పామూరు: ‘అయ్యా భోజనం తిని వెళ్లయ్యా’ అని కోరిన తల్లి మాటలే చివరివయ్యాయి. మళ్లీ వస్తానంటూ వెళ్లిన విద్యార్థి శాశ్వతంగా కన్ను మూశాడు. ఈత కోసం వెళ్లిన బీటెక్‌ విద్యార్థి క్వారీ నీటిలో పడి మృతి చెందిన ఘటన శనివారం కోడిగుంపల సమీపంలోని ఓ క్వారీలో చోటుచేసుకుంది. వేమూరి మదన్‌ (20)విజయవాడ లయోలా ఇంజినీరింగ్‌ కళాశాలలో బీటెక్‌ ప్రథమ సంవత్సరం చదువుతున్నాడు. రెండు రోజుల క్రితం స్వగ్రామం కోడిగుంపల వచ్చాడు. శనివారం స్నేహితులతో కలిసి ఈత నేర్చుకునేందుకు క్వారీలోకి దిగాడు. నీటిలోకి జారిపోతుండగా స్నేహితులు అతనిని రక్షించేందుకు యత్నించి విఫలమయ్యారు. వెంటనే గ్రామంలోకి వెళ్లి చెప్పి గ్రామస్తులను క్వారీ వద్దకు తీసుకువచ్చి మదన్‌ను బయటకు తీయగా అప్పటికే మృతి చెంది ఉన్నాడు. మృతదేహాన్ని కోడిగుంపల గ్రామం తరలించారు. తల్లి వేమూరి కళావతి కన్నీరు మున్నీరుగా విలపిస్తోంది. అన్నంతినమని తల్లి కోరగా.. ఈతకు పోతున్నానని కాసేపట్లో వచ్చి తింటానని చెప్పి వెళ్లాడు. కానీ కుమారుడికి భోజనంపెట్టి తాను తినేందుకు ఎదురు చూస్తున్న కళావతి.. ఒక్కసారిగా మరణవార్త విని కుప్పకూలిపోయింది. గ్రామంలో విషాదఛాయలు వేమూరి అయ్యన్న, కళావతిల ఏకై క కుమారుడు మదన్‌ మరణంతో కోడిగుంపల గ్రామంలో విషాదఛాయలు అలముకున్నాయి. కష్టపడి వ్యవసాయం, బట్టల వ్యాపారం చేసుకుని జీవిస్తూ కుమారుడిని చదివిస్తున్న వారు గ్రామంలో అందరికి తలలో నాలుకలా ఉంటూ జీవనం సాగిస్తున్నారు. వేసవి సెలవులకు వచ్చి, అప్పటిదాకా అందరితో కలిసి ఉండి అంతలో ఈత సరదాతో మృత్యువాత పడటంతో స్నేహితులు జీర్ణించుకోలేక పోతున్నారు. కాగా తరచూ ప్రమాదలు జరుగుతున్నా క్వారీల యజమానులు తగిన జాగ్రత్తలు తీసుకోకపోవడం బాధాకరం.


 ఆముదాలపల్లిలో యువకుడి మృతి
  
 నిజాంపట్నం: స్నేహితులతో సరదాగా ఈతకు వెళ్ళి యువకుడు చెరువులో గల్లంతైన సంఘటన నిజాంపట్నం మండలంలోని ఆముదాలపల్లిలోయ  చోటు చేసుకుంది. ఆముదాలపల్లికి చెందిన పిల్లిబోయిన  గోపి(23)  హైదరాబాద్‌లో కానిస్టేబుల్‌ పరీక్షలకు కోచింగ్‌ తీసుకుంటూ దీపావళి పండుగకు ఇంటికి వచ్చాడు.  ఇద్దరు స్నేహితులు మరకా ఏడుకొండలు, అశోక్‌కుమార్‌లతో కలసి చెరువులో స్నానం చేసేందుకు గురువారం వెళ్ళాడు. స్నేహితులిరువురు ఈతకు చెరువులోకి వెళ్ళగా గోపి స్నానం చేసేందుకు కొంత లోతుకు వెళ్ళాడు. ఆ ప్రాంతంలో భారీ గొయ్యి ఉండటంతో ఒక్కసారిగా గోపి మునిగిపోయాడు. స్నేహితులు గమనించి అతనిని రక్షించేందుకు ప్రయత్నించినప్పటికి కనిపించలేదు.   గ్రామస్తులు చెరువులో గాలించగా  మృతదేహం  సాయంత్రం  లభ్యమైంది.