న్యూఢిల్లీ : ర్యాగింగ్‌ను అరికట్టేందుకు తీసుకుంటున్న చర్యల గురించి తెలపాలని లోక్‌ సభలో అడిగిన ప్రశ్నకు మానవ వనరుల అభివృద్ధి శాఖ సహాయ మంత్రి సత్యపాల్‌ సింగ్‌ సమాధానమిచ్చారు. ఈ సందర్భంగా ఆయన మాట్లాడుతూ.. విద్యా సంస్థల్లో రాగింగ్‌ను అరికట్టేందుకు యూనివర్సిటీ గ్రాంట్స్‌ కమిషన్‌(యూజీసీ) 2009లో నిబంధనలు రూపొందించింది. ర్యాగింగ్‌కు వ్యతిరేకంగా విద్యార్థుల్లో అవగాహన పెంచేందుకు మానవ వనరుల అభివృద్ధి శాఖ ప్రతీ సంవత్సరం ప్రచార కార్యక్రమాలు నిర్వహిస్తోందని తెలిపారు. ర్యాగింగ్‌ను నిరోధించడం కోసం యాంటీ ర్యాగింగ్‌ టోల్‌ ఫ్రీ నంబర్‌ను రూపొందించామన్నారు. ర్యాగింగ్‌కు సంబంధించి ఫిర్యాదులు చేయాలనుకుంటే 1800-180-5522 నంబర్‌కు ఫోన్‌ చేయాలని సూచించారు. ఇందుకోసం 12 భాషల్లో కాల్‌ సెంటర్ల సేవలు వినియోగించుకోనున్నట్లు తెలిపారు. అంతేకాకుండా ఫిర్యాదులు స్వీకరించడానికి యాంటీ ర్యాగింగ్‌ వెబ్‌సైట్‌ www.antiragging.in ను కూడా రూపొందించామన్నారు. ఫిర్యాదులకు సంబంధించిన వివరాలు, స్టేటస్‌ కూడా ఎప్పటికప్పుడు తెలుసుకునేందుకు వీలుగా ఉంటుందన్నారు. గతేడాది మే 17న యాంటీ ర్యాగింగ్‌ మొబైల్‌ యాప్‌ను కూడా ప్రారంభించామని, గూగుల్‌ ప్లే స్టోర్‌ నుంచి ఈ యాప్ ను డౌన్‌లోడ్‌ చేసుకోవచ్చని తెలిపారు. యాంటీ ర్యాగింగ్‌ కు పాల్పడిన విద్యార్థుల తల్లిదండ్రుల స్పందన గురించి, బాధితుల మానసిక వేదనకు సంబంధించిన కొన్ని వీడియోలు కూడా అప్‌లోడ్‌ చేశామన్నారు. యూజీసీ వెబ్‌పేజీ http://www.ugc.ac.in/page/Videos-Regarding-Ragging.aspx లో చూడవచ్చని, సీబీఎస్‌సీ కూడా ర్యాగింగ్‌ వ్యతిరేకంగా చర్యలు చేపడుతున్నట్లు తెలిపారు. ఫిర్యాదులు స్వీకరించి www.cbseaff.nic.inలోని నిబంధనలకు అనుగుణంగా చర్యలు తీసుకుంటున్నామని పేర్కొన్నారు. ర్యాగింగ్‌ను అరికట్టేందుకు పలు చర్యలు తీసుకుంటున్న హెచ్‌ఆర్‌డీ శాఖ బాధితుల గురించి అనేక సంక్షేమ చర్యలు తీసుకుంటోందన్నారు. బాధితులతో పాటు నేరస్తుల మానసిక ఆరోగ్యం గురించి పర్యవేక్షించేందుకు నలుగురు సభ్యులతో కూడిన కమిటీని ఏర్పాటు చేసినట్లు తెలిపారు. బాధితులకు కౌన్సిలింగ్‌ కూడా నిర్వహిస్తున్నామని తెలిపారు. అన్ని విద్యా సంస్థల్లో ఓరియెంటేషన్‌, స్వాగత కార్యక్రమాలు నిర్వహించేలా ప్రోత్సహిస్తున్నామన్నారు. ర్యాగింగ్‌కు వ్యతిరేకంగా రూపొందించిన నిబంధనలు అమలయ్యేలా వైస్‌ చాన్స్‌లర్‌లకు కూడా ఆదేశాలు జారీ చేశామని తెలిపారు.


 న్యూఢిల్లీ: ర్యాగింగ్ను నియంత్రించలేకపోతున్న ఓ 20 డెంటల్ కాలేజీల గుర్తింపును రద్దు చేయనున్నారు. ఈ మేరకు డెంటల్ కౌన్సిల్ ఆఫ్ ఇండియా(డీసీఐ) కేంద్ర ఆరోగ్యశాఖకు ఓ లేఖ రాసింది. మొత్తం 20 కాలేజీలను రద్దు చేయాలని అందులో ప్రతిపాదించింది. దేశవ్యాప్తంగా ర్యాగింగ్ చట్టాలు తీసుకొచ్చి కఠినంగా అమలు చేస్తున్నప్పటికీ కొన్ని కాలేజీల్లో ఇప్పటికీ ఆ విష సంస్కృతి ప్రబలంగా ఉన్న విషయం తెలిసిందే. ఎన్నోసార్లు విద్యార్థులు, వారి తల్లిదండ్రులు ఫిర్యాదులు చేసినప్పటికీ వాటిని కాలేజీ యాజమాన్యాలు బేఖాతరు చేస్తుండటంతో వాటి గుర్తింపు రద్దు చేయాలని డీసీఐ ప్రతిపాదనలు చేసింది.
 
 డీసీఐ ప్రతిపాదించిన కాలేజీలు ఇవే..
 
 రీజినల్ డెంటల్ కాలేజీ, గువాహతి
 
 పాట్నా డెంటల్ కాలేజ్ అండ్ హాస్పిటల్, పాట్నా
 
 డాక్టర్ బీఆర్ అంబేద్కర్ ఇన్స్టిట్యూట్ ఆఫ్ డెంటల్ సైన్సెస్ అండ్ హాస్పిటల్, పాట్నా
 
 మిథిలియా మైనారిటీ డెంటల్ కాలేజ్ అండ్ హాస్పిటల్, దర్భాంగ
 
 ఈఎస్ఐసీ డెంటల్ కాలేజ్ అండ్ హాస్పిటల్, ఢిల్లీ
 
 ప్రభుత్వ డెంటల్ కాలేజ్, శ్రీనగర్
 
 ఇందిరాగాంధీ గవర్నమెంట్ డెంటల్ కాలేజ్, జమ్మూ
 
 కేజీఎఫ్ కాలేజ్ ఆఫ్ డెంటల్ సైన్సెస్ అండ్ హాస్పిటల్, బీఈఎంఎల్ నగర్
 
 ఎఎంఈ డెంటల్ కాలేజ్ అండ్ హాస్పిటల్, రాయచూర్
 
 హితకారిణి డెంటల్ కాలేజ్ అండ్ హాస్పిటల్, జబల్పూర్
 
 బాబా కాలేజ్ ఆఫ్ డెంటల్ సైన్సెస్, భోపాల్
 
 గవర్నమెంట్ డెంటల్ కాలేజ్ అండ్ హాస్పిటల్, ఔరంగబాద్
 
 నాందేడ్ రూరల్ డెంటల్ కాలేజ్ అండ్ రిసెర్చ్ సెంటర్, నాందేడ్
 
 శ్రీ బాలాజీ డెంటల్ కాలేజీ, రంగారెడ్డి జిల్లా, తెలంగాణ
 
 రాజేశ్ రామ్ దాస్ జీ కాంబే డెంటల్ కాలేజ్ అండ్ హాస్పిటల్ అకోలా
 
 శ్రీ సుక్మని డెంటల్ కాలేజ్ అండ్ హాస్పిటల్, డెరాబస్సి
 
 నిమ్స్ డెంటల్ కాలేజ్, జైపూర్
 
 ఫాకల్టీ ఆఫ్ డెంటల్ సైన్సెస్, కింగ్ జార్జ్ యూనివర్సిటీ ఆఫ్ డెంటల్ సైన్సెస్, లక్నో
 
 హరశరణ్ దాస్ డెంటల్ కాలేజీ, గజియాబాద్
 
 స్కూల్ ఆఫ్ డెంటల్ సైన్సెస్, గ్రేటర్ నోయిడా.
 గత కొద్ది సంవత్సరాలుగా ఈ కాలేజీల్లో ర్యాగింగ్ ఘటనలు పెరగడంతోపాటు.. మరణాలు కూడా సంభవించాయని, ఈ నేపథ్యంలో వీటి గుర్తింపు రద్దు చేయాలని డీసీఐ ప్రతిపాదించింది.