డిస్కౌంట్లు, ధరలను పోల్చే సమాచారమందిస్తున్న స్కాన్‌డిడ్
  
 న్యూఢిల్లీ: మొబైల్ ఫోన్ల దేశీయ దిగ్గజం మైక్రోమ్యాక్స్ కంపెనీ  స్కాన్‌డిడ్(సేవింగ్స్ డిస్కవరీ ప్లాట్‌ఫారమ్)లో కొంత వాటా కొనుగోలు చేసింది. వాటా కొనుగోళ్లకు సంబంధించి ఎలాంటి ఆర్థిక వివరాలను కంపెనీ వెల్లడించలేదు. స్కాన్‌డిడ్ సంస్థ పుణే కేంద్రంగా 2012 నుంచి కార్యకలాపాలు నిర్వహిస్తోంది. స్థానిక రిటైలర్లు, ఈ కామర్స్ సంస్థల్లో వస్తువుల ధరలను పోల్చి చూపడమే కాకుండా, ఎక్కడెక్కడ ఏమేమి డిస్కౌంట్లు లభిస్తాయో.. ఆ సమాచారాన్ని స్కాన్‌డిడ్ వినియోగదారులకు అందిస్తోంది.
 
 200కు పైగా ఆన్‌లైన్ వ్యాపారస్తులకు సంబంధించి  కోటికి పైగా ఉత్పత్తుల ధరలను పోల్చే సమాచారాన్ని వినియోగదారులకు అందిస్తోంది. స్కాన్‌డిడ్   వాటా కొనుగోలు... అప్లికేషన్ సర్వీసుల రంగంలో తమ స్థానాన్ని మరింత పటిష్టం చేస్తుందని, సమగ్రమైన మొబైల్ ఇకోసిస్టమ్ నిర్మాణానికి దోహదపడుతుందని మైక్రోమ్యాక్స్ వ్యవస్థాపకుల్లో ఒకరైన రాహుల్ శర్మ చెప్పారు.
  


 న్యూఢిల్లీ: మైక్రోమ్యాక్స్ కంపెనీ ‘యు’ బ్రాండ్ లో కొత్త స్మార్ట్‌ఫోన్ యుఫోరియాను మంగళవారం మార్కెట్లోకి తెచ్చింది. యుఫోరియా ఫోన్ ధర రూ.6,999 అని, అమెజాన్‌డాట్‌ఇన్ ద్వారా దీనిని కొనుగోలు చేయవచ్చని కంపెనీ పేర్కొం ది. మంగళవారం నుంచే ఈ ఫోన్ కోసం రిజిస్ట్రేషన్లు ప్రారంభమయ్యాయని, ఈ నెల 28 నుంచి విక్రయాలు జరుపుతామని పేర్కొంది. భారత్‌లోనే రూపొందించి, తయారు చేసిన తమ తొలి స్మార్ట్‌ఫోన్ యుఫోరియా అని వివరించింది.
 
 ఇక మైక్రోమ్యాక్స్‌కు చెందిన యు బ్రాండ్ కనెక్టెడ్ డివెసైస్ సెగ్మెంట్లోకి ప్రవేశించింది. హెల్త్‌యు, యుఫిట్ డివైస్‌లను అందిస్తోంది. వినియోగదారుల అహార రికార్డులను ట్రాక్ చేసి, వారు ఫిట్‌నెస్‌తో ఉండేలా యు ఫిట్ డివైస్   తోడ్పడుతుందని  యు బ్రాండ్ పేర్కొంది. ఆండ్రాయిడ్ లాలిపాప్ ఆధారిత సైనోజెన్ ఆపరేటింగ్ సిస్టమ్‌పై పనిచేసే ఈ డ్యుయల్ సిమ్ ఫోన్‌లో 5 అంగుళాల ఐపీఎస్ డిస్‌ప్లే, 8 మెగా పిక్సెల్ రియర్ కెమెరా, 5 మెగాపిక్సెల్ కెమెరా, 2 జీబీ ర్యామ్, 16 జీబీ మెమెరీ, 2,230 ఎంఏహెచ్ బ్యాటరీ వంటి ప్రత్యేకతలున్నాయి.


 40 కోట్ల డాలర్ల పెట్టుబడులు
 న్యూఢిల్లీ: మొబైల్ ఫోన్‌లు తయారు చేసే మైక్రోమ్యాక్స్ కంపెనీ స్టార్టప్‌ల్లో 40 కోట్ల డాలర్ల వరకూ పెట్టుబడులు పెట్టనున్నది. ఆరోగ్య సంరక్షణ, వినోదం, గేమింగ్‌లకు సంబంధించి కనీసం 20 స్టార్టప్‌ల్లో ఈ స్థాయి పెట్టుబడులు పెట్టనున్నామని మైక్రోమ్యాక్స్ వ్యవస్థాపకుల్లో ఒకరైన రాహుల్ శర్మ చెప్పారు. తమ సేవల పోర్ట్‌ఫోలియోను మరింత పటిష్టం చేసుకునే చర్యల్లో భాగంగా ఒక్కో స్టార్టప్‌ల్లో 10 లక్షల నుంచి 20 కోట్ల వరకూ పెట్టుబడులు పెట్టనున్నామని వివరించారు. ఇప్పటికే బెంగళూరుకు చెందిన హెల్త్, ఫిట్‌నెస్ స్టార్టప్ హెల్తిఫైమి స్టార్టప్‌లో ఇన్వెస్ట్ చేశామని వివరించారు.