హైదరాబాద్, బిజినెస్ బ్యూరో : ఐటీ ఇంజినీరింగ్ సేవల సంస్థ సైయంట్ .. సిల్వర్ జూబిలీ వేడుకల సందర్భంగా ప్రత్యేక డివిడెండు ప్రకటించింది. రూ. 5 ముఖవిలువ గల షేరు ఒక్కింటిపై రూ. 2.50 (50 శాతం) అందించనున్నట్లు వివరించింది. ప్రత్యేక డివిడెండు రూపంలో మొత్తం రూ. 34 కోట్లు చెల్లించనున్నట్లు సైయంట్ పేర్కొంది. ప్రత్యేక డివిడెండుకు రికార్డు తేది సెప్టెంబర్ 9 కాగా, చెల్లింపు తేది సెప్టెంబర్ 16. మరోవైపు, ఉద్యోగులకు రిస్ట్రిక్టెడ్ స్టాక్ యూనిట్స్ (ఆర్‌ఎస్‌యూ) పథకం కింద షేర్లను కేటాయించనున్నట్లు, ఆర్థికంగా దీని ప్రభావం రూ. 34 కోట్ల మేర ఉండనున్నట్లు సంస్థ తెలిపింది.


 న్యూఢిల్లీ: భారీగా నగదు నిల్వలున్న ప్రభుత్వ రంగ అన్‌లిస్టెడ్ సంస్థలు.. ఇకపై కేంద్రానికి ప్రత్యేక డివిడెండ్‌ను చెల్లించాల్సి రానుంది. లేదా ప్రభుత్వ షేర్లను బైబ్యాక్ అయినా చేయాల్సి ఉంటుంది. ఈ ప్రక్రియంతటినీ పెట్టుబడులు, ప్రభుత్వ ఆస్తుల నిర్వహణ విభాగం (దీపం) కింద కొత్తగా పేరు మారిన డిజిన్వెస్ట్‌మెంట్ విభాగం పర్యవేక్షించనుంది. పరిశ్రమల సమాఖ్య ఫిక్కీ నిర్వహించిన కార్యక్రమంలో పాల్గొన్న సందర్భంగా కేంద్ర ఆర్థిక వ్యవహారాల కార్యదర్శి శక్తికాంత దాస్ ఈ విషయాలు తెలిపారు. పుష్కలంగా నిధులు ఉన్న ప్రభుత్వ రంగ సంస్థలు (పీఎస్‌యూ) .. విస్తరణ ప్రణాళికలేమీ లేకపోతే ఆ నిధులను డివిడెండుగా చెల్లించేందుకో లేదా ప్రభుత్వ వాటాలను కొనుగోలు చేయడానికో వెచ్చించాలని దాస్ సూచించారు. మార్కెట్ విలువను రాబట్టేలా లిస్టింగ్‌కు అర్హమైన పీఎస్‌యూలను ఎంపిక చేసే బాధ్యతను దీపంనకు అప్పగించనున్నట్లు ఆయన వివరించారు.