న్యూఢిల్లీ: వివాదాస్పద సాధ్వీ రాధే మా మళ్లీ వార్తల్లోకెక్కారు. ఢిల్లీలోని ఓ పోలీస్‌ స్టేషన్‌కు వెళ్లిన ఆమె స్టేషన్‌ హౌస్‌ అధికారి (ఎస్‌హెచ్‌ఓ) సీట్లో కూర్చున్నారు. ఆమె పక్కనే ఎస్‌హెచ్‌ఓ సంజయ్‌ శర్మ మెడలో ఎర్రటి శాలువాతో చేతులు కట్టుకొని నిలబడి ఉన్న ఫొటో ఇప్పుడు చర్చనీయాంశంగా మారింది. స్థానిక వివేక్‌ విహార్‌ పోలీస్‌ స్టేషన్‌లో ఇది చోటుచేసుకుంది. దీనిపై స్టేషన్‌ అధికారి సంజయ్‌ శర్మను ప్రశ్నించగా.. రాధే మా రామ్‌లీలా మైదానానికి వెళ్లే మార్గంలో తమ స్టేషన్‌ ముందు ఆగి, స్టేషన్‌లో ఉన్న టాయిలెట్‌ను ఉపయోగించుకున్న తర్వాత ఆమె తన కుర్చీలో కూర్చున్నారని తెలిపారు. తన సీటు నుంచి లేవాలని రాధే మాను చేతులు జోడించి అభ్యర్థించానని, ఆ సమయంలోనే ఫొటో తీశారని ఎస్‌హెచ్‌ఓ చెప్పారు. దీనిపై ఉన్నతాధికారులు దర్యాప్తునకు ఆదేశించారు. అలాగే రామ్‌లీలా మైదానంలోని జీటీబీ పోలీస్‌ స్టేషన్‌లో పోలీసు అధికారులు భక్తి పాటలకు డ్యాన్స్‌ చేస్తూ ఉన్న వీడియో ఒకటి బయటకు వచ్చింది. ఈ వీడియోలో రాధే మాతో పాటు ఐదుగురు పోలీస్‌ సిబ్బంది కూడా ఉన్నారు. ఈ ఘటనలు సెప్టెంబర్‌ 28, 29 తేదీల్లో జరిగాయి. ఈ వీడియోను రాధే మా ఫేస్‌బుక్‌ పేజీలో అప్‌లోడ్‌ చేశారు. ఈ వీడియోలో ఏఎస్సైలు, కానిస్టేబుళ్లు ఉన్నారు. వీరిని ప్రస్తుతం విధుల నుంచి తప్పించి హోల్డ్‌లో ఉంచామని ఉన్నతాధికారులు తెలిపారు. 


 రాధే మా.. ఈ పేరుకు ఇప్పుడు పరిచయం అవసరం లేదు. ప్రత్యేకంగా హెలికాప్టర్ సమకూరిస్తేనే పెళ్లికి వస్తానని చెప్పిన సన్యాసిని! ప్రస్తుతం వరకట్న వేధింపుల కేసులో అరెస్టయి జైల్లో ఊచలు లెక్కపెడుతోంది. ఆమె సంపద గురించి, ఖరీదైన దుస్తులు, నగలంటే ఆమెకున్న మోజు గురించి కథలు కథలుగా అందరూ చెప్పుకొంటారు. ఆమె మేకప్ అయితే.. ఫొటోలలోను, వీడియోల్లో కూడా స్పష్టంగా కనిపిస్తుంది. కానీ అలాంటి రాధే మా దగ్గర అసలు డబ్బుఏ లేవట. తన బ్యాంకు ఖాతాలో కేవలం 8-10 లక్షల రూపాయలు మాత్రమే ఉన్నాయని ఆమె చెబుతోంది.
 
 మరి ఖరీదైన దుస్తులు, మేకప్ విషయం ఏంటని అడిగితే.. భక్తులు ఇచ్చిన దుస్తులే తాను వేసుకుంటానని, అలాగే తన మేకప్ కూడా భక్తులే చేస్తారని ఆమె సెలవిచ్చిందట. కుంభమేళాకు తనను రావొద్దంటూ నిషేధించినట్లు వచ్చిన కథనాలన్నీ అవాస్తవమని, తనపై ఎలాంటి నిషేధం లేదని కూడా చెప్పింది. తాను కావాలనుకుంటే నాసిక్ కుంభమేళాకు వెళ్లేదాన్నని, ఇంతకు ముందు కూడా చాలా కుంభమేళాలకు వెళ్లానని రాధే మా తెలిపింది.