జ్యోతినగర్‌ : ఎన్టీపీసీ రామగుండం ఉద్యోగ గుర్తింపు సంఘం ఎన్నికల్లో భాగంగా గురువారం యూనియన్లకు గుర్తులు కేటాయించారు. పోటీలో ఉన్న ఎన్టీపీసీ మజ్దూర్‌ యూనియన్‌(ఐఎన్టీయూసీ)కి చేతిలో చేయి గుర్తు, ఎన్టీపీసీ డెమోక్రటిక్‌ ఎంప్లాయీస్‌ యూనియన్‌(హెచ్‌ఎంఎస్‌)కు స్కూటర్‌ గుర్తు, ఎన్టీపీసీ కార్మిక సంఘ్‌(బీఎంఎస్‌)కు గులాబీ పువ్వు, ఎన్టీపీసీ తెలంగాణ కార్మిక సంఘంకు పులి గుర్తు కేటాయించినట్లు ఎన్నికల అధికారులు తెలిపారు.


 గోదావరిఖని : ఎన్టీపీసీ రామగుండం పర్మినెంట్‌ కార్మిక సంఘం ఎన్నికల్లో టీఆర్‌ఎస్‌ పోటీ చేయడం లేదని తెలంగాణ రాష్ట్ర సమితి రామగుండం కార్పొరేషన్‌ కార్మిక విభాగం అధ్యక్ష, కార్యదర్శులు ఎండీ ప్యారేమియా, కోమల్ల శ్రీనివాస్‌ తెలిపారు. బుధవారం స్థానిక శివాజీనగర్‌లోని ఎమ్మెల్యే క్యాంపు కార్యాలయంలో ఏర్పాటు చేసిన సమావేశంలో వారు మాట్లాడారు. టీఆర్‌ఎస్‌ కార్మిక విభాగం రాష్ట్ర అధ్యక్షులు రూప్‌సింగ్‌ ఆదేశాల మేరకు ఎన్టీపీసీ ప్లాంట్‌లో జరిగే పర్మినెంట్‌ కార్మికుల ఎన్నికల్లో పోటీ చేయడానికి ఎవరికి అనుమతి ఇవ్వలేదని తెలిపారు. ఎవరైనా టీఆర్‌ఎస్‌ కార్మిక విభాగం పక్షాన పోటీలో ఉంటే పార్టీకి గానీ, కార్మిక విభాగానికి ఎలాంటి సంబంధం లేదని వారు పేర్కొన్నారు. ఎన్నికల్లో పోటీ చేసే వారు కేసీఆర్‌ ఫొటో గానీ, టీఆర్‌ఎస్‌ పార్టీ జెండాలు, కండువాలు ఉపయోగించరాదని తెలిపారు. ఎవరైనా అనుమతి లేకుండా పార్టీ పేరును వాడుకుంటే చట్టపరమైన చర్యలు తీసుకుంటామని స్పష్టం చేశారు. ఈ సమావేశంలో నాయకులు జనగామ శ్రీనివాస్, గడ్డం శంకర్, తొట్ల దేవేందర్, సందుపట్ల సత్యనారాయణరెడ్డి, ఎరచాటి ప్రవీణ్‌కుమార్, ఎ.కుమార్, కె.శ్రీనివాస్, టి.సుమన్‌ పాల్గొన్నారు.