టాలీవుడ్‌లో టాప్‌ పోజిషన్‌లో ఉన్న సంగీత దర్శకుడు దేవీ శ్రీ ప్రసాద్‌. ఇటీవల తన స్థాయికి తగ్గ మ్యూజిక్‌ హిట్స్‌ ఇవ్వడంలో కాస్త ఇబ్బంది పడుతున్న దేవీ, ఈ వారం మహర్షితో ప్రేక్షకుల ముందుకు రానున్నాడు. భారీ అంచనాల మధ్య ప్రేక్షకుల ముందుకు వస్తున్న మహర్షి పై దేవీ కూడా చాలా ఆశలు పెట్టుకున్నాడు. తాజాగా దేవీ శ్రీ సంగీతమందించిన ఓ పాట అంతర్జాతీయ వేదిక మీద ప్రశంసలు అందుకుంది. ప్రపంచంలోనే బిగ్గెస్ట్ డ్యాన్స్‌ కాంపిటీషన్‌గా పేరున్న ‘ఎన్‌బీసీ వరల్డ్‌ ఆఫ్‌ డ్యాన్స్‌’ ఫినాలేలో కింగ్స్‌ టీం, దేవీ పాటకు డ్యాన్స్‌ చేసింది. సర్థార్ గబ్బర్‌ సింగ్ సినిమాలోనే ‘ఆడేవడన్నా.. ఈడేవడన్న’ అనే పాటను ప్రదర్శించిన కింగ్స్‌ టీం ప్రేక్షకులతో పాటు న్యాయనిర్ణేతలను కూడా ఆశ్చర్యానికి గురిచేసింది. ఈ విషయంపై  దేవీ శ్రీ ప్రసాద్ ట్విటర్‌ వేదికగా స్పందించాడు.‌ గతంలో అదే వేదిక మీద తాను సంగీతమందించిన ఖైదీ నంబర్‌ 150 సినిమాలో సుందరి పాటను ప్రదర్శించిన సంగతిని గుర్తు చేసుకున్నాడు. నా సంగీతం ప్రజలతో డ్యాన్స్‌ చేయించటం నాకు ఆనందంగా ఉంది అంటూ ట్వీట్ చేశాడు. OMG ! What a Brilliant Performance!!👏🏻👏🏻🙏🏻 That time it was #SUNDARI frm #Khaidi150 & now it is #Vadevadanna frm #SARDARGabbarSingh on d International Dance Stage !! Am so Thrilled wn my MUSIC makes People DANCE !! ThankU & Lov U guys ! U just nailed it !! Keep Roc’KING’S !! https://t.co/mfkd1BhwJG — DEVI SRI PRASAD (@ThisIsDSP) 6 May 2019


 జనతా గ్యారేజ్ సినిమా రిలీజ్ అయి రెండున్నర నెలలు దాటిపోయినా ఎన్టీఆర్ తన నెక్ట్స్ సినిమాను ఇంత వరకు ఎనౌన్స్ చేయలేదు. జనతా గ్యారేజ్తో కెరీర్లో బిగెస్ట్ హిట్ సాధించిన జూనియర్ నెక్ట్స్ సినిమా ఏ జానర్లో చేయాలో తేల్చుకోలేకపోతున్నాడు. దీంతో చాలా మంది దర్శకులు జూనియర్తో సినిమా చేసేందుకు ఇంట్రస్ట్ చూపిస్తున్నా.. ఎవరికీ ఓకె చెప్పటం లేదు. ఇప్పటికే ఎన్టీఆర్ నెక్ట్స్ సినిమా డైరెక్టర్స్ లిస్ట్లో చాలా మంది దర్శకుల పేర్లు వినిపించగా.. తాజాగా ఓ ఫ్లాప్ సినిమా దర్శకుడితో ఎన్టీఆర్ నెక్ట్స్ సినిమా ఉంటుదన్న టాక్ వినిపిస్తోంది.
 
 పవర్ సినిమాతో ఇండస్ట్రీలోకి పవర్ఫుల్గా ఎంట్రీ ఇచ్చిన దర్శకుడు బాబీ. తొలి సినిమాతోనే మంచి విజయం సాధించిన బాబీ రెండో సినిమాగా పవర్ స్టార్ పవన్ కళ్యాణ్ను డైరెక్ట్ చేసే చాన్స్ కొట్టేశాడు. పవన్ హీరోగా సర్థార్ గబ్బర్సింగ్ సినిమాను తెరకెక్కించిన బాబీ ఆశించిన స్థాయిలో ఆకట్టుకోలేకపోయాడు.  ఆ సినిమాకు డిజాస్టర్ టాక్ రావటంతో బాబీ కెరీర్ కష్టాల్లో పడింది. ఆ సమయంలో తన తొలి సినిమా హీరో రవితేజతో మరో సినిమా చేయడానికి ప్లాన్ చేసుకున్నాడు.
 
 రవితేజ ప్రస్తుతం సినిమా చేసే మూడ్లో లేకపోవటంతో ఎన్టీఆర్తో సినిమా చేయడానికి ప్లాన్ చేస్తున్నాడట. ఇప్పటికే ఎన్టీఆర్కు లైన్ కూడా వినిపించిన బాబీ ప్రస్తుతం పూర్తి స్క్రిప్ట్ను రెడీ చేసే పనిలో ఉన్నాడు. జనతా గ్యారేజ్ లాంటి భారీ హిట్ తరువాత జూనియర్, బాబీతో సినిమాకు అంగీకరిస్తాడా..? లేక ఇది కూడా గతంలో వచ్చిన వార్తల్లాగే గాసిప్ అని కొట్టి పారేస్తారా..? చూడాలి.


 - పవన్ కల్యాణ్
 హైదరాబాద్ ప్రశాసన్ నగర్‌లో పవన్‌కల్యాణ్ ఆఫీస్. ప్రత్యేక ఇంటర్వ్యూల కోసం ముందు హాలులో మీడియా ప్రతినిధులు వెయిటింగ్. వెయిటింగ్ హాలు దాటి ఆ డూప్లెక్స్ హౌస్‌లో లోపలికి వెళితే, ఒక చిన్న టేబుల్ మీద చాలా తెలుగు, ఇంగ్లీషు దినపత్రికలు... ఆ పక్కనే పుస్తకాల బీరువా. పక్కనే ఉన్న చిన్నగదిలో బల్లపై విశ్వనాథ సత్యనారాయణ ‘హాహా హూహూ’, గుంటూరు శేషేంద్ర శర్మ ‘ఆధునిక మహాభారతం’, తిలక్ ‘అమృతం కురిసిన రాత్రి’, హిందీ, ఇంగ్లీష్ సాహిత్య రచనలు కిక్కిరిసి కనిపిస్తున్నాయి.
 
 సోఫాలో పవన్ కల్యాణ్. నిర్మాత, చిరకాల మిత్రుడైన శరత్‌మరార్‌తో మంతనాలాడుతున్నారు. కోట్ల ఖర్చు, వంద కోట్ల వ్యాపారం చేసిన ‘సర్దార్ గబ్బర్‌సింగ్’ను ఆఘమేఘాల మీద పూర్తి చేసి, అనుకున్న టైమ్‌కి రిలీజ్ చేసిన పవన్ అనేక నెలల కష్టం నుంచి కాస్తంత సేద తీరుతున్నారు. ఓపెనింగ్స్‌తో సంచలనం సృష్టిస్తున్న ‘సర్దార్...’ గురించి ‘సాక్షి’తో ముఖాముఖి మాట్లాడారు. ముఖ్యాంశాలు...
  
 ♦ కంగ్రాట్స్ అండీ! చాలా రోజుల తర్వాత మళ్ళీ తెర మీదకొచ్చారు!
 థ్యాంక్స్. కొన్ని నెలలుగా పడ్డ కష్టం తెర మీదకొచ్చేసింది.
  
 ♦ తెరపై మీ గుర్రపుస్వారీ అదీ చూస్తే, బాగా చేయి తిరిగినట్లుంది!
 (నవ్వేస్తూ...) నిజానికి, నాకు గుర్రపుస్వారీ రాదు. ఎప్పుడూ నేర్చుకోలేదు. ‘గబ్బర్ సింగ్’ టైమ్‌లో తొలి సారిగా గుర్రపుస్వారీ చేయాల్సి వచ్చింది. కింద పడి, తల పగిలితే ఏమిట్రా బాబూ అని కొద్దిగా భయం వేసిందంటే నమ్మండి. అప్పుడు నేను గుర్రం దగ్గరకెళ్ళి దానితో మాట్లాడా. (నవ్వులు..) నాకు గుర్రపుస్వారీ రాదని, సహకరించమని చెప్పుకున్నా. నా కమ్యూనికేషన్ ఏమర్థమైందో ఏమో గుర్రం సహకరించింది. ఒకసారి జీను పెకైక్కి కూర్చున్నాక, నాకు తెలియకుండానే పట్టు దొరికింది. అంతే! ఇక, ‘సర్దార్ గబ్బర్ సింగ్’కి నాకు అలవాటై పోయింది. ముఖ్యంగా ఈ సిన్మాకు వేసిన సువిశాలమైన రతన్‌పూర్ సెట్ ప్రాంగణంలో అటూ, ఇటూ తిరగడానికి గుర్రమే వాడా. షాట్‌కీ, షాట్‌కీ మధ్య గ్యాప్‌లో రోజుకు అయిదారు సార్లు గుర్రపు స్వారీ చేశా! నాతో పోలిస్తే, అన్నయ్య (చిరంజీవి) అవలీలగా, స్వారీ చేస్తారు. ఆయనకు బాగా వచ్చు. నేను బాగా వచ్చినట్లు నటించాను (నవ్వులు).
  
 ♦ జీవితంలోనూ, తెర మీదా తుపాకీలకూ, మీకూ అవినాభావ సంబంధంలా ఉందే!
 గన్స్... (క్షణమాగి, నవ్వుతూనే...). నేను మొదట ఏమని ఆలోచిస్తానంటే, మనం పని చేస్తున్న విషయం ప్రామాణికంగా ఉండాలనుకుంటా. అందుకనే, ఈ సినిమాలో వాడిన గన్స్ అన్నీ నిజమైన రక రకాల గన్స్ తాలూకు నమూనాలుగా చేయించా. ‘మద్రాస్ రైఫిల్ క్లబ్’లో మెంబర్‌ని. అక్కడి నా పరిచయాలన్నీ వాడుకొని, వాళ్ళ సలహా సూచనలతో ఆ నమూనాలు చేశాం. బేసిక్‌గా మొక్కలు, తుపాకులు బాగా ఇష్టం.
  
 ♦ ఎర్ర తుండు వేసుకున్నారు. మొక్కలు... తుపాకులా? లేక అడవులు... తుపాకులా?
 (నవ్వేస్తూ) ఇప్పటికైతే మొక్కలు, తుపాకులే!
  
 ♦ మార్షల్‌ఆర్ట్స్‌పై మీ ప్రేమను క్లైమాక్స్‌లో చూపినట్లున్నారు!
 అవునండీ! క్లైమాక్స్‌లో విలన్‌తో చేసే ఫైట్‌లో ఫిలిప్పైన్స్‌కు చెందిన మార్షల్ ఆర్ట్ ‘ఎస్‌క్రిమా’ వాడాను. అలాగే, మార్షల్ ఆర్టిస్ట్ బ్రూస్లీ పెంపొందించిన చైనీస్ తరహా కుంగ్‌ఫూ ‘జీత్ కునే డో’ కూడా! ఇవన్నీ ‘జానీ’ సినిమా టైమ్‌లో నేర్చుకున్నా. ప్రత్యర్థిని బ్లాక్ చేయడం, పంచ్ కొట్టడం - రెంటికీ పెద్ద గ్యాప్ ఉండదు.
  
 ♦ ఇవున్నా ‘ఆగడు’, ‘కిక్2’లతో పోలుస్తూ, విమర్శలొచ్చాయే!
 ‘తొలిప్రేమ’ సినిమా చేసినప్పుడు కూడా పనికి మాలిన ఆకతాయిల కథ అని విమర్శకులు చీల్చి చెండా డారు. కానీ, సిన్మా బ్లాక్ బస్టర్. ఇవాళ్టికీ చెప్పుకుంటున్నారు. అందర్నీ తృప్తిపరచడమనేది అసాధ్యం. ఏమైనా, ప్రశంసల్లానే విమర్శల్నీ తీసుకోవాలి. ఎవరి అభిప్రాయం వాళ్ళది. మెచ్చుకొనే వాళ్ళూ, తిట్టేవాళ్ళూ - ఇద్దరూ నాకు సమానం.
  
 ♦ కానీ, ఒకే రకమైన సిన్మాలు తీస్తుంటే... చూస్తుంటే...?
 నిజమే. కానీ ఎవరి సిన్మాలు కొత్తగున్నాయి? మనమెంతసేపటికీ నిర్ణీత వాణిజ్య ఫార్మట్‌లో చిక్కుకుపోతున్నాం. బావిలో కప్పలైపోతు న్నాం. హీరో అంటే పాటలు, ఫైట్లు, డ్యాన్‌‌సలు, కామెడీ చేయాలి. అంచనాలతో వచ్చే ఒత్తిడి అదనం. నాతో సహా ఎవరికైనా ఇదే పరి స్థితి. కానీ, భారతీయ నేపథ్య కథల్ని హాలీవుడ్ తరహా స్క్రీన్ ప్లేతో చెప్పాలి. పాటల్లేని అలాంటి స్వతంత్ర సిన్మాలు మా సంస్థలో తీస్తా.
  
 ♦ ‘బాహుబలి’ తెలుగు సిన్మాను ఉన్నతశిఖరాలకు చేరిస్తే, ‘సర్దార్...’ మళ్ళీ కిందకు తీసుకుపోయిందన్నట్లు రామ్ గోపాల్‌వర్మ ట్వీట్ చేశారు...
  అలాగా! చూడలేదండీ! వీళ్ళంతా ప్రిడిక్టబుల్ పీపుల్.
  
 ♦ మీకూ, ఆయనకూ మధ్య ఏమైనా తేడా పాడాలున్నాయా?
 (క్షణమాగి) అప్పట్లో ఆయన ‘వైఫ్ ఆఫ్ వరప్రసాద్’ కథ చెప్పారు. ఆ సిన్మా నేను చేయలేదు. అంతే. అయినా ఆయన విచిత్ర మైన వ్యక్తి. నన్నడిగితే, ఆయన బయటవాళ్ళ మీద పెట్టే శ్రద్ధ తనపై, తన సిన్మాలపై పెడితే వేరే స్థాయికి వెళ్ళేవారు.
  
 ♦ కానీ ఎవరైనా కామెంట్ చేస్తుంటే?
 (మధ్యలోనే) సిన్మా గురించైనా, పాలిటిక్స్ గురించైనా కామెంట్ చేయడం చాలా తేలిక. కానీ, పాలి టిక్స్‌లోకొచ్చి జనం ముందు మాట్లాడ్తే తెలుస్తుంది. అంతెందుకు ఆయన్ని (వర్మ) సెక్యూర్టీ లేకుండా విజయ వాడలో నుంచి వెళ్ళమనండి! కుదరదు. ఏమైనా, క్రిటిక్స్ చేయాల్సిన పని వేరు. ఫిల్మ్ మేకర్ చేయాల్సిన పని వేరు. ఆయన తోటి ఫిల్మ్ మేకర్ అనుకుంటాను. కాదంటే, నాకూ లోపల వేరే భాష చాలా ఉంది. నేనూ స్ట్రిప్ చేసి, మాట్లాడగలను.
  
 ♦ మీరు ‘రాజా సర్దార్ గబ్బర్‌సింగ్’ కంటిన్యూస్ అన్నారే?
  అవునండీ! చేస్తాం.
 
 ♦ ఏంటి? ఈ రిజల్ట్‌తో సంబంధం లేకుండానేనా?
 రిజల్టంటే ఏమిటి? ఒక సిన్మాకు ఎంత డబ్బులు పెట్టాం, ఎంత వచ్చాయనేగా! మరీ, నా సినిమా రూ.400 కోట్లు సంపాదించాలని లక్ష్యం పెట్టకండి! (నవ్వు)  ఎండ్ టైటిల్స్‌లో చెప్పినట్లు ‘రాజా సర్దార్ గబ్బర్‌సింగ్’ చేస్తాం.
  
 ♦ మొత్తానికి ‘గబ్బర్‌సింగ్’ని బ్రాండ్‌గా మారుస్తున్నట్లున్నారు!
 బ్రాండ్ కాదు కానీ దాన్తో ఎంటర్‌టైనర్స్ తీద్దామని!
  
 ♦ అసలు ‘గబ్బర్‌సింగ్’ పాత్ర పేరు, తతంగం మీ సృష్టేనట!
 హైదరాబాద్‌లో కె.ఎస్.ఎన్. మూర్తి గారని పోలీస్ ఆఫీసర్ ఉండేవారు. ఆయనను గబ్బర్‌సింగ్ అని పిలిచేవారు. ఆ స్ఫూర్తితో నేను ‘గబ్బర్‌సింగ్’ అనే టైటిల్ పెట్టుకొని, హిందీ ‘దబంగ్’ బేసిక్ ప్లాట్ తీసుకొని, కథ, అంత్యాక్షరి సీన్స్ లాంటి వన్నీ వర్క్ చేశా. ఫోటో షూట్ చేశాక, దర్శకుడు హరీశ్ శంకర్‌ను పిలిచి, సిన్మా అప్పగించా. అలా ‘గబ్బర్‌సింగ్’ వచ్చింది.
  
 ♦ ఇంతకీ, ‘సర్దార్...’ను హిందీలో రిలీజ్ చేయడంలోని ఆలోచన?
 మన తెలుగు సినిమాల్ని హిందీలోకి డబ్బింగ్ చేసి, వాటిని ‘జీ’ టీవీ లాంటి వాటిలో విపరీతంగా ప్రదర్శిస్తున్నారు. జనమూ చూస్తున్నారు. అలాంటప్పుడు మన సిన్మాను మనమే హిందీలోకి డబ్ చేసి, రిలీజ్ చేస్తే బాగుంటుంది కదా! తెలుగు సిన్మా మార్కెట్‌ను విస్తరించడానికి ఎవరో ఒకరు ఇలాంటి ప్రయత్నం చేయాలి. ‘సర్దార్ గబ్బర్ సింగ్’తో నేను చేసింది అదే! ఈ ప్రయత్నం సక్సెసా, కాదా అన్నది తర్వాత! ముందుగా ఎవరో ఒకరు ఇలాంటివి ప్రయత్నించాలి. వంద సినిమాలతో ప్రయత్నిస్తే, 101వ దానితోనైనా తెలుగు సినిమాకు కొత్త మార్కెట్ ఓపెన్ అవుతుంది. అది నా సిన్మా అయినా, కాకపోయినా ఫరవాలేదు. కానీ, మన సినిమాకు మార్కెట్ పెరగడం ముఖ్యం. ఇది ఆ ప్రక్రియలో భాగం.
  
 ♦ నెక్స్‌ట్ సినిమా మళ్ళీ ఎప్పుడు?
 త్వరలోనే! ఎస్.జె. సూర్య దర్శకుడు.
  
 ♦ మీ కాంబినేషన్‌లో ‘ఖుషి’కి ఇది సీక్వెలా?
 లేదు. ఇది వేరే. ఫ్యాక్షనిస్ట్ లవ్‌స్టోరీ.
  
 ♦ త్రివిక్రమ్‌తో ‘కోబలి’ చిత్రం చేస్తారన్నారు.
 ఆ కథ గురించి, అది ఎప్పుడు పట్టాల మీదకు ఎక్కుతుందనేది త్రివిక్రమ్ గారు చెప్పాలి! మీరు ఆయన్ని అడగాలి (నవ్వులు).
  
 ♦ మీరు నిర్మాతగా - చరణ్‌తో, మీరు హీరోగా దాసరితో చేస్తామన్న సిన్మాల మాటేమిటి?
 అవి చేయాలండి! దాసరి గారు కథ సిద్ధం చేయిస్తున్నారు. కథ పూర్తి అయ్యాక తప్పకుండా చేస్తాం. కానీ, నెల నెలా ఖర్చులు గడవడం కోసం సిన్మాలు చేయాల్సి వస్తోంది. కానీ, మరో రెండు, మూడు చేశాక మానేస్తా.
  
 ♦ ‘సర్దార్ గబ్బర్‌సింగ్’కు 35 కోట్లు తీసుకున్నారట!
  అది నిజం కాదు. అంత తీసుకోలేదు.
  
 ♦ తెలుగులో అత్యధిక పారితోషికపు హీరో మీరేనంటే...
 యస్. అయామ్! హయ్యస్ట్ రెమ్యూనరేషన్ అందుకొంటున్నా. ట్యాక్స్ వాళ్ళనడిగితే చెబుతారు.
  
 ♦ ఇంతకీ మీరు ఎంత రిచ్? ఎంత పూర్?
 ఇన్‌కమ్ ట్యాక్స్ బ్యాలెన్‌‌సషీట్ చూస్తే 20 కోట్లు డెఫ్సిట్.
  
 ♦ మరి సిన్మాలు మానేస్తే ఎలా? ఫ్యాన్స్, ప్రేక్షకులేమవుతారు?
 ‘ఖుషి’ టైమ్‌లోనే 2-3 సినిమాలు చేసి మానేద్దామ నుకున్నా. కుదరలేదు. ఇప్పుడిక పూర్తిగా రాజకీయాల్లోకి వచ్చేద్దామనుకొంటున్నా. భార్యాబిడ్డల జీవితం గడవడానికి కావాల్సిన కొద్ది డబ్బు సంపాదించి, సిన్మాలు మానేస్తా. రాజకీయాల్లో నేను నాలా ఉండచ్చు. సిన్మాల్లో అలా కాదు.
  
 ♦ మీ అబ్బాయి అకీరా ఈ సిన్మా చూశాడా? ఏమన్నాడు?
 లేదండీ! చూడలేదు. నేను కూడా వాళ్ళను చూసి, 4 నెలలైంది. ఈ సినిమా బిజీలో పడి వెళ్ళలేదు. పిల్లలు బెంగ పడుతున్నారు. ఈ సినిమా రిలీజ్ రోజునే వాడి పుట్టినరోజు కూడా! మర్చిపోయాను. సాయంత్రం గుర్తొచ్చి ఫోన్ చేసి, సారీ చెప్పాను. రేపో, ఎల్లుండో పుణే వెళ్ళి, చూసొస్తా.  
  
 ♦ ఇంతకీ మీరు పవర్‌స్టారా? పవర్ మేకరా? పవర్ మాంగరా?
 (నవ్వేస్తూ...) ఇవేవీ కాదు. నేను వట్టి పవన్ కల్యాణ్‌ని! అంతే!
 
 - రెంటాల జయదేవ


 ఎల్‌బీనగర్ (హైదరాబాద్): సినిమా టికెట్లు దక్కించుకోవాలన్న ఆత్రంతో ఓ యువకుడు వేలు పోగొట్టుకున్నాడు. వనస్థలిపురం విష్ణు థియేటర్ వద్ద శుక్రవారం ఈ ఘటన చోటుచేసుకుంది. 'సర్ధార్ గబ్బర్‌సింగ్' సినిమా టికెట్ల కోసం ఓ యువకుడు విష్ణు థియేటర్ వద్దకు వెళ్లాడు. 
  
 మెయిన్ గేటు ఎక్కి లోపలికి దూకే సమయంలో వాచ్‌మెన్ ఒక్కసారిగా గేటును తెరిచాడు. అప్పటికే గేటుపై ఉన్న ఆ యువకుడు సరాసరి కిందికి దూకడంతో వేలు గేటులో ఇరుక్కుని తెగి పడిపోయింది. తీవ్ర రక్తస్రావం కావడంతో స్థానికులు అతన్ని వైద్య చికిత్స కోసం తరలించే ప్రయత్నం చేసినప్పటికీ... భయంతో బాధితుడు అక్కడి నుంచి పారిపోయాడు. 


 హైదరాబాద్‌: 'నిజంగా పవర్ స్టార్ నన్ను కొట్టలేదు. అవన్నీ ఒట్టి రూమర్లు.. ఇక ప్రచారం చేయడం మానుకోండి' అంటూ వాపోతున్నాడు కమెడియన్ షకలక శంకర్. పవర్ స్టార్ పవన్ కల్యాణ్ 'సర్దార్ గబ్బర్ సింగ్' షూటింగ్ లో ఉండగా కమెడియన్ షకలక శంకర్ని చెంపదెబ్బ కొట్టాడన్న వార్త గత రెండు రోజులుగా సినీ సర్కిల్స్ లో హల్ చల్ చేస్తోంది. షూటింగ్ కి ఆలస్యంగా రావడమే కాకుండా దర్శకుడి పట్ల దురుసుగా ప్రవర్తించిన కారణంగా పవన్.. శంకర్ మీద చేయి చేసుకున్నారంటూ వార్తలు వినిపిస్తున్నాయి. ఈ క్రమంలో శనివారం స్వయంగా శంకరే వివరణ ఇచ్చుకున్నాడు.
 
 తన అభిమాన హీరోతో కలిసి సెట్లో చాలా ఎంజాయ్ చేశానని,  అసలు ఏ గొడవా జరగలేదని చెప్పాడు. తను వండిన చేపల పులుసు అంటే పవన్ కల్యాణ్ కు ఇష్టమని, అలాగే తనతో జానపద గీతాలు కూడా పాడించుకుంటూ ఉంటారని పవన్ తో తన అనుబంధాన్ని  పంచుకున్నాడు షకలక శంకర్.


 కొతం కాలంగా సినిమాలకు దూరంగా ఉన్న పవన్, ఈసారి అభిమానులకు ఫుల్ ట్రీట్ ఇవ్వడానికి రెడీ అవుతున్నాడు. ఇప్పటికే తన నెక్ట్స్ ప్రాజెక్ట్ సర్దార్ గబ్బర్సింగ్ 60 శాతం షూటింగ్ పూర్తిచేసిన పవన్, తదుపరి షెడ్యూల్ను మరింత భారీగా ప్లాన్ చేస్తున్నాడు. ఇప్పటికే అవుట్ డోర్ షూట్తో పాటు కొన్ని పాటలను కూడా పూర్తిచేసుకున్న ఈ సినిమా త్వరలో ఓ భారీ సెట్లో షూటింగ్కు రెడీ అవుతోంది.
 
 పవన్ సన్నిహితుడు శరత్ మరార్ ప్రతిష్ఠాత్మకంగా నిర్మిస్తున్న ఈ సినిమా కోసం హైదరబాద్ బంజారాహిల్స్లో భారీ సెట్ వేశారు. పవన్ లాంటి స్టార్ హీరోతో అవుట్ డోర్లో షూటింగ్ చేస్తే సమస్యలు తెలెత్తుతాయని భావించిన యూనిట్, సెట్లో చేయటమే కరెక్ట్ అని.. ఓ బజారుతో పాటు భారీ రైల్వే స్టేషన్, ట్రైన్ల సెట్ రూపొందించారు.
 
 దాదాపు 2 కోట్లతో రూపొందించిన ఈ సెట్లో 27 రోజుల పాటు భారీ షెడ్యూల్ను ప్లాన్ చేశారు. పవర్ ఫేం బాబీ దర్శకత్వంలో తెరకెక్కుతున్న ఈ సినిమాలో కాజల్ హీరోయిన్గా నటిస్తోంది. మార్చి మూడోవారంలో ఆడియోను, ఏప్రిల్ 11న సినిమాను రిలీజ్ చేయడానికి ప్లాన్ చేస్తున్నారు చిత్రయూనిట్.


 పవర్ స్టార్ పవన్ కళ్యాణ్ హీరోగా నటిస్తున్న కొత్త సినిమా సర్దార్ గబ్బర్సింగ్. చాలా రోజులుగా వాయిదా పడుతూ వచ్చిన ఈ సినిమా ఈ మధ్యే పట్టాలెక్కింది. పవర్ ఫేం బాబీ దర్శకత్వంలో పక్కా మాస్ కమర్షియల్ ఎంటర్టైనర్గా ఈ సినిమాను తెరకెక్కిస్తున్నారు. పవన్ పుట్టిన రోజున ఫస్ట్ లుక్ టీజర్ను రిలీజ్ చేసిన చిత్రయూనిట్ ఆ తరువాత మీడియాకు దూరంగా ఉంటూ వస్తున్నారు. దీంతో సినిమాకు సంబంధించి రకరకాల వార్తలు టాలీవుడ్ సర్కిల్స్ లో హల్చల్ చేస్తున్నాయి.
 
 ఈ గాసిప్స్ అన్నింటికి ఫుల్స్టాప్ పెట్టేసింది హాట్ బ్యూటీ లక్ష్మీరాయ్. సర్దార్ గబ్బర్సింగ్ సినిమాలో స్పెషల్ సాంగ్లో నటిస్తున్న ఈ బ్యూటీ, తాను పవన్తో కలిసి దిగిన ఫోటోలు తన ట్విట్టర్ పేజిలో పోస్ట్ చేసింది. దీంతో పవర్ స్టార్ అభిమానులు పండగ చేసుకుంటున్నారు. గబ్బర్సింగ్ సినిమాలోని కెవ్వుకేక పాటను గుర్తు చేసేలా ఉన్నాయి ఈ స్టిల్స్.
 
 ఎన్నో వివాదాల తరువాత షూటింగ్ మొదలైన సర్దార్ గబ్బర్సింగ్ సినిమాను పవన్ మిత్రుడు శరత్ మరార్, పవర్స్టార్తో కలిసి నిర్మిస్తున్నాడు.ఈ సినిమాలో కాజల్ అగర్వాల్ హీరోయిన్గా నటిస్తోంది. కథా కథనాలు పవన్ కళ్యాణ్ అందిస్తుండటం మరో విశేషం.