‘‘ఈ రోజుల్లో ఓ 3 నిమిషాలు తెలుగులో మాట్లాడాలంటేనే చాలా కష్టమవుతోంది. మరి ఈ చిత్రంలో కథానాయకుడు, నాయికల మధ్య తెలుగులో మాట్లాడాలనే ప్రేమపరీక్ష ఎలా ఉంటుందో చూడాలి. ఈ పాటలో తెలుగులోని పద్యం, సామెత, ఛందస్సు, అలంకారాల గురించి రచయిత చాలా చక్కగా వివరించారు’’ అని రచయిత పరుచూరి గోపాలకృష్ణ అన్నారు. మహేంద్ర, లావణ్య, సమ్మెట గాంధీ, భవానీ శంకర్, సాకేత్‌ మాధవి, బేబి కీర్తన నటించిన చిత్రం ‘ఒక తెలుగు ప్రేమకథ’. సంతోష్‌ కృష్ణ దర్శకత్వంలో కిషోరి బసిరెడ్డి నిర్మించిన ఈ చిత్రంలో తెలుగుదనంపై వచ్చే పాటని హైదరాబాద్‌లో విడుదల చేశారు. దర్శక–నిర్మాత తమ్మారెడ్డి భరద్వాజ మాట్లాడుతూ– ‘‘తెలుగు భాష అమరం.. అజరామరం.. ఇప్పుడున్న రోజుల్లో పూర్తి స్థాయి తెలుగులో మాట్లాడటమంటే చాలా కష్టం. అదే ఇతివృత్తంతో ఈ చిత్రం రూపొందించడం అభినందనీయం’’ అన్నారు. ‘‘అందరూ తెలుగులోనే మాట్లాడాలి.. లేదంటే మన తెలుగు భాష మరుగున పడిపోతుంది’ అని దర్శకుడు చెప్పిన సందేశం నచ్చి ఈ చిత్రాన్ని నిర్మించా’’ అన్నారు కిషోరి బసిరెడ్డి. ‘‘ఉడుకు మనసు గల ఇద్దరి మధ్య గిల్లిగజ్జాలాటే ఈ సినిమా’’ అన్నారు సంతోష్‌ కృష్ణ. ఈ చిత్రానికి సంగీతం: మహత్‌ నారాయణ్, కెమెరా: దేవేందర్‌ రెడ్డి. 


 సాక్షి, సిటీబ్యూరో : దాసరి పుట్టిన రోజు సందర్భంగా లఘు చిత్రాల పోటీని నిర్వహిస్తున్నామని దాసరి కల్చరల్ కమిటీ అధ్యక్షుడు తమ్మారెడ్డి భరద్వాజ్ చెప్పారు. మే 4న డా. దాసరి నారాయణరావు పుట్టిన రోజు సందర్భంగా జరిపే కార్యక్రమాల వివరాలను సోమవారం హైదరాబాద్‌లో జరిపిన విలేకరుల సమావేశంలో ఆయన వెల్లడించారు.
 
 అనంతరం దాసరి కల్చరల్ కమిటీ కన్వీనర్ రేలంగి నరసింహారావు మాట్లాడుతూ ‘సామాజిక బాధ్యత కథాంశాలతో తీసిన 5 నుంచి 25 నిమిషాల నిడివిగల చిత్రాలను పోటీకి ఆహ్వానిస్తున్నాం. ఏడాది లోపు తీసిన చిత్రాలు మాత్రమే ఈ పోటీలోకి తీసుకుంటాం. అవి సోషల్ నెట్‌వర్క్‌లో ప్రదర్శించిన చిత్రాలైనా పర్లేదు. ఈనెల 26వ తేదీలోపు లఘుచిత్రాలను డీవీడీ రూపంలో చరిత్ర ఆఫీసు, ప్లాట్ నెం.183, గ్రీన్‌బావర్చీ హోటల్ వెనుక, కమలాపురికాలనీ, హైదరాబాద్-73 చిరుమానాలో అందజేయాలి.
 
 మే 4న హైదరాబాద్‌లో జరిగే దాసరి జన్మదిన వేడుకలో విజేతలకు ప్రథమ, ద్వితీయ, తృతీయ బహుమతులతో పాటు రెండు ప్రోత్సాహక బహుమతులు కూడా అందిస్తాం’ అని తెలిపారు. కార్యక్రమంలో జర్నలిస్ట్ ప్రభు, లఘుచిత్ర దర్శకుడు కత్తి మహేశ్ కూడా మాట్లాడారు.