న్యూఢిల్లీ: సోషల్‌ మీడియా, ఇతర ఆన్‌లైన్‌ వేదికల దుర్వినియోగాన్ని అడ్డుకునేందుకు కేంద్రం సమాచార, సాంకేతికత నిబంధనల్లో మార్పులు ప్రతిపాదించింది. ప్రభుత్వ సంస్థలు కోరినప్పుడల్లా పలానా సమాచారం ఎక్కడి నుంచి వచ్చిందో తెలుసుకునేందుకు సోషల్‌ మీడియా సంస్థలు సహకరించాలని పేర్కొంది. ఈ మేరకు ఐటీ నిబంధనల్లో మార్పులు చేస్తూ సోమవారం ముసాయిదా సవరణలను ప్రకటించింది. ఈ చర్య వ్యక్తిగత గోప్యతను ఉల్లంఘిస్తూ, పౌరుల జీవితాల్లోకి ప్రభుత్వం చొరబడేందుకు కారణమవుతుందని విపక్షాలు ఆరోపించాయి. ఈ సవరణలు అమల్లోకి వస్తే ప్రజలపై ప్రభుత్వం చలాయిస్తున్న పెద్దన్న అధికారాలు మరింత విస్తృతమవుతాయని, ఈ పరిస్థితి నియంత పాలనకు సమానమవుతుందని కాంగ్రెస్‌ పేర్కొంది. తాజా నిబంధనలు వ్యక్తిగత గోప్యత, భావ స్వేచ్ఛకు విఘాతం కలిగిస్తాయని నిపుణులు ఆందోళన వ్యక్తం చేశారు. ఈ సవరణలపై ప్రజలు తమ అభిప్రాయాలు తెలిపేందుకు జనవరి 15 వరకు గడువిచ్చారు. వ్యక్తిగత గోప్యతను కారణంగా చూపుతూ ప్రస్తుతం సోషల్‌ మీడియా సంస్థలు  సమాచార వనరుల్ని వెల్లడించేందుకు నిరాకరిస్తున్న సంగతి తెలిసిందే.   అలాంటి సమాచారంతో జాగ్రత్త.. ‘చట్టబద్ధ అధికారం కలిగి ఉన్న సంస్థలు కోరితే సోషల్‌ మీడియా సంస్థలు తమ ప్లాట్‌ఫాంపై ఉన్న సమాచార సృష్టికర్తలు ఎవరో తెలుసుకునేందుకు సహకరించాలి. అక్రమ, విద్వేషపూరిత సమాచారాన్ని గుర్తించి తొలగించేందుకు లేదా ప్రజలకు కనిపించకుండా చేసేందుకు ఆయా సంస్థలు టెక్నాలజీ ఆధారిత వ్యవస్థల్ని ఏర్పాటుచేసుకోవాలి’ అని ముసాయిదా సవరణల్లో పేర్కొన్నారు. కొన్ని ముఖ్యాంశా>లు..అమర్యాద, దైవదూషణ కలిగించే, అభ్యంతరకర సమాచారాన్ని అప్‌లోడ్, హోస్టింగ్, షేరింగ్‌ చేయొద్దని సోషల్‌ మీడియా సంస్థలు వినియోగదారులకు సూచించాల్సి ఉంటుంది. చట్ట వ్యతిరేక, స్వీకర్తలను తప్పుదోవ పట్టించే, జాతి భద్రతకు ముప్పుగా మారే ఎలాంటి సమాచారాన్నైనా హోస్టింగ్, షేరింగ్‌ చేయొద్దని అప్రమత్తం చేయాలి. కోర్టు ఆదేశించిన 24 గంటల్లోపు సాధ్యమైనంత త్వరగా అలాంటి సమాచారాన్ని సోషల్‌ మీడియా సంస్థలు తొలగించాలి. సైబర్‌ భద్రత, దేశ భద్రత రీత్యా దర్యాప్తు సంస్థలు కోరితే అలాంటి సమాచారాన్ని 72 గంటల్లోగా అందించాలి. ఈ కేసుల దర్యాప్తులో ప్రభుత్వ సంస్థలకు సహకరించేందుకు అవసరమైతే ఇంటర్నెట్‌ కంపెనీలు సంబంధిత రికార్డుల్ని 180 రోజులు లేదా అంత కన్నా ఎక్కువ కాలం భద్రపరచాలి. నియంత్రణ మా ఉద్దేశం కాదు.. సామాజిక మాధ్యమాల సమాచారాన్ని నియంత్రించే ఉద్దేశం తమకు లేదని, కానీ ఈ సంస్థలు తమ ప్లాట్‌ఫాంలు ఉగ్రవాదం, హింస, నేరానికి దోహదపడకుండా ఉండాలని ఐటీ మంత్రిత్వ శాఖ పేర్కొంది. ఇటీవల సంఘ విద్రోహ శక్తులు సోషల్‌ మీడియాను వినియోగించుకుని కొత్త సవాళ్లు విసిరిన సంగతిని ప్రస్తావించింది. టెక్‌ కంపెనీలు గూగుల్, ఫేస్‌బుక్, వాట్సప్, ట్విట్టర్‌లతో ఐటీ మంత్రిత్వ శాఖ అధికారులు గత వారం సమావేశమై ప్రతిపాదిత సవరణలపై చర్చలు జరిపారు. సామాజిక మాధ్యమాలు వేదికగా బూటకపు వార్తలు విస్తరించడం ఇటీవల పెద్ద సమస్యగా మారడం తెల్సిందే. వాట్సప్‌లో వ్యాపించిన పుకార్ల వల్ల దేశవ్యాప్తంగా మూకహింస చెలరేగింది. దీంతో సోషల్‌ మీడియా సంస్థల్ని చట్ట పరిధిలో జవాబుదారీని చేసేందుకు చర్యలు తీసుకుంటామని ఐటీ మంత్రి రవిశంకర్‌ ప్రకటించిన సంగతి తెలిసిందే. 

సాక్షి, బెంగళూరు: దేశీయ అతిపెద్ద క్యాబ్‌అగ్రిగేటర్‌ ఓలా వ్యూహాత్మక భారీ పెట్టుబడులకుదిగుతోంది. స్కూటర్ షేరింగ్ స్టార్ట్‌అప్‌ సంస్థ వోగోలో100 మిలియన్‌ డాలర్ల పెట్టుబడులను పెట్టింది. తద్వారా ఇప్పటికే వోగోలో పెట్టుబడిదారుగా ఓలా  బైక్‌ షేరింగ్‌ సేవల్లోకి ఎంట్రీ ఇవ్వనుంది. డెయిలీ స్కూటర్‌ రెంటల్‌ యాప్‌  వోగోలో  పెట్టుబడుల ద్వారా ఓలా కనీసం లక్ష కొత్త స్కూటర్లను కొనుగోలుకు సాయపడనుంది. వోగోలో తమ పెట్టుబడులు  దేశంలో మొట్టమొదటి స్మార్ట్ మల్టీ-మోడల్ నెట్‌వర్క్‌ అనుసంధానానికి సాయపడుతుందని ఓలా కో ఫౌండర్‌ సీఈవో భవిష్‌ అగర్వాల్‌ ఒక ప్రకటనలో తెలిపారు.  

న్యూఢిల్లీ : ప్రముఖ సామాజిక మాధ్యమం వాట్సాప్‌పై కేంద్ర ప్రభుత్వ ఒత్తిళ్లు పనిచేస్తున్నాయి. మెసేజ్‌లు, ఇమేజ్‌లు, వీడియోలు ఒకేసారి పెద్ద సంఖ్యలో షేర్‌ చేయకుండా ఐదుగురికి మాత్రమే వాటిని పంపేలా ‘వాట్సాప్‌’ నియంత్రణ చర్యలు చేపట్టింది. ఈ విధానాన్ని శుక్రవారం నుంచి ప్రయోగాత్మకంగా మొదలుపెడుతున్నట్టు ఆ సంస్థ ప్రకటించింది. ఇటీవల వాట్సాప్‌ ద్వారా వదంతులతో పాటు నకిలీ వార్తల ప్రచారం విపరీతంగా పెరిగిపోయింది. చిన్న పిల్లలను ఎత్తుకెళుతున్నారనే ‘ఫేక్‌వార్తలు’ విస్తృ తంగా ప్రచారం కావడం కేంద్ర, రాష్ట్ర ప్రభుత్వానికి పెద్ద తలనొప్పిగానే మారింది. ఈ నకిలీ వార్తలు పలు రాష్ట్రాల్లో మూకోన్మాదానికి దారి తీసింది. వీటి కారణంగా ఈ ఏడాదిలో 31 మంది అమాయకులు ప్రాణాలు కోల్పోవాల్సి వచ్చింది. జవాబుదారీతనం పెంచడంతో పాటు, చట్టాలను మరింత మెరుగ్గా అమలు చేసేందుకు వీలుగా కట్టుదిట్టమైన చర్యలు తీసుకోవాల్సిందిగా కేంద్రం వాట్సాప్‌ సంస్థకు గురువారం రెండో లేఖ పంపింది. ప్రజలను రెచ్చగొట్టే పుకార్ల నియంత్రణకు వెంటనే చర్యలు తీసుకోవాల్సిందిగా ఆ సంస్థకు కేంద్ర ఎలక్ట్రానిక్, ఐటీ శాఖ ఈ నెల మొదట్లో హెచ్చరికలు జారీ చేసిన సంగతి తెలిసిందే. ఈ నేపథ్యంలోనే ఒకేసారి ఐదుగురికే మెసేజ్‌లు, ఇమేజ్‌లు, వీడియోలు పంపేలా వాట్సాప్‌ కీలక మార్పు చేసింది. ఎండ్‌ టు ఎండ్‌ ఎన్‌క్రిప్ట్‌గా కొనసాగుతున్న వాట్సాప్‌ ద్వారా భద్రతా, గోప్యతాను కాపాడేందుకు పూర్తిస్థాయిలో కట్టుబడి ఉన్నట్టు పేర్కొంది. రాబోయే రోజుల్లో ఇలాంటి మరిన్ని ఫీచర్లతో ఈ యాప్‌ను మరింత మెరుగుపరచనున్నట్టు ప్రకటించింది. కుటుంబ సభ్యులు, మిత్రులతో సులభమైన పద్ధతుల్లో సంభా షించేందుకు వీలుగా వాట్సాప్‌ను ఓ ప్రైవేట్‌ మెసేజింగ్‌ యాప్‌గా రూపొందించినట్టు స్పష్టం చేసింది. దీనిలో భాగంగా కొన్నేళ్ల క్రితం ఒకేసారి లెక్కకు మించి చాట్‌లకు మెసేజ్‌లు ఫార్వర్డ్‌ చేసేందుకు వీలు కల్పించే ఫీచర్‌ జత చేసినట్టు తెలిపింది. ఇప్పుడు ఈ పద్ధతికి స్వస్తి పలికి వాట్సాప్‌ యూజర్లందరికీ వర్తించేలా ఒకసారి ఐదుగురికి మాత్రమే మెసేజ్‌ ఫార్వర్డ్‌ చేసే విధానాన్ని శుక్రవారం నుంచి ప్రయోగాత్మకంగా మొదలుపెడుతున్నట్టు పేర్కొంది. తాము ప్రవేశపెడుతున్న మార్పులతో ప్రైవేట్‌ మెసేజింగ్‌ యాప్‌గా డిజైన్‌ చేసిన వాట్సాప్‌ ఉద్దేశం నేరవేరుతుందని భావిస్తున్నట్టు తెలిపింది. ప్రపంచంలోనే అత్యధికంగా ఫొటోలు, వీడియోలు, మెసేజ్‌లు ఫార్వర్డ్‌ చేస్తున్నది భారత వాట్సాప్‌ యూజర్లే. ఒకేసారి ఐదుగురికే వీటిని ఫార్వర్డ్‌ చేసేలా నియంత్రణతో పాటు ప్రస్తుతం తమ యాప్‌లో మీడియా మెసేజెస్‌కు పక్కనే ఉన్న క్విక్‌ ఫార్వర్డ్‌ బటన్‌ తొలగించనున్నట్టు ఆ సంస్థ తెలిపింది. వాట్సాప్‌ యూజర్లు సొంతంగా పంపించే(ఒరిజినల్‌) మెసేజ్‌ ఏదో, ఫార్వర్డ్‌ చేసిన మెసేజ్‌ ఏదో గుర్తించే ఫార్వర్డ్‌ లేబుల్‌ను కూడా ఈ సంస్థ ఇటీవలే ప్రారంభించింది.


 ట్యాక్సీ అగ్రిగేటర్ ఓలా హైదరాబాద్‌లోనూ షేరింగ్ సర్వీసులను ప్రారంభించింది. ఒక వాహనంలో ఒకే మార్గంలో వేర్వేరు వ్యక్తులు ప్రయాణించడమే ఈ షేరింగ్. ఒక రైడ్‌లో ముగ్గురు దాకా వెళ్లొచ్చు. కస్టమర్లు ఓలా యాప్‌లో రైడ్ నౌ ద్వారా షేరింగ్ బటన్‌ను నొక్కి వెళ్లాల్సిన ప్రాంతం పేరు టైప్ చేస్తే చాలు. ఓలా షేర్‌లో అయ్యే చార్జీని ప్రయాణానికి ముందు డ్రైవర్‌కు చెల్లించాల్సిందే. లాంచింగ్ ఆఫర్‌లో భాగంగా ప్రయాణ చార్జీల్లో 50 శాతం వరకు ఆదా చేసుకోవచ్చని కంపెనీ వెల్లడించింది.