేతిలో మెజిస్టీరియల్ అధికారాలు ఉంటాయని, ప్రార్థనా స్థలాలకు అనుమతులిచ్చే బాధ్యతలు వారి వద్దే ఉంచాలని ప్రభుత్వానికి సిఫారసు చేసింది. ప్రస్తుతం అమలులో వున్న మున్సిపల్ చట్టాల ప్రకారం ప్రార్థనా మందిరాలకు అనుమతులిచ్చే అధికారం కేవలం జిల్లా కలెక్టర్లకే ఉంది. ఈ అధికారాన్ని మున్సిపల్ కమిషనర్లకు అప్పగించాలంటే మున్సిపల్ చట్టాల సవరణ జరపక తప్పదని డెరైక్టరేట్ ఆఫ్ కంట్రీ, టౌన్ ప్లానింగ్ సైతం ప్రభుత్వానికి నివేదించింది.