సాక్షి, నల్లగొండ: అవుట్‌ సోర్సింగ్‌ ఏజెన్సీల దందా ఏళ్ల తరబడిగా కొనసాగుతూనే ఉంది. ఏజెన్సీ నిర్వాహకులు నిరుద్యోగులను నిలువు దోపిడీ చేస్తున్నారు. నెలకు రూ.10వేల జీతం వచ్చే అవుట్‌ సోర్సింగ్‌ ఉద్యోగానికి రూ.లక్షన్నర నుంచి రెండు లక్షల రూపాయలకుపైనే వసూలు చేసిన సంఘటనలు ఉన్నాయి. అంతోఇంతో అదనపు ఆదాయం ఉంటుందని భావిస్తున్న శాఖల్లో అయితే వసూళ్ల రేటు పెద్దగానే ఉంటుంది. ఈ ఉద్యోగాల విషయంలో డబ్బుల దందా పెద్ద ఎత్తున కొనసాగుతోంది. తాజాగా రిజిస్ట్రేషన్‌ కార్యాలయంలో అవుట్‌ సోర్సింగ్‌ పోస్టుల భర్తీకి ప్రభుత్వం నిర్ణయించింది. ఒక ఏజెన్సీ నిర్వాహకుడు వసూళ్ల దందాకు తెగబడినట్లు సమాచారం. ఈ వ్యవహారంపై స్థానిక ప్రజాప్రతినిధి కలెక్టర్‌కు ఫిర్యాదు చేయడంతో ఆయన విచారణ జరిపారు. వాస్తవమేనని తేలడంతో ఆగ్రహించిన కలెక్టర్‌ వారికి తిరిగి డబ్బులు ఇవ్వాలంటూ ఆ ఏజెన్సీ నిర్వాహకుడిని ఆదేశించారని తెలిసింది. దీంతో పాటు ఆ ఏజెన్సీని బ్లాక్‌లిస్ట్‌లో పెట్టాలని ఆదేశించారని సమాచారం.  పనిచేస్తున్న వారినుంచే వసూళ్లు ఈ పోస్టులకు సంబంధించి కొందరు ఇప్పటికే ఆ శాఖలో రోజువారీ వేతనంపై  పనిచేస్తున్నారు. వారంతా తమనే అవుట్‌ సోర్సింగ్‌ పద్ధతిన తీసుకోవాలని అధికారులకు దరఖాస్తులు పెట్టుకున్నారు. వారినుంచే ఏజెన్సీ డబ్బులు వసూలు చేసిందని సమాచారం. ప్రస్తుతం భువనగిరి, సూర్యాపేటలో భర్తీ ప్రక్రియ ప్రారంభం కాలేదు.  ఉమ్మడి జిల్లా పరిధిలోని నల్లగొండ, సూర్యాపేట, యాదాద్రి భువనగిరి రిజిస్ట్రేషన్‌ కార్యాలయాల్లో అవుట్‌ సోర్సింగ్‌ పద్ధతిన 24 పోస్టులను భర్తీ చేయాలని ఆ శాఖ ఉన్నతాధికారులనుంచి ఆదేశాలు వచ్చాయి. నల్లగొండ, సూర్యాపేటలో ఒకే ఏజెన్సీకి  ఉద్యోగులను సమకూర్చే కాంట్రాక్ట్‌  దక్కింది. యాదాద్రి జిల్లాలో మాత్రం ప్రభుత్వ ఆధీనంలో ఉన్న ఏజెన్సీకి అప్పగిస్తున్నట్లు సమాచారం. ఇటీవల కలెక్టర్‌ మిగిలిన జిల్లాల కలెక్టర్లతో మాట్లాడి పోస్టులు భర్తీ చేయాలని నిర్ణయించారు. నల్లగొండలో ఉన్న ఏడు పోస్టులకు సంబంధించి నలుగురినుంచి  ఒక ఏజెన్సీ నిర్వహకుడు రూ.75వేల చొప్పున రూ.3లక్షలు వసూలు చేసినట్లు సమాచారం. ఈ విషయంపై బాధితుల పక్షాన నల్లగొండ శాసనసభ్యుడికి ఫిర్యాదు అందడంతో ఆయన కలెక్టర్‌ దృష్టికి తీసుకువెళ్లారని చెబుతున్నారు. దీంతో కలెక్టర్‌ విచారణ చేపట్టారు. నలుగురినుంచి ఏజెన్సీ నిర్వాహకుడు డబ్బులు వసూలు చేశాడని తేలడంతో కలెక్టర్‌ తీవ్ర స్థాయిలో ఆగ్రహం వ్యక్తం చేసి, వెంటనే సదరు నిర్వాహకుడిని పిలిపించి బాధితులకు డబ్బులు తిరిగివ్వాలని ఆదేశించారు. ఆ తర్వాత ఏజెన్సీని కూడా బ్లాక్‌లిస్ట్‌లో పెట్టాలని  సంబంధిత అధికారులకు ఆదేశించినట్లు తెలిసింది.  ఏళ్ల తరబడి ..దందా  జిల్లాలో కొన్ని అవుట్‌ సోర్సింగ్‌ ఏజెన్సీల దందా ఏళ్లుగా కొనసాగుతూనే ఉంది. వాస్తవంగా కాంట్రాక్టర్‌ ప్రభుత్వం అడిగిన సిబ్బందిని వారి క్వాలిఫికేషన్‌ ఆధారంగా ప్రభుత్వ శాఖలకు పంపించాల్సి ఉంది. ఈ సందర్భంలో వారినుంచి ఎలాంటి డబ్బులూ వసూలు చేయరాదు. కానీ ప్రస్తుతం పెరిగిపోయిన నిరుద్యోగ సమస్య ఏజెన్సీలకు కాసుల వర్షాన్ని కురిపిస్తోంది. ఈ అవకాశంతో కొందరు ఏజెన్సీల నిర్వాహకులు రూ.కోట్లకు పడగలెత్తారు. కొందరు అధికారులకు డబ్బులు ముట్టజెప్పి ఏజెన్సీ దక్కించుకుంటుండగా మరికొందరు ప్రజాప్రతినిధుల ద్వారా ఏజెన్సీలు పొందుతున్నారన్న ఆరోపణలు ఉన్నాయి. దీంతో వారి వసూళ్ల దందా పెద్ద ఎత్తున పెరిగిపోయింది.  సంవత్సరంపైగా ఉచితంగా పనిచేయాల్సిందేనా.. రూ.15వేలు వచ్చే అవుట్‌ సోర్సింగ్‌ పోస్టుకు రూ.2లక్షలు వసూలు చేస్తున్నారంటే  దాదాపు సంవత్సరం పైగానే వారు ఉచితంగా  పనిచేయాల్సి వస్తున్నట్టే. అదనపు సంపాదన ఉం టుందని భావించే శాఖల్లో ఉద్యోగమైతే.. ఒక పోస్టుకు రూ.3లక్షల పైనే వసూలు చేస్తున్నార న్న ఆరోపణలు ఉన్నాయి. అయితే ఇప్పటి వరకు కొందరు  నిర్వాహకులు ఇష్టానుసారంగా వసూళ్లకు పాల్పడుతున్నారు. డబ్బులు లేని వారికి అన్ని అర్హతులు ఉండీ అవకాశం దొరకని పరిస్థితి. కొందరు ఏజెన్సీ నిర్వాహకులు అర్హతలు లేకున్నా బోగస్‌ సర్టిఫికెట్లు సృష్టించి కూడా ఉద్యోగాలు ఇస్తున్నారన్న ఆరోపణలు కూడా ఉన్నాయి.  మెడికల్‌ కళాశాలలోనూ వసూళ్ల దందా..! జిల్లా మెడికల్‌ కళాశాలలో అవుట్‌ సోర్సింగ్‌ పద్ధతిన పోస్టులు మంజూరు కావడంతో ఏజెన్సీల దందా మొదలైంది. ఇప్పటికీ ఏజెన్సీలను ఫైనల్‌ చేయలేదు. కానీ కొందరు నిర్వాహకులు మాత్రం మెడికల్‌ కళాశాలల్లో ఉద్యోగాల పేర డబ్బుల వసూళ్లకు పాల్పడుతున్న వ్యవహారంపై  ‘సాక్షి’ ప్రత్యేక కథనం ప్రచురించడంతో ఉన్నతాధికారులు ఆగ్రహం వ్యక్తం చేశారు. దీంతో వసూలు దారుల్లో గుబులు మొదలైంది. పోలీసులు కూడా వారి గురించి ఆరా తీసినట్లు సమాచారం. ఇదే పరిస్థితిలో రిజిస్ట్రేషన్‌ శాఖలో ఏజెన్సీ నిర్వాహకుడు అభ్యర్థుల నుంచి వసూళ్ల దందా బయటపడింది. బాధితులకు తిరిగి డబ్బు ఇప్పించడం ఇప్పుడు అవుట్‌ సోర్సింగ్‌ ఏజెన్సీల్లో గుబులు రేపుతోంది.  కలెక్టర్‌ సీరియస్‌తో అడ్డం తిరిగిన కథ ఇప్పటి వరకు ఏ ఏజెన్సీ నిర్వాహకుడు కూడా డబ్బులు వసూలు చేసి తిరిగి ఇచ్చిన దాఖలాలు లేవు. మొట్టమొదటిసారి శాసనసభ్యుడి ఫిర్యాదు, కలెక్టర్‌ విచారణతో బట్టబయలై వసూలు చేసిన డబ్బులు తిరిగి ఇప్పించడంతో ఏజెన్సీల్లో కలవరం మొదలైంది. ఇదే క్రమంలో గతంలో భర్తీ చేసిన ఉద్యోగాలపై కూడా విచారణ చేయాలన్న డిమాండ్‌ కొన్ని ఏజెన్సీలనుంచే వ్యక్తమవుతోంది. 

శాతవాహనయూనివర్సిటీ(కరీంనగర్‌): కరీంనగర్‌లోని శాతవాహన యూనివర్సిటీలో ఎక్కడ చూసినా ఖాళీలే కనిపిస్తున్నాయి. ఏళ్ల నుంచి పోస్టులు ఖాళీగా ఉండడంతో కాంట్రాక్టు, అవుట్‌సోర్సింగ్‌ ఉద్యోగులతో నెట్టుకు రావాల్సిన పరిస్థితి ఎదురవుతోంది. యూనివర్సిటీకి ఇన్‌చార్జి వైస్‌ చాన్స్‌లర్‌(వీసీ) ఉండడంతో రిక్రూట్‌మెంట్‌కు ముందుకు రాకపోవడం ప్రధాన కారణంగా తెలుస్తోంది. ప్రభుత్వం కూడా పెద్దగా దృష్టి సారించకపోవడం కూడా మరో కారణమని విద్యావేత్తల నుంచి అభిప్రాయం వ్యక్తమవుతోంది. పోస్టులు ఎక్కువ సంఖ్యలో ఖాళీ ఉండడంతో ఉన్న వారిపై పనిభారం పడుతోంది. అభివృద్ధి పనులు కొంతకాలంగా సాగుతున్నా పూర్తిస్థాయి, రెగ్యులర్‌ ఉద్యోగులుంటే అన్ని రకాలుగా యూనివర్సిటీ అభివృద్ధి చెందుతుంది. వరుస ఎన్నికలు కూడా పోస్టుల భర్తీకి అడ్డంకిగా నిలుస్తున్నాయి. పూర్తిస్థాయి వీసీ నియామకం ఆలస్యమైతే ఇన్‌చార్జితోనే రిక్రూట్‌మెంట్‌ చేసి ఖాళీలను భర్తీ చేయాలని వివిధ విద్యార్థి సంఘాలు కోరుతున్నాయి. 70 శాతం పైగా ఖాళీలే... యూనివర్సిటీలో టీచింగ్‌ నాన్‌టీచింగ్‌ విభాగాల్లో పెద్ద ఎత్తున ఖాళీలున్నాయి. శాతవాహనలో టీచింగ్‌కు సంబంధించి 65 పోస్టులకు ప్రస్తుతం రెగ్యులర్‌ పోస్టులు 20 మంది మాత్రమే ఉండగా మిగతా 45 పోస్టులు ఖాళీగానే ఉన్నాయి. ప్రొఫెసర్లు 10కి 10 ఖాళీలుండగా, అసోసియేట్‌ ప్రొఫెసర్లు16కు 16 ఖాళీలు, అసిస్టెంట్‌ ప్రొఫెసర్లు 37కు 20 మంది ఉండగా, 17 పోస్టులు ఖాళీలున్నాయి. నాన్‌ టీచింగ్‌ విషయానికి వస్తే మొత్తం 51 పోస్టులుండగా 13 పోస్టులు మాత్రమే భర్తీ కాగా 38 పోస్టులు ఖాళీగానే ఉన్నాయి. ముఖ్యమంత్రి కార్యాలయం వద్ద... యూనివర్సిటీలో కేటాయించిన పోస్టుల్లోనే దాదాపు టీచింగ్‌లో 70 శాతం వరకు ఖాళీ ఉండగా నాన్‌టీచింగ్‌లో దాదాపు 75 శాతం వరకు  ఖాళీలున్నాయి. ఇవి కాకుండా టీచింగ్‌లో మరో 40కిపైగా పోస్టులు, నాన్‌టీచింగ్‌లో మరో 44 పోస్టులు అవసరమని యూనివర్సిటీ అధికారులు ప్రభుత్వానికి నివేదించారు. ఆయా పోస్టులకు సంబంధించిన ఫైళ్లు ముఖ్యమంత్రి కార్యాలయంలో ఉన్నట్లు శాతవాహన అధికార వర్గాల సమాచారం. వీటితోపాటు 12బీకి సంబంధించిన దస్త్రాలు కూడా  సీఎం కార్యాలయంలోనే ఉన్నట్లు సమాచారం. ఎన్నికలు ముగిస్తే కానీ వీటి విషయంలో స్పష్టత రాదని తెలుస్తోంది. ఇది ఇలా ఉండగా ప్రస్తుతం ఇన్‌చార్జి వీసీ పాలనే గత నాలుగేళ్లకు పైగా కొనసాగుతోంది. ఇన్‌చార్జి వీసీ ఉండగా నియమకాలు చేపట్టేందుకు ముందకు రావడం లేదని తెలుస్తోంది. గతంలో అసిస్టెంట్‌ ప్రొఫెసర్ల నియామకంలో పెద్ద ఎత్తున అవినీతి, అక్రమాలు జరిగాయని రాజకీయ పార్టీల నాయకులు, విద్యార్థి సంఘాలు అనేక సార్లు ధర్నాలు చేశాయి. దీంతో ఇన్‌చార్జి పాలనలో నియమాకాలు జరుగుతాయో లేదో తెలియని పరిస్థితి నెలకొంది. ఎన్నికలు ముగిస్తేనే ముందుకు... యూనివర్సిటీలో వివిధ విభాగాల్లో ఖాళీలను భర్తీ చేయాలంటే ఎన్నికలు ముగిసే వరకు ఆగాల్సిందేనని తెలుస్తోంది. ప్రస్తుతం గత 8 నెలల నుంచి రాష్ట్రంలో ఎన్నికల వాతావరణం ఉండడంతో నియామక, 12బీ గుర్తింపు పక్రియ ముందుకు సాగడం లేదు. స్థానిక సంస్థల ఎన్నికలు ముగిసి ఫలితాలు రాగానే మున్సిపల్‌ ఎన్నికల కోడ్‌ కూసేలా ఉంది. ఇదే జరిగితే మరో రెండు మూడు నెలలు భర్తీ పక్రియ పెండింగ్‌ పడుతుందని విద్యావేత్తలు అంచనా వేస్తున్నారు. ఎన్నికలు పూర్తయిన తర్వాత రెగ్యులర్‌ వీసీ నియామక ప్రక్రియ ఆలస్యమయితే ఇన్‌చార్జి వీసీతోనైనా నియామకాలు జరిపి ఖాళీగా ఉన్న పోస్టులతోపాటు అవసరమున్న మరిన్ని పోస్టులను భర్తీ చేయాలని విద్యార్థులు కోరుతున్నారు.

సాక్షి, ఒంగోలు టౌన్‌: ఎన్నికల కోడ్‌ అమలులో ఉన్నా పాత డేట్లతో పోస్టింగ్‌ ఆర్డర్లు జారీచేసి వారికి కేటాయించిన ప్రాంతాల్లో విధుల్లో చేరాలంటూ ఆ శాఖ అధికారి నుండి ఫోన్లు వెళ్లాయి. ఎన్నికల కోడ్‌ అమలులో ఉండగానే పాత తేదీలతో పోస్టింగ్‌ ఆర్డర్లు ఇచ్చి సంబంధిత అధికారులపై ఒత్తిళ్లు తీసుకురావడం ఆ శాఖలో చర్చనీయాంశమైంది. వివరాలు.. సమగ్ర శిక్షా అభియాన్‌ జిల్లా ప్రాజెక్టు పరిధిలోని కస్తూరిబా గాంధీ బాలికా విద్యాలయాల్లో వివిధ కేటగిరీలకు సంబంధించిన పోస్టులను భర్తీ చేసేందుకు దఫాలు వారీగా నోటిఫికేషన్లు జారీ చేశారు. స్పెషల్‌ ఆఫీసర్‌ మొదలుకొని కింది స్థాయి వరకు ఖాళీగా ఉన్న పోస్టులను భర్తీ ప్రక్రియ చేపట్టారు. కొన్ని పోస్టులను రాత పరీక్ష ద్వారా మరికొన్ని పోస్టులను ఔట్‌ సోర్సింగ్‌ ఏజెన్సీ ద్వారా భర్తీ చేసుకునేందుకు అవకాశం కల్పించారు. కంప్యూటర్‌ ఆపరేటర్లు, ఒకేషనల్‌ ఇన్‌స్ట్రక్టర్లు, సీఆర్‌పీలు, పీఈటీలకు సంబంధించి 57 పోస్టులను భర్తీ చేయాల్సి ఉంది. వీటిలో ఎన్నికల షెడ్యూల్‌ విడుదలైన రోజు సంబంధిత ఔట్‌ సోర్సింగ్‌ ఏజెన్సీకి పోస్టుల భర్తీకి అవకాశం వచ్చిన్నా ఆ ఏజెన్సీతో సంబంధం లేకుండానే తాము అనుకున్న వారికి పాత డేట్లు వేసి పోస్టింగ్‌లు ఇవ్వడం వివాదాస్పదమైంది. పాత డేట్లతో పోస్టింగ్‌లు సమగ్ర శిక్షా అభియాన్‌ జిల్లా ప్రాజెక్టు పరిధిలోని కస్తూరిబా గాంధీ బాలికా విద్యాలయాల్లో కంప్యూటర్‌ ఆపరేటర్, ఒకేషనల్‌ ఇన్‌స్ట్రక్టర్, క్లస్టర్‌ రీసోర్స్‌ పర్సన్, పీఈటీ వంటి పోస్టులను ఔట్‌ సోర్సింగ్‌ ద్వారా భర్తీ చేయాలని నిర్ణయించారు. ఈ పోస్టుల కోసం పెద్ద సంఖ్యలో అభ్యర్థుల నుంచి దరఖాస్తులు వచ్చాయి. ఏమైందో ఏమోగానీ ఈ పోస్టులతో పాటు ప్రకటించిన స్పెషల్‌ ఆఫీసర్‌ పోస్టుల భర్తీకి రాత పరీక్ష నిర్వహించారు. అదే సమయంలో ఈ పోస్టులను తాత్కాలికంగా నిలిపేశారు. మొత్తం మీద ఆ పోస్టులను కూడా భర్తీ చేసుకునేందుకు ఆ శాఖ ఉన్నతాధికారుల నుంచి అనుమతి తీసుకున్నారు. ఇంతవరకు బాగానే ఉన్నా పోస్టుల భర్తీ ప్రక్రియ వివాదాస్పదమైంది. రానా ఏజెన్సీ ద్వారా ఔట్‌ సోర్సింగ్‌ పోస్టులను భర్తీ చేయనున్నారు. ఈ పోస్టుల భర్తీ చేసుకునేందుకు ఆ ఏజెన్సీకి ఈ నెల 10వ తేదీ అనుమతి వచ్చింది. అదేరోజు సాయంత్రం సార్వత్రిక ఎన్నికలకు సంబంధించి కేంద్ర ఎన్నికల సంఘం ప్రకటన చేయడంతో ఆ శాఖలో కీలకమైన వ్యక్తికి ‘మనీ’లాంటి ఆలోచన వచ్చింది. ఔట్‌ సోర్సింగ్‌ పోస్టులకు ఎలాగూ అనుమతి వచ్చింది కదా అని పాత డేట్లతో పోస్టింగ్‌ ఆర్డర్‌లను పుట్టించడం వివాదాస్పదమైంది. సంబంధిత పోస్టుల భర్తీకి పాత డేట్లు వేసి విధుల్లో చేరాలంటూ కొంతమంది ఎస్‌ఓలపై ఒత్తిళ్లు వచ్చినట్లు తెలిసింది. కీలకమైన ఆ వ్యక్తి సంబంధిత అధికారులకు ఫోన్లు చేసి 8, 9వ తేదీల్లో విధుల్లో చేరినట్లుగా చూపించాలని సమగ్ర శిక్షా అభియాన్‌ కార్యాలయం నుంచి ఫోన్లు వెళ్లాయి. కొంతమంది ఆ ఫోన్లకు భయపడి పాత డేట్లతో విధుల్లో చేరినట్లుగానే చూపించేశారు. మరికొంతమంది మాత్రం ఎక్కడ మా ఉద్యోగాలు ఊడతాయోనన్న భయంతో కొద్దిగా సంశయించినా ఒత్తిడి అధికం కావడంతో తప్పనిసరి పరిస్థితుల్లో పాత డేట్లతో ఔట్‌ సోర్సింగ్‌ సిబ్బందిని చేర్చుకున్నారు. సీసీ కెమెరాల్లో రికార్డు జిల్లాలోని అన్ని కస్తూరిబా గాంధీ బాలికా విద్యాలయాల్లో వాటి రక్షణకు సంబంధించి సీసీ కెమెరాలు ఏర్పాటు చేశారు. కస్తూరిబా గాంధీ విద్యాలయంలో ఎవరు అడుగు పెట్టినా ఆ క్షణం నుంచే సీసీ కెమేరాల్లో రికార్డు అవుతోంది. జిల్లాలోని పలు కస్తూరిబా బాలికా విద్యాలయాల్లో నిబంధనలకు విరుద్ధంగా విధుల్లో చేరేందుకు పాత తేదీలతో వచ్చిన వారి కదలికలు కూడా సీసీ కెమెరాల్లో రికార్డు అయ్యాయ. సీసీ కెమెరాలను ఆధారం చేసుకొని సమగ్ర విచారణ జరిపితే కేజీబీవీల్లో ఏం జరుగుతుందో ఇట్టే అర్థమవుతోంది. సంబంధిత అభ్యర్థి ఏ రోజు విధుల్లో చేరారన్నది కూడా స్పష్టంగా తెలియనుంది. పైపెచ్చు ఔట్‌ సోర్సింగ్‌ ద్వారా పోస్టులను భర్తీ చేసే సమయంలో రోస్టర్‌ విధానాన్ని పాటించకుండా, ఓపెన్‌ కేటగిరి(ఓసీ)కి సంబంధించిన పోస్టులనే భర్తీ చేయడం కూడా చర్చనీయాంశమైంది. ఓసీకి సంబంధించిన వారు అయితే తాము డిమాండ్‌ చేసిన విధంగా సమర్పిస్తారన్న ఉద్దేశంతో వన్‌సైడ్‌గా వ్యవహరించారన్న విమర్శలు ఉన్నాయి. ‘చిరు’ ప్రభావం కస్తూరిబా గాంధీ బాలికా విద్యాలయాల్లో ఔట్‌ సోర్సింగ్‌ కింద నిబంధనలకు విరుద్ధంగా పోస్టులను భర్తీ చేసిన విషయంలో ఆ శాఖకు చెందిన కీలకమైన అ««ధికారితో పాటు మరో కీలకమైన వ్యక్తి చక్రం తిప్పారన్న విమర్శలు బలంగా వినిపిస్తున్నాయి. ఆ శాఖకు చెందిన మంత్రికి అత్యంత దగ్గర బంధువైన వ్యక్తి నిబంధనలకు విరుద్ధంగా జరిగిన నియామకాల్లో కీలకపాత్ర పోషించారన్న ఆరోపణలు ఉన్నాయి. దానికితోడు ఔట్‌ సోర్సింగ్‌ ద్వారా భర్తీ చేసిన పోస్టుల్లో రోస్టర్‌ ఆఫ్‌ రిజర్వేషన్‌ కింద తీసిన వాటిలో ఓసీలకు సంబంధించిన పోస్టులకే పచ్చజెండా ఊపడం చర్చనీయాంశమైంది. ఓసీలకు సంబంధించిన పోస్టులను భర్తీ చేయడం ద్వారా ఎక్కువగా తూగుతారని, ఇతరులైతే తాము డిమాండ్‌ చేసినంత ఇచ్చుకోలేరన్న ఉద్దేశంతో సరికొత్త విధానానికి తెరలేపారన్న విమర్శలు వినిపిస్తున్నాయి. ఈ విషయమై సమగ్ర విచారణ జరిపితే మరిన్ని వాస్తవాలు వెలుగులోకి వచ్చే అవకాశాలు లేకపోలేదు. 

నగర పాలక సంస్థలో ఔట్‌ సోర్సింగ్‌ నియామకాలకు లెక్క లేదు. వీరు ఎక్కడ పని చేస్తున్నారో ఉన్నతాధికారులు అడిగినా.. సమాధానం చెప్పే దిక్కు లేదు. వీరి జీతాల చెల్లింపుల్లో అవినీతికి అడ్డూఅదుపూ లేదు. బడ్జెట్‌లో ఏటికేడు జీతాల లెక్కలు రెట్టింపైనా ఎవరెవరికి పంచుతున్నారో రికార్డు లేదు. ‘ఏమిటిది ?.. ఏం జరుగుతోంది.. వెంటనే లెక్కలు తేల్చండి’ అంటూ కమిషనర్‌ మండిపడినా 20 రోజులుగా ఆయా విభాగాల అధికారులు ఖాతరు చేసింది లేదు. ఇప్పటి వరకు పని చేసిన సిబ్బందికి ఈ నెల జీతాలు వచ్చిందీ లేదు. ఇదీ గుంటూరు నగర పాలక సంస్థ పరిధిలో ఔట్‌ సోర్సింగ్‌ సిబ్బంది విషయంలో అధికారులు అనుసరిస్తున్న తీరు.   సాక్షి, గుంటూరు : గుంటూరు నగరపాలక సంస్థ కార్యాలయ పరిధిలోని ఇంజినీరింగ్, ప్రజారోగ్య విభాగాల్లో సిబ్బంది కొరత ఉండటంతో అవుట్‌ సోర్సింగ్‌ ద్వారా కొందరిని నియమించుకునేందుకు  అవకాశం కల్పించారు. వీరికి నగరపాలక సంస్థ ఖజానా నుంచి జీతాలు చెల్లిస్తున్నారు. అధికారిక లెక్కల ప్రకారం ఇంజినీరింగ్‌ విభాగంలో 930 మంది, ప్రజారోగ్య విభాగంలో 1667 మంది సిబ్బంది అవుట్‌ సోర్సింగ్‌లో విధులు నిర్వహిస్తున్నారు. వీరిలో ఎవరెక్కడ పని చేస్తున్నారో ఆయా విభాగాల అధికారులకే తెలియని పరిస్థితి.  డిప్యూటేషన్‌ల పేరుతో రెవెన్యూ, పట్టణ ప్రణాళిక విభాగం వంటి అనేక విభాగాల్లో వీరిని కేటాయిస్తున్నారు. అయితే ఇదే అదనుగా భావించిన కొందరు అవినీతి అధికారులు అసలు ఎవరూ పని చేయకుండానే ఉన్నట్లుగా లెక్కలు చూపుతూ నెల నెలా జీతాలు మార్చుకుంటున్నారని ఆరోపణలు వెల్లువెత్తుతున్నాయి. అధికారుల ఇళ్లలో పనులకూ వీరే.. ప్రజారోగ్య విభాగంలో 1667 మంది అవుట్‌ సోర్సింగ్‌ సిబ్బందికి జీతాలు చెల్లిస్తుండగా, సుమారుగా 300 మంది వరకు నగరపాలక సంస్థతోపాటు, వివిధ శాఖల అధికారుల ఇళ్లల్లో పని చేస్తున్నట్లు సమాచారం. సొంత పనులకు అవుట్‌ సోర్సింగ్‌ సిబ్బందిని వినియోగించుకుంటూ జీతాలు మాత్రం నగరపాలక సంస్థ ద్వారా చెల్లిస్తున్నారనే విమర్శలు వినిపిస్తున్నాయి. అదే విధంగా ఇంజినీరింగ్‌ విభాగంలో 930 మంది అవుట్‌ సోర్సింగ్‌ సిబ్బంది పని చేస్తున్నట్లు చెబుతుండగా, ఇటీవల ఏఈలు తమ వద్ద పని చేసే సిబ్బంది లెక్కలు ఎస్‌ఈకి సమర్పించారు. ఇందులో మాత్రం 888 మంది మాత్రమే పని చేస్తున్నట్లుగా చూపడం చూస్తుంటే మిగతా సిబ్బంది ఎక్కడైనా పని చేస్తున్నారా ? లేక వారు లేకుండానే బినామీ పేర్లతో జీతాల డబ్బులు కాజేస్తున్నారా ? అనే అనుమానాలు వ్యక్తమవుతున్నాయి. అవుట్‌ సోర్సింగ్‌ సిబ్బందిలో అనేక మంది అధికారుల ఇళ్లల్లో డ్రైవర్లు, వాచ్‌మెన్‌లు, సెక్యూరిటీ గార్డులుగా వినియోగించుకుంటున్నారనే ఆరోపణలు వినిపిస్తున్నాయి.   ప్రతి ఏటా రెట్టింపు బిల్లులు గుంటూరు నగరపాలక సంస్థ కార్యాలయ పరిధిలో అవుట్‌ సోర్సింగ్‌ ఉద్యోగుల జీతాల ఖర్చు ప్రతి ఏటా రెట్టింపు స్థాయిలో పెరుగుతుండటం పలు అనుమానాలకు తావిస్తోంది. అవుట్‌ సోర్సింగ్‌ ఉద్యోగుల జీతాల కోసం  2016–17 సంవత్సరానికిగాను రూ. 25 కోట్లు ఖర్చు చేయగా, 2017–18 సంవత్సరానికి అది సుమారుగా రూ. 50 కోట్లకు చేరింది.   బిల్లులు నిలిపివేసి నివేదిక కోరిన కమిషనర్‌ గుంటూరు నగరపాలక సంస్థ కార్యాలయ పరిధిలో పని చేస్తున్న అవుట్‌ సోర్సింగ్‌ సిబ్బంది మార్చి జీతాల బిల్లులను వివిధ శాఖల అధికారులు కమిషనర్‌ శ్రీకేష్‌ లత్కర్‌కు ఆన్‌లైన్‌ ద్వారా పేర్లు లేకుండా పంపారు. అయితే వీటిపై అనుమానం వ్యక్తం చేసిన కమిషనర్‌ జీతాలు నిలిపివేసి అవుట్‌ సోర్సింగ్‌ సిబ్బంది ఎక్కడెక్కడ పని చేస్తున్నారు ? వారి వివరాలతో పూర్తి నివేదిక ఇవ్వాలని ఆయా శాఖ అధికారులను ఆదేశించారు.  20 రోజులుగా నివేదిక ఇవ్వని అధికారులు లెక్కలు చూపితే అధికారుల ఇళ్లలో పని చేసే వారితోపాటు అసలు పనిచేయని వారి గుట్టు సైతం బయటపడుతుందని భయమో ఏమోగానీ 20 రోజులు దాటుతున్నా ఇంత వరకు వివరాలు కమిషనర్‌కు అందించలేదు. దీంతో నిజంగా పని చేసిన అవుట్‌ సోర్సింగ్‌ సిబ్బంది సైతం జీతాలు రాక ఇబ్బందులు పడుతున్నారు. అవుట్‌ సోర్సింగ్‌ ఉద్యోగుల ఆధార్‌ కార్డును బయోమెట్రిక్‌కు అనుసంధానం చేయాలని గత కమిషనర్‌ అనురాధ అధికారులను ఆదేశించినప్పటికీ ఇంత వరకు ఆ ప్రక్రియ ప్రారంభం కాలేదు.  కంప్యూటర్‌ ఆపరేటర్‌ను మంత్రి పేషీకి పంపాం: రామచంద్రారెడ్డి, ఏసీ  గుంటూరు నగరపాలక సంస్థలో కంప్యూటర్‌ ఆపరేటర్‌గా పని చేస్తున్న అవుట్‌ సోర్సిం గ్‌ఉద్యోగిని డిప్యూటేషన్‌పై మంత్రి పేషీకి పంపుతూ ఆర్డర్‌ ఇచ్చాం. మిగతా అవుట్‌ సోర్సింగ్‌ ఉద్యోగులు డిప్యూటేషన్‌పై ఇతర విధులు నిర్వర్తిస్తున్నట్లు మా దృష్టిలో లేదు. అకౌంట్‌ సెక్షన్‌లో కొంత ఆలస్యం కావడంతోపాటు, కమిషనర్‌ సెలవులో ఉండటంతో అవుట్‌ సోర్సింగ్‌ ఉద్యోగుల జీతాలు ఆలస్యమయ్యాయి.   


 -  మరో 192 ఔట్ సోర్సింగ్ పోస్టులు
  
 సాక్షి, హైదరాబాద్: బీసీ సంక్షేమ శాఖ పరిధిలో జూనియర్ కాలేజీలుగా అప్‌గ్రేడ్ చేసిన 16 గురుకుల పాఠశాలల్లో బోధన, బోధనేతర సిబ్బంది, ఔట్‌సోర్సింగ్ పోస్టులను ప్రభుత్వం మంజూరు చేసింది. వీటిలో 240 రెగ్యులర్ పోస్టులు, 192 ఔట్‌సోర్సింగ్ పోస్టులకు గానూ ఆర్థిక శాఖ కార్యదర్శి శివశంకర్ మంగళవారం ఉత్తర్వులు జారీ చేశారు. బీసీ గురుకులాల సర్వీసు రూల్స్ ఆధారంగా రెగ్యులర్ పోస్టులను డెరైక్టు రిక్రూట్‌మెంట్ ద్వారా భర్తీ చేసేందుకు బీసీ సంక్షేమ శాఖ చర్యలు చేపట్టాలని పేర్కొన్నారు.
  
  రెగ్యులర్ పోస్టులు..
  కేటగిరీ    పోస్టులు    వేతనం (రూపాయల్లో)
  ప్రిన్సిపల్    16    42,490 - 96,110
  జూనియర్ లెక్చరర్     176    37100 - 91,450
  లైబ్రేరియన్    16    37100 - 91,450
  ఫిజికల్ డెరైక్టర్    16    37100 - 91450
  సీనియర్ అసిస్టెంట్    16    22460 - 66330
  
  ఔట్‌సోర్సింగ్ పోస్టులు..
  జూనియర్ అసిస్టెంట్ కమ్ డీఈవో    16
  ల్యాబ్ అసిస్టెంట్     32
  అటెండర్    32
  కుక్    16
  మల్టీ పర్పస్ వర్కర్    96
  మొత్తం    192.