వయసు పెరుగుతున్న కొద్దీ రజనీకాంత్‌లో ఎనర్జీ, స్టయిల్, చరిష్మా కూడా పెరుగుతున్నాయి. సినిమా సినిమాకు మరింత ఫ్రెష్‌ లుక్‌లోకి మారిపోతున్నారు. ప్రస్తుతం ఆయన హీరోగా ఏ ఆర్‌ మురుగదాస్‌ దర్శకత్వంలో ‘దర్బార్‌’ అనే చిత్రం తెరకెక్కుతోంది. నయనతార కథానాయిక. లైకా సంస్థ నిర్మిస్తోంది. ఈ సినిమాలో రజనీకాంత్‌ సెకండ్‌ లుక్‌ను ఓనమ్‌ సందర్భంగా బుధవారం రిలీజ్‌ చేశారు. ఫైట్‌కు రెడీ అవుతున్నట్టు గుర్రుగా చూస్తున్నారు రజనీ.  ‘మరింత యవ్వనంగా, అందంగా, తెలివిగా, కఠినంగా రజనీకాంత్‌ను చూపించబోతున్నాం’ అని మురుగదాస్‌ పేర్కొన్నారు. ఇందులో పోలీస్‌ అధికారి పాత్రలో రజనీ కనిపిస్తారు. వచ్చే ఏడాది సంక్రాంతికి ‘దర్బార్‌’ రిలీజ్‌ కానుంది.

ఫుట్‌బాల్‌ గ్రౌండ్‌లో ప్రత్యర్థులను హడలెత్తించేలా ఆడారు తమిళ నటుడు విజయ్‌. ఈ ఆట ఈ ఏడాది దీపావళికి వెండితెరపైకి వస్తుంది. అట్లీ దర్శకత్వంలో విజయ్‌ హీరోగా రూపొందుతున్న సినిమాకు ‘బిగిల్‌’ అనే టైటిల్‌ను ఖరారు చేశారు. అలాగే శనివారం విజయ్‌ పుట్టినరోజు సందర్భంగా ఈ సినిమా ఫస్ట్‌ లుక్, సెకండ్‌ లుక్‌ను విడుదల చేశారు. ఈ లుక్స్‌ చూస్తుంటే  విజయ్‌ క్యారెక్టర్‌లో మూడు నాలుగు షేడ్స్‌ ఉంటాయని అర్థం అవుతోంది. ఇక్కడున్న ఫస్ట్‌ లుక్‌ పోస్టర్‌లో ఒక గెటప్‌లో యంగ్‌ ఫుట్‌బాల్‌ ప్లేయర్‌గా కనిపిస్తున్న విజయ్, ఇంకో లుక్‌లో కత్తి పట్టుకుని మాస్‌ లుక్‌లో కనిపిస్తున్నారు. ఈ సినిమాలో నయనతార కథానాయికగా నటిస్తున్నారు. ఈ ఏడాది దీపావళికి సినిమా విడుదల కానుంది. అన్నట్లు.. ‘బిగిల్‌’ అంటే విజిల్‌ అని అర్థం.

2017 అక్టోబర్‌ 6... నాగచైతన్య, సమంత తమ ప్రేమ ప్రయాణంలో పెళ్లి అనే ‘మజిలీ’ని చేరుకున్న రోజు. పెళ్లి తర్వాత వారిద్దరూ కలిసి నటిస్తున్న మొదటి చిత్రం ‘మజిలీ’. ఇందులో ఇద్దరూ భార్యాభర్తలుగానే నటిస్తున్నారు. ‘దేర్‌ ఈజ్‌ లవ్‌.. దేర్‌ ఈజ్‌ పెయిన్‌’ అనేది ఉపశీర్షిక. షైన్‌ స్క్రీన్‌ బ్యానర్‌పై సాహు గారపాటి, హరీశ్‌ పెద్ది నిర్మిస్తున్నారు. ‘నిన్ను కోరి’ ఫేమ్‌ శివ నిర్వాణ దర్శకత్వం వహిస్తున్నారు. ఇప్పటికే దాదాపు 80 శాతం పైగా షూటింగ్‌ పూర్తి చేసుకున్న ఈ చిత్రాన్ని ఏప్రిల్‌ 5న విడుదల చేస్తున్నట్లు చిత్రనిర్మాతలు తెలిపారు. జనవరి 1న ఈ చిత్రం ఫస్ట్‌ లుక్‌ను విడుదల చేశారు. ఫస్ట్‌ లుక్‌లో గడ్డంతో సమంత సరసన కనిపించారు చైతూ. సంక్రాంతి సందర్భంగా సోమవారం ఈ చిత్రం సెకండ్‌ లుక్‌ను విడుదల చేశారు. ఈ పోస్టర్‌లో చేతిలో బ్యాట్, క్లీన్‌ షేవ్‌తో కనిపించారు చైతూ. అయితే ఈసారి ఫొటోలో సమంత కనిపించడంలేదు. రెండో హీరోయిన్‌గా చేస్తున్న దివ్యాంశ కౌశిక్‌ ఆత్మీయంగా చైతూని హగ్‌ చేసుకుని కనిపిస్తున్నారు. ఇంట్లో ఇల్లాలు సమంత అయితే గ్రౌండ్‌లో ప్రియురాలు దివ్యాంశ అనుకోవాలేమో. అంటే.. ఇదేమైనా ట్రయాంగిల్‌ లవ్‌ స్టోరీయా? ఏప్రిల్‌లో తెలుసుకుందాం. ఈ చిత్రకథ మాత్రం విశాఖపట్నం నేపథ్యంలో ఉంటుందట. రావు రమేశ్, పోసాని కృష్ణముర ళి, సుబ్బరాజు కీలక పాత్రలు పోషిస్తున్న ఈ చిత్రానికి సంగీతం: గోపీ సుందర్, కెమెరా: విష్ణు వర్మ.

రజనీకాంత్‌ హీరోగా కార్తీక్‌ సుబ్బరాజ్‌ దర్శకత్వంలో రూపొందుతున్న సినిమా ‘పేట్టా’. సిమ్రాన్, త్రిష కథానాయికలుగా నటిస్తున్నారు. సన్‌పిక్చర్స్‌ నిర్మిస్తున్న ఈ సినిమా ఫస్ట్‌ లుక్‌ మోషన్‌ పోస్టర్‌ అండ్‌ టైటిల్‌ను సెప్టెంబర్లో రిలీజ్‌ చేసిన విషయం గుర్తుండే ఉంటుంది. తాజాగా రజనీకాంత్‌ సెకండ్‌ లుక్‌ను గురువారం రిలీజ్‌ చేసి రజనీ ఫ్యాన్స్‌కు సర్‌ప్రైజ్‌ ఇచ్చారు టీమ్‌. ఫస్ట్‌ లుక్‌లో రజనీకాంత్‌ ఫుల్‌ మాస్‌గా కనిపిస్తే, సెకండ్‌ లుక్‌లో క్లాస్‌గా కనిపించారు. ఈ లుక్స్‌ని బట్టి సినిమాలోని రజనీకాంత్‌ క్యారెక్టర్‌లో షేడ్స్‌ ఉంటాయని అర్థం అవుతుంది. అలాగే సెకండ్‌ లుక్‌ 1980 కాలంనాటిదిగా ఉంది. అంటే ఈ సినిమా 1980 బ్యాక్‌డ్రాప్‌లో తెరకెక్కుతోందా? అనే ఊహాగానాలు కూడా మొదలయ్యాయి. ప్రస్తుతం ‘పేట్టా’ సినిమా చిత్రీకరణ వారణాసిలో జరుగుతోందని సమాచారం. రజనీ, విజయ్‌సేతుపతి, త్రిషలపై కీలక సన్నివేశాలను చిత్రీకరిస్తున్నారని కోలీవుడ్‌ టాక్‌. నవాజుద్ధీన్‌ సిద్ధిఖీ, విజయ్‌ సేతుపతి, బాబీ సింహా, డైరెక్టర్‌ శశి, మేఘా ఆకాశ్, సనత్‌ రెడ్డి కీలక పాత్రలు చేస్తున్నారు. అనిరు«ద్‌ రవిచంద్రన్‌ స్వరాలు సమకూర్చుతున్న ఈ సినిమాను వచ్చే ఏడాది సంక్రాంతికి రిలీజ్‌ చేయాలనుకుంటున్నారు.

‘ఎన్‌జీకే’.. అంటే ఏంటి? అని ఇన్ని రోజులు ఆలోచించిన సినీ లవర్స్‌కు సూర్య అండ్‌ టీమ్‌ ఆన్సర్‌ చెప్పేశారు. సెల్వరాఘవన్‌ దర్శకత్వంలో సూర్య హీరోగా రూపొందుతోన్న సినిమా ‘ఎన్‌జీకే’. సాయిపల్లవి, రకుల్‌ ప్రీత్‌సింగ్‌ కథానాయికలుగా నటిస్తున్నారు. ఎస్‌.ఆర్‌. ప్రకాశ్‌ బాబు, ఎస్‌.ఆర్‌. ప్రభు నిర్మిస్తున్నారు. సోమవారం సూర్య బర్త్‌ డే సందర్భంగా ఆదివారం ఈ సినిమా సెకండ్‌ లుక్‌ను రిలీజ్‌ చేశారు. ఇక్కడ ఉన్న ఫొటో అదే. తమిళ పోస్టర్‌పై ‘ఎన్‌జీకే’ అంటే ‘నంద గోపాలన్‌ కుమారన్‌’ అని చెప్పారు టీమ్‌. మరి.. తెలుగు ‘ఎన్‌జీకే’ అంటే... ‘నంద గోపాలకృష్ణ’ అట. టైటిల్‌ క్యాప్షన్‌ను బట్టి నంద గోపాలకృష్ణ పాత్రలో సూర్య కనిపిస్తారని ఊహించవచ్చు. దాదాపు చిత్రీకరణ పూర్తి కావొచ్చిన ఈ సినిమాను ఈ ఏడాది దీపావళికి రిలీజ్‌ చేయాలనుకుంటున్నారు. ఈ చిత్రానికి సంగీతం: యువన్‌ శంకర్‌ రాజా.


 లైట్‌గా వెయిట్‌ తగ్గింది.. మజిల్‌ పెరిగింది. లైట్‌గా హెయిర్‌ కట్‌ చేశాడు... రఫ్‌గా కాస్త గడ్డం పెంచాడు. కట్‌ చేస్తే.. న్యూ హ్యాండ్సమ్‌ లుక్‌తో గోపీచంద్‌ ఆడియన్స్‌ని ఎట్రాక్ట్‌ చేస్తున్నాడు. ఆయన హీరోగా సంపత్‌ నంది దర్శకత్వంలో జె. భగవాన్, జె. పుల్లారావ్‌ నిర్మిస్తున్న సినిమా ‘గౌతమ్‌నంద’. మహాశివరాత్రి సందర్భంగా గోపీచంద్‌ సెకండ్‌ లుక్‌ విడుదల చేశారు. నిర్మాతలు మాట్లాడుతూ – ‘‘గోపీచంద్‌ లుక్‌కి అద్భుతమైన స్పందన లభిస్తోంది.
 సంపత్‌ నంది ప్రతి విషయంలోనూ జాగ్రత్తలు తీసుకుని హీరో క్యారెక్టర్‌ని సై్టలిష్‌గా ఎలివేట్‌ చేశారు. ప్రస్తుతం రామ్‌–లక్ష్మణ్‌ నేతృత్వంలో యాక్షన్‌ సీన్స్‌ తీస్తున్నాం. మూడు నిమిషాల ఓ ఫైట్‌ కోసం గోపీచంద్‌ నాలుగు రోజులు రిహార్సల్స్‌ చేయడంతో సింగిల్‌ టేక్‌లో పూర్తి చేశాం. తెలుగులో ఈ విధంగా చేయడం ఇది మొదటిసారి. ఈ షెడ్యూల్‌తో టాకీ పూర్తవుతుంది. మార్చిలో పాటల చిత్రీకరణకు విదేశాలు వెళతాం’’ అన్నారు. హన్సిక, కేథరిన్‌ కథానాయికలుగా నటిస్తున్న ఈ చిత్రానికి కళ: బ్రహ్మ కడలి, కూర్పు: గౌతంరాజు, కెమేరా: ఎస్‌. సౌందర్‌రాజన్, సంగీతం: ఎస్‌.ఎస్‌. తమన్‌.