పిల్లలు బాల్యాన్ని ఆస్వాదించాలి. బాల్యపు ఛాయలు వీడకముందే పెద్దయితే ఎలా? ఈ అవాంచిత మార్పుకు కారణాలు అనేకం. అర్లీ ప్యూబర్టీలో సౌందర్య సాధనాల పాత్ర చాలా పెద్దదని చెబుతోంది యూఎస్‌లోని అధ్యయన సంస్థ. చిన్నప్పుడే పెద్దవుతున్నారు! బాలికల్లో అర్లీ ప్యూబర్టీకి దారి తీస్తున్న కారణాల మీద యూఎస్‌లో ఒక అధ్యయనం జరిగింది. 1990ల కాలంతో పోలిస్తే ఇటీవల బాలికలు చాలా త్వరగా యుక్తవయసులోకి వస్తున్నారు. పునరుత్పత్తి వ్యవస్థ పరిణతి చెంది రుతుక్రమం మొదలవుతోంది. యూఎస్‌లో ప్రతి పదిమంది బాలికల్లో ఎనిమిది మంది చాలా చిన్న వయసు నుంచే మేకప్‌ వేసుకుంటున్నట్లు వెల్లడైంది.అర్లీ ప్యూబర్టీకి అల్ట్రా ప్రాసెస్‌డ్‌ ఆహారం కూడా ఒక కారణమే అయినప్పటికీ బాలురతో పోలిస్తే బాలికల్లో ఈ లక్షణాలు ఎక్కువగా కనిపించడానికి కారణం సౌందర్య సాధనాలుగా గుర్తించారు. రోజువారీ డిటర్జెంట్‌లు, పెర్‌ఫ్యూమ్‌ల తోపాటు మేకప్‌ సాధనాల పాత్ర చాలా ఎక్కువగా ఉంటోందని అంచనా. యూఎస్‌ నేషనల్‌ ఇన్‌స్టిట్యూట్‌ ఆఫ్‌ హెల్త్‌ ఇదే అంశం మీద నిర్వహించిన జీబ్రాఫిష్‌ పరిశోధన కూడా ఈ రసాయనాల ప్రభావాన్ని నిర్ధారించింది. అర్లీ ప్యూబర్టీ కారణంగా పదేళ్లలోపే రుతుక్రమం మొదలవడం ఒక సమస్య అయితే దీర్ఘకాలంలో స్థూలకాయం, గుండె సమస్యలు, బ్రెస్ట్‌ క్యాన్సర్‌ తోపాటు అనేక ఇతర ఆరోగ్య సమస్యలకు దారి తీసే ప్రమాదం ఉందని ఎండోక్రైనాలజీ జర్నల్‌ ప్రచురించింది. కేన్సర్‌ కూడా ముందుకొచ్చింది! అల్ట్రా ప్రాసెస్‌డ్‌ ఫుడ్‌ కారణంగా పెరుగుతున్న క్యాన్సర్‌ల విషయానికి వస్తే... గతంలో క్యాన్సర్‌ బారిన పడడానికి సగటు వయసు 70 ఏళ్లుగా ఉండేది. ఇప్పుడు 35 ఏళ్ల లోపే క్యాన్సర్‌ బారిన పడుతున్నారు. క్యాన్సర్‌ పరిశోధనల్లోనూ సౌందర్యసాధనాల పాత్రను ప్రధానంగా గుర్తిస్తున్నారు నిపుణులు. అల్ట్రా ప్రాసెస్‌డ్‌ కాస్మటిక్స్‌ స్కిన్‌ క్యాన్సర్‌కు కారణమవుతున్నాయి. ముఖం, జుట్టు, చర్మం అందంగా కనిపించడానికి వాడే సౌందర్యసాధనాల్లో ఉపయోగించే రసాయనాల కారణంగా ఎగ్జిమా, వెయిట్‌ గెయిన్‌ సమస్యలు కూడా వస్తున్నాయని అర్థమైంది. కొన్ని సందర్భాలో అర్లీ ప్యూబర్టీకి దారి తీసే పరిస్థితులు గర్భస్థ శిశువుగా ఉన్నప్పుడే మొదలవుతాయి. గర్భిణిగా ఉన్నప్పుడు తీవ్రమైన మానసిక ఒత్తిడికి లోనయితే ఆ ప్రభావం పుట్టే బిడ్డ మీద ఉంటుందని కొన్ని అధ్యయనాలు తెలియచేశాయి. నెయిల్‌ పాలిష్‌లలో ఉండే ఫార్మాల్డిహైడ్‌ వంటి కొన్ని విషపూరిత రసాయనాలు కేన్సర్‌కు కారణమవుతున్నాయి. డిబ్యూటిల్‌ఫ్తాలేట్‌ పునరుత్పత్తి వ్యవస్థ మీద దుష్ప్రభావాన్ని చూపిస్తుంది. మూత తీయగానే ఘాటు వాసన వచ్చే నెయిల్‌ పాలిష్‌లు, గ్లిట్టర్‌ పాలిష్‌లు మరింత హానికరమని అనేక అధ్యయనాల్లో వెల్లడైంది.మన దేశంలో బాలికల్లో కాస్మటిక్స్‌ వాడకం అమెరికాతో పోలిస్తే అంత తీవ్రంగా లేకపోయినప్పటికీ స్థూలకాయం, దేహ కదలికలు తగినంతగా లేని జీవనశైలి, చదువు ఒత్తిడి బాలికల్లో అర్లీ ప్యూబర్టీకి కారణమవుతున్నాయి. కాబట్టి తోటి పిల్లలతో కలిగి దేహానికి శ్రమ కలిగించే ఆటలను ప్రోత్సహించాలని, పిల్లలను పిక్‌నిక్‌లకు తీసుకువెళ్లడం ద్వారా వాళ్ల దృష్టిని అనేక ఇతర సామాజికాంశాల మీదకు మళ్లించాలని నిపుణులు సూచిస్తున్నారు. నాట్య ప్రదర్శనలు, ఇతర స్టేజ్‌ షోలలో పాల్గొనే పిల్లలకు మేకప్‌ తప్పని సరి అవుతుంది. అలాంటప్పుడు నిపుణుల సూచన మేరకు హానికరం కాని సౌందర్య సాధనాలను మాత్రమే ఉపయోగించాలి. మన దైనందిన జీవితంలో డిటర్జెంట్‌ల వాడకం తప్పదు, పైగా వాటి ప్రమాణాలను సంస్థాగతంగా తప్ప వ్యక్తులుగా నిర్దేశించలేం. మరో ముఖ్యమైన విషయం... రోజుకు మూడు నుంచి నాలుగు లీటర్ల నీటిని తాగే అలవాటుంటే ఇక ముఖం మీద ఏ సౌందర్యసాధనమూ అవసరం లేదని కూడా అధ్యయనాలు సూచిస్తున్నాయి. మేకప్‌ అవసరం లేదు! అర్లీ ప్యూబర్టీ ఆందోళన కలిగించే విషయమే. రసాయనాల ప్రభావానికి సంబంధించిన పరిశోధనలు ఇంకా కొనసాగుతూనే ఉన్నాయి. నిజానికి దేహ ఆరోగ్యాన్ని కచ్చితంగా కాపాడుకుంటే సన్‌స్రీన్, మాయిశ్చరైజర్‌ తప్ప ఇతర సౌందర్యసాధనాల అవసరమే ఉండదు. బాల్యంలోనే వీటి మాయలో పడుతున్నారంటే ప్రకటనల ప్రభావం తోపాటు అవి అందుబాటులో ఉండడం కూడా కారణమే. కొన్ని ప్రత్యేకమైన, అరుదైన సందర్భాల్లో మేకప్‌ తప్పనిసరి కావచ్చు. అలా ఉపయోగించేటప్పుడు కూడా ఆ బాలికలను డాక్టర్‌కు చూపించి వారి అభిప్రాయాన్ని తీసుకోవాలి. బాలిక చర్మతత్వాన్ని బట్టి సైడ్‌ ఎఫెక్ట్స్‌ లేని మేకప్‌ తదితర సౌందర్యసాధనాలను సూచించగలుగుతారు. – డాక్టర్‌ స్వప్నప్రియ, డర్మటాలజిస్ట్‌ (చదవండి: డాటర్‌ ఆట చూసి అమ్మ అంపైరయింది)

మా అమ్మాయికి పదిహేడేళ్లు. ఇంకా రజస్వల కాలేదు. ఏ అనారోగ్యమూ లేదు. అయినా రజస్వల ఎందుకు కావట్లేదో తెలియడం లేదు. – అనూరాధ, చింతలపూడి డిలేయ్డ్‌ మెనాకీ సాధారణంగా పదమూడేళ్ల లోపు బ్రెస్ట్‌ డెవలప్‌మెంట్, పదహారేళ్లలోపు నెలసరి మొదలు అవుతాయి. పదహారేళ్ల తర్వాత కూడా రాకపోతే డిలేయ్డ్‌ మెనాకీ (delayed menarche) అంటాము. చాలామంది అమ్మాయిలు తక్కువ బీఎమ్‌ఐ.. అంటే ఎత్తుకు తగ్గ బరువు నిష్పత్తి 17 కన్నా తక్కువ ఉంటే బరువు పెరిగిన తర్వాతే నెలసరి మొదలవుతుంది. కొంమందిలో హార్మోన్స్‌ ఇంబాలెన్స్, జెనెటిక్‌ ప్రాబ్లమ్స్‌ ఉన్నా ఇలా ఆలస్యంగా రజస్వల అవుతారు. ఎండోక్రైనాలజిస్ట్‌ (హార్మన్‌ డాక్టర్‌)ను సంప్రదించాల్సి రావచ్చు. సెకండరీ సెక్సువల్‌ క్యారెక్టర్స్‌ అంటే ఆక్సిలా, ప్యూబిక్‌ ఏరియాలో హెయిర్‌ గ్రోత్‌ ఉండడం, బ్రెస్ట్‌ డెవలప్‌మెంట్‌ మొదలవడం కనుక ఉంటే హార్మోన్ల పరీక్ష అవసరం లేదు. తక్కువ బరువు ఉన్నా ఆలస్యంగానైనా నెలసరి మొదలవ్వొచ్చు. కానీ పదిహేడేళ్లు దాటినా ఇలాంటి మార్పులేనప్పుడు వెంటనే గైనకాలజిస్ట్‌ లేదా ఎండోక్రైనాలజిస్ట్‌ను సంప్రదించాలి. స్పోర్ట్స్‌లో యాక్టివ్‌గా ఉన్నవారిలో కూడా పీరియడ్స్‌ లేట్‌గానే మొదలవుతాయి. వయస్సుకి ఉండాల్సిన బరువు కన్నా తక్కువ బరువు ఉన్నా నెలసరి ఆలస్యంగానే మొదలువుతుంది. ఒకసారి స్కానింగ్‌ చేయించి, డాక్టర్‌ను సంప్రదిస్తే .. థైరాయిడ్‌ పరీక్ష చేసి ఏ సమస్యాలేదు అంటే.. నెలసరి కోసం వేచి చూడవచ్చు.  -డాక్టర్‌ భావన కాసు, గైనకాలజిస్ట్‌ – ఆబ్‌స్టెట్రీషియన్‌, హైదరాబాద్‌  చదవండి: ఫోర్స్‌ చేస్తున్నారు

న్యూఢిల్లీ: కరోనా మహమ్మారి ముందస్తు రజస్వల అవడానికి కూడా దారి తీస్తోందన్న దిగ్భ్రాంతికరమైన విషయం తాజాగా బయట పడింది. కరోనా తర్వాత ప్రపంచవ్యాప్తంగా బాలికల్లో ఈ కేసులు పెరుగుతున్నట్లు సర్వేల్లో తేలింది. సాధారణంగా బాలికలు 13 నుంచి 16 ఏళ్ల వయసులో రజస్వల అవుతుంటారు. కానీ, 8 ఏళ్ల బాలికలు సైతం ఉదంతాలు బయటపడ్డాయి. ‘‘ఒకమ్మాయి నా దగ్గరికొచ్చింది. ఆమె వయసు ఎనిమిదేళ్ల తొమ్మిది నెలలు. అప్పుడే íపీరియడ్స్‌ మొదలయ్యాయి’’ అని ఢిల్లీలోని ప్రముఖ పీడియాట్రిక్‌ ఎండోక్రైనాలజిస్ట్‌ డాక్టర్‌ మన్‌ప్రీత్‌ సేథీ చెప్పారు. కరోనాకు ముందు ఎర్లీ ప్యూబర్టీ కేసులు నెలకు 10 వరకూ వచ్చేవని, ఇప్పుడు 30 దాటుతున్నాయని వెల్లడించారు. ఇటలీ, టర్కీ, అమెరికాల్లోనూ ఈ కేసులు వెలుగు చూస్తున్నాయి.  కారణమేమిటి?: ముందస్తు రజస్వలకు ప్రధాన కారణం కోవిడ్‌–19 వ్యాప్తిని నియంత్రించడానికి ప్రభుత్వాలు విధించిన లాక్‌డౌన్‌. విద్యాసంస్థలు మూతపడ్డాయి. ఆ సమయంలో జనమంతా ఇళ్లకే పరిమితయ్యారు. విద్యార్థులకు ఆటపాటలు కూడా లేవు. నెలల తరబడి ఇళ్లల్లోనే ఉండిపోవాల్సి వచ్చింది. ఫలితంగా వారిలో జీవక్రియలు(మెటబాలిజం) ప్రభావితమయ్యాయి. మన మెదడు మన శరీరం ఎత్తును పరిగణనలోకి తీసుకోదు. బరువును మాత్రం పరిగణనలోకి తీసుకుంటుంది. శరీరంలో ఉత్పత్తి అయ్యే అన్ని హార్మోన్ల స్థాయిలను పిట్యూటరీ గ్రంథి పర్యవేక్షిస్తూ ఉంటుంది. శరీరం ఒక స్థాయి బరువుకు చేరుకోగానే ఈ గ్రంథి ప్యూబర్టీని ప్రేరేపిస్తుంది. ఫలితంగా బాలికల్లో పిరియడ్స్‌ ప్రారంభమవుతాయి. ఇందులో హార్మోన్ల స్థాయి కూడా కీలక పాత్ర పోషిస్తాయి. అంటే బరువును నియంత్రణలో ఉంచుకుంటే ముందుస్తు రజస్వలను అరికట్టవచ్చని దీన్నిబట్టి స్పష్టమవుతోంది.

ఆడపిల్ల ఉంటే ఇంట్లోని వారు ఇరుగు పొరుగు వారు ఆ పిల్ల ఈడేరే విషయమై ఎదురు చూస్తూ ఉంటారు. ‘మీ అమ్మాయి ఈడేరిందా?’ అని అడుగుతూ ఉంటారు. కాని అందరు అమ్మాయిలు ఈడేరాలని లేదు. ప్రతి ఐదువేల మంది ఆడపిల్లల్లో ఒకరు ఎప్పటికీ రజస్వల కాని లోపంతో ఉంటారు. ఈ లోపాన్ని ‘టర్నర్‌ సిండ్రోమ్‌’ అంటారు. వైద్యశాస్త్రం పెద్దగా ఏ సహాయం చేయలేని ఈ సమస్యను సానుభూతితో అర్థం చేసుకోవడం గురించి ఇటీవల తెలుగులో కథలు వస్తున్నాయి. ఆ కథలు ఏమంటున్నాయి? ‘తొమ్మిదో తరగతికి వచ్చిన చెల్లెలు ఏపుగా ఎదిగి పోతుంటే నేనేమో గిడసబారిన మొక్కలాగా నాలుగున్నర అడుగులు దాటలేదు. అసలే మెడ కురచ. భుజాలు కొంచెం దగ్గరకొచ్చి మరింత చిన్నగా కనిపించేదాన్ని. నాతో కాలేజీకి వచ్చే అమ్మాయిల్లో కొందరికి నేనంటే చాలా చులకన. ఎప్పుడూ ఏదో రకంగా నన్ను ఆట పట్టించడం, జోకులేసి నవ్వుకోవడం వాళ్లకి సరదా. కళ్లలో తడి కనిపిస్తే మరింత ఏడిపిస్తారు. నేను పుష్పవతిని కాలేదు. అంతమాత్రం చేత నన్నెందుకు చిన్నచూపు చూడాలి. అందుకు బాధ్యురాలిని నేను కాదు కదా’ – రచయిత్రి వల్లూరిపల్లి శాంతి ప్రబోధ రాసిన ‘టర్నర్‌ సిండ్రోమ్‌’ అనే కథ నుంచి ‘ఎనిమిదో తరగతి అయిపోయింతర్వాత యేసవి సెలవుల్లో మా క్లాసుల మిగిలిన ఆడగుంటలు కరణాలమ్మాయి రాజేస్వరి, తెలకలోళ్ల కమల పుష్పవతులైపోయినారు. మా లచ్చుమత్త వచ్చినప్పుడల్లా ‘ఎప్పుడు మూల కూకుంటావే, ఎప్పుడు తిరపతిగాడిని పెల్లి సేసుకుంటావే’ అని అడుగుతుండీది. కళ్లు మూసి కళ్లు తెరిసినప్పుడికి రోజులు గిర్రున తిరిగిపోతున్నాయిగాని నేను పెద్దమనిషి కాకుండా శీలవతిలాగ మిగిలిపోతానేమో అని మాయమ్మకు, నాయనకు బెంగ పట్టుకున్నాది. మా ఊరిలోన నా ఒయసు ఆడగుంటలు తొమ్మండుగురు. నేను తొమ్మిదో తరగతికొచ్చినప్పుడికి ఏడుగురు పెద్దమనుసులైపోయినారు. నేను, పెదరైతుగారింటి మంగ ఇంకా అవ్వలేదు. నాలాగే కూకోడానికి ఇంకొక మనిషి ఊర్ల ఉందని మాయమ్మకు, మా నాన్నకు కొంచెం దైర్యంగా ఉండేది. ఇదిగో ఇప్పుడు పెదరైతుగారి పిల్ల సంవర్తాడిందనగానే మాయమ్మ, మా నాయిన తడిసిపోయిన సొప్పకట్టల్లాగా అయిపోగానే మొదటిసారి నేను పెద్దపిల్లనవ్వనేమో అని నాకు బయ్యమేసింది’ – రచయిత కరుణ కుమార్‌ రాసిన ‘పుష్పలత నవ్వింది’ కథ నుంచి. ఆడపిల్ల ఈడేరకపోతే మన దగ్గర భూకంపాలు వస్తాయి. ఆడజన్మ అంటేనే మన దృష్టిలో అమ్మ అయ్యే జన్మ అని అర్థం. సెంటిమెంట్‌ బలం ఎక్కువ. ఆమె ప్రత్యుత్పత్తికి అనువుగా ఉంటేనే గౌరవం. మన్నన. ప్రత్యుత్పత్తికి యోగ్యంగా లేకపోతే ఆమె మీద, కుటుంబం మీద చాలా ఒత్తిడి పెడుతుంది సమాజం. వింతగా చూస్తుంది. గేలి చేస్తుంది. చులకనతో విడిగా ఉంచేస్తుంది. ఈడేరని అమ్మాయికి సమాజం దృష్టిలో ఏ భవిష్యత్తూ లేనట్టే. ఇది ఒక రకంగా మూస దృష్టి. ఇంత మూసలో అందరూ ఉండకపోవచ్చు. పై రూపం బాగున్నా లోపల స్వల్ప మార్పుల వల్ల భిన్నంగా ఉండొచ్చు. అంతమాత్రం చేత వారికి ఏ భవిష్యత్తూ లేదనట్టుగా చూసే తీరు తప్పు. అలాంటి స్త్రీలు తమకు నచ్చిన రీతిలో జీవితాన్ని నిర్మించుకోవచ్చు. సంతోషంగా జీవించవచ్చు. కుటుంబం, సమాజం చేయాల్సింది అందుకు సహకరించడమే... అని చెబుతూ తెలుగులో కథలు వస్తున్నాయి. అలాంటి రెండు కథలే ‘టర్నర్‌ సిండ్రోమ్‌’, ‘పుష్పలత నవ్వింది’. ఆడపిల్లలు ఎందుకు ఈడేరరు? వివిధ కారణాలు ఉండొచ్చు. కాని ప్రధాన కారణం ‘టర్నర్‌ సిండ్రోమ్‌’. మనుషుల్లో 23 జతల క్రోమోజోములు ఉంటాయి. స్త్రీలలో ఈ 23 జతల క్రోమోజోముల్లో ఏదైనా ఒక జతలో ఒక ఎక్స్‌ క్రోమోజోము ఏర్పడకపోతే అటువంటి వారిలో మొత్తం 45 క్రోమోజోములు ఉంటాయి. ఇలా 45 క్రోమోజోములు ఉన్నవారిలో అండాశయాలు చాలా చిన్నగా ఉండాయి. నెలసరి రాదు. అంటే వీరు ఎప్పటికీ రజస్వల కాలేరు. అది వినా ఇతరత్రా సాధారణ జీవనం జీవించొచ్చు. వైవాహిక జీవితం కూడా పొందవచ్చు. హెన్రీ టర్నర్‌ అనే అమెరికన్‌ ఎండోక్రైనాలజిస్ట్‌ ఈ సంగతి కనిపెట్టాడు కనుక దీనిని టర్నర్‌ సిండ్రోమ్‌ అంటారు. ఈ సమస్య ఉన్న 70 శాతం గర్భస్థ శిశువులను ఆల్ట్రాసౌండ్‌ పరీక్షలలో కనిపెట్టి అబార్షన్‌ చేస్తున్నారు అమెరికాలో. మిగిలిన ముప్పై శాతం శిశువుల్లో ఈడేరే వయసు వచ్చే దాకా ఈ సమస్య ఉన్నట్టు తెలియదు. కథలు ఏమంటున్నాయి? కరుణ కుమార్‌ రాసిన ‘పుష్పలత నవ్వింది’, శాంతి ప్రబోధ రాసిన ‘టర్నర్‌ సిండ్రోమ్‌’ ఈడేరని ఆడపిల్లల వేదనను చెబుతాయి. ‘పుష్పలత నవ్వింది’లో తండ్రి దాదాపు విరక్తిలోకి వెళతాడు తన ఒక్కగానొక్క కూతురు పెద్దమనిషి కాలేదని. టర్నర్‌ సిండ్రోమ్‌లో కథానాయిక తల్లి, నానమ్మ ఎంతో ఒత్తిడికి గురవుతారు. కథానాయిక కూడా. అయితే ‘పుష్పలత నవ్వింది’లో తల్లి, కూతురు కలిసి తండ్రికి అబద్ధం చెబుతారు. అమ్మాయి ఈడేరిన నాటకం ఆడతారు. అదొక ఇంటి రహస్యంగా ఉంచుతారు. ‘మంచి మనసున్న కుర్రాడిని పెళ్లి చేసుకుంటే ఆ తర్వాత అతనే అర్థం చేసుకుంటాడు’ అనే ముగింపు ఇస్తే... ‘టర్నర్‌ సిండ్రోమ్‌’ లో మాత్రం కథానాయిక బాగా చదువుకుని మొదట తన కాళ్ల మీద తాను నిలబడాలనుకుంటుంది. కుటుంబం నుంచి దూరంగా వచ్చి తన సమస్య తెలిసి తనతో జీవితాన్ని పంచుకునే అబ్బాయిని జీవితంలోకి ఆహ్వానిస్తుంది. ఈ రెండు కథల్లోనూ కథానాయికలకు కుటుంబం నుంచి, సమాజం నుంచి సవాలే ఎదురయ్యింది. ఇంత సవాలు అక్కర్లేదు. మనుషులకు ఎన్నో శారీరక లోపాలు ఉంటాయి. కళ్లద్దాలు రావడం కూడా ఒక లోపమే కదా. అలాంటి సర్వసాధారణ లోపంగా భావించే దశకు ఇటువంటి ఆడపిల్లల విషయంలో సమాజం వెళ్లాలి. ఆ చైతన్యం కథలు ఇస్తున్నాయి. అలాంటి కథలను ఆహ్వానించాలి. మా సమీప బంధువు ఒకరు తన కూతురు పెద్దమనిషి కావటం లేదని చాలా సంవత్సరాలు బాధపడటం దగ్గరగా చూశాను. అలాగే వరుసకు నాకు మేనత్త అయ్యే ఒకామె చివరి వరకు పెళ్లి లేకుండా ఉండిపోవడం చూసాను. అప్పుడే ఈ సమస్య వెనుక ఉన్న సామాజిక కోణం అర్థమయ్యింది. అప్పుడు ఈ కథ రాయాలని అనిపించింది. – కరుణకుమార్, రచయిత, సినీ దర్శకుడు నాకు బాగా తెలిసిన ఓ పోస్ట్‌గ్రాడ్యుయేట్‌ యువతి ఒక సందర్భంలో తన సమస్య గురించి చెప్పినప్పుడు ఆశ్చర్యపోయాను. మహిళలందరికీ నెలసరి అనే శరీర ధర్మం సహజం. కానీ కొందరిలో ఉండదు. అది నిజం. నాకు తెలిసిన గైనకాలజిస్ట్‌ దగ్గరకి ఆ అమ్మాయిని తీసుకెళ్ళాను. ఫలితం శూన్యం. అప్పటి నుంచి ఈ సమస్యపై రాయాలి అనుకునేదాన్ని. శరీర అంతర్గత అవయవాల్లో సమస్య ఉన్న ఆ అమ్మాయిలు ఎటువంటి మానసిక, సామాజిక, శారీరక సమస్యలు ఎదుర్కొంటారో అని నేను చేసిన ఆలోచనకు జవాబే ఈ కథ. – వల్లూరుపల్లి శాంతిప్రబోధ, రచయిత్రి  ఇది కూడా చదవండి: Period Pain and Cramps: రోజుకో నువ్వుల ఉండ, ఇంకా...

యుక్తవయస్సుకు రాగానే పిల్లల్లో ఎన్నో మార్పులు. అన్ని రోజులు తల్లిదండ్రుల మాటే వేదంగా భావించే అంతర్ముఖుల్లో కూడా ఎన్నో మార్పులు వస్తుంటాయి. మంచి చేదుగా అనిపిస్తుంది, చెడు త్వరగా ఆకర్షిస్తుంది. స్నేహితులే ప్రపంచమవుతారు. అంతకుముందు చూడని కొత్త లోకం కనిపిస్తుంది. మొత్తని​కి ప్రపంచమే చాలా కొత్తగా కనిపిస్తుంది.  కొత్త అలవాట్లు వచ్చి చేరతాయి. రాముడు మంచి బాలుడు అని అనిపించుకున్న వారిని సైతం చెడ్డవారిని చేస్తుంది కౌమార దశ. ఇన్నిరోజులు ఈ మార్పులకు కారణం హర్మోన్ల ప్రభావం అనుకున్నాం. కానీ ఇది నిజం కాదట. కౌమార దశలో పిల్లల సామాజిక ప్రవర్తనలో  మార్పుకు కారణం పునరుత్పిత్తి హర్మోన్ల ప్రభావం కాదట. ఈ విషయాన్ని బఫెలో యూనివర్శీటీకి చెందిన ప్రముఖ  రచయిత మాథ్యూ పాల్ వెల్లడించారు. యుక్తవయసులో శరీరంలో వచ్చే అన్నిమార్పులకు కారణం పునరుత్పత్తి హర్మోన్లే. అయితే ఇంతకాలం కౌమార దశలో వచ్చే సామాజిక ప్రవర్తనలో మార్పుకు కూడా ఈ హర్మోన్లే కారణం అనుకున్నాం. కానీ పాల్, అతని సహచరులు కలిసి చేసిన నూతన పరిశోధన ఇది అబద్దమని నిరూపించింది. ఇంతకు ముందు ప్రయోగాలు నిరూపించలేని అనేక విషయాలను వీరు రుజువు చేశారు. అందుకోసం వీరు నూతన విధానాన్ని కనుగొన్నారు. దాని ప్రకారం ప్రతి ఒక్కరిలో యుక్తవయస్సులో వచ్చే మార్పులును వీరు పరిశీలించారు.  ‘ఈ దశలో సంక్లిష్ట ఆలోచన విధానం అభివృద్ధి చెందుతుంది. అనేక మానసిక ఆరోగ్య సమస్యలు ఎదురవుతాయి. ప్రమాదకర ప్రవర్తన విధానం ముఖ్యంగా  మాదకద్రవ్యాల వినియోగం వంటి అంశాలు ప్రారంభదశలో ఉంటాయి. సామాజిక ప్రవర్తన అంశానికి వచ్చినట్లయితే, అన్ని రోజులు తల్లిదండ్రులను అంటిపెట్టుకుని ఉన్నవారు పూర్తిగా వేరే ప్రపంచం వైపు ఆకర్షితులౌతారు. అక్కడ వారు కలుసుకునే వ్యక్తులను బట్టి వారి సామాజిక ప్రవర్తన ఉంటుంది. పునరుత్పత్తి హర్మోన్ల ప్రధాన విధి ప్రత్యుత్పత్తి సామర్ధ్యం, రెండో దశ లైంగిక లక్షణాలను పెంపొందించడం, గోనడల్ హర్మోన్స్ పెరుగుదల వంటివి మాత్రమే’ అని తమ పరిశోధనలో తేల్చారు.  ప్రస్తుతం పాల్‌ రూపొందించిన విధానం వల్ల పునరుత్పత్తి హర్మోన్లు కలిగించే మార్పులేంటో సులభంగా గుర్తించవచ్చు. యవ్వనము విశాలమైనదని, దీనిలోనే కౌమార దశ కూడా ఉంటుందని దాంతో పాటు యుక్తవయసులో జరిగే మేథోవికాసం, సామాజిక, భావోద్వేగ మార్పులను కూడా కలిగి ఉంటాయని పాల్‌ చెప్పారు. ఈ మార్పులను గుర్తించడం వల్ల కౌమార దశ అభివృద్ధికి బాధ్యత వహించే అంతర్లీన యంత్రాంగాలను అర్థం చేసుకోవడంతో పాటు జీవితంలో మున్ముందు వచ్చే మానసిక ఆరోగ్య సమస్యలకు కారణాలను కూడా విశ్లేషించవచ్చన్నారు.  


 ఆనంద్ శరీరంలో నేనో కీలక భాగాన్ని. ఆక్రోటు (వాల్‌నట్) పరిమాణంలో ఉంటాన్నేను. నేను అతడి ప్రొస్టేట్‌ను (పౌరుష గ్రంథిని) ఒక్కోసారి ఆనంద్‌ను బాగా ఇబ్బంది పెట్టేస్తుంటాను. రాత్రివేళ మంచి నిద్రలో ఉండగా అతడికి మెలకువొచ్చేలా చేస్తాను. పాపం ఆనంద్... రాత్రివేళ నా కారణంగా పదేపదే బాత్‌రూమ్‌కు వెళ్లాల్సి వస్తుంది. పరిస్థితి వికటిస్తే, మూత్రం ద్వారా పోవలసిన కాలుష్యాలు రక్తంలో కలిసేలా చేయడం ద్వారా యురేమిక్ పాయిజనింగ్‌కు దారితీసి అతడి మరణానికి కూడా కారణమవుతాను. ఇందుకు నేనేమీ చేయలేను. ప్రకృతే నన్ను అలా తయారు చేసింది. వయసు మీరాక నాతో కొన్ని ఇబ్బందులు ఉన్నా, నాలో చాలా సానుకూల అంశాలు ఉన్నాయి. ఆనంద్ శృంగార జీవితంలో ముఖ్య పాత్రనే పోషిస్తాను. ఇంకా నా ఘనతని చెప్పుకోకూడదు గానీ, మానవజాతి మనుగడే చాలావరకు నాపై ఆధారపడి ఉంది.
 
 వెన్ను ఆదేశిస్తుంది... నేను పాటిస్తాను...
 ఆనంద్ పొత్తికడుపులో అతడి మూత్రాశయానికి దిగువ ఉంటాన్నేను. ఆనంద్ యుక్తవయస్సులోకి వచ్చేంత వరకు కేవలం బాదంగింజ పరిమాణంలో ఉంటాను. అతడి మిగిలిన శరీరంతో పాటే నేను కూడా క్రమంగా ప్రస్తుత పరిమాణానికి పెరుగుతాను. ఆనంద్ బాల్యస్థితిని వీడి యువకుడిగా మారినప్పుడు అతడి శరీరంలో విడుదలయ్యే హార్మోన్ల ద్వారా నాకు సంకేతం అందుతుంది. అప్పటికి నేను పూర్తి ఆకారాన్ని సంతరించుకుని ఉంటాను. నాలోని కండరాలతో వేరుశనగ గింజల పరిమాణంలో నిర్మితమైన సంచుల్లో వీర్యద్రవం తయారవడం అప్పుడే మొదలైంది. ఆనంద్‌లో లైంగికోద్రేకాలు కలిగినప్పుడు నాలోని ద్రవాన్ని ఎలా ఖాళీ చేయాలో నాకు తెలీదు. అలాంటప్పుడు ఆనంద్ వెన్ను దిగువ నుంచి వచ్చే ఆదేశాలను తు.చ. తప్పక పాటిస్తాను. అలాంటి స్థితిలోనే నాలో చాలా సంక్లిష్టమైన చర్యలు మెరుపు వేగంలో జరిగిపోతాయి. నా బ్లాడర్ దిగువనున్న స్పింక్టర్ వాల్వ్  క్షణకాలం గట్టిగా నొక్కేసినట్లు మూసుకుపోతుంది. దాంతో ఆ సమయంలో మూత్రం వెలువడే ఆస్కారమే ఉండదు. ఆ వెంటనే కండర సంకోచ తరంగాలు నా వరకు వ్యాపిస్తాయి. వాటి వల్ల వీర్యద్రవాన్ని నిల్వ చేసుకున్న నా సంచులు కూడా ఒత్తుకుపోతాయి. వాటి నుంచి ఇరవై శాతం వీర్యద్రవం తయారైతే, నాలో నేరుగా ఎనభై శాతం వీర్యద్రవం తయారవుతుంది. ఒత్తిడికి గురైనప్పుడు ఈ ద్రవం ఒక్కసారిగా మూత్రనాళం ద్వారం ద్వారా బయటకు వచ్చేస్తుంది. ఈ ద్రవం దాదాపు ఒక టీస్పూన్ పరిమాణంలో ఉంటుంది.
  
 వయసు మళ్లే కొద్దీ కష్టాలు
 ఆనంద్‌కు వయసు మళ్లే కొద్దీ అతడి వృషణాల నుంచి తయారయ్యే హార్మోన్ల ఉత్పత్తి తగ్గిపోతుంది. అలాంటి పరిస్థితుల్లో నా పరిమాణం అతడి చిన్నప్పటి పరిమాణానికి కుంచించుకుపోతానని హేతుబద్ధంగా ఊహించవచ్చు. అయితే, నిజానికి నాలోని పరిణామం ఇందుకు విరుద్ధంగా జరుగుతుంది. కుంచించుకుపోయే బదులు నా పరిమాణం పెరుగుతుంది. ఒక్కోసారి విపరీత పరిస్థితుల్లో ఏకంగా ఒక దబ్బకాయ పరిమాణానికి పెరిగిపోతాను. ఇప్పటికైతే ఆనంద్‌కు అలాంటి పరిస్థితేమీ లేదు గానీ, అతడికి యాభయ్యేళ్లు దాటితే నా పరిమాణం పెరిగే అవకాశాలు ఇరవై శాతం వరకు పెరుగుతాయి. ఎనభయ్యేళ్లు నిండితే ఆ అవకాశాలు ఎనభై శాతం వరకు పెరుగుతాయి. నా పరిమాణం కాస్తంత పెరిగితే ఆందోళన చెందాల్సిన పనేమీ లేదు. అయితే, మూత్రాశయాన్ని నొక్కేసేంతగా పెరిగితేనే ఆందోళన చెందాలి. అలా పెరిగితే మూత్రం నెమ్మదిగా వెలువడటం, తరచుగా మూత్రానికి వెళ్లాల్సి రావడం, మూత్రనాళంలో ఇన్ఫెకన్లు ఏర్పడి మంటపుట్టడం వంటి లక్షణాలు కనిపిస్తాయి. అలాంటప్పుడు వెంటనే వైద్యసహాయం తీసుకోవాలి. ఈ పరిస్థితి ఉన్నప్పుడు కాఫీ, టీ, ఆల్కహాల్ మానేయాలని వైద్యులు చెబుతారు. పరీక్షల ద్వారా తగిన కారణాన్ని కనుక్కుని మందుల ద్వారా ఉపశమనం కలిగించేందుకు ప్రయత్నిస్తారు. తప్పనిసరి పరిస్థితులు తలెత్తితే ముందు మూత్రనాళంలోకి ట్యూబ్ పంపి మూత్రం బయటకు పోయే మార్గాన్ని ఏర్పాటు చేస్తారు. ఇంకా అవసరమైతే శస్త్రచికిత్స చేసి నన్ను పూర్తిగా తొలగిస్తారు. లేకుంటే, పెన్సిల్ వంటి పరికరాన్ని మూత్రనాళం గుండా నా వరకు పంపి, మూత్రానికి అవరోధం కలిగిస్తున్న నాలోని కణజాలాన్ని విద్యుత్‌తరంగాలతో నాశనం చేస్తారు. ఇలాంటి చికిత్స పద్ధతులను తలచుకుంటేనే ఆనంద్‌కు భయంతో ఒళ్లు గగుర్పొడుస్తుంది. ఇలాంటి ప్రక్రియలు తన పురుషత్వాన్ని తుదముట్టించేస్తాయనేదే అతడి ఆందోళన. అయితే, అది అపోహ మాత్రమే. ఇలాంటి చికిత్సల తర్వాత కూడా ఎనభైశాతం మంది పురుషులు సాధారణ లైంగిక జీవితాన్ని కొనసాగించగలుగుతారు.
  
  కేన్సర్  సోకితేనే కష్టం 
 నా పరిమాణం కాస్త పెరిగినంత మాత్రాన ఆందోళన అక్కర్లేదు. ఇన్ఫెక్షన్ల వంటి ఇతరేతర కారణాల వల్ల వాపు వచ్చి నా పరిమాణం పెరగవచ్చు. అలాంటి పరిస్థితిని సాధారణ చికిత్సలతోనే చక్కదిద్దవచ్చు. అయితే, కేన్సర్ వల్ల నాలో అసాధారణమైన పెరుగుదల ఏర్పడితేనే కష్టం. యాభై ఏళ్లు నిండిన వాళ్లలో దాదాపు ఐదు శాతం మందికి ప్రొస్టేట్ కేన్సర్ సోకే అవకాశాలు ఉంటాయి. డెబ్బయ్యేళ్లు నిండిన వారిలో ఈ అవకాశాలు యాభై శాతం వరకు ఉంటాయి. దురదృష్టం ఏమిటంటే, అలాంటి వారిలో దాదాపు 90 శాతం మంది వైద్యుల వద్దకు వచ్చే సరికే వారి వ్యాధి ముదిరిపోయి ఉంటుంది. అయితే, నాకు సోకే కేన్సర్లు మిగిలిన కేన్సర్లలాగ వారాలు, నెలల వ్యవధిలోనే అంత త్వరగా వ్యాపించేవి కావు. ఇవి చాలా నెమ్మదిగా పెరుగుతాయి. శస్త్రచికిత్సకు వీలు లేనంతగా ఈ కేన్సర్లు వ్యాపించినా, మందుల ద్వారా జీవితకాలాన్ని పొడిగించేందుకు అవకాశాలు ఉన్నాయి. నాలోని కేన్సర్లు పురుష హార్మోన్ల ద్వారా పెరుగుతూ ఉంటాయి. పురుష హార్మోన్లను ఉత్పత్తిచేసే వృషణాలను తొలగించడం ద్వారా లేదా స్త్రీ హార్మోన్లు ఇచ్చి చికిత్స చేయడం ద్వారా ఈ కేన్సర్లను నయం చేయవచ్చు. అవసరమైతే రేడియేషన్ చికిత్స, స్త్రీ హార్మోన్ల చికిత్స కలిపి కూడా చేసే అవకాశాలు ఉంటాయి. ఒక్కోసారి నాలో మొదలైన కేన్సర్ ప్రాణాంతకం కాకుండా ఉండాలంటే, వైద్యులు నన్ను పూర్తిగా తొలగించడం ద్వారా రోగులను కాపాడుతూ ఉంటారు.    
  
  
 పునరుత్పత్తిలో నేనే కీలకం
 పునరుత్పత్తి వ్యవస్థలో నేనే (ప్రొస్టేట్) కీలకం. ఆనంద్ శరీరంలో నేనే గనుక లేకుంటే, అతడికి సంతానం పొందే అవకాశాలే దాదాపు ఉండవు. అతడి వీర్యద్రవానికి స్టోరేజీ యూనిట్‌లా పనిచేస్తాను నేను. ప్రతి స్ఖలనంలోనూ ఆనంద్ వృషణాలు దాదాపు ఇరవై కోట్ల వీర్యకణాలను విడుదల చేస్తాయి. నాలో తయారయ్యే ప్రత్యేక ద్రవం వాటిని డైల్యూట్ చేసి, వీర్యకణాల సంఖ్య పదోవంతుకు తగ్గేలా చేస్తుంది. ప్రొటీన్లు, ఎంజైమ్‌లు, కొవ్వులు, చక్కెరలతో ఉండే నా ద్రవం వీర్యకణాలకు పోషణనిస్తుంది. నా ద్రవంలోని క్షారగుణం స్త్రీ శరీరంలోని ఆమ్లగుణాన్ని తట్టుకుని మరీ వీర్యకణాలను బతికిస్తుంది. నా ద్రవంలో క్షారగుణమే లేకుంటే వీర్యకణాలు సజీవంగా స్త్రీ శరీరంలోని అండాన్ని చేరుకోలేవు.
  
 నాలో మూడు భాగాలు
 చిన్నగానే ఉంటాను గానీ, నాలో మూడు భాగాలు ఉంటాయి. ఒకదాని పక్కన ఒకటిగా నాలో ఉంటాయి. ఆనంద్ మూత్రనాళం నాలోని మధ్యభాగం మీదుగా  వెళుతుంది. నాకు ఇన్ఫెక్షన్ సోకినా, వాపు వచ్చినా లేదా కేన్సర్ సోకినా నాలోని భాగాలు పరిమాణానికి మించి పెరుగుతాయి. ఫలితంగా మూత్ర విసర్జనకు అంతరాయం కలుగుతుంది. ఇక అక్కడి నుంచి నానా సమస్యలు మొదలవుతాయి. బయటకు రాలేని మూత్రం బ్లాడర్‌లోనే మడుగు కట్టేస్తుంది. అందులోకి బ్యాక్టీరియా చేరి తీవ్రమైన ఇన్ఫెక్షన్లు తలెత్తుతాయి. బ్లాడర్‌లో నిండిన మూత్రం తిరిగి కిడ్నీలకు చేరి, అక్కడి నుంచి రక్తంలో కలిసిపోయి యురీమిక్ పాయిజనింగ్ కలిగిస్తుంది. యమయాతన కలిగించే ఈ పరిస్థితి క్రమంగా మరణానికి దారితీస్తుంది.