TV
Thomas Cup badminton tournament
-
క్వార్టర్‌ ఫైనల్లో భారత్..
చెంగ్డూ (చైనా): డిఫెండింగ్‌ చాంపియన్‌ భారత పురుషుల జట్టు థామస్ కప్ బ్యాడ్మింటన్ టీమ్ టోర్నీలో క్వార్టర్‌ ఫైనల్లోకి దూసుకెళ్లింది. గ్రూప్ ‘సి’లో సోమవారం జరిగిన రెండో లీగ్ మ్యాచ్‌లో భారత్ 5–0తో ఇంగ్లండ్‌ను చిత్తుగా ఓడించింది. తొలి మ్యాచ్‌లో ప్రణయ్ 21–15, 21–15తో హ్యారీ హంగ్‌పై గెలిచి భారత్‌కు 1–0తో శుభారంభం ఇచ్చాడు.రెండో మ్యాచ్‌లో సాత్విక్ సాయిరాజ్–చిరాగ్‌ శెట్టి జోడీ 21–17, 19–21, 21–15తో బెన్‌ లేన్‌–సీన్‌ వెండీ జంటపై గెలిచి ఆధిక్యాన్ని 2–0కు పెంచింది. మూడో మ్యాచ్‌లో ప్రపంచ మాజీ నంబర్వన్, ఆంధ్రప్రదేశ్‌ ప్లేయర్‌ కిడాంబి శ్రీకాంత్ 21–16, 21–11తో నదీమ్‌ డాలి్వపై నెగ్గడంతో భారత్ 3–0తో విజయాన్ని ఖరారు చేసుకుంది.నాలుగో మ్యాచ్‌లో అర్జున్–ధ్రువ్‌ కపిల జంట 21–17, 21–19తో రోరీ ఈస్టన్‌–అలెక్స్‌ గ్రీన్‌ ద్వయంపై గెలిచింది. చివరిదైన ఐదో మ్యాచ్‌లో కిరణ్‌ జార్జ్‌ 21–18, 21–12తో చోలన్‌ కేయాన్‌ను ఓడించడంతో భారత్ 5–0తో క్లీన్‌స్వీప్‌ చేసింది. గ్రూప్ తొలి మ్యాచ్‌లో భారత్ 4–1తో థాయ్‌లాండ్‌పై గెలుపొందింది. రేపు జరిగే చివరి లీగ్ మ్యాచ్‌లో భారత్ 14 సార్లు చాంపియన్‌ ఇండోనేసియాతో తలపడుతుంది. ఈ మ్యాచ్‌లో నెగ్గిన జట్టు గ్రూప్ టాపర్‌గా నిలుస్తుంది.ఇవి చదవండి: కెరీర్‌ బెస్ట్‌ రెండో ర్యాంక్‌లో.. జ్యోతి సురేఖ -
మీరంతా దేశం గర్వపడేలా చేశారు: ప్రధాని మోదీ
న్యూఢిల్లీ: థామస్ కప్ గెలిచి చరిత్ర సృష్టించిన భారత బ్యాడ్మింటన్ జట్టును ప్రధాని నరేంద్ర మోదీ స్వయంగా కలిసి అభినందించారు. కప్ గెలిచిన అనంతరం స్వదేశానికి తిరిగి వచ్చిన బాడ్మింటన్‌ టీంతో ప్రత్యేకంగా సమావేశమైన ప్రధాని వారిపై ప్రశంసలు కురిపించారు. అంతర్జాతీయ గడ్డపై త్రివర్ణ పతాకాన్ని రెపరెపలాడించి దేశాన్ని గర్వపడేలా చేశారంటూ కితాబిచ్చారు. దాదాపు గంటకు పైగా జరిగిన ఈ ముఖాముఖీలో ప్రధాని ఆటగాళ్లందరితో సరదాగా మాట్లాడారు. సింగిల్స్, డబుల్స్‌ లో అద్భుతంగా రాణించిన భారత్ ఫైనల్లో డిపెండింగ్‌ ఛాంపియన్ ఇండోనేషియాపై 3-0తో గ్రాండ్‌ విక్టరీ సాధించింది. 73 ఏళ్ల థామస్ కప్ చరిత్రలో తొలిసారి కప్ అందుకుంది. థామస్ కప్ గెలిచి చరిత్ర సృష్టించిన భారత బ్యాడ్మింటన్ జట్టుకు భారత ప్రభుత్వం కోటి రూపాయల బహుమతి ప్రకటించింది. కేంద్ర క్రీడాశాఖ మంత్రి అనురాగ్ ఠాకూర్ భారత జట్టుకు కోటి రూపాయల నగదు బహుమతి నజరానాగా ప్రకటించన సంగతి తెలిసిందే. Interacted with our badminton champions, who shared their experiences from the Thomas Cup and Uber Cup. The players talked about different aspects of their game, life beyond badminton and more. India is proud of their accomplishments. https://t.co/sz1FrRTub8 — Narendra Modi (@narendramodi) May 22, 2022 -
తెలుగు తేజానికి ఆనంద్‌ మహీంద్రా ప్రశంసలు
దేశ బ్యాడ్మింటన్ చరిత్ర తిరగ రాస్తూ భారత జట్టు థామస్ కప్‌ని గెలుచుకుంది. క్రీడా ప్రముఖులతో పాటు రాజకీయ నేతలు, పారిశ్రామికవేత్తలు భారత జట్టును ప్రశంసల్లో ముంచెత్తుతున్నారు. అయితే గెలిచిన జట్టులో ఓ సభ్యుడైన తెలుగు తేజం కిదాంబి శ్రీకాంత్ చేసిన ఓ వ్యాఖ్య ఇండస్ట్రియలిస్ట్‌ ఆనంద్‌ మహీంద్రాను అమితంగా ఆకట్టుకుంది. కిదాంబి శ్రీకాంత్ చెప్పిన విషయం ఆటలకే కాదు వ్యాపార రంగానికి ఆ మాటకు వస్తే నిత్య జీవితంలో కూడా పాటించాల్సిన ఎంతో ముఖ్యమైన విషయం అంటూ కొనియాడారు. థామస్ గెలుపును ఆస్వాదిస్తూ కిదాంబి శ్రీకాంత్ ఓ ట్వీట్‌ చేశారు. అందులో ఆయన ఈ టోర్నమెంట్‌లో మేమంతా ఒక టీంగా ఎంతో బాగా ఆడామని, ఆ అనుభవం విభిన్నమైనదని తెలిపారు. కప్ గెలుచుకోవడం అనేది పైపూత మాత్రమేనని. నిజానికి ఓ టీమ్‌గా కచ్చితంగా ఆడటమే అసలైన విజయమంటూ తెలిపారు. అనేక మంది వ్యక్తులతో ముడిపడి ఉండే బిజినెస్‌లో టీంస్పిరిట్‌ అనేది ఎంతో ముఖ్యమైన విషయం. ఇదే విషయాన్ని ఆనంద్‌ మహీంద్రా ఎ‍న్నోసార్లు చెప్పారు కూడా. లాభాలు అనేవి బోనస్‌ మాత్రమేనని అసలైన విజయం లక్ష్యాన్ని చేరుకోవడంలో ఓక టీంగా మనం ఎలా పని చేశానమనేది ముఖ్యమని గతంలో మహీంద్రా చెప్పారు. అదే రకమైన అభిప్రాయాన్ని కిదాంబి శ్రీకాంత్ సైతం వ్యక్తం చేశాడు. And here’s a good addition to #mondaythoughts He says the Thomas Cup title was simply ‘Icing on the cake.’ It was the Team Experience that was the real prize! Brilliant. Let’s remember that; in Business and in all of Life.. pic.twitter.com/wN3FtLiVhz — anand mahindra (@anandmahindra) May 16, 2022 చదవండి: మహీంద్రా రైజ్‌.. ఆటోమొబైల్‌ సెక్టార్‌లో తొలిసారిగా.. -
చరిత్రాత్మక విజయం
చరిత్రాత్మక ఘట్టం. చిరస్మరణీయ సందర్భం. భారత బ్యాడ్మింటన్‌లో సువర్ణాక్షర లిఖిత విజయం. ఇలాంటి విశేషణాలు ఎన్ని వాడినా తక్కువే. ప్రపంచ టీమ్ బ్యాడ్మింటన్ ఛాంపియన్‌షిప్‌గా పేరున్న ప్రతిష్ఠాత్మక థామస్ కప్‌లో ఆదివారం భారత పురుషుల జట్టు సాధించిన గెలుపు అలాంటిది మరి. 73 ఏళ్ళ థామస్ కప్, ఉబర్‌ కప్‌ల చరిత్రలో భారత్‌కు తొలిసారి దక్కిన విజయం ఇది. అందులోనూ 14 పర్యాయాలు విజేతగా నిలిచిన ఇండొనేషియా జట్టును 3–0 తేడాతో ఓడించడం అనూహ్యం. ఈ విజయానికి దేశమంతటా అపూర్వ స్పందన లభిస్తున్నదంటే కారణం అదే. ఈ విజయం సాధించిపెట్టినవారిలో షట్లర్లు కిడాంబి శ్రీకాంత్, సాత్విక్ సాయిరాజ్, కృష్ణప్రసాద్, విష్ణువర్ధన్‌ గౌడ్, కోచ్‌ పుల్లెల గోపీచంద్ వంటి తెలుగు తేజాలు ఉండడం మరింత గర్వకారణం. ఇప్పటి దాకా కేవలం ప్రాతినిధ్యానికే తప్ప పతకానికి నోచుకోని పురుషుల టీమ్ టోర్నమెంట్‌ థామస్ కప్‌లో భారత విజయం ఇప్పుడిక కొన్ని తరాల పాటు చెప్పుకొనే కథ. క్వార్టర్‌ ఫైనల్, సెమీ ఫైనల్‌లలో మన విజయాలు గాలివాటువేమో అన్న అనుమానాలను పటాపంచలు చేస్తూ, ఫైనల్లో మన ఆటగాళ్ళు 3 వరుస విజయాలతో మునుపటి ఛాంపియన్ ఇండొనేషియాను ఓడించి, దేశానికి బంగారు పతకం తెచ్చారు. 43 ఏళ్ళ క్రితం ప్రకాశ్‌ పదుకోనే, సయ్యద్‌ మోదీ లాంటి దిగ్గజాలతో కూడిన భారత షట్లర్ల జట్టు సెమీస్‌ దాకా వెళ్ళి, డెన్మార్క్‌ చేతిలో ఓడింది. ఈసారి సెమీఫైనల్లో అదే డెన్మార్క్‌పై గెలిచి ఫైనల్‌కు చేరడం గమ్మల్తైన కాకతాళీయం. యువ షట్లర్ లక్ష్యసేన్‌ మొదటి సింగిల్స్‌లో తొలి గేమ్‌ ఓడినా, పుంజుకొని వరల్డ్‌ నంబర్‌ 5 ఆటగాణ్ణి మట్టికరిపించారు. డబుల్స్‌లో సాయిరాజ్, చిరాక్‌ షెట్టి సైతం మొదటి గేమ్‌ ఓడినా, తరువాత రెండు గేమ్‌లలో సత్తా చాటి, గెలుపు అందించారు. కీలకమైన రెండో సింగిల్స్‌లో మన తెలుగు బిడ్డ శ్రీకాంత్ ఆచితూచి ఆడారు. ఆసియా క్రీడోత్సవాల విజేత జొనాథన్‌ క్రిస్టీని ఓడించి, సువర్ణాధ్యాయం లిఖించారు. 1975లో హాకీ వరల్డ్‌ కప్... 1983లో క్రికెట్‌ వరల్డ్‌ కప్... ఈ 2022లో ప్రపంచ బ్యాడ్మింటన్ కప్ లాంటి థామస్ కప్... మూడు వేర్వేరు ఆటలు... మూడు వేర్వేరు సందర్భాలు... మూడింటా సమష్టి కృషితో భారత జట్లే విజేతలు. బ్యాంకాక్‌లోని ఇంప్యాక్‌ ఎరీనాలో భారత త్రివర్ణ పతాకం రెపరెపలాడిన ఈ ఘట్టాన్ని – 39 ఏళ్ళ క్రితం 1983 క్రికెట్‌ వరల్డ్‌ కప్‌లో కపిల్‌ సేన సాధించిన విజయంతో ఇప్పుడు అందరూ పోలుస్తున్నారు. ఇంకా చెప్పాలంటే, 73 ఏళ్ళ చరిత్రను తిరగరాసిన తాజా గెలుపు, 1983 నాటి విజయం కన్నా మించినదని గోపీచంద్ లాంటి వారు అభిప్రాయపడుతున్నారు. ఆ వరల్డ్‌ కప్ క్రికెట్‌లోనూ, ఇప్పుడీ థామస్ కప్ బ్యాడ్మింటన్‌లోనూ భారత జట్టుపై ఎవరికీ ఎలాంటి అంచనాలూ లేవు. రెండు సందర్భాల్లోనూ భారత జట్టు విజేతగా నిలుస్తుందన్న ఊహా లేదు. కానీ, ఇంగ్లండ్‌లో ఆనాటి భారత క్రికెటర్లు, ఇప్పుడు బ్యాంకాక్‌లో మన బ్యాడ్మింటన్ క్రీడాకారులు కలసికట్టుగా ఆడితే, అసాధ్యం కూడా సుసాధ్యమేనని నిరూపించారు. బ్యాడ్మింటన్ ప్రధానంగా వ్యక్తిగత ప్రతిభాపాటవాలకు గీటురాయిగా నిలిచే క్రీడ. వ్యక్తిగత ప్రతిభతో ఆ రంగంలో పతకాలు సాధించడం గొప్పే. కానీ, సమష్టి కృషితో ఒక టీమ్ ఈవెంట్‌లో విజయం సాధించడం మరీ గొప్ప. థామస్ కప్ ప్రాథమికంగా టీమ్ ఈవెంట్‌ గనక జట్టులోని ప్రతి సభ్యుడూ టోర్నమెంట్‌ పొడుగూతా విజయ ప్రదర్శనలే ఇవ్వాల్సి ఉంటుంది. పైగా, టీమ్ ఈవెంట్లలో మన డబుల్స్‌ జోడీలు ఆట్టే రాణించకపోవడం భారత షటిల్‌ బ్యాడ్మింటన్‌ను చిరకాలంగా వేధిస్తున్న సమస్య. దాన్ని అధిగమించి, అపూర్వమైన ఆట తీరుతో దక్కిన ఈ థామస్ కప్ ప్రత్యేకమైనదని కోచ్‌ గోపీచంద్ భావిస్తున్నది అందుకే! ఈ అపూర్వ విజయాన్ని ఏ ఒక్కరి ఖాతాలోనో పూర్తిగా వేసెయ్యలేం. భారత బ్యాడ్మింటన్‌లో వ్యక్తిగత ప్రతిభతో పాటు కలసికట్టుగా ఆడే ఓ బృంద స్ఫూర్తి వికసిస్తోందనడానికి ఈ విజయం ఓ తార్కాణం. బంగారు భవితకు బలమైన పునాది. గతంలో వరల్డ్‌ ఛాంపియన్ షిప్, ఒలింపిక్‌ పతకాలు, ఇప్పుడు థామస్ కప్ – ఇవన్నీ బ్యాడ్మింటన్‌లో భారత్ అంచెలంచెల శిఖరారోహణకు సాక్ష్యాలు. ఇండొనేషియా, మలేసియా లాంటి బలమైన జట్లను థామస్ కప్‌లో ఓడించి, స్వర్ణాన్ని సాధించడం రాకెట్‌ వేగంతో మారుతున్న మన షటిల్‌ క్రీడా ముఖచిత్రానికి ప్రతీక. ‘కుbŒ∙భీ హో... జీత్‌నా హై’ అనే లక్ష్యంతో, ఆత్మవిశ్వాసంతో సాగితే ఏదీ అసాధ్యం కాదని షట్లర్లు నిరూపించారు. పదిమంది జట్టూ ప్రత్యేక వాట్సప్‌ గ్రూప్‌లో నిర్మొహమాటంగా భావావేశాలు పంచుకుంటూ సాగిన వైనం మరో విజయసూత్రం. 1980లో ప్రకాశ్‌ పదుకోనే, 2001లో పుల్లెల గోపీచంద్, 2010లో సైనా నెహ్వాల్, ఆ పైన పీవీ సింధు... ఇలా ఎప్పటికప్పుడు బ్యాడ్మింటన్ తారలు ఉద్భవిస్తూనే ఉన్నారు. అయితే, గ్రామాల నుంచి ఆకలితో వచ్చిన ఆటగాళ్ళతో ప్రస్తుత భారత బ్యాడ్మింటన్ జట్టు మునుపెన్నడూ లేనంత పటిష్ఠంగా కనిపిస్తోంది. ఇది ఒక శుభపరిణామం. పారుపల్లి కాశ్యప్, సాయి ప్రణీత్‌ లాంటి ఆటగాళ్ళ తర్వాత కిడాంబి శ్రీకాంత్ లాంటి వాళ్ళ అడుగుజాడల్లో లక్ష్యసేన్‌ లాంటి యువ షట్లర్లు తయారవుతుండడం భవితపై మరిన్ని ఆశలు రేపుతోంది. ఈ కొత్త తరాన్ని తయారు చేయడంలో గోపీచంద్, ఆయన అకాడెమీ లాంటివి నిరంతరం చేస్తున్న కృషి గణనీయం. జూలైలో కామన్వెల్త్, ఆగస్టులో వరల్డ్‌ ఛాంపియన్‌షిప్‌ – ఇలా మరెన్నో ప్రపంచ శ్రేణి పోటీలు రానున్న వేళ తాజా విజయం మన షట్లర్లకు పెద్ద ఉత్ప్రేరకం. ఆటకూ, ఆశకూ ఇప్పుడిక ఆకాశమే హద్దు. -
థామస్ కప్ విజయంపై పుల్లెల గోపీచంద్ ఆసక్తికర వ్యాఖ్యలు
థామస్ కప్ 2022లో స్వర్ణ పతకం సాధించి చరిత్ర సృష్టించిన భారత పురుషుల బ్యాడ్మింటన్ బృందంపై సర్వత్రా ప్రశంసలు వెల్లువెత్తుతున్నాయి. ప్రధాని నరేంద్ర మోదీ నుంచి సామాన్య పౌరుల దాకా అందరూ టీమిండియాకు శుభాకాంక్షలు తెలుపుతూ అభినందిస్తున్నారు. టీమిండియా సాధించిన అపురూప విజయంపై చీఫ్‌ కోచ్‌ పుల్లెల గోపీచంద్ స్పందిస్తూ.. బ్యాడ్మింటన్‌కు ఈ విజయం 1983 క్రికెట్‌ వరల్డ్‌కప్‌ విజయం కంటే గొప్పదని ఆసక్తికర వ్యాఖ్యలు చేశాడు. అప్పట్లో ఏమాత్రం అంచనాలు లేకుండా వరల్డ్‌కప్‌ బరిలోకి దిగిన కపిల్‌ డెవిల్స్‌.. ప్రపంచ ఛాంపియన్ వెస్టిండీస్‌ను మట్టికరిపించి విశ్వవిజేతగా నిలిస్తే.. తాజాగా కిదాంబి శ్రీకాంత్ నేతృత్వంలోని టీమిండియా సైతం 14సార్లు ఛాంపియన్ అయిన ఇండోనేషియాను 3-0తో చిత్తు చేసి బ్యాడ్మింటన్‌లో 73 ఏళ్ల భారత కలను సాకారం చేసిందని అన్నాడు. 1983 వరల్డ్‌కప్‌ గెలిచాక భారత క్రికెట్‌ రూపురేఖలు ఎలా మారిపోయాయో.. థామస్ కప్ గెలుపుతో భారత బ్యాడ్మింటన్‌కు కూడా శుభ ఘడియలు మొదలయ్యాయని తెలిపాడు. థామస్ కప్ విజయం ఇచ్చిన స్పూర్తితో భారత షట్లర్లు మున్ముందు మరిన్ని సంచనాలు నమోదు చేస్తారని ఆశాభావం వ్యక్తం చేశాడు. భారత బృందానికి నాయకత్వం వహించిన కిదాంబి శ్రీకాంత్‌ను గోపీచంద్ ప్రత్యేకంగా అభినందించాడు. చదవండి: Thomas Cup 2022: షటిల్‌ కింగ్స్‌ -
Thomas Cup 2022: ఆకాశాన మన ‘స్మాష్‌’...
కిడాంబి శ్రీకాంత్ అలా గాల్లోకి ఎగిరాడు... తనదైన శైలిలో ఒక క్రాస్‌కోర్ట్‌ స్మాష్‌ను సంధించాడు... ప్రత్యర్థి క్రిస్టీ వద్ద దానికి జవాబు లేకపోయింది... అంతే! శ్రీకాంత్ వెనుదిరిగి రాకెట్‌ విసిరేయగా, భారత ఆటగాళ్లంతా ఒక్కసారిగా ప్రవాహంలా కోర్టులోకి దూసుకొచ్చారు... కనీసం ప్రత్యర్థికి మర్యాదపూర్వకంగా శ్రీకాంత్ ఒక షేక్‌ హ్యాండ్‌ అన్నా ఇవ్వమంటూ రిఫరీ చెబుతున్నా పట్టించుకునే పరిస్థితి లేకుండా మన షట్లర్ల సంబరాలతో స్టేడియం హోరెత్తింది... శ్రీకాంత్ వరల్డ్‌ చాంపియన్‌షిప్‌లో రజతం గెలిచాడు... ఆరు సూపర్‌ సిరీస్‌ టైటిల్స్‌ కూడా సాధించాడు... వరల్డ్‌ నంబర్‌వన్‌గా కూడా నిలిచాడు. లక్ష్య సేన్‌ 20 ఏళ్లకే వరల్డ్‌ చాంపియన్‌షిప్‌లో కాంస్యం గెలవడంతోపాటు మూడు బీడబ్ల్యూఎఫ్‌ టూర్‌ టైటిల్స్‌ అందుకున్నాడు... హెచ్‌ఎస్‌ ప్రణయ్ ఖాతాలోనూ బీడబ్ల్యూఎఫ్‌ టైటిల్‌ ఉండగా, ఆసియా చాంపియన్‌షిప్‌లో అతను రన్నరప్‌... డబుల్స్‌లోనూ సాత్విక్ సాయిరాజ్–చిరాగ్‌ శెట్టి జోడీ ఇటీవల సంచలనాలు సృష్టిస్తోంది. విడివిడిగా చూస్తే వీరంతా వేర్వేరు అంతర్జాతీయ వేదికలపై ఎన్నో ఘనతలు సాధించారు... అంతకుముందు తరంలో ప్రకాశ్‌ పడుకోన్, పుల్లెల గోపీచంద్ కూడా భారత బ్యాడ్మింటన్ స్థాయిని పెంచే ఆటను ప్రదర్శించారు. కానీ జట్టుగా, కలిసికట్టుగా, సమష్టిగా చూస్తే మాత్రం భారత్ ఖాతాలో భారీ విజయం లోటు ఇన్నేళ్లుగా ఉండిపోయింది. ఇన్నాళ్లకు ఆ కల నిజమైంది. ఈ చిరస్మరణీయ ఘట్టం ఒక రోజులోనో, ఒక ఏడాదిలోనే ఆవిష్కృతమైంది కాదు... గత కొన్నేళ్లుగా ఒక్కో మెట్టు ఎక్కుతూ శిఖరానికి చేరిన ప్రస్థానమిది. సాక్షి క్రీడా విభాగం భారత జట్టు థామస్ కప్ కోసం వెళ్లినప్పుడు జట్టుపై ఎలాంటి అంచనాలు లేవు... గాయాల నుంచి ఇపుడిపుడే కోలుకుంటున్న ఆటగాళ్లతో పాటు అన్ని విభాగాల్లో బలమైన ఆటగాళ్లు ఉన్న ప్రత్యర్థులను దాటి మన జట్టు ముందంజ వేయడం కష్టమనిపించింది. ఎవరి నుంచైనా ఏదైనా అద్భుత ప్రదర్శన వచ్చినా ఇతర మ్యాచ్‌లూ వరుసగా గెలిస్తే తప్ప జట్టుకు విజయం దక్కదు. అయితే ఎలాంటి ఆశలు లేకుండా పోవడమే టీమ్‌కు మేలు చేసింది. తమను ఎవరూ నమ్మని సమయంలో ఆటగాళ్లే తమను తాము నమ్మారు... వారికి కోచ్‌లు అండగా నిలిచి స్ఫూర్తిని నింపారు. జట్టు ప్రకటించిన తర్వాత టోర్నీ ఆరంభానికి ముందు భారత బృందం ‘వి విల్‌ బ్రింగ్‌ ఇట్‌ హోమ్‌’ పేరుతో ఒక వాట్సాప్‌ గ్రూప్‌ను తయారు చేసుకుంది. చాంపియన్‌గా నిలిచే వరకు ఇందులో ప్రతీ క్షణం స్ఫూర్తి నింపే సందేశాలే. చివరకు మన షట్లర్లు చిరస్మరణీయ విజయంతో తామేంటో చూపించారు. సెమీస్‌ చేరడంతోనే కనీసం కాంస్యం ఖాయం చేసుకొని మన టీమ్ టోర్నీలో తొలి పతకంతో కొత్త చరిత్ర సృష్టించింది. కానీ ఆ జోరు తుది లక్ష్యాన్ని అందుకునే వరకు ఆగలేదు. అందరూ అదరగొట్టగా... బ్యాడ్మింటన్‌కు ప్రపంచకప్‌లాంటి థామస్ కప్‌లో భారత్‌కు విజయం అందించినవారిని చూస్తే ఒక్కరి ఖాతాలోనూ ఒలింపిక్‌ పతకం లేదు! కానీ ఈ మెగా టోర్నీకి వచ్చేసరికి అందరూ తమ అత్యుత్తమ ప్రదర్శనను చూపించారు. అజేయ ఆటతో శ్రీకాంత్ ఎవరికీ అందనంత ఎత్తులో నిలిచాడు. లీగ్ దశలో భారత్ ఒక మ్యాచ్‌ ఓడినా శ్రీకాంత్ మాత్రం ఒక్కసారి కూడా నిరాశపర్చలేదు. ఇక క్వార్టర్స్, సెమీస్‌లలో ప్రణయ్ ఆట గురించి ఎంత చెప్పినా తక్కువే. ఈ రెండు సందర్భాల్లోనూ జట్టు 2–2తో సమంగా నిలిచిన స్థితిలో చివరి మ్యాచ్‌లో బరిలోకి దిగే ఆటగాడిపై అపారమైన ఒత్తిడి ఉంటుంది. కానీ ప్రణయ్ ఎంతో పట్టుదలగా నిలబడ్డాడు. తన గాయాన్ని కూడా లెక్క చేయకుండా ఆడి జట్టును గెలిపించాడు. అదృష్టవశాత్తూ ఫైనల్లో అతను ఆడాల్సిన అవసరమే రాలేదు. రెండు నాకౌట్‌ మ్యాచ్‌లలో నిరాశపర్చిన లక్ష్య సేన్‌ అసలు సమరంలో సత్తా చాటాడు. ఫైనల్లో అతడు తన స్థాయిని ప్రదర్శించడం భారత్ అవకాశాలు పెంచింది. ఇక విశ్వసనీయమైన జోడీగా గుర్తింపు తెచ్చుకున్న సాత్విక్–చిరాగ్‌ ఆ నమ్మకాన్ని వమ్ము చేయలేదు. సరిగ్గా చెప్పాలంటే థామస్ కప్‌లాంటి ఈవెంట్లలో బలహీన డబుల్స్‌ కారణంగానే ఇన్నేళ్లుగా వెనుకబడుతూ వచ్చిన భారత్‌కు ఈ ద్వయం కారణంగా ముందంజ వేసే అవకాశం దక్కింది. ఇంతింతై వటుడింతై... థామస్ కప్‌లో భారత్ గెలవడమే కాదు, గెలిచిన తీరుకు కూడా జేజేలు పలకాల్సిందే. ఈ రోజు మన ఘనతను చూసి సాధారణ అభిమానులు ఎంతో సంతోషిస్తూ ఉండవచ్చు. కానీ ఇన్నేళ్లుగా ఆటను దగ్గరి నుంచి చూసిన వారికి ఈ విజయం విలువేమిటో మరింత బాగా కనిపిస్తుంది. పుల్లెల గోపీచంద్ 2001లో ఆల్‌ ఇంగ్లండ్‌ టైటిల్‌ గెలిచిన తర్వాత కూడా షటిల్‌ పరిస్థితులు గొప్పగా ఏమీ లేవు. కానీ గోపీచంద్ కోచ్‌గా మారిన తర్వాత షటిల్‌ క్రీడకు ప్రత్యేక గుర్తింపు దక్కింది. సరిగ్గా చెప్పాలంటే 2008 బీజింగ్‌ ఒలింపిక్స్‌లో సైనా నెహ్వాల్ క్వార్టర్‌ ఫైనల్ చేరిన తర్వాత ఆటపై ఆసక్తి పెరిగింది. ఆ తర్వాత సైనా సాధించిన వరుస విజయాలు ఈ క్రీడ స్థాయిని పెంచాయి. 2012 లండన్‌ ఒలింపిక్స్‌లో కాంస్య పతకంతో సైనా మెరవడంతో బ్యాడ్మింటన్ కూడా ఆదరణ పొందుతున్న క్రీడల్లో ఒకటిగా మారింది. అయితే 2016 రియో ఒలింపిక్స్‌లో సింధు సాధించిన రజతం ఈ క్రీడ స్థాయిని ఎక్కడికో తీసుకెళ్లింది. సాధారణ క్రీడాభిమానులు కూడా బ్యాడ్మింటన్‌ను అనుసరించసాగారు. ప్రపంచంలో ఏ మూల టోర్నీ జరిగినా వాటి ఫలితాలపై ఆసక్తి చూపించారు. ఇక ఆయా దేశాల్లో ఉండే ఎన్‌ఆర్‌ఐలు టోర్నీ వేదికలకు వెళ్లి మరీ మన షట్లర్లను ప్రోత్సహించసాగారు. పలువురు ప్రముఖులు ట్వీట్ల ద్వారా బ్యాడ్మింటన్ ఫలితాలను చర్చిస్తుండటంతో సంబంధం లేనివారి దృష్టి కూడా ఆటపై పడింది. కొన్నేళ్ల క్రితం వరకు మన షట్లర్లు మెయిన్‌ ‘డ్రా’లోకి అడుగుపెట్టడం, టాప్‌–100 ర్యాంకుల్లో ఉండటం కలగానే అనిపించేది. కానీ ఇప్పుడు ఎంతో మంది నేరుగా పెద్ద టోర్నీల్లో తలపడుతున్నారు. ఈ పురోగతి అంతా నేటి థామస్ కప్ విజయం వరకు తీసుకెళ్లిందంటే అతశయోక్తి కాదు. -
భళా.. కిడాంబి
గుంటూరు వెస్ట్‌ (క్రీడలు): ప్రతిష్టాత్మక థామస్ కప్ విజయాన్ని భారత జట్టు గెలుపొందడం, అందులో గుంటూరుకు చెందిన షట్లర్ కిడాంబి శ్రీకాంత్ కీలక పాత్ర పోషించడంతో ఆదివారం క్రీడాభిమానులు, సహచరులు, కోచ్‌లు ఉద్వేగానికి లోనయ్యారు. శభాష్‌ శ్రీకాంత్.. అంటూ ప్రశంసలు కురిపించారు. 2018లో ప్రపంచ నంబర్‌ వన్‌ స్థానం పొందిన తర్వాత అనేక విజయాలు నమోదు చేసినా, భారత చిరకాల వాంఛ అయిన థామస్ కప్ గెలవడం పట్ల సర్వత్రా హర్షం వ్యక్తం అవుతోంది. థామస్ కప్ ఫైనల్ మ్యాచ్‌లో శ్రీకాంత్ తనదైన శైలిలో ప్రత్యర్థి ఇండోనేషియా ఆటగాడు, ఏషియన్‌ గేమ్స్‌ గోల్డ్‌ మెడలిస్ట్‌ జోనాటన్‌ క్రిస్టీని 21–15, 23–21 స్ట్రెయిట్‌ సెట్స్‌లో మట్టికరిపించి తెలుగోడి సత్తా చాటాడు. గుంటూరులో ఉన్న శ్రీకాంత్ తండ్రి కృష్ణను షటిల్‌ బ్యాడ్మింటన్ అసోసియేషన్‌ సభ్యులు సంపత్‌ కుమార్, డి.శ్రీనివాసరావులు ఘనంగా సత్కరించి తమ అభిమానాన్ని చాటుకున్నారు. గుంటూరులోనే ఓనమాలు ఏడేళ్ల వయసులో శ్రీకాంత్ స్థానిక ఎన్టీఆర్‌ స్టేడియంలో వేసవి శిక్షణకు సరదాగా వచ్చాడు. అప్పుడే అతనిలోని వేగాన్ని గుర్తించిన శిక్షకులు, సీనియర్‌ ఆటగాళ్లు తల్లిదండ్రులు కృష్ణ, రాధలకు మరింత ఉత్తమ శిక్షణ ఇప్పించాలని సలహా ఇవ్వడంతో హైదరాబాద్‌కు మకాం మార్చారు. అయినప్పటికీ శ్రీకాంత్ తల్లిదండ్రులు గుంటూరుతో సంబంధాలు కొనసాగిస్తూనే ఉన్నారు. అడపాదడపా శ్రీకాంత్ గుంటూరుకు రావడం, పాత మిత్రులను కలవడం జరుగుతోంది. ఈ దేశం గర్విస్తోంది.. థామస్ కప్‌లో నా కుమారుడు శ్రీకాంత్ విజయాన్ని దేశం సాధించిన విజయంగా నేను భావిస్తున్నాను. చిన్నప్పటి నుంచి ఎంతో క్రమశిక్షణతో సాధన చేశాడు. దీని కోసం ఎన్నో సరదాలను త్యాగం చేయాల్సి వచ్చింది. ఇప్పటికీ విశ్రమించకుండా సాధన చేస్తునే ఉంటాడు. శ్రీకాంత్‌ను చూసి మరింత మంది ఔత్సాహిక క్రీడాకారులు ముందుకు రావాలని ఆకాంక్షిస్తున్నాను. – కిడాంబి కృష్ణ, శ్రీకాంత్ తండ్రి అద్భుత వేగం అతని సొంతం ఎన్టీఆర్‌ స్టేడియంలో తొలి నాళ్లలో శ్రీకాంత్ సాధన చేయడం చూశాను. అద్భుత వేగం అతని సొంతం. తోటి పిల్లలతో సరదాగా ఉండడంతో పాటు, ఆట సమయంలో వేరే ధ్యాస లేకుండా దృష్టి సారించే వాడు. విజయం సాధించాలంటే ఏమి చేయాలో అతనికి బాగా తెలుసు. అందుకోసం చేసేదంతా క్రమశిక్షణతో చేసేవాడు. ఈ రోజు ఎవరికీ అందనంత ఎత్తుకు ఎదిగాడు. క్వార్టర్‌ ఫైనల్స్‌ నుంచి మ్యాచ్‌లు గమనిస్తే భారత బృందం కొత్త దూకుడు విధానాన్ని అనుసరించింది. ప్రత్యర్థులు ఇది తెలుసుకునే లోపే విజయం భారత్ సొంతమయ్యింది. – షేక్‌ అన్వర్‌ బాషా, షటిల్‌ కోచ్‌ ఇదొక చరిత్రే భారత జట్టులోని ఐదుగురిలో నలుగురు తెలుగువారు. అందులో మన గుంటూరు షట్లర్ శ్రీకాంత్ ఉండడం ఎంతో సంతోషంగా ఉంది. అటువంటి క్రీడాకారుడ్ని పొందిన రాష్ట్రం, దేశం గర్వపడుతోంది. మా ముందు ఓనమాలు నేర్చుకున్న పిల్లాడు ఈ రోజు ప్రపంచం మెచ్చే ప్లేయర్‌గా గుర్తింపు పొందడం పట్ల అసోసియేషన్‌ సభ్యులు, క్రీడాభిమానులం గర్వంగా ఫీల్‌ అవుతున్నాం. – సంపత్‌ కుమార్, షటిల్‌ బ్యాడ్మింటన్ అసోసియేషన్‌ రాష్ట్ర కోశాధికారి -
శభాష్‌ సాత్విక్
సాక్షి, అమలాపురం: కోనసీమ జిల్లా కేంద్రమైన అమలాపురానికి చెందిన రంకిరెడ్డి సాత్విక్ సాయిరాజ్ ప్రతిష్టాత్మక థామస్ కప్‌ను గెలుచుకున్న భారత జట్టులో సభ్యుడు కావడం పట్ల ఈ ప్రాంతంలో హర్షాతిరేకాలు వ్యక్తమవుతున్నాయి. డబుల్స్‌లో సాత్విక్.. చిరాగ్‌ శెట్టితో కలిసి ఆడాడు. గతంలో కామన్వెల్త్ క్రీడల్లో భారత జట్టు తరఫున బంగారు, రజత పతకాలు సాధించాడు. ఒలింపిక్స్‌లో పతకం త్రుటిలో చేజారింది. అయినా వెరవకుండా పలు అంతర్జాతీయ పోటీల్లో సత్తా చాటుతున్నాడు. సాత్విక్ విజయం పట్ల అమలాపురంలో పలువురు కేక్‌ కట్‌ చేసి బాణాసంచా కాల్చారు. సాత్విక్ ఎదుగుదల వెనుక అతడి తండ్రి రంకిరెడ్డి కాశీ విశ్వనాథ్‌ పాత్ర కీలకం. కాశీ విశ్వనాథ్‌ పాఠశాలలో పీడీగా పని చేస్తూ హెచ్‌ఎంగా పదోన్నతి పొందాక రిటైరయ్యారు. పైగా షటిల్‌ బ్యాడ్మింటన్ క్రీడాకారుడు. ఇదే క్రీడలో స్టేట్‌ రిఫరీగా పని చేశారు. ఆయనకు ఇద్దరు కుమారులు. ఇద్దరూ అమలాపురం ఆఫీసర్స్‌ క్లబ్‌ స్టేడియంలో షటిల్‌ బ్యాడ్మింటన్‌లో శిక్షణ పొందారు. చిన్నవాడైన సాత్విక్ క్రీడను సీరియస్‌గా తీసుకుని రాణించాడు. 2015 నుంచి హైదరాబాద్‌లోని పుల్లెల గోపీచంద్ అకాడమీలో శిక్షణ పొందుతున్నాడు. మ్యాచ్‌ గెలుస్తానని అనుకోలేదు తొలి సెట్‌లో ఓడిపోయాం. రెండో సెట్‌లో 20–17 తేడాతో వెనుకబడ్డాం. ఆ సమయంలో ప్రత్యర్థులు చేసిన చిన్న తప్పిదం మాకు అనుకూలంగా మారింది. ఆ సెట్‌ గెలిచాం. అదే ఊపులో మూడో సెట్‌ కూడా గెలిచాం. నాన్న, అమ్మ ఆ సమయంలో తిరుపతిలో ఉన్నారు. స్వామి కరుణించారు. అందుకే కలలో కూడా ఊహించని విజయాన్ని సొంతం చేసుకున్నాం. చాలా సంతోషంగా ఉంది. నేను గెలిచాననే ఆనందం కన్నా భారత జట్టు విజయం సాధించడం రెట్టింపు సంతోషాన్నిస్తోంది. – సాత్విక్ చిన్నప్పటి నుంచీ ఆటపై మక్కువ సాత్విక్ నాలుగో సంవత్సరం నుంచే నాతో పాటు స్టేడియానికి వచ్చేవాడు. స్థానిక క్లబ్‌లో శిక్షణ శిబిరాలు నిర్వహించడం, నాతో పాటు అక్కడకు రావడం వల్ల సాత్విక్‌కు ఆటపై మక్కువ పెరిగింది. జిల్లా స్థాయిలో తొలిసారి అండర్‌–9కు ఎంపికయ్యాడు. అక్కడి నుంచి ఆరంభమైన కెరీర్‌ అంతర్జాతీయ స్థాయి వరకూ వెళ్లడం మాకు చాలా సంతోషాన్నిస్తోంది. మంచి క్రీడాకారుడవుతాడని ఆశించాను కానీ ఈ స్థాయిని ఊహించలేదు. థామస్ కప్ గెలవడం సాత్విక్ కెరీర్‌లో గొప్ప విజయంగా నిలిచిపోతుంది. మొదట్లో సాత్విక్‌తో కలిసి ఆడిన కృష్ణప్రసాద్ కూడా ఇప్పుడు గెలిచిన జట్టులో ఉండడం చాలా సంతోషాన్నిస్తోంది. – రంకిరెడ్డి కాశీవిశ్వనాథ్, సాత్విక్ తండ్రి ఆ మ్యాచ్‌ చూడలేదు సాత్విక్ ఆడిన ఫైనల్ మ్యాచ్‌ మేము చూడలేదు. ఆ సమయంలో మేమిద్దరం (సాత్విక్ తల్లిదండ్రులు) తిరుమలలో స్వామి వారి కల్యాణంలో ఉన్నాము. బయటకు రాగానే విషయం తెలిసింది. ఈ విజయం ఊహించలేదు. సాత్విక్ ఇంతటి ఘన విజయం సాధించడం పట్ల తల్లిదండ్రులుగా చాలా ఆనందంగా ఉంది. దీనిని మాటల్లో వర్ణించలేం. భారత జట్టుకు అభినందనలు. కోచ్‌లకు, క్రీడాభిమానులకు కృతజ్ఞతలు. – రంకిరెడ్డి రంగమణి, సాత్విక్ తల్లి దటీజ్‌ కృష్ణప్రసాద్ థామస్ కప్ గెలిచిన షటిల్‌ బాడ్మింటన్‌ బృందంలో మరో ఆటగాడు కాకినాడకు చెందిన గరగ కృష్ణప్రసాద్ తండ్రి గంగాధర్‌ ప్రోద్బలంతో షటిల్‌ బ్యాడ్మింటన్‌లో ప్రవేశించాడు. గంగాధర్‌ గత డిసెంబర్‌లో అనారోగ్యంతో మృతి చెందారు. తన కొడుకును అంతర్జాతీయ క్రీడాకారునిగా తీర్చిదిద్దేందుకు ఆయన అహర్నిశలూ కృషి చేశారు. గంగాధర్‌ సైతం షటిల్‌ బ్యాడ్మింటన్ క్రీడాకారుడు. గతంలో ఆంధ్రా యూనివర్సిటీ బ్యాడ్మింటన్ జట్టు కెప్టెన్‌గా ఉన్నారు. క్రికెట్‌లో సైతం రాణించారు. తండ్రి గంగాధర్‌తో కృష్ణప్రసాద్ తండ్రి బాటలోనే కొడుకు కృష్ణప్రసాద్ కూడా షటిల్‌ బ్యాడ్మింటన్‌లో రాణించడం విశేషం. కృష్ణప్రసాద్‌కు మొదటి నుంచీ పట్టుదల ఎక్కువ. సాత్విక్‌తో కలిసి పలు టోర్నీలు ఆడిన కృష్ణప్రసాద్ 2011లో గోపీచంద్ అకాడమీలో చేరాడు. తొలుత సింగిల్స్ ఆడిన కృష్ణప్రసాద్ 2015 నుంచి డబుల్స్‌పై దృష్టి పెట్టాడు. మూడేళ్లలోనే జూనియర్‌ డబుల్స్‌ విభాగం ర్యాంకింగ్స్‌లో రెండో స్థానానికి ఎదిగాడు. 2019లో దక్షిణాసియా బ్యాడ్మింటన్ పోటీల్లో స్వర్ణ పతకం కైవసం చేసుకున్నాడు. తాజా విజయం పట్ల దటీజ్‌ కృష్ణప్రసాద్.. అంటూ ఈ ప్రాంత షటిల్‌ క్రీడాకారులు కొనియాడుతున్నారు. అందరికీ గర్వకారణం థామస్ కప్ సాధించిన భారత బ్యాడ్మింటన్ బృందంలో తెలంగాణకు చెందిన విష్ణువర్ధన్‌ గౌడ్ కూడా ఉన్నాడు. ఈ చరిత్రాత్మక గెలుపుపై ‘సాక్షి’ విష్ణువర్ధన్‌ గౌడ్ తల్లిదండ్రుల స్పందన కోరగా వారు తమ బిడ్డ గెలుపు పట్ల సంతోషం వ్యక్తం చేశారు. సుదీర్ఘ విరామం తర్వాత భారత బ్యాడ్మింటన్ టీమ్ సాధించిన గెలుపు భారతీయులందరికీ గర్వకారణమన్నారు. గర్వంగా ఉంది చాలా ఆనందంగా ఉంది. మాది క్రీడా కుంటుంబం. ఓ క్రీడాకారుడిగా నా కుమారుడు ప్రపంచ కప్ గెలిచిన టీంలో ఉండడం గర్వంగా ఉంది. 73 ఏళ్ల తర్వాత ఈ క్రీడలో భారత్‌కు కప్ రావడం అందులో నా కుమారుడు ఉండడం అదృష్టం. – విష్ణువర్ధన్‌గౌడ్‌ తండ్రి వెంకటేశ్‌గౌడ్‌ సంతోషంగా ఉంది నా కుమారుడు అంతర్జాతీయ స్థాయిలో ఆడి భారత దేశానికి కప్ తీసుకురావడం సంతోషంగా ఉంది. ఎంతో పట్టుదలతో శిక్షణ పొందాడు. కుటుంబమంతా అన్ని విధాలా అండగా అన్ని వేళలా ప్రోత్సహించాం. దానికి తగ్గ ఫలితం వచ్చింది. – విష్ణువర్ధన్‌గౌడ్‌ తల్లి సుహాసిని -
థామస్ కప్ గెలిచిన భారత బృందానికి సీఎం వైఎస్‌ జగన్‌ శుభాకాంక్షలు
థామస్ కప్ గెలిచి చరిత్ర సృష్టించిన భారత పురుషుల బ్యాడ్మింటన్ బృందానికి ఏపీ సీఎం వైఎస్‌ జగన్‌మోహన్‌ రెడ్డి శుభాకాంక్షలు తెలిపారు. భారత బ్యాడ్మింటన్‌లో ఇదో చారిత్రక ఘట్టం అని అభివర్ణించారు. బ్యాడ్మింటన్‌లో 73 ఏళ్ల భారత కలను సాకారం చేసినందుకు గాను కిదాంబి శ్రీకాంత్ అండ్‌ టీమ్‌ను అభినందించారు. ఫైనల్లో జరిగిన కీలక మ్యాచ్‌లో అద్భుత విజయం సాధించిన శ్రీకాంత్‌ను సీఎం జగన్‌ ప్రత్యేకంగా ప్రశంసించారు. ఈ మేరకు ట్విటర్‌ ద్వారా తన సందేశాన్నిపంపారు. A historic moment for Indian Badminton as India brings home its first #ThomasCup! Congratulations to Srikanth Kidambi and team India for their spectacular win in the finals and their remarkable journey up to the last shot. — YS Jagan Mohan Reddy (@ysjagan) May 15, 2022 కాగా, పురుషుల బ్యాడ్మింటన్‌లో భారత షట్లర్లు సరికొత్త అధ్యాయాన్ని లిఖించారు. 73 ఏళ్ల థామస్ కప్ చరిత్రలో భారత బ్యాడ్మింటన్ జట్టు తొలిసారి స్వర్ణ పతకాన్ని ముద్దాడింది. టోర్నీ ఆసాంతం అద్భుత విజయాలు సాధిస్తూ వచ్చిన భారత బృందం.. ఆదివారం జరిగిన ఫైనల్లో 14 సార్లు ఛాంపియన్ అయిన ఇండోనేసియాను 3-0 తేడాతో మట్టికరిపించి థామస్ కప్ 2022 స్వర్ణాన్ని చేజిక్కించుకుంది. తొలి సింగిల్స్‌లో లక్ష్య సేన్‌.. ఆంథోని జింటింగ్‌ను 21-8, 21-17, 21-16 తేడాతో ఓడించగా.. తరువాతి మ్యాచ్‌లో సాత్విక్ సాయిరాజ్ రాంకి రెడ్డి-చిరాగ్‌ శెట్టి ద్వయం.. 18-21, 23-21, 21-19 తేడాతో మహ్మద్‌ ఎహసాన్‌, కెవిన్‌ సంజయ సుకముల్జియో జోడీని ఖంగుతినిపించి భారత ఆధిక్యాన్ని 2-0కు చేర్చింది. ఇక కీలకమైన మూడో మ్యాచ్‌లో భారత స్టార్ షట్లర్ కిదాంబి శ్రీకాంత్ వీర లెవెల్లో రెచ్చిపోయి ఏషియన్‌ గేమ్స్‌ గోల్డ్‌ మెడలిస్ట్‌ జోనాటన్‌ క్రిస్టీని 21-15, 23-21 తేడాతో మట్టికరిపించి భారత బ్యాడ్మింటన్ చరిత్రలో సరికొత్త ఆధ్యాయాన్ని లిఖించాడు. చదవండి: చరిత్ర సృష్టించిన భారత షట్లర్లు.. 73 ఏళ్ల చరిత్రలో తొలిసారి..! -
థామస్ ఉబర్‌ కప్ లో చరిత్ర సృష్టించిన భారత్
-
చరిత్ర సృష్టించిన భారత షట్లర్లు.. 73 ఏళ్ల చరిత్రలో తొలిసారి..!
బ్యాంకాక్‌: పురుషుల బ్యాడ్మింటన్‌లో భారత షట్లర్లు సరికొత్త అధ్యాయాన్ని లిఖించారు. 73 ఏళ్ల థామస్ కప్ చరిత్రలో భారత బ్యాడ్మింటన్ జట్టు తొలిసారి స్వర్ణ పతకాన్ని ముద్దాడింది. టోర్నీ ఆసాంతం అద్భుత విజయాలు సాధిస్తూ వచ్చిన భారత బృందం.. ఆదివారం జరిగిన ఫైనల్లో 14 సార్లు ఛాంపియన్ అయిన ఇండోనేసియాను 3-0 తేడాతో మట్టికరిపించి థామస్ కప్ 2022 స్వర్ణాన్ని చేజిక్కించుకుంది. తొలి సింగిల్స్‌లో లక్ష్య సేన్‌.. ఆంథోని జింటింగ్‌ను 21-8, 21-17, 21-16 తేడాతో ఓడించగా.. తరువాతి మ్యాచ్‌లో సాత్విక్ సాయిరాజ్ రాంకి రెడ్డి-చిరాగ్‌ శెట్టి ద్వయం.. 18-21, 23-21, 21-19 తేడాతో మహ్మద్‌ ఎహసాన్‌, కెవిన్‌ సంజయ సుకముల్జియో జోడీని ఖంగుతినిపించి భారత ఆధిక్యాన్ని 2-0కు చేర్చింది. ఇక కీలకమైన మూడో మ్యాచ్‌లో భారత స్టార్ షట్లర్ కిదాంబి శ్రీకాంత్ వీర లెవెల్లో రెచ్చిపోయి ఏషియన్‌ గేమ్స్‌ గోల్డ్‌ మెడలిస్ట్‌ జోనాటన్‌ క్రిస్టీని 21-15, 23-21 తేడాతో మట్టికరిపించి భారత బ్యాడ్మింటన్ చరిత్రలో సరికొత్త ఆధ్యాయాన్ని లిఖించాడు. భారత బృందం ఫైనల్ చేరే క్రమంలో (నాకౌట్‌ దశలో) మలేసియా, డెన్మార్క్‌ లాంటి పటిష్టమైన జట్లను ఖంగుతినిపించిన విషయం తెలిసిందే. ఈ విజయం ఎంతో మందికి స్ఫూర్తి.. ప్రధాని మోదీ 73 ఏళ్ల కలను సాకారం చేసిన భారత పురుషుల బ్యాడ్మింటన్ బృందాన్ని భారత ప్రధాని నరేంద్ర మోదీ అభినందించారు. బ్యాడ్మింటన్ చరిత్రలో సరికొత్త ఆధ్యాయాన్ని లిఖించిన భారత షట్లర్లకు ప్రధాని శుభాకాంక్షలు తెలిపారు. భారత్‌కు స్వర్ణ పతకం ఖాయం కాగానే మోదీ ట్వీట్‌ చేశారు. The Indian badminton team has scripted history! The entire nation is elated by India winning the Thomas Cup! Congratulations to our accomplished team and best wishes to them for their future endeavours. This win will motivate so many upcoming sportspersons. — Narendra Modi (@narendramodi) May 15, 2022 "భారత బ్యాడ్మింటన్ బృందం చరిత్ర సృష్టించింది. ఈ విజయం పట్ల యావత్‌ భారతం గర్వంతో ఉప్పొంగిపోతుంది. స్వర్ణం గెలిచిన భారత బృందానికి శుభాకాంక్షలు.. వారు భవిష్యత్తులో మరిన్ని విజయాలు సాధించాలి. ఈ విజయం ఎంతో మంది భవిష్యత్తు క్రీడాకారులకు స్ఫూర్తిగా నిలుస్తుంది" అంటూ మోదీ ట్వీట్‌ ద్వారా తన సందేశాన్ని తెలియజేశారు. -
Thomas Cup 2022: కొత్త చరిత్ర సృష్టిస్తారా!
బ్యాంకాక్‌: అద్భుత ప్రదర్శనతో ఇప్పటికే ఆకట్టుకున్న భారత పురుషుల బ్యాడ్మింటన్ జట్టు తొలి సారి థామస్ కప్‌ను అందుకోవాలనే లక్ష్యంతో బరిలోకి దిగుతోంది. నేడు జరిగే ఫైనల్లో భారత బృందం 14 సార్లు చాంపియన్‌ అయిన ఇండోనేసియాతో తలపడనుంది. టోర్నీ చరిత్రలో తొలిసారి సెమీస్‌ చేరడం ద్వారా గురువారం కనీసం కాంస్యం ఖాయం చేసుకున్న మన షట్లర్లు, శుక్రవారం మరో అడుగు ముందుకేసి సెమీస్‌లో కూడా విజయం సాధించారు. నాకౌట్‌ దశలో మలేసియా, డెన్మార్క్‌లను ఓడించి భారత్ తుది పోరుకు అర్హత సాధించగా...ఇండోనేసియా జట్టు చైనా, జపాన్‌ల ను ఓడించింది. గత రికార్డుపరంగా చూస్తే ఇండోనేసియాకంటే భారత్ కాస్త బలహీనంగా కనిపిస్తున్నా... డెన్మార్క్‌తో సెమీస్‌ పోరులో మన ఆట కొత్త ఆశలు రేపుతోంది. పైగా రెండు అద్భుత విజయాలు అందించిన ప్రేరణ మన ప్లేయర్లలో ఉత్సాహం పెంచడం ఖాయం. సింగిల్స్‌లో ఇప్పటి కే శ్రీకాంత్, ప్రణయ్ తమ సత్తా చాటగా మరో సింగిల్స్ మ్యాచ్‌ మాత్రం మనకు కలిసి రావడం లేదు. ప్రపంచ చాంపియన్‌షిప్‌ కాంస్య పతక విజేత లక్ష్య సేన్‌ ఈ సారైనా చెలరేగితే జట్టు బెంగ తీరుతుంది. మూడు సింగిల్స్‌లో గెలిచే అవకాశాలు ఉంటే...రెండు డబుల్స్‌ మ్యాచ్‌లలో కనీసం ఒకటై నా గెలిచేందుకు అవకాశం ఉంటుంది. సాత్విక్ సాయిరాజ్ – చిరాగ్‌శెట్టి తమ పాత్రను సమర్థంగా పోషించగలరు. గాయంతోనే సెమీస్‌లో ఆడిన ప్రణయ్ పూర్తి స్థాయిలో కోలుకోవాల్సి ఉంది. -
Thomas Cup 2022: భళా భారత్...
బ్యాంకాక్‌లో భారత పురుషుల బ్యాడ్మింటన్ జట్టు అద్భుతాన్ని ఆవిష్కరించింది. 73 ఏళ్ల సుదీర్ఘ చరిత్రగల ప్రతిష్టాత్మక థామస్ కప్ టీమ్ టోర్నీలో భారత జట్టు తొలిసారి ఫైనల్లోకి దూసుకెళ్లింది. 2016 చాంపియన్‌ డెన్మార్క్‌తో హోరాహోరీగా సాగిన సెమీఫైనల్లో భారత్ 3–2తో గెలిచింది. ఆదివారం జరిగే ఫైనల్లో 14 సార్లు చాంపియన్‌ ఇండోనేసియాతో భారత్ అమీతుమీ తేల్చుకుంటుంది. బ్యాంకాక్‌: థామస్ కప్ బ్యాడ్మింటన్ టీమ్ టోర్నమెంట్‌లో భారత్ తమ అత్యుత్తమ ప్రదర్శన నమోదు చేసింది. 1949లో మొదలైన ఈ మెగా ఈవెంట్‌లో టీమిండియా తొలిసారి ఫైనల్లోకి అడుగు పెట్టింది. మాజీ చాంపియన్‌ డెన్మార్క్‌ జట్టుతో శుక్రవారం జరిగిన సెమీఫైనల్లో భారత్ 3–2తో విజయం సాధించింది. మరో సెమీఫైనల్లో 14 సార్లు విజేత ఇండోనేసియా 3–2తో మాజీ విజేత జపాన్‌ను ఓడించి ఆదివారం జరిగే టైటిల్‌ పోరులో భారత్‌తో తలపడేందుకు సిద్ధమైంది. సాత్విక్–చిరాగ్‌ చెలరేగి... డెన్మార్క్‌తో పోటీని భారత్ ఓటమితో మొదలుపెట్టింది. భారత నంబర్వన్, ప్రపంచ తొమ్మిదో ర్యాంకర్ లక్ష్య సేన్‌ 49 నిమిషాల్లో 13–21, 13–21తో ప్రపంచ నంబర్వన్ విక్టర్‌ అక్సెల్‌సన్‌ చేతిలో ఓడిపోయాడు. రెండో మ్యాచ్‌లో సాత్విక్ సాయిరాజ్–చిరాగ్‌ శెట్టి ద్వయం అద్భుత ఆటతీరు కనబరిచింది. 78 నిమిషాలపాటు జరిగిన మ్యాచ్‌లో సాత్విక్–చిరాగ్‌ ద్వయం 21–18, 21–23, 22–20తో కిమ్‌ ఆస్‌ట్రప్‌–మథియాస్‌ క్రిస్టియాన్సన్‌ జంటను ఓడించి స్కోరును 1–1తో సమం చేసింది. ఆంధ్రప్రదేశ్‌ ఆటగాడు సాత్విక్–మహారాష్ట్ర ప్లేయర్‌ చిరాగ్‌ శెట్టి కీలకదశలో పాయింట్లు రాబట్టి పైచేయి సాధించారు. మూడో మ్యాచ్‌లో ప్రపంచ మాజీ నంబర్వన్, ఆంధ్రప్రదేశ్‌ ఆటగాడు కిడాంబి శ్రీకాంత్ తన శక్తినంతా ధారపోసి ఆడాడు. ప్రపంచ మూడో ర్యాంకర్ ఆండెర్స్‌ ఆంటోన్సెన్‌తో జరిగిన ఈ మ్యాచ్‌లో ప్రపంచ 11వ ర్యాంకర్ శ్రీకాంత్ 80 నిమిషాల్లో 21–18, 12–21, 21–15తో గెలుపొంది భారత్‌కు 2–1 ఆధిక్యాన్ని అందించాడు. పోటీలో నిలవాలంటే కచ్చితంగా గెలవాల్సిన నాలుగో మ్యాచ్‌లో డెన్మార్క్‌ జట్టు రాణించింది. ఆండెర్స్‌ రస్‌ముసెన్‌–ఫ్రెడెరిక్‌ ద్వయం 21–14, 21–13తో పంజాల విష్ణువర్ధన్‌ గౌడ్–గారగ కృష్ణప్రసాద్ జంటను ఓడించి స్కోరును 2–2తో సమం చేసింది. ప్రణయ్ ప్రతాపం స్కోరు 2–2తో సమం కావడంతో భారత ఆశలన్నీ ఐదో మ్యాచ్‌లో బరిలోకి దిగిన హెచ్‌ఎస్‌ ప్రణయ్‌పై ఆధారపడ్డాయి. మలేసియాతో క్వార్టర్‌ ఫైనల్లో చివరి మ్యాచ్‌లో గెలిచి భారత్‌ను సెమీస్‌కు చేర్చిన ప్రణయ్ ఈసారీ తనపై పెట్టుకున్న నమ్మకాన్ని వమ్ముచేయలేదు. ప్రపంచ 13వ ర్యాంకర్ రస్‌ముస్‌ జెమ్కెతో జరిగిన మ్యాచ్‌లో 23వ ర్యాంకర్ ప్రణయ్ 73 నిమిషాల్లో 13–21, 21–9, 21–12తో గెలుపొంది భారత్‌ను తొలిసారి థామస్ కప్‌లో ఫైనల్‌కు చేర్చాడు. మ్యాచ్‌ మధ్యలో ప్రణయ్ చీలమండకు గాయమైనా ఆ బాధను ఓర్చుకుంటూ పట్టువదలకుండా పోరాడిన అతను భారత్‌కు మరో చిరస్మరణీయ విజయం కట్టబెట్టాడు. -
Thomas Cup 2022: ఎన్నాళ్లో వేచిన పతకం
సుదీర్ఘ నిరీక్షణ ముగిసింది. ప్రతిష్టాత్మక థామస్ కప్ బ్యాడ్మింటన్ టోర్నీలో భారత పురుషుల జట్టు కొత్త చరిత్ర సృష్టించింది. ఐదుసార్లు చాంపియన్‌ మలేసియా జట్టును క్వార్టర్‌ ఫైనల్లో ఓడించిన భారత్ 1979 తర్వాత ఈ మెగా ఈవెంట్‌లో మళ్లీ సెమీఫైనల్‌ చేరింది. తద్వారా 73 ఏళ్ల ఈ టోర్నీ చరిత్రలో భారత పురుషుల జట్టు తొలిసారి కనీసం కాంస్య పతకాన్ని ఖరారు చేసుకుంది. 1990 నుంచి థామస్ కప్‌లో సెమీఫైనల్లో ఓడిన రెండు జట్లకూ కాంస్య పతకాలు అందజేస్తున్నారు. అంతకుముందు మాత్రం సెమీఫైనల్లో ఓడిన రెండు జట్ల మధ్య ప్రత్యేకంగా కాంస్య పతకం కోసం మ్యాచ్‌ను నిర్వహించేవారు. బ్యాంకాక్‌: అగ్రశ్రేణి క్రీడాకారులతో బరిలోకి దిగిన భారత పురుషుల జట్టు అంచనాలకు అనుగుణంగా రాణించింది. గతంలో సాధ్యంకాని ఘనతను ఈసారి సొంతం చేసుకుంది. బ్యాడ్మింటన్‌లో ప్రతిష్టాత్మక టీమ్ ఈవెంట్‌ అయిన థామస్ కప్‌లో భారత పురుషుల జట్టు తొలిసారి పతకాన్ని ఖాయం చేసుకుంది. గురువారం జరిగిన క్వార్టర్‌ ఫైనల్లో భారత్ 3–2తో ఐదుసార్లు చాంపియన్‌ మలేసియా జట్టును ఓడించి సెమీఫైనల్‌ చేరింది. థామస్ కప్‌లో సెమీఫైనల్‌ చేరిన జట్లకు కనీసం కాంస్య పతకాలు లభిస్తాయి. నేడు జరిగే సెమీఫైనల్లో 2016 చాంపియన్‌ డెన్మార్క్‌ జట్టుతో భారత్ తలపడుతుంది. మరో సెమీఫైనల్లో ఇండోనేసియాతో జపాన్‌ ఆడుతుంది. ఇతర క్వార్టర్‌ ఫైనల్స్‌లో డెన్మార్క్‌ 3–2తో దక్షిణ కొరియాపై... జపాన్‌ 3–2తో చైనీస్‌ తైపీపై... ఇండోనేసియా 3–0తో చైనాపై విజయం సాధించాయి. గెలిపించిన ప్రణయ్ మలేసియాతో పోటీలో భారత్‌కు శుభారంభం దక్కలేదు. తొలి మ్యాచ్‌లో భారత నంబర్వన్, ప్రపంచ తొమ్మిదో ర్యాంకర్ లక్ష్య సేన్‌ 21–23, 9–21తో ప్రపంచ ఆరో ర్యాంకర్ లీ జి జియా చేతిలో ఓడిపోయాడు. అయితే రెండో మ్యాచ్‌లో సాత్విక్ సాయిరాజ్–చిరాగ్‌ శెట్టి జంట 21–19, 21–15తో గో జె ఫె– నూరుజుద్దీన్‌ జోడీని ఓడించి స్కోరును 1–1తో సమం చేసింది. ఆంధ్రప్రదేశ్‌ ప్లేయర్‌ సాత్విక్ సాయిరాజ్, మహారాష్ట్ర ఆటగాడు చిరాగ్‌ చక్కటి సమన్వయంతో ఆడుతూ మ్యాచ్‌ కొనసాగుతున్నకొద్దీ జోరు పెంచి ప్రత్యర్థి జోడీకి ఏమాత్రం అవకాశం ఇవ్వలేదు. మూడో మ్యాచ్‌లో తెలుగు తేజం కిడాంబి శ్రీకాంత్ 21–11, 21–17తో ఎన్జీ జె యోంగ్‌పై గెలిచి భారత్‌ను 2–1తో ఆధిక్యంలో నిలిపాడు. 41 నిమిషాల్లో ముగిసిన ఈ మ్యాచ్‌లో శ్రీకాంత్ తొలి గేమ్‌లో చెలరేగిపోగా... రెండో గేమ్‌లో కాస్త ప్రతిఘటన ఎదుర్కొన్నాడు. నాలుగో మ్యాచ్‌లో పంజాల విష్ణువర్ధన్‌ గౌడ్–గారగ కృష్ణప్రసాద్ జంట 19–21, 17–21తో ఆరోన్‌ చియా–తియో యె యి ద్వయం చేతిలో ఓడిపోవడంతో స్కోరు 2–2తో సమమైంది. తెలంగాణ ప్లేయర్‌ విష్ణువర్ధన్‌ గౌడ్, ఆంధ్రప్రదేశ్‌ ఆటగాడు కృష్ణప్రసాద్ పోరాటపటిమ కనబరిచినా కీలకదశలో తడబడ్డారు. నిర్ణాయక ఐదో మ్యాచ్‌లో అనుభవజ్ఞుడైన హెచ్‌ఎస్‌ ప్రణయ్ ఎలాంటి ఒత్తిడికి లోనుకాకుండా ఆడి 21–13, 21–8తో లియోంగ్‌ జున్‌ హావోపై నెగ్గడంతో భారత్ 3–2తో చిరస్మరణీయ విజయాన్ని ఖరారు చేసుకుంది. స్కోరు 20–8 వద్ద ప్రణయ్ స్మాష్‌ షాట్‌ కొట్టి చివరి పాయింట్‌ రాబట్టిన వెంటనే భారత జట్టు సభ్యులందరూ ఆనందంతో కోర్టులోకి దూసుకెళ్లి సంబరాలు చేసుకున్నారు. -
నాకౌట్‌ దశకు భారత్ అర్హత
బ్యాంకాక్‌: అగ్రశ్రేణి క్రీడాకారులతో బరిలోకి దిగిన భారత పురుషుల జట్టు థామస్ కప్ బ్యాడ్మింటన్ టీమ్ ఈవెంట్‌లో తొలి లక్ష్యాన్ని పూర్తి చేసింది. గ్రూప్ ‘సి’లో భాగంగా సోమవారం కెనడా జట్టుతో జరిగిన రెండో లీగ్ మ్యాచ్‌లో భారత్ 5–0తో ఘనవిజయం సాధించింది. వరుసగా రెండో గెలుపుతో భారత్ క్వార్టర్‌ ఫైనల్ (నాకౌట్‌ దశ)కు అర్హత పొందింది. గ్రూప్ ‘సి’లోని మరో మ్యాచ్‌లో చైనీస్‌ తైపీ 5–0తో జర్మనీని ఓడించి భారత్‌తోపాటు క్వార్టర్‌ ఫైనల్ బెర్త్‌ను ఖరారు చేసుకుంది. భారత్, చైనీస్‌ తైపీ మధ్య బుధవారం జరిగే లీగ్ మ్యాచ్‌లో గెలిచిన జట్టు గ్రూప్ టాపర్‌గా నిలుస్తుంది. కెనడాతో జరిగిన పోటీలో తొలి మ్యాచ్‌లో ప్రపంచ 11వ ర్యాంకర్ కిడాంబి శ్రీకాంత్ 20–22, 21–11, 21–15తో ప్రపంచ 29వ ర్యాంకర్ బ్రియాన్‌ యాంగ్‌ను 52 నిమిషాల్లో ఓడించి భారత్‌కు 1–0తో ఆధిక్యాన్ని అందించాడు. రెండో మ్యాచ్‌లో సాత్విక్ సాయిరాజ్–చిరాగ్‌ శెట్టి ద్వయం 21–12, 21–11తో జేసన్‌ ఆంథోనీ–కెవిన్‌ లీ జంటపై గెలిచింది. మూడో మ్యాచ్‌లో హెచ్‌ఎస్‌ ప్రణయ్ 21–15, 21–12తో సంకీర్త్‌ను ఓడించి భారత్‌కు 3–0తో ఆధిక్యాన్ని ఇవ్వడంతోపాటు విజయాన్ని ఖరారు చేశాడు. నాలుగో మ్యాచ్‌లో గారగ కృష్ణప్రసాద్–పంజాల విష్ణువర్ధన్‌ గౌడ్ జోడీ 21–15, 21–11తో డాంగ్‌ ఆడమ్‌–ని యకూరా జంటపై నెగ్గింది. చివరిదైన ఐదో మ్యాచ్‌లో ప్రియాన్షు రజావత్‌ 21–13, 20–22, 21–14తో విక్టర్‌ లాయ్‌పై గెలవడంతో భారత్ 5–0తో కెనడాను క్లీన్‌స్వీప్‌ చేసింది. ఉబెర్‌ కప్‌లో భాగంగా నేడు భారత మహిళల జట్టు తమ రెండో లీగ్ మ్యాచ్‌లో అమెరికాతో ఆడుతుంది. ఈ మ్యాచ్‌లో భారత్ గెలిస్తే క్వార్టర్‌ ఫైనల్‌కు అర్హత సాధిస్తుంది. -
19 ఏళ్ల నిరీక్షణకు తెర...
అర్హుస్‌ (డెన్మార్క్‌): థామస్ కప్ పురుషుల టీమ్ బ్యాడ్మింటన్ చాంపియన్‌షిప్‌లో 19 ఏళ్ల తర్వాత ఇండోనేసియా జట్టు మళ్లీ విజేతగా నిలిచింది. చైనా జట్టుతో ఆదివారం జరిగిన ఫైనల్లో ఇండోనేసియా 3–0తో గెలిచి 14వసారి థామస్ కప్‌ను సొంతం చేసుకుంది. చివరిసారి ఇండోనేసియా జట్టు 2002లో ఈ మెగా ఈవెంట్‌ను దక్కించుకుంది. తొలి మ్యాచ్‌లో జిన్‌టింగ్‌ 18–21, 21–14, 21–16తో లు గ్వాంగ్‌ జును ఓడించాడు. రెండో మ్యాచ్‌లో అల్ఫియాన్‌–అర్దియాంతో జోడీ 21–12, 21–19తో హిజి టింగ్‌–జౌ హావో డాంగ్‌ జంటపై గెలిచింది. మూడో మ్యాచ్‌లో జొనాథన్‌ క్రిస్టీ 21–14, 18–21, 21–14తో లి ఫి షెంగ్‌పై నెగ్గి ఇండోనేసియాకు విజయాన్ని ఖరారు చేశాడు. మరోవైపు ఉబెర్‌ కప్ మహిళల టీమ్ చాంపియన్‌íÙప్ ఫైనల్లో చైనా 3–1తో జపాన్‌ను ఓడించి 15వసారి చాంపియన్‌గా నిలిచింది. -
చైనా ముందు చేతులెత్తేశారు
బ్యాంకాక్‌: థామస్ కప్ బ్యాడ్మింటన్ ప్రపంచ టీమ్ చాంపియన్‌షిప్‌లో భారత పురుషుల జట్టు మూకుమ్మడిగా చేతులెత్తేసింది. గ్రూప్ ‘ఎ’లో మంగళవారం చైనాతో జరిగిన ఆఖరి లీగ్ మ్యాచ్‌లో భారత్ 0–5తో వైట్‌వాష్‌ అయ్యింది. తొలి పోరులో ప్రణయ్ 9–21, 9–21తో చెన్‌లాంగ్‌ చేతిలో చిత్తుగా ఓడాడు. రెండో మ్యాచ్‌లో అర్జున్–శ్లోక్‌ జంట 12–21, 15–21తో లీ చంగ్‌–జంగ్‌ నాన్‌ జోడీ చేతిలో కంగుతింది. మూడో మ్యాచ్‌లో సాయిప్రణీత్ పోరాడి ఓడాడు. షి యుకితో జరిగిన పోరులో అతను 9–21, 21–15, 12–21తో పరాజయం చవిచూశాడు. నాలుగో మ్యాచ్‌లో లీ జున్‌హుయ్‌–లీ యుచెన్‌ ద్వయం 21–15, 20–22, 21–15తో అరుణ్‌–సాన్యమ్‌ శుక్లా జంటపై గెలిచింది. చివరి సింగిల్స్‌లో లిన్‌ డాన్‌ 16–21, 21–9, 21–8తో లక్ష్యసేన్‌ను ఓడించాడు. -
భారత జట్లకు చుక్కెదురు
స్టార్ క్రీడాకారులు కిడాంబి శ్రీకాంత్, పీవీ సింధు, సిక్కి రెడ్డి, అశ్విని పొన్నప్ప, సాత్విక్ సాయిరాజ్, చిరాగ్‌ శెట్టి గైర్హాజరీ భారత బ్యాడ్మింటన్ జట్ల ప్రదర్శనపై తీవ్ర ప్రభావం చూపించింది. ప్రతిష్టాత్మక థామస్–ఉబెర్‌ కప్ చాంపియన్‌షిప్‌లో తొలి రోజు భారత పురుషుల, మహిళల జట్లకు అనూహ్య ఓటమి ఎదురైంది. తొలి లీగ్ మ్యాచ్‌లోనే ఓటమితో భారత జట్లకు నాకౌట్‌ చేరే అవకాశాలు సన్నగిల్లాయి. బ్యాంకాక్‌: కోచ్‌ల వ్యూహాత్మక తప్పిదమో... ప్రత్యర్థి జట్టును తక్కువ అంచనా వేశారో గానీ భారత పురుషుల బ్యాడ్మింటన్ జట్టు మూల్యం చెల్లించుకుంది. థామస్ కప్‌లో భాగంగా ఫ్రాన్స్‌ జట్టుతో ఆదివారం జరిగిన గ్రూప్ ‘ఎ’ తొలి లీగ్ మ్యాచ్‌లో భారత్ 1–4తో ఓడిపోయింది. సింగిల్స్‌లో అగ్రశ్రేణి షట్లర్, ప్రపంచ తొమ్మిదో ర్యాంకర్ హెచ్‌ఎస్‌ ప్రణయ్‌ను... డబుల్స్‌లో మూడుసార్లు జాతీయ చాంపియన్‌గా సుమీత్ రెడ్డి–మనూ అత్రి జంటను ఆడించకుండా విశ్రాంతి ఇవ్వడం భారత విజయావకాశాలపై ప్రభావం చూపించింది. తొలి మ్యాచ్‌లో ప్రపంచ 18వ ర్యాంకర్ సాయిప్రణీత్ 21–7, 21–18తో బ్రైస్‌ లెవెర్‌డెజ్‌ను ఓడించి భారత్‌కు 1–0 ఆధిక్యం అందించాడు. అయితే రెండో మ్యాచ్‌లో అర్జున్–శ్లోక్‌ రామచంద్రన్‌ జంట 13–21, 16–21తో బాస్టియన్‌ కెర్‌సాడీ–జూలియన్‌ మాయో జోడీ చేతిలో ఓడిపోయింది. స్కోరు 1–1తో సమమైంది. మూడో మ్యాచ్‌లో 21వ ర్యాంకర్ సమీర్‌ వర్మ 18–21, 22–20, 18–21తో ప్రపంచ 43వ ర్యాంకర్ లుకాస్‌ కోర్వీ చేతిలో ఓటమి చవిచూశాడు. దాంతో ఫ్రాన్స్‌ 2–1తో ఆధిక్యంలోకి వెళ్లింది. నాలుగో మ్యాచ్‌లో అరుణ్‌ జార్జి–సాన్యమ్‌ శుక్లా జంట 10–21, 12–21తో థోమ్‌ గికెల్‌–రోనన్‌ లాబెర్‌ ద్వయం చేతిలో ఓడిపోవడంతో ఫ్రాన్స్‌ 3–1తో విజయాన్ని ఖాయం చేసుకుంది. నామ మాత్రమైన ఐదో మ్యాచ్‌లో జూనియర్‌ మాజీ వరల్డ్‌ నంబర్వన్ లక్ష్య సేన్‌ 20–22, 21–19, 19–21తో తోమా పపోవ్‌ చేతిలో పరాజయం పాలయ్యాడు. నేడు జరిగే రెండో లీగ్ మ్యాచ్‌లో ఆస్ట్రేలియాతో భారత్ ఆడుతుంది. ఇదే గ్రూప్‌లో చైనా కూడా ఉంది. నాలుగు జట్లున్న ఈ గ్రూప్‌లో తొలి రెండు స్థానాల్లో నిలిచిన జట్లు క్వార్టర్‌ ఫైనల్‌కు చేరుకుంటాయి. సైనాకు షాక్‌... ఉబెర్‌ కప్‌లో భాగంగా కెనడాతో జరిగిన గ్రూప్ ‘ఎ’ మ్యాచ్‌లో భారత మహిళల జట్టుకు 1–4తో ఓటమి ఎదురైంది. తొలి మ్యాచ్‌లో కామన్వెల్త్ గేమ్స్‌ స్వర్ణ పతక విజేత సైనా నెహ్వాల్ 21–15, 16–21, 16–21తో ప్రపంచ 14వ ర్యాంకర్ మిచెల్లి లీ చేతిలో పరాజయం పాలైంది. గతంలో మిచెల్లితో ఆడిన రెండుసార్లూ నెగ్గిన సైనాకు ఈసారి నిరాశ ఎదురైంది. రెండో మ్యాచ్‌లో రాచెల్‌ హోండెరిచ్‌ 21–11, 21–13తో జక్కా వైష్ణవి రెడ్డిని ఓడించి కెనడాకు 2–0తో ఆధిక్యం అందించింది. మూడో మ్యాచ్‌లో మేఘన–పూర్వీషా ద్వయం 21–19, 21–15తో మిచెల్లి టాంగ్‌–జోసెఫిన్‌ వు జంటను ఓడించింది. అయితే నాలుగో మ్యాచ్‌లో బ్రిట్నీ టామ్‌ 21–11, 21–15తో శ్రీకృష్ణప్రియపై నెగ్గడంతో కెనడా 3–1 తో విజయాన్ని దక్కించుకుంది. చివరి మ్యాచ్‌లో రాచెల్‌–క్రిస్టెన్‌ సాయ్‌ ద్వయం 21–14, 21–16తో సంయోగిత–ప్రాజక్తా జంటను ఓడించి కెనడాకు 4–1తో విజయాన్ని అందించింది. -
ఓటమితో మొదలు
► తొలి మ్యాచ్‌లో భారత్ 2-3తో థాయ్‌లాండ్ చేతిలో పరాజయం ► థామస్ కప్ బ్యాడ్మింటన్ టోర్నీ కున్‌షున్ (చైనా): అగ్రశ్రేణి సింగిల్స్ క్రీడాకారులు కిడాంబి శ్రీకాంత్, ప్రణయ్ గైర్హాజరీలో... థామస్ కప్ టీమ్ బ్యాడ్మింటన్ టోర్నమెంట్‌లో భారత జట్టుకు శుభారంభం దక్కలేదు. ఆదివారం జరిగిన గ్రూప్ ‘బి’ లీగ్ మ్యాచ్‌లో భారత్ 2-3 తేడాతో థాయ్‌లాండ్ చేతిలో ఓడిపోయింది. తొలి సింగిల్స్‌లో ప్రపంచ 21వ ర్యాంకర్ అజయ్ జయరామ్ 16-21, 21-12, 14-21తో ప్రపంచ 26వ ర్యాంకర్ తనోంగ్‌సక్ సేన్‌సోమ్‌బున్‌సుక్ చేతిలో ఓటమి పాలయ్యాడు. రెండో మ్యాచ్‌లో సుమీత్ రెడ్డి-మనూ అత్రి ద్వయం 17-21, 6-21తో బొదిన్ ఇసారా-నిపిత్‌పోన్ జోడీ చేతిలో ఓడింది. మూడో మ్యాచ్‌లో సాయిప్రణీత్ 21-11, 21-16తో ఖొసిత్ పెట్‌ప్రాదబ్‌పై గెలిచి భారత్ ఖాతా తెరిచాడు. అయితే నాలుగో మ్యాచ్‌లో సాత్విక్ సాయిరాజ్-అక్షయ్ దేవాల్కర్ జోడీ 15-21, 21-14, 15-21తో డెచాపోల్-కెద్రెన్ జంట చేతిలో పరాజయం పాలవ్వడంతో భారత్‌కు 1-3తో ఓటమి ఖాయమైంది. నామమాత్రమైన ఐదో మ్యాచ్‌లో సౌరభ్ వర్మ 21-17, 16-21, 21-19తో అదుల్చ్ ్రనమ్‌కుల్‌పై గెలుపొందాడు. మంగళవారం జరిగే రెండో లీగ్ మ్యాచ్‌లో హాంకాంగ్‌తో భారత్ ఆడుతుంది.
Advertisement