న్యూఢిల్లీ: ఈ ఏడాది టైమ్‌ మ్యాగజైన్‌ అత్యంత ప్రభావితం చూపించిన వ్యక్తుల జాబితాలో  ప్రధాని మోదీసహా ఐదుగురు భారతీయులు స్థానం సంపాదించారు. పౌరసత్వ సవరణ చట్టానికి వ్యతిరేకంగా ఢిల్లీలోని షాహిన్‌బాగ్‌ ఆందోళనలను ముందుండి నడిపించిన 82 ఏళ్ల వయసున్న బామ్మ బిల్కిస్‌ టైమ్‌ జాబితాలో స్థానం పొందారు. బాలీవుడ్‌ నటుడు ఆయుష్మాన్‌ ఖురానా, గూగుల్‌ సీఈవో సుందర్‌ పిచాయ్, ప్రొఫెసర్‌ రవీంద్ర గుప్తా అత్యంత ప్రభావితం చూపించిన 100 మందిలో చోటు దక్కించుకున్నారు. ఇక ఇండియన్‌ అమెరికన్, డెమొక్రాట్ల ఉపాధ్యక్ష అభ్యర్థి కమలా హ్యారిస్‌ టైమ్స్‌ జాబితాకెక్కారు. రాజకీయ నాయకుల కేటగిరీలో మోదీతో పాటుగా అమెరికా అధ్యక్షుడు ట్రంప్, చైనా అధ్యక్షుడు జిన్‌పింగ్‌ ఉన్నారు. భారత్‌ని ముందుకు నడిపించే నాయకుడు మోదీని మించి మరొకరు లేరని టైమ్‌ మ్యాగజైన్‌ పేర్కొంది. ప్రొఫెసర్‌ రవీంద్ర గుప్తా హెచ్‌ఐవీ ఎయిడ్స్‌ వ్యాధిని జయించిన వ్యక్తిగా గుర్తింపు పొందారు. కేంబ్రిడ్జి యూనివర్సిటీలో క్లినికల్‌ మైక్రోబయాలజీలో ప్రొఫెసర్‌గా ఉన్నారు. అణగారిన వర్గాల గొంతుక షాహిన్‌బాగ్‌ దాదీగా పేరు సంపాదించిన బిల్కిస్‌ గడ్డ కట్టే చలిని సైతం లెక్క చేయకుండా 100 రోజుల పాటు రేయింబవళ్లు పౌరసత్వ చట్ట సవరణకు వ్యతిరేకంగా గళమెత్తారు. ‘ఒక చేత్తో జపమాల, మరో చేత్తో జాతీయ జెండా పట్టుకొని అణగారిన వర్గాల గళంగా బిల్కిస్‌ నిలిచారు. మహిళలు, మైనార్టీల అణచివేతకు వ్యతిరేకంగా పోరాట స్ఫూర్తిని రగిలించారు. పొద్దున్నే 8కల్లా ఠంచనుగా నిరసనకు కూర్చొనే ఆమె అర్ధరాత్రయినా కదిలేవారు కాదు’అని టైమ్‌ మ్యాగజైన్‌ ప్రొఫైల్‌లో షాహిన్‌బాగ్‌ దాదీ గురించి జర్నలిస్టు రాణా అయూబ్‌ రాసుకొచ్చారు. ఆయుష్మాన్‌ భవ ఆర్టిస్టుల కేటగిరిలో స్థానం దక్కించుకున్న బాలీవుడ్‌ నటుడు ఆయుష్మాన్‌ ఖురానా గురించి టైమ్‌ ప్రొఫైల్‌లో నటి దీపికా పదుకొనె రాశారు. కన్న కలలు నిజం కావడం చాలా కొద్ది మంది చూస్తారని, అందులో ఆయుష్మాన్‌ ఒకరని అన్నారు. ఆయనలో ప్రతిభ, కష్టపడే తత్వంతో పాటుగా సహనం, పట్టుదల, నిర్బయంగా ముందుకు దూసుకుపోయేతత్వాన్ని దీపిక ప్రశంసించారు.

బాలీవుడ్‌ యువ హీరో ఆయుష్మాన్‌ ఖురానా అరుదైన గౌరవాన్ని పొందారు. ప్రఖ్యాత యూఎస్‌ మ్యాగజీన్‌  ‘టైమ్స్‌’ విడుదల చేసిన ప్రపంచ అత్యంత ప్రభావశీల వ్యక్తుల టాప్‌–100 జాబితాలో ఆయుష్మాన్‌ చోటు సంపాదించుకున్నాడు. ఢిల్లీలో బిగ్‌ ఎఫ్‌ఎమ్‌లో ఆర్జేగా కెరీర్‌ను ప్రారంభించిన ఆయుష్మాన్‌ ఆ తర్వాత టీవీ యాంకర్‌గా పనిచేశారు. 2012లో వచ్చిన సూజిత్‌ సర్కార్‌ ‘విక్కీ డోనర్‌’తో బాలీవుడ్‌ బాక్సాపీస్‌ వద్ద రికార్డుల వర్షం కురిపించారు. అలాగే ఆయుష్మాన్‌ నటించిన ‘అంధాదూన్‌’ బ్లాక్‌ బస్టర్‌ హిట్‌గా నిలిచింది. ‘ఆర్టికల్‌ –15, డ్రీమ్‌ గర్ల్, బాలా’ వంటి వినూత్న చిత్రాలతో వరుస హిట్లు అందుకుని బాలీవుడ్‌లో సత్తా చాటుతున్నారు ఆయుష్మాన్‌ ఖురానా. ఇదిలా ఉంటే.. ‘టాప్‌ 100 మోస్ట్‌ ఇన్‌ఫ్లూయెన్షియల్‌ పీపుల్‌ ఇన్‌ ది వరల్డ్‌’ జాబితాలో భారతదేశం నుంచి ప్రధాని నరేంద్ర మోదీ, సుందర్‌ పిచాయ్, రవీంద్రగుప్తా, బిల్కిస్‌ దాది తదితరులు కూడా ఉన్నారు. ‘‘ప్రతిభావంతులు ఉన్న ఈ జాబితాలో స్థానం సంపాదించుకోవడం నాకు దక్కిన గౌరవంగా భావిస్తున్నాను’’ అని పేర్కొన్నారు ఆయుష్మాన్‌ ఖురానా.


 న్యూయార్క్: భారత ప్రధానమంత్రి నరేంద్ర మోదీ మరో బిరుదు అందుకున్నారు. గతంలో మోదీని రాక్‌స్టార్‌గా అభివర్ణించగా తాజాగా ఇంటర్నెట్ స్టార్ అనే బిరుదు కూడా ఆయన ఖాతాలో చేరింది. సోషల్ మీడియాలో మోదీ చురుగ్గా ఉంటారు. ఇంటర్నెట్ లో ఆయన గురించి ఏదో ఒక చర్చ జరుగుతూనే ఉంటుంది. అందుకే అంతర్జాలంలో అత్యంత ప్రభావవంతమైన వ్యక్తిగా మరోసారి ఆయన గుర్తింపు తెచ్చుకున్నారు.
 
 ఫేమస్ మేగజీన్ టైమ్స్‌ విడుదల చేసిన జాబితాలో మోదీ వరుసగా రెండో ఏడాది స్థానం దక్కించుకున్నారు. ఈ సందర్భంగా టైమ్స్ మేగజీన్ మోదీని ఇంటర్నెట్‌ స్టార్‌ అని ప్రస్తావించింది. ర్యాంకులివ్వకుండా నెట్టింట్లో అత్యంత ప్రభావవంతులైన 30 మంది వ్యక్తుల జాబితాను టైమ్స్ విడుదల చేసింది. ఆ లిస్టులో మోదీ తోపాటు, అమెరికా అధ్యక్ష పదవికి పోటీ పడుతున్న డొనాల్డ్‌ ట్రంప్‌, రచయిత్రి జేకే రౌలింగ్‌, సాకర్‌ స్టార్‌ క్రిస్టియానో రోనాల్డో తదితరులు ఉన్నారు.