పాట్నాలో వరుస పేలుళ్ల సంఘటన తర్వాత బాలీవుడ్ చిత్రానికి సంబంధించిన ఆడియో కార్యక్రమానికి హోం మంత్రి సుశీల్ కుమార్ షిండే హాజరవ్వడం వివాదస్పదమైంది. ఆడియో కార్యక్రమానికి షిండే హాజరుకావడంపై బీజేపీ మండిపడింది. ప్రభుత్వ వ్యవహారాల కన్నా కేంద్ర మంత్రులకు ఇతర కార్యక్రమాలపై మోజు ఉందని బీజేపీ ఆరోపించింది. 
  
 అయితే ఆడియో విడుదల కార్యక్రమానికి షిండే హాజరవ్వడంపై యూపీఏ అధినేత్రి సోనియాగాంధీ గుర్రుగా ఉన్నట్టు సమాచారం. ఈ నేపథ్యంలో సోనియాగాంధీతో షిండే సమావేశం కావడం రాజకీయంగా ప్రాధాన్యత సంతరించుకుంది. సోనియాగాంధీతో షిండే సమావేశంలో 10 జన్ పథ్ లో సుమారు 20 నిమిషాలపాటు సాగిందని.. వివారాలు ఇంకా బయటకు పొక్కలేదని తెలుస్తోంది. 
  
 బాలీవుడ్ తార కంగనా రనౌత్ నటించిన 'రజ్జో' చిత్రం ఆడియో కార్యక్రమం ముంబైలో ఆదివారం సాయంత్రం జరిగింది. ఈ కార్యక్రమానికి షిండే హాజరయ్యారు. ఆదివారం పాట్నాలో నరేంద్ర మోడీ పాల్గొన్న సభలో వరుస బాంబు పేలుళ్లు చోటుచేసుకున్నాయి. గతంలో ఢిల్లీలో పేలుళ్లు జరిగినప్పడు అప్పటి కేంద్ర హోంమంత్రి శివరాజ్ పాటిల్ దుస్తులు మార్చుకోవడం కూడా వివాదస్పదమైన సంగతి తెలిసిందే. 


 ఓ ముస్లిమ్ యువతి, బ్రాహ్మణ కుర్రాడి మధ్య సాగే ప్రేమకథతో రూపొందిన చిత్రం ‘రాజ్జో’. ఈ  కథలో కొత్తదనం ఏముంది? ఇలాంటివి చాలా సినిమాల్లో చూశాంగా అనుకుంటున్నారా? కానీ ఈ కథలో ఓ ట్విస్ట్ ఉంది. ఆ కుర్రాడిది టీనేజ్. ఆ అమ్మాయి వయసు దాదాపు పాతికేళ్లు. ఈ ఇద్దరి మధ్య సాగే ప్రేమకథకు ఎలాంటి ముగింపునిచ్చారో ‘రాజ్జో’లో చూడాల్సిందే. 
  
  ముస్లిమ్ యువతిగా కంగనా రనౌత్, బ్రాహ్మణ కుర్రాడిగా పారస్ అరోరా నటించారు. నూతన దర్శకుడు విశ్వాస్ పాటిల్ దర్శకత్వం వహిస్తున్నారు. ఇది ప్రేమకథ కాబట్టి హీరో, హీరోయిన్ మధ్య రొమాంటిక్ సీన్స్ చాలానే ఉంటాయట. ఇప్పటివరకు దర్శకుడు చెప్పిన సన్నివేశాలన్నిటినీ చేసిన కంగనా ఇటీవల మాత్రం ఓ సీన్‌కి ‘నా వల్ల కాదు’ అనేశారు. ఎందుకంటే ఆ సీన్ చాలా రొమాంటిక్‌గా ఉంటుంది. పారాస్ వయసు 17. ఈ మైనర్ బాలుడితో ఈ స్థాయిలో విజృంభించడం సరికాదని భావించే సదరు సన్నివేశానికి కంగనా ససేమిరా అన్నారు. 
  
  ఈ చిత్రం షూటింగ్ ప్రారంభించినప్పట్నుంచీ పారాస్ చాలా ముభావంగా, బిడియంగా ఉండటంతో, అతని భయాన్ని, బెరుకుని పోగొట్టడానికి కంగనా చాలా ఫ్రెండ్లీగా మెలిగేవారు. రొమాంటిక్ సీన్స్‌లో కూడా తనే ప్రోత్సహించి చేయించేవారట. కానీ, దానికీ ఓ హద్దు ఉందని భావించారామె. దిసీజ్ టూమచ్ అని, అలాంటి సీన్ చెయ్యనని మొండికేశారట. దాంతో చేసేదేం లేక ఆ సన్నివేశాన్ని మార్చి రాశారని సమాచారం. నవంబర్ 15న ఈ చిత్రాన్ని విడుదల చేయాలనుకుంటున్నారు.