సాక్షి, సెంట్రల్‌ డెస్క్‌ :  ఒకటా, రెండా ఏకంగా 42 లోక్‌సభ స్థానాలు.. దేశంలో అత్యధిక సీట్లున్న రాష్ట్రాల్లో మూడో స్థానం.. అందుకే అందరి దృష్టి ఆ రాష్ట్రంపైనే!. పట్టు నిలుపుకోవాలని ఒకరి పోరాటం.. పాగా వేయాలని మరొకరి ఆరాటం.. బెంగాల్‌పై మమత ఆధిక్యం ఇంకా కొనసాగుతోంటే.. నేనున్నానంటూ కమల దళం సవాల్‌ విసురుతోంది. బీజేపీతో చేతులు కలిపినదెవరైనా తనకు శత్రువేనని మమత నినదిస్తుంటే బెంగాల్‌లో అభివృద్ధికి మమతే స్పీడ్‌ బ్రేకర్‌ అంటూ మోదీ కౌంటర్‌ ఇస్తున్నారు. ఇంతకీ ‘బెంగాల్‌ దంగల్‌’లో విజేత ఎవరు?.. ‘పశ్చిమ బెంగాల్‌’ ఈ పేరు చెబితే విశ్వకవి రవీంద్రుడి జాతీయ గీతాలాపనే కాదు. ఆ రాష్ట్రంలో జరిగే రాజకీయ హింస కూడా అందరికీ గుర్తొస్తుంది. కొన్నాళ్ల క్రితం వరకు తృణమూల్‌ కాంగ్రెస్‌ (టీఎంసీ), వామపక్ష–కాంగ్రెస్‌ కూటమి మధ్య జరిగిన రాజకీయ యుద్ధం ఇప్పుడు  టీఎంసీ వర్సస్‌ బీజేపీగా మారిపోయింది. ఈ పోరు రాజకీయం రంగు మార్చుకుంటోంది. 34 ఏళ్ల వామపక్షాల పాలనకు చరమగీతం పాడి, సీపీఎం కంచుకోటను బద్దలుగొట్టి పశ్చిమబెంగాల్‌లో చరిత్ర సృష్టించారు తృణమూల్‌ కాంగ్రెస్‌ అధినేత్రి, బెంగాల్‌ ముఖ్యమంత్రి మమతా బెనర్జీ. 2011 అసెంబ్లీ ఎన్నికల్లో విజయకేతనం ఎగురవేసిన తర్వాత ఆమె వెనుదిరిగి చూడలేదు. ఎనిమిదేళ్లుగా రాష్టాన్ని తన కనుసన్నల్లోనే పాలిస్తున్నారు. బెంగాల్‌లో ఆమె మాటే శాసనం. ఆమెను ప్రశ్నించే వారు లేరు. ఎవరి మీదనైనా కన్నెర్ర చేస్తే చాలు ప్రసన్నం చేసుకోవాలనే అనుకుంటారు. మమత హయాంలో అభివృద్ధి ఆమడ దూరంలోనే ఉన్నా ఆమెను ఎదుర్కొనే ప్రత్యామ్నాయం ఇప్పటి వరకు రాలేదు. ఎన్నికలకు ముందు ప్రధానమంత్రి నరేంద్ర మోదీకి వ్యతిరేకంగా కూటమి కట్టాలని మమత చేసిన ప్రయత్నాలు ఫలించలేదు. దీంతో ఎన్నికల్లో ఒంటరిగానే బరిలోకి దిగారు.  ఇద్దరూ ఇద్దరే నరేంద్రమోదీ, మమతా బెనర్జీ ఇద్దరూ ఇద్దరే. ఇద్దరి ఆలోచనలు ఒకటే. ఇద్దరివీ ఒంటరి జీవితాలే. అంతా తమ చుట్టూ తిరగాలని, తమ మాటే చెల్లుబాటు కావాలని అనుకుంటారు. తమకు ఎవరైనా ఎదురు తిరిగితే అణగదొక్కేస్తారు. ఒకే స్వభావం ఉన్న ఇద్దరూ ఇప్పుడు బెంగాల్‌లో పోటీ పడుతున్నారు. ప్రధానమంత్రి పీఠంపై కన్నేసిన మమత కేంద్రం పేరు చెబితేనే అపర కాళికావతారం ఎత్తుతారు. శారదా చిట్‌ఫండ్స్, రోజ్‌వ్యాలీ పోంజి పథకాలు ఆమె ప్రభుత్వం మెడకు చుట్టుకున్నా, కోల్‌కతా పోలీసు కమిషనర్‌ రాజీవ్‌కుమార్‌ను అరెస్ట్‌ చేయడానికి వచ్చిన సీబీఐనే ఎదుర్కొన్న ధైర్యం ఆమెది. మోదీనే నువ్వెంత అంటే నువ్వెంత అనగలరు.  దీదీ ఇలాకాలో మోదీ ధమాకా  కోల్‌కతాలో పరేడ్‌ గ్రౌండ్స్‌లో ప్రధానమంత్రి నరేంద్ర మోదీ ప్రారంభించిన ఎన్నికల ప్రచారం బీజేపీ శ్రేణులకు మంచి ఊపునిచ్చింది. మోదీ తన మాటల మాయాజాలంతో దీదీ నినాదాలకు కౌంటర్‌ నినాదాలిస్తూ సభను హోరెత్తించారు. మార్పు రావాలి. మార్పు కావాలి అంటూ తృణమూల్‌పై విరుచుకుపడుతూ బెంగాల్‌ రేసులో దూసుకుపోతున్నా బీజేపీ రన్నరప్‌గానే ఉంటుందని రాజకీయ విశ్లేషకుల భావన. పశ్చిమ బెంగాల్‌లో మమత దీదీ ఇంకా పట్టు కొనసాగుతోందని ఒపీనియన్‌ పోల్స్‌ వెల్లడిస్తున్నాయి. అయితే బీజేపీ గతంలో కంటే మెరుగైన ఫలితాల్ని సాధిస్తుందని తేల్చి చెప్పాయి.  బీజేపీ ‘తూర్పు పాలసీ’ ఫలిస్తుందా?  దక్షిణాది రాష్ట్రాలపై పూర్తిగా ఆశలు వదిలేసుకున్న బీజేపీ కేవలం ఉత్తరాదిని నమ్ముకుని ‘మేజిక్‌ ఫిగర్‌ 272’ని చేరుకోలేదు. అందుకే అధికారంలోకి వచ్చిన దగ్గర్నుంచి తూర్పు రాష్ట్రాల్లో ఉన్న 143 ఎంపీ స్థానాలపై కన్నేసింది. పశ్చిమ బెంగాల్, జార్ఖండ్, బిహార్, ఒడిశా, ఈశాన్య రాష్ట్రాలపై పట్టు బిగించే ప్రయత్నాలు చేస్తోంది. బీజేపీ అధ్యక్షుడిగా పగ్గాలు చేపట్టాక అమిత్‌ షా కనీసం ఆరుసార్లు పశ్చిమ బెంగాల్‌లో పర్యటించారు. క్షేత్రస్థాయిలో పార్టీని పటిష్టపరిచే వ్యూహాల్లో కొంత వరకు విజయం సాధించారు. కనీసం 22 స్థానాలైనా సాధించాలన్న పట్టుదలతో రాజకీయ వ్యూహాలు రచిస్తున్నారు.  నాయకత్వం  కొరత 2014 ఎన్నికల్లో బెంగాల్‌లో 18 శాతం ఓట్లు సాధించిన బీజేపీ, ఆ తర్వాత రెండేళ్లకే జరిగిన అసెంబ్లీ ఎన్నికల్లో 11 శాతం ఓట్లను మాత్రమే పొందింది. చాలాచోట్ల రెండో స్థానంలో నిలిచింది. అదే ఇప్పుడు బీజేపీకి బలంగా మారింది. అయితే నాయకత్వ సమస్య ఆ పార్టీని వెంటాడుతోంది. బీజేపీలో కీలక నేతలందరూ వలస పక్షులే. జనాల్లో చరిష్మా ఉన్న నేతలే లేరు. అందరూ కాంగ్రెస్, లెఫ్ట్‌ నుంచి వచ్చిన వారే. దిలీప్‌ ఘోష్‌కి పార్టీ పగ్గాలు అప్పగించాక, ఇతర పార్టీల నుంచి చిన్నా చితక నేతలు వచ్చి చేరారు. 2016 అసెంబ్లీ ఎన్నికల్లో ఓటమి పాలైన టీవీ నటి రూపా గంగూలీకి మహిళా విభాగాన్ని అప్పగించారంటే నాయకత్వం సమస్య ఎంత ఉందో అర్థమవుతుంది. ఎన్నికల వేళ టీఎంసీలో టికెట్లు దక్కని ఎమ్మెల్యే అర్జున్‌సింగ్, మరో ఇద్దరు ఎంపీలు అనుపమ్‌ హజ్రా, సౌమిత్రా ఖాన్‌ బీజేపీ గూటికి చేరడం కొంతవరకు కలిసొచ్చే అంశం. బీజేపీలోకి వచ్చిన వారంతా మమత, ఆమె మేనల్లుడు అభిషేక్‌ బెనర్జీ నియంతృత్వ పోకడల్ని దుయ్యబట్టడం దీదీలో కాస్త కలవరాన్ని పెంచుతున్నాయి. గత ఎన్నికల స్థాయిలో తృణమూల్‌ కాంగ్రెస్‌ ఎంపీ స్థానాలను దక్కించుకోలేకపోయినా సంకీర్ణ సర్కార్‌ ఏర్పాటైతే ఆమె కేంద్రంలో చక్రం తిప్పుతారనేది రాజకీయ విశ్లేషకుల అభిప్రాయంగా ఉంది.  దీదీ మాట   ‘జనని, జన్మభూమి, జనం (మా, మట్టి, మనుష్‌) గెలిస్తేనే, ప్రజాస్వామ్యం గెలుస్తుంది’  ఇది మమతకు అత్యంత ఇష్టమైన నినాదాల్లో ఒకటి.  ‘2016 అసెంబ్లీ ఎన్నికల్లో 294 అసెంబ్లీ స్థానాల్లో నేనే అభ్యర్థిని’.. ఇది మమత నాటి ప్రచారం. ‘2019లో బీజేపీ ఫినిష్‌ అయిపోతుంది’.  మమత ప్రచారం ‘బెంగాల్‌ గడ్డ మాదే..’ మోదీ తూటా  ‘మమత పాలనలో జనని, జన్మభూమి, జనం సర్వనాశనం అయ్యారు. వారిని కాపాడే సత్తామాకే ఉంది’.. ఇది మమత నినాదానికి మోదీ కౌంటర్‌.  ‘42 స్థానాల్లో పోటీ చేస్తున్నది చౌకీదారులే’.. ప్రస్తుత ఎన్నికల్లో మోదీ స్లోగన్‌.  ‘ఈ ఎన్నికల్లో ఎవరి సత్తా ఏమిటో తెలుస్తుంది’..  మోదీప్రచారం ‘మార్పు కావాలి..మార్పు రావాలి’. యుద్ధానికి సిద్ధం దీదీ నయా ఫార్ములా 2014 లోక్‌సభ ఎన్నికల్లో మాదిరిగా దేశవ్యాప్తంగా మోదీ హవా ప్రస్తుతం లేదనేది అంతటా వినిపిస్తున్న మాట. బీజేపీ ఎన్ని సీట్లు సాధిస్తుందన్నదే ఇప్పుడు జరుగుతున్న చర్చ. దీనికి మమతా బెనర్జీ ఇటీవల జరిగిన విశాఖపట్నం సభలో తనదైన స్టయిల్‌లో ఒక కొత్త ఫార్ములా చెప్పారు.. బీజేపీ దాని మిత్రపక్షాలకు 125 సీట్లకు మించి రావని, మోదీతో చేతులు కలపని పార్టీలే నెగ్గుతాయన్నది ఆమె థియరీ. ఇదేదో అల్లాటప్పాగా ఆమె చెప్పలేదు. 2014 ఎన్నికల్లో ఓట్లు, సీట్లు, అంకెలు లెక్కలు అన్నీ వేసుకొని ఒక అంచనాకు వచ్చారు. గత ఎన్నికల్లో మోదీ ప్రభంజనం వీచినప్పుడే పశ్చిమ బెంగాల్, కర్ణాటక, తమిళనాడు, కేరళ, ఆంధ్రప్రదేశ్, ఒడిశా రాష్ట్రాల్లో మొత్తం 191 స్థానాల్లో బీజేపీ 21 సీట్లు సాధించింది. వాటిలో కర్ణాటకలోనే 17 సీట్లు వచ్చాయి. గత ఎన్నికల్లో 71 స్థానాలు సాధించిన యూపీలో ఇప్పుడు త్రిముఖ పోటీ నెలకొనడంతో 15 నుంచి 20కి మధ్య బీజేపీ ఆగిపోతుందని ఆమె అంచనా. ఇక  క్లీన్‌స్వీప్‌ చేసిన రాజస్తాన్, గుజరాత్, కాకుండా కొన్ని హిందీ రాష్ట్రాల్లో కూడా ఈసారి హోరాహోరీ పోరు నెలకొంది. అలాంటప్పుడు ప్రభుత్వ ఏర్పాటుకు అవసరమైన సీట్లు బీజేపీకి ఎక్కడ నుంచి వస్తాయనేది మమత వాదన. కేంద్రంలో సంకీర్ణ ప్రభుత్వమే ఏర్పాటైతే కనీసం 30 సీట్లు సాధించినా తాను చక్రం తిప్పేయొచ్చన్నది మమత ఆశ. ఎన్నికల్లో ఇవే ప్రచారాస్త్రాలు పౌర జాతీయ రిజిస్టర్‌ (ఎన్‌ఆర్‌సీ): అసోంలో అక్రమ వలసదారుల్ని గుర్తించడానికి కేంద్రం తెచ్చిన పౌర జాతీయ రిజిస్టర్‌ ప్రకంపనలు బెంగాల్‌ను కూడా తాకాయి. బీజేపీ – టీఎంసీ మధ్య ఘర్షణాత్మక వాతావరణం నెలకొంది. మన దేశానికి వచ్చిన శరణార్థుల్ని గెంటేస్తారా అంటూ మమతా కేంద్రంపై కన్నెర్ర చేశారు. దీంతో బంగ్లాదేశ్‌ నుంచి బెంగాల్‌కు వచ్చిన వలసదారుల్లో ఒక రకమైన గందరగోళం, అభద్రతా భావం నెలకొంది. ఇది ఎన్నికల్లో ప్రధానంగా ప్రభావం చూపించనుంది.  అక్రమ వలసలు సరిహద్దు దేశాల నుంచి అక్రమ వలసల్ని ప్రోత్సహిస్తూ మమత బెంగాల్‌ గడ్డను వారికి స్వర్గధామంగా మారుస్తున్నారన్న ఆరోపణలున్నాయి. దీనినే బీజేపీ ఎన్నికల అంశంగా పదేపదే లేవనెత్తుతోంది. మమతను ఇరుకున పెడుతోంది.  పౌరసత్వ సవరణ బిల్లు ఈ బిల్లు కూడా ఎన్నికల్లో ప్రధానాంశమే. ఈ బిల్లు ప్రకారం బంగ్లాదేశ్, పాకిస్తాన్, ఆఫ్ఘ్ఘనిస్తాన్‌ నుంచి వలస వచ్చిన ముస్లిమేతరులకు పౌరసత్వాన్ని ఇచ్చే బిల్లు. ఈ బిల్లును లోక్‌సభ ఆమోదించింది కానీ ఇంకా రాజ్యసభ ఆమోదం పొందలేదు. ఇది వివక్షతో కూడుకున్నదని దీదీ మండిపడుతున్నారు.  నిరుద్యోగం నిరుద్యోగం అనేది ఇప్పుడు దేశవ్యాప్త ఎన్నికల అంశంగా మారింది. మమత  తాము రాష్ట్రంలో చిన్న తరహా పరిశ్రమలు, కుటీర పరిశ్రమలు, గ్రామస్థాయిలో స్వయం సహాయక సంఘాల ద్వారా లక్షల్లో ఉద్యోగాలు కల్పించామని అంటున్నారు. కేంద్రం తీసుకున్న పెద్ద నోట్ల రద్దు, జీఎస్టీ వంటి నిర్ణయాలతో చిన్నా చితక పరిశ్రమలు కుదేలైపోయాయంటూ అవకాశం వచ్చినప్పుడల్లా ప్రచారం చేస్తున్నారు. 

కోల్‌కతా: కేంద్రంలోని ఎన్డీయే ప్రభుత్వం, పశ్చిమ బెంగాల్‌లోని మమతా బెనర్జీ సర్కారు మధ్య కొనసాగుతున్న ప్రచ్ఛన్న యుద్ధం తారాస్థాయికి చేరింది. చిట్‌ఫండ్‌ కుంభకోణం కేసులో ఆదివారం కోల్‌కతా పోలీస్‌ కమిషనర్‌ను విచారించేందుకు వెళ్లిన సీబీఐ అధికారుల్ని బెంగాల్‌ పోలీసులు అడ్డుకుని నిర్బంధంలోకి తీసుకోవడం తీవ్ర ఉత్కంఠకు దారితీసింది. దీంతో రాష్ట్ర, కేంద్ర ప్రభుత్వాల ఆధీనంలో పనిచేస్తున్న రెండు పోలీసు విభాగాల మధ్య కనీవినీ ఎరుగని రీతిలో ఘర్షణ వాతావరణం నెలకొంది. సెర్చ్‌ వారెంట్‌ లేకుండానే పోలీస్‌ కమిషనర్‌ ఇంటికి వెళ్లడంపై తీవ్ర ఆగ్రహం వ్యక్తం చేసిన మమతా బెనర్జీ.. మోదీ, షా చేతుల్లో తనకు అవమానం జరిగిందని పేర్కొంటూ కోల్‌కతాలో పేరొందిన మెట్రో సినిమాకు ఎదురుగా రాత్రి ధర్నాకు దిగారు. అయితే సీబీఐ అధికారుల అరెస్ట్‌పై భిన్న కథనాలు వినిపించాయి. తమ అధికారుల్ని బలవంతంగా తీసుకెళ్లి పోలీస్‌ స్టేషన్‌లో నిర్బంధించారని సీబీఐ ఆరోపిం చగా, సీనియర్‌ పోలీసు అధికారి ఒకరు ఖండిం చారు. పోలీసు కమిషనర్‌ రాజీవ్‌ కుమార్‌ను విచారించేందుకు తగిన పత్రాలు ఉన్నాయో? లేదో? పరిశీలించేందుకే వారిని పోలీస్‌  స్టేషన్‌కు తీసుకెళ్లామని వివరణ ఇచ్చారు. దెబ్బకు దెబ్బ అన్నట్లు ఆ తరువాత బెంగాల్‌ పోలీసుల బృందం ఒకటి కోల్‌కతాలోని సీబీఐ కార్యాలయానికి వెళ్లి తమ అదుపులోకి తీసుకుంది. కనిపించకుండా పోయారని వార్తలు వచ్చిన రాజీవ్‌కుమార్‌ తాజా ఘటనతో మళ్లీ ప్రత్యక్షమయ్యారు. రాజీవ్‌కుమార్‌ను విచారించేందుకు బెంగాల్‌ ప్రభుత్వం నుంచి అనుమతి ఇప్పించా లని కోరుతూ సోమవారం సుప్రీంకోర్టును ఆశ్రయిస్తామని సీబీఐ తెలిపింది. శారద చిట్‌ఫండ్, రోజ్‌వ్యా లీ పోంజి పథకాలకు సంబంధించి రాజీవ్‌కుమార్‌ విచారణకు హాజరుకాకుండా తప్పించుకు తిరుగుతున్నారని సీబీఐ ప్రకటించిన మరుసటి రోజే ఈ పరిణామాలు చోటుచేసుకున్నాయి. ఇదే అదనుగా బీజే పీ, తృణమూల్‌ మధ్య మాటల యుద్ధం మొదలైంది. బెంగాల్‌లో తమ ప్రభుత్వాన్ని కూల్చేందుకు బీజేపీ కుట్రపన్నుతోందని తృణమూల్‌ ఆరోపించగా, రాజ్యాంగ సమగ్రత, విలువల్ని మమత ప్రభుత్వం ఎగతాళి చేస్తోందని బీజేపీ ఎదురు దాడి చేసింది. డ్రామా కొనసాగిందిలా.. కోల్‌కతాలో లౌడాన్‌ వీధిలోని రాజీవ్‌కుమార్‌ నివాసానికి సుమారు 40 మంది సీబీఐ అధికారులు చేరుకున్నాక కనీవినీ ఎరుగని హైడ్రామా మొదలైంది. వారు లోనికి వెళ్లకుండా అక్కడి భద్రతా సిబ్బంది, అధికారులు అడ్డుకున్నారు. విషయం తెలుసుకున్న వెంటనే రంగంలోకి దిగిన పోలీసులు..రాజీవ్‌కుమార్‌ను ప్రశ్నించేందుకు సీబీఐ అధికారుల వద్ద అవసరమైన పత్రాలు ఉన్నాయా? లేదా? అని వాకబు చేయడం ప్రారంభించారు. ఆ తరువాత కొందరు అధికారుల్ని షేక్‌స్పియర్‌ సరాని పోలీసు స్టేషన్‌కు తరలించారు. ఆ వెంటనే రాజీవ్‌కుమార్‌ నివాసానికి మరికొందరు సీబీఐ అధికారులు రావడంతో కొంత గందరగోళం నెలకొంది. వారిలో కొందరిని పోలీసులు బలవంతంగా జీపులో ఎక్కించి పోలీస్‌ స్టేషన్‌కు తీసుకెళ్లారు. విచారణ ముగిశాక సీబీఐ అధికారుల్ని వదిలిపెట్టినట్లు జాయింట్‌ పోలీస్‌ కమిషనర్‌ (క్రైం) ప్రవీణ్‌ త్రిపాఠి చెప్పారు. రహస్య ఆపరేషన్‌ నిమిత్తం కోల్‌కతాకు వచ్చామని వారు చెప్పారని, అది ఏ రకమైన ఆపరేషనో తమకు తెలియదని వెల్లడించారు. ఇదిలా ఉండగా, ఉద్రిక్తతను నివారించడానికి కోల్‌కతా సీబీఐ కార్యాలయం వద్దకు కేంద్ర బలగాలు చేరుకున్నాయి. సీబీఐ దాడులు ఊహించాం: మమతా బెనర్జీ రాజీవ్‌కుమార్‌ నివాసం బయట హడావుడిగా మీడియా సమావేశం నిర్వహించిన మమతా బెనర్జీ కేంద్ర ప్రభుత్వంపై నిప్పులు చెరిగారు. ప్రధాని మోదీ, బీజేపీ అధ్యక్షుడు అమిత్‌ షా తమ ప్రభుత్వాన్ని కూల్చేందుకు కుట్ర పన్నుతున్నారని ఆరోపించారు. మోదీ ఆదేశాల మేరకు జాతీయ భద్రతా సలహాదారు అజిత్‌ దోవల్‌ రాజకీయ ప్రత్యర్థులపైకి సీబీఐని పంపుతున్నారని దుయ్యబట్టారు. ‘చేతులకు రక్తపు మరకలు అంటుకున్న అలాంటి ప్రధానితో మాట్లాడటానికి సిగ్గుగా ఉంది. జనవరి 19న విపక్షాలతో విజయవంతంగా ర్యాలీ నిర్వహించడంతో రాష్ట్రంలో ప్రభుత్వాన్ని కూల్చేందుకు మోదీ, షా ప్రయత్నిస్తున్నారు. ర్యాలీ తరువాత సీబీఐతో దాడులు చేయిస్తారని మాకు తెలుసు. మా ప్రభుత్వం అధికారంలోకి వచ్చాక చిట్‌ఫండ్‌ కంపెనీల యజమానుల్ని అరెస్ట్‌ చేసింది. ఈ వ్యవహారంలో సిట్‌ను ఏర్పాటుచేసి దర్యాప్తు చేసింది మేమే’ అని మమతా బెనర్జీ అన్నారు. మోదీ ప్రభుత్వాన్ని గద్దె దించేందుకు విపక్షాలన్నీ చేతులు కలపాలని పిలుపునిచ్చారు.    రాజ్యాంగాన్ని పరిహసించారు: బీజేపీ కోల్‌కతా పోలీస్‌ కమిషనర్‌ను సీబీఐ ప్రశ్నించకుండా పోలీసులు అడ్డుకోవడంపై బీజేపీ మండిపడింది. మమతా బెనర్జీ నేతృత్వంలోని తృణమూల్‌ ప్రభుత్వం రాష్ట్రంలో ప్రజాస్వామ్యం, రాజ్యాంగ విలువల్ని పరిహాసానికి గురిచేస్తోందని ఆరోపించింది. ఈ వైఖరి మమతా బెనర్జీ నిరంకుశత్వాన్ని సూచిస్తోందని తెలిపింది. సుప్రీంకోర్టు ఆదేశాల మేరకు సీబీఐ చిట్‌ఫండ్‌ కుంభకోణాలపై విచారణ జరుపుతోందని, కోల్‌కతా పోలీసుల చర్య అత్యున్నత న్యాయస్థానం పట్ల అవిధేయత కనబరచడమేనని పేర్కొంది. బెంగాల్‌లో శాంతి, భద్రతలు పూర్తిగా దారితప్పాయని విమర్శించింది. మమతకు విపక్షాల బాసట.. పశ్చిమ బెంగాల్‌ ప్రభుత్వం, సీబీఐ మధ్య ప్రతిష్టంభన నెలకొన్న నేపథ్యంలో మమతా బెనర్జీకి విపక్ష నాయకులు సంఘీభావం ప్రకటించారు. కాంగ్రెస్‌ అధ్యక్షుడు రాహుల్‌ గాంధీ, ఢిల్లీ ముఖ్యమంత్రి కేజ్రీవాల్, ఆంధ్రప్రదేశ్‌ ముఖ్యమంత్రి చంద్రబాబు, ఎస్పీ అధ్యక్షుడు అఖిలేశ్‌ యాదవ్, డీఎంకే అధ్యక్షుడు స్టాలిన్, ఎన్‌సీ నేత ఒమర్‌ అబ్దుల్లా ఆమెకు ఫోన్‌చేసి మద్దతు తెలిపారు. విపక్షాలంతా ఒకే పక్షమని, వచ్చే ఎన్నికల్లో ఫాసిస్ట్‌ శక్తుల్ని ఓడిస్తామని రాహుల్‌ అన్నారు. రాజ్యాంగం, ప్రజాస్వామ్య విలువలు, సమాఖ్య స్ఫూర్తికి మోదీ తూట్లుపొడిచారని కేజ్రీవాల్‌ ఆరోపించారు. ప్రజాస్వామ్యానికి మోదీ–షా ద్వయం ప్రమాదకరమని, బెంగాల్‌లో సీబీఐ చర్యను ఖండించాలని అన్నారు.   సీబీఐ నోటీసులకు స్పందించని కమిషనర్‌ శారదా, రోజ్‌వ్యాలీ కుంభకోణాల కేసుల్ని విచారించిన ప్రత్యేక దర్యాప్తు బృందానికి రాజీవ్‌కుమార్‌ నేతృత్వం వహించారు. ఈ కేసులకు సంబంధించి గల్లంతయిన కొన్ని పత్రాల విషయమై ఆయనని విచారించాల్సి ఉందని సీబీఐ ప్రకటించింది. తమ ముందు హాజరుకావాలని సీబీఐ పలు నోటీసులు పంపినా స్పందించలేదు. లోక్‌సభ ఎన్నికల సన్నద్ధతపై సమీక్ష జరిపేందుకు ఇటీవల ఎన్నికల సంఘం కోల్‌కతాలో పర్యటించగా, ఆ కార్యక్రమానికి  రాజీవ్‌కుమార్‌ హాజరుకాలేదు. అయితే రాజీవ్‌కుమార్‌ విధులకు దూరంగా ఉంటున్నారని వచ్చిన వార్తల్ని కోల్‌కతా పోలీసులు కొట్టిపారేశారు. ఆయన కోల్‌కతాలోనే ఉన్నారని, రోజూవారీ విధులకు హాజరువుతున్నారని ప్రకటన విడుదల చేశారు. సీబీఐ అధికారిని అదుపులోకి తీసుకుంటున్న పోలీసులు

కోల్‌కతా : విపక్షాలను రాజకీయంగా ఎదుర్కోలేకనే.. ప్రధాని ఇలా వ్యక్తిగత దాడులకు పాల్పడుతన్నారంటూ ఆగ్రహం వ్యక్తం చేశారు పశ్చిమబెంగాల్‌ ముఖ్యమంత్రి మమతా బెనర్జీ. శుక్రవారం కేంద్ర ప్రభుత్వం మధ్యంతర బడ్జెట్‌ను ప్రవేశపెట్టిన అనంతరం మమతా మీడియాతో మాట్లాడుతూ.. ‘నాకు హిందీ సరిగా రాదు. చాలా జాగ్రత్తగా మాట్లాడుతున్నాను. కేంద్ర ప్రభుత్వం ప్రవేశపెట్టిన మధ్యంతర బడ్జెట్‌ అర చేతిలో వైకుంఠం చూపినట్లుగా ఉంది. ఈ బడ్జెట్‌ వల్ల జనాలకు ఎలాంటి ప్రయెజనం ఉండదు. ఇలా అంటున్నందుకు వారు(నరేంద్ర మోదీ) నన్ను అరెస్ట్‌ చేయవచ్చు. కానీ నేను ఇలాంటి వాటికి భయపడను’ అని తెలిపారు. అంతేకాక ‘ప్రసుత్తం నరేంద్ర మోదీ ప్రభుత్వం విపక్షాలను రాజకీయంగా ఎదుర్కొలేక.. వ్యక్తిగత దాడులకు పాల్పడుతున్నదనే విషయం జనాలందరికి తెలుసు.  అందులో భాగంగానే ఏదో ఒకటి చేసి ప్రతిపక్షాలను ఇబ్బందులకు గురి చేయ్యండి అంటూ మోదీ.. అధికారులను ఆదేశిస్తున్నారు. ప్రధాని ఒత్తిడి మేరకే అధికారలు ఇలా చేస్తున్నారు. ఈ విషయంలో అధికారుల మీద నాకు ఎలాంటి కోపం లేదు. కానీ ఇలాంటి చర్యలకు పూనుకుని మోదీ ప్రతిపక్షాలను తీవ్రంగా అవమానిస్తున్నార’ని మమతా ఆరోపించారు. అయితే మమతా మోదీపై ఇలా విరుచుకు పడటానికి కారణం ఉంది. సంచలనం సృష్టించిన కోట్ల రూపాయల ‘శారద పోంజి’ స్కామ్‌ విచారణ నిమిత్తం సీబీఐ అధికారులు రెండు రోజుల క్రితం మమతా పర్సనల్‌ సెక్రటరీని అరెస్ట్‌ చేశారు. ఈ నేపథ్యంలో మమతా, మోదీపై ఆగ్రహం వ్యక్తం చేశారు. అంతేకాక వ్యక్తిగత రాగద్వేషాలకు తావు లేకుండా పవిత్రంగా రాజకీయాలు చేయగలరా అంటూ మమతా, మోదీకి సవాలు విసిరారు.


 భారతీయ జనతాపార్టీ జాతీయ అధ్యక్షుడిగా రెండోసారి ప్రమాణం చేసిన తర్వాతిరోజే తదుపరి కార్యక్షేత్రం పశ్చిమబెంగాల్ పై దృష్టి సారించారు అమిత్ షా. సోమవారం కోల్ కతాలో రాష్ట్ర బీజేపీ నిర్వహించిన సభలో పాల్గొన్న ఆయన అధికార తృణమూల్ కాంగ్రెస్ పై తీవ్రస్థాయి విమర్శలు గుప్పించారు. దేశ ద్రోహులు, అసాంఘిక శక్తులకు పశ్చిమబెంగాల్ అడ్డాగా మారిందని, మమత నేతృత్వంలోని టీఎంసీ ప్రభుత్వ వైఫల్యమే ఇందుకు కారణమని ఆరోపించారు.
  
 'ఒక్క చిట్ ఫండ్ వ్యాపారం తప్ప రాష్ట్రంలోని మిగతా పరిశ్రమలన్నీ కుదేలయ్యాయి. చిట్ ఫండ్ వ్యాపారం మాత్రమే మూడుపువ్వులు ఆరు కాయలుగా వర్ధిల్లుతున్నది' అంటూ శారద చిట్ ఫండ్ కుంభకోణాన్ని పరోక్షంగా ప్రస్తావిస్తూ దీదీపై విమర్శలు గుప్పించారు. ఈ ఏడాది నవంబర్ లో పశ్చిమ బెంగాల్ అసెంబ్లీకి ఎన్నికలు జరగనున్ననేపథ్యంలో ఆ రాష్ట్రంలో పాగావేసేందుకు బీజేపీ ప్రయత్నాలు చేస్తున్నది. ఎన్నికల ఏడాది మొదటినెలలోనే అమిత్ షా రాకతో అనధికారికంగా ప్రచార శంఖారావాన్ని పూరించినట్లేనని విశ్లేషకులు అంటున్నారు.


 కోల్కతా: శారద చిట్ ఫండ్ కుంభకోణంలో నిందితుడు, తృణమూల్ కాంగ్రెస్ బహిష్కృత ఎంపీ కునాల్ ఘోష్ ఆరోగ్యం  విషమించింది. కుంభకోణంపై సమగ్ర రదర్యాప్తు జరపాలని డిమాండ్ చేస్తున్న ఆయన.. గడిచిన 28 రోజులుగా జైలులోనే నిరాహార దీక్ష చేస్తున్నారు.
 
 బీపీ, షుగర్ లెవల్స్ పడిపోవడంతోపాటు శరీరంలో కీటోన్స్ స్థాయి పెగిందని, కునాల్‌ను వెంటనే ఆస్పత్రికి తరలించాలని జైలు వైద్యులు.. సిబ్బందికి సూచించినట్లు సమాచారం. చిట్ ఫండ్ స్కామ్‌లో అరెస్టయిన కునాల్ రెండేళ్లుగా కోల్కతా సెంట్రల్ జైలులో విచారణా ఖైదీగా ఉన్నారు. గతేడాది నవంబర్లో కునాల్ ఆత్మహత్యాయత్నం చేసిన సంగతి తెలిసిందే. సకాలంలో జైలు సిబ్బంది స్పందించడంతో ఆయన ప్రాణాలతో బయటపడగలిగారు.
 
 శారదా గ్రూప్‌నకు చెందిన శారదా మీడియా ద్వారా అత్యధిక లబ్ధి పొందింది బెంగాల్ సీఎం మమత బెనర్జీయేనని ఆరోపించడమే కాక, కోర్టులోనూ వాగ్మూలం ఇచ్చిన కునాల్.. 2013లో ఈ స్కాం బయటపడే నాటికి ఆ మీడియాకు సీఈవోగా ఉన్నారు. అప్పటికి పలు పత్రికలు, టీవీ చానళ్లు శారదా మీడియా చేతిలో ఉన్నాయి.  ఈ కేసులో తనను బలి పశువును చేశారని తృణమూల్ నేతలపై కునాల్ ధ్వజమెత్తారు. ప్రజల నుంచి వేలకోట్ల రూపాయల డిపాజిట్ వసూలు చేసి మోసానికి పాల్పడిందన్న అభియోగంపై శారద చిట్ ఫండ్ సంస్థపై కోల్ కతా, ఒడిశాల్లో పలు కేసులు నమోదయ్యాయి. ఈ కుంభకోణంలో పెద్ద సంఖ్యలో రాజకీయ నాయకుల హస్తం ఉన్నట్లు ఇప్పటికే రుజువులు లభించాయి.