సాక్షి, పశ్చిమగోదావరి : పోలవరం మండలం పట్టిసీమ వద్ద అపశ్రుతి చోటుచేసుకుంది. భక్తుల‌ మధ్య జరిగిన తొక్కిసలాటలో జరిగి ఒక వృద్దురాలు మృతి చెందారు. శివరాత్రి సందర్భంగా ఆదివారం అర్ధరాత్రి నుంచే వేలాది మంది పట్టిసీమ చేరుకున్నారు. అధిక సంఖ్యలో భక్తులు పోటెత్తడంతో అధికారులు వారిని నియంత్రించలేకపోయారు. ఈ క్రమంలో రద్దీ ఎక్కువ కావడంతో క్యూలైన్లోనే ఎక్కువసేపు నిల్చోవాల్సిన పరిస్థితి ఏర్పడింది. ఓవైపు ఎండ.. మరోవైపు సరైన వసతులు లేకపోవడంతో భక్తులు ఆగ్రహం వ్యక్తం చేస్తున్నారు. దీంతో భక్తులను గోదావరి దాటించడానికి అధికారులు ప్రయత్నిస్తున్న క్రమంలో తొక్కిసలాట జరిగింది. ఈ ఘటనలో ఓ వృద్ధురాలు మృతి చెందగా.. పలువురు అస్వస్థతకు గురయ్యారు.   ఇదిలా ఉండగా... అంచనాలకు మించి ఈరోజు మధ్యాహ్నం సమయానికి సుమారు డెబ్భై వేల మంది భక్తులు చేరుకోవడంతో పట్టిసీమ వద్ద గోదావరిపై రవాణా అస్తవ్యస్తంగా మారింది. దీంతో రద్దీని అదుపు చేయలేక అధికారులు నానాతంటాలు పడుతున్నారు. రద్దీ ఎక్కువ కావడం సహా గోదావరిలో నీటి మట్టం తగ్గిపోవడంతో పడవలు నెమ్మదిగా వెళ్లాల్సి వస్తోంది. అదేవిధంగా అధికారులు సరైన ఏర్పాట్లు చేయకపోవడంతో గంటల తరబడి క్యూలైన్లలో నిలబడటం, ఎండ తీవ్రత ఎక్కువగా ఉండటంతో భక్తులు తీవ్ర ఇబ్బందులు ఎదుర్కొంటున్నారు. ఈ క్రమంలో సుమారు 50 నుంచి 60 మంది భక్తులు స్పృహ కోల్పోయారు. వెంటనే అక్కడికి చేరుకున్న వైద్య ఆరోగ్య శాఖా సిబ్బంది వైద్యం అందించడంతో అపాయం తప్పింది. రద్దీకి తగ్గట్లుగా భక్తులకు సౌకర్యాలను అమర్చడంలో అధికారులు విఫలమయ్యారని పలువురు ఆగ్రహం వ్యక్తం చేస్తున్నారు. పరిస్థితిని అదుపు చేయడంలో రెవెన్యూ, పోలీసు, అధికార యంత్రాంగాలు విఫమయ్యాయని మండిపడుతున్నారు. సాయంత్రం నుంచి రాత్రికి పట్టిసీమకు వచ్చే భక్తుల సంఖ్య మరొక లక్ష దాటుతుందని, అప్పుడు పరిణామాలు ఎలా ఉంటాయోనని ఆందోళన వ్యక్తం చేస్తున్నారు.


 విశాఖ: మహా శివరాత్రిని పురస్కరించుకుని విశాఖ జిల్లాలోని ఆర్కే బీచ్లో సోమవారం టీఎస్ఆర్ సేవ పీఠం ఆధ్వర్యంలో శివరాత్రి వేడుకలను ఘనంగా నిర్వహించారు. ఈ వేడుకల్లో మంత్రి గంట శ్రీనివాసరావు, పెందుర్తి శారదాపీఠాధిపతి స్వరూపనానేంద్ర సరస్వతి, సినీ ప్రముఖులు కృష్ణంరాజు, సుమన్, రాజశేఖర్, జీవిత, పరుచూరి గోపాల కృష్ణ, సాలూరు వాసురాం బృందం పాల్గొన్నారు.
 
 ఈ సందర్భంగా సంగీత, సాహిత్య రంగాల్లో సేవలందించిన కళాకారులు, రచయితలు 10 మందిని శివ శక్తి అవార్డులతో టీఎస్ఆర్ సేవా పీఠం సత్కరించింది. ఇందులో నటుడు కృష్ణంరాజుకు విశ్వ విఖ్యాత నట వీర బిరుదుతో టీఎస్ఆర్ సేవా పీఠం ఘనంగా సత్కరించింది.


 చిత్తూరు(సదుం) : శివరాత్రి ఉత్సవాల సందర్భంగా డప్పు కొట్టేందుకు వెళ్లిన వ్యక్తిని ట్రాక్టర్ ఢీకొట్టడంతో మృతి చెందాడు. వివరాలు చిత్తూరు జిల్లా సదుం మండలకేంద్రంలో బుధవారం తెల్లవారుజామున జరిగిన శివరాత్రి ఉత్సవాల్లో భాగంగా డప్పు కొట్టేందుకు వెళ్లిన ఈశ్వర్య(50)ను ట్రాక్టర్ ఢీకొట్టడంతో అక్కడికక్కడే మృతి చెందాడు. సంఘటనా స్థలానికి చేరుకున్న పోలీసులు కేసు నమోదు చేసి దర్యాప్తు చేస్తున్నారు. కాగా, మృతుడికి భార్య, కుమారుడు ఉన్నాడు.