Live Updates: ► త్రిపురలో పోలింగ్‌ ప్రక్రియ ముగిసింది. ఎన్నికల్లో 69.96 శాతం పోలింగ్‌ నమోదు. Time: 02.15PM త్రిపుర అసెంబ్లీ ఎన్నికల పోలింగ్‌ ప్రశాంతంగా కొనసాగుతోంది. మధ్యాహ్నం ఒంటి గంట వరకు 51.4 శాతం పోలింగ్‌ నమోదు అయ్యింది. Time: 1.00PM ►బీజేపీ నాయకులు పలు చోట్ల ఓటర్లను ఇబ్బందులకు గురిచేస్తూ నిర్భయంగా ఓటు వేయకుండా ఆపుతున్నారు. సీపీఎం నేత, మాజీ సీఎం మాణిక్ సర్కార్ ఆరోపించారు. అయితే బీజేపీ బెదిరింపులుకు గురిచేసిన జనం ఓట్లు వేయడానికి శాయశక్తులా ప్రయత్నిస్తున్నారని అన్నారు. Time: 11.00 ►త్రిపుర అసెంబ్లీ ఎన్నికల్లో ఉదయం 11 గంటల వరకు 31.23%  పోలింగ్‌ నమోదైంది. ► మాజీ సీఎం, బీజేపీ రాజ్యసభ సభ్యుడు బిప్లబ్ కుమార్‌ దేబ్ ఓటు వేశారు. అనంతరం ఆయన మాట్లాడుతూ.. ఏ ఎన్నికలను పెద్దవి, చిన్నవిగా చూడమని అన్నారు. ప్రజలే తమకు అత్యున్నతమని.. వారిని గౌరవించడం తమ కర్తవ్యమని పేర్కొన్నారు.  ‘2018లో ప్రజలు అధికారం అందించారు. కోవిడ్ ఉన్నప్పటికీ,  రాష్ట్రంలోని అన్ని రంగాలలో అభివృద్ధి చేసి చూపించాం.. ఇది ప్రజలకు  తెలుసు’ అని అన్నారు. Gomati | BJP MP CM Biplab Deb cast his vote for #TripuraElection2023 today. He says, "We don't see any election as big or small. Public is supreme & it's our duty to respect them. They gave us power in 2018 & despite COVID, we worked in all sectors of state. People know this." pic.twitter.com/PtGMl2LcPG — ANI (@ANI) February 16, 2023 Time: 10.00 ► త్రిపుర అసెంబ్లీ ఎన్నికల పోలింగ్‌లో ఉదయం 9 గంటల వరకు 13.23% ఓటింగ్ నమోదైంది.    ►త్రిపుర సీఎం మాణిక్ సాహా ఓటుహక్కు వినియోగించుకున్నారు.  బోర్దోవాలీ అసెంబ్లీ నియోజకవర్గంలోని మహారాణి తులసుబాతి బాలికల ఉన్నత పాఠశాలలో ఓటు వేశారు. అనంతరం సీఎం మాట్లాడుతూ.. ఓటు వేయడం ఆనందంగా ఉందని.. ఓటర్లందరూ తమ ఓటు హక్కు వినియోగించుకోవాలని కోరారు. ‘ శాంతియుత ఓటింగ్ జరగాలని ఆశిస్తున్నా. నా ముందున్న సవాలు ఏంటని ప్రజలు అడుగుతున్నారు. ప్రత్యర్థులైన కాంగ్రెస్‌- వామపక్షాలు కలిసి పోటీలోకి రావడమే సవాల్‌.’ అని తెలిపారు. #WATCH | Tripura CM Dr Manik Saha casts vote in Assembly elections, in Agartala pic.twitter.com/fHpvoCpe4r — ANI (@ANI) February 16, 2023 Time: 9.00 ►త్రిపురలో రికార్డు స్థాయిలో ఓటు వేయాలని ప్రధానమంత్రి నరేంద్రమోదీ రాష్ట్ర ఓటర్లకు విజ్ఞప్తి చేశారు. రికార్డు సంఖ్యలో ఓటు వేసి ప్రజాస్వామ్య పండుగను బలోపేతం చేయాలని త్రిపుర ప్రజలను కోరుతున్నాను. యువత తమ ఓటు హక్కును వినియోగించుకోవాలని నేను ప్రత్యేకంగా పిలుపునిస్తున్నాను’  మోదీ ట్వీట్ చేశారు. కాగా త్రిపుర అసెంబ్లీ ఎన్నికల కోసం  ప్రచారం చేసిన చేసిన విషయం తెలిసిందే. Urging the people of Tripura to vote in record numbers and strengthen the festival of democracy. I specially call upon the youth to exercise their franchise. — Narendra Modi (@narendramodi) February 16, 2023 అగర్తలా: రాజకీయ పార్టీల హోరాహోరీ ప్రచార కార్యక్రమాలు, ఎన్నికల హామీలు, పరస్పర విమర్శనాస్త్రాల పర్వం ముగిశాక పోలింగ్‌ క్రతువుకు త్రిపుర రాష్ట్రం సిద్ధమైంది. గురువారం ఉదయం ఏడు గంటల నుంచి పోలింగ్‌ ప్రారంభమైంది. మధ్యాహ్నం నాలుగు గంటల వరకు 3,337 పోలింగ్‌ కేంద్రాల్లో 60 శాసనసభ స్థానాలకు పోలింగ్‌ జరగనుంది. స్వేచ్ఛగా, పారదర్శకంగా, ప్రశాంతంగా పోలింగ్‌ జరిగేలా అనిఏర్పాట్లు చేసినట్లు రాష్ట్ర చీఫ్‌ ఎలక్టోరల్‌ ఆఫీసర్‌(సీఈఓ) గిట్టే కిరణ్‌కుమార్‌ దినకరో చెప్పారు. పోలింగ్‌ కేంద్రాల్లో 1,100 కేంద్రాలు సున్నితమైన ప్రాంతాల్లో ఉండగా 28 సమస్యాత్మక ప్రాంతాల్లో ఉన్నాయి. ప్రత్యేక రాష్ట్ర డిమాండ్‌ కోసం ఉద్యమం చేసి రాజకీయాల్లోకి అడుగుపెట్టిన తిప్రా మోతా రాకతో ఈసారి త్రిముఖ పోరు కనిపిస్తోంది. బీజేపీ–ఐపీఎఫ్‌టీ కూటమి, సీపీఐ(ఎం)–కాంగ్రెస్‌ కూటమి, తిప్రా మోతాల మధ్యే అసలు పోరు ఆవిష్కృతంకానుంది. 13.53 లక్షల మహిళాఓటర్లుసహా మొత్తం 28.13 లక్షల మంది ఓటర్లు తమ ఓటు హక్కు వినియోగించుకోనున్నారు. మార్చి రెండో తేదీన ఓట్లు లెక్కిస్తారు. ‘ అన్ని పోలింగ్‌ కేంద్రాల్లో కలిపి మొత్తంగా 31వేల పోలింగ్‌ సిబ్బంది, 25వేల కేంద్ర భద్రతా బలగాలు, 31వేల రాష్ట్ర పోలీసు బలగాలు విధుల్లో కొనసాగనున్నాయి’ అని సీఈఓ చెప్పారు. ముందస్తు చర్యల్లో భాగంగా 17వ తేదీ ఉదయందాకా నిషేధాజ్ఞలు అమల్లోకి తెచ్చాం. అంతరాష్ట్ర, అంతర్జాతీయ సరిహద్దులను మూసేశాం’ అని సీనియర్‌ పోలీస్‌ ఉన్నతాధికారి చెప్పారు. 55 చోట్ల బీజేపీ, 42 చోట్ల తిప్రామోతా ముఖ్యమంత్రి, బీజేపీ అభ్యర్థి మాణిక్‌ సాహా ఈసారి బర్దోవాలీ నుంచి బరిలో నిలిచారు. సీపీఎం రాష్ట్ర కార్యదర్శి జితేంద్ర చౌదరి సాబ్రూమ్‌ నియోజకవర్గం నుంచి పోటీచేస్తున్నారు. తిప్రా మోతా చైర్మన్‌ ప్రద్యోత్‌ దేబ్‌ బర్మన్‌ ఈసారి పోటీచేయడంలేదు. బీజేపీ 55 చోట్ల తన అభ్యర్థులను బరిలో నిలిపింది. బీజేపీ కూటమి పార్టీ ఐపీఎఫ్‌టీ ఆరు స్థానాల్లో పోటీచేస్తోంది. ఈ రెండు పార్టీలూ ఒక స్థానంలో స్నేహపూర్వక పోటీకి సిద్దమయ్యాయి. సీపీఎం 47 చోట్ల, కాంగ్రెస్‌ 13 చోట్ల, తిప్రా మోతా 42 చోట్ల అభ్యర్థులను నిలబెట్టాయి. గత ఐదేళ్లపాలనలో తాము చేసిన అభివృద్ధినే ఎన్నికల అజెండాగా బీజేపీ ప్రచారంచేయగా, దుష్ప్రరిపాలన అంటూ లెఫ్ట్‌ ఫ్రంట్, కాంగ్రెస్‌లు విమర్శిస్తూ ప్రచారంచేయడం తెల్సిందే. గ్రేటర్‌ తిప్రాల్యాండ్‌ రాష్ట్ర సాధనే ఏకైక లక్ష్యంగా పనిచేస్తూ తిప్రా మోతా ఎన్నికల పర్వంలో మునిగిపోవడం విదితమే.  

చండీపూర్‌(అగర్తలా): త్రిపురను కాంగ్రెస్, సీపీఎం, తిప్రా మోతా అనే ట్రిపుల్‌ ట్రబుల్‌ నుంచి బీజేపీ డబుల్‌ ఇంజిన్‌ సర్కారే కాపాడుతుందని కేంద్ర హోం మంత్రి అమిత్‌ షా చెప్పారు. త్రిపుర రాష్ట్రం ఉనాకోటి, సెపాహిజలా జిల్లాల్లో ఆదివారం జరిగిన ఎన్నికల ప్రచార ర్యాలీలో మంత్రి మాట్లాడారు. ఈ మూడు సమస్యల నుంచి బయటపడాలనుకుంటే బీజేపీ డబుల్‌ ఇంజిన్‌ ప్రభుత్వానికే ఓటేయాలని ప్రజలకు పిలుపునిచ్చారు. ఏళ్లపాటు రాష్ట్రంలోని గిరిజనులను నిర్లక్ష్యం చేసిన సీపీఎం ప్రజలను మోసగించడానికే ఇప్పుడు గిరిజన నేతను ముఖ్యమంత్రి అభ్యర్థిగా ప్రకటించిందని ఆయన విమర్శించారు. బీజేపీని ఓడించటానికే సీపీఎం, కాంగ్రెస్‌ ఏకమయ్యాయని మంత్రి ఆరోపించారు. ఈ మూడు పార్టీలకు అధికారమిస్తే రాష్ట్రంలో తిరిగి ఆటవిక పాలన వచ్చినట్లేనన్నారు. సీపీఎం, కాంగ్రెస్‌ ప్రభుత్వాల హయాంలో పలు కుంభకోణాలు జరిగాయని చెప్పారు. ఈ నెల 16న జరగనున్న అసెంబ్లీ ఎన్నికల్లో సీపీఎం, కాంగ్రెస్‌ కలిసి పోటీ చేస్తున్న విషయం తెలిసిందే. 

2018 అసెంబ్లీ ఎన్నికలు. లెఫ్ట్‌ కూటమి పాతికేళ్ల పాలనతో విసిగిపోయిన త్రిపుర ప్రజలను బీజేపీ అభివృద్ధి మంత్రం ఆకట్టుకుంది. దాని భాగస్వామ్య పార్టీ ఐపీఎఫ్‌టీకి గిరిజనుల్లో ఉన్న ఆదరణ తోడైంది. దాంతో 60 సీట్లకు గాను కాషాయ పార్టీ ఏకంగా 36 స్థానాల్లో నెగ్గింది. ముఖ్యంగా 20 ఎస్టీ స్థానాల్లో ఏకంగా 17 సీట్లను కొల్లగొట్టింది! ఐదేళ్ల తర్వాత పరిస్థితులు తారుమారవుతున్న సూచనలు కన్పిస్తున్నాయి. ప్రత్యేక రాష్ట్ర నినాదంతో రాజకీయ పార్టీ అవతారమెత్తిన ఉద్యమ సంస్థ టిప్రా మోతా ఈసారి అధికార పార్టీ పుట్టి ముంచేలా కన్పిస్తోంది... ఈశాన్య రాష్ట్రమైన త్రిపురలో అసెంబ్లీ ఎన్నికల వేడి తారస్థాయికి చేరుతోంది. పోలింగ్‌ (ఫిబ్రవరి 16) తేదీ సమీపిస్తున్న కొద్దీ పార్టీలన్నీ అమ్ములపొదుల్లోంచి అన్ని అస్త్రాలూ బయటికి తీస్తున్నాయి. రాష్ట్రంలో పాతికేళ్ల లెఫ్ట్‌ పాలనకు 2018 ఎన్నికల్లో బీజేపీ తెర దించింది. గిరిజనుల్లో బాగా పట్టున్న ఐపీఎఫ్‌టీ పార్టీతో జట్టు కట్టి ఘనవిజయం సాధించింది. సీపీఎం 16 సీట్లకు పరిమితం కాగా కాంగ్రెస్‌ సోదిలోకూడా లేకుండా పోయింది. ఈసారి మాత్రం టిప్రా మోతా రూపంలో కొత్త పార్టీ తెరపైకి రావడంతో సమీకరణాలన్నీ మారిపోయాయి. పరిస్థితి తారుమారు... త్రిపుర మాజీ రాజ కుటుంబానికి చెందిన ప్రద్యోత్‌ బిక్రం మాణిక్యదేబ్‌ బర్మన్‌ సారథ్యంలో కొంతకాలంగా ప్రత్యేక గిరిజన రాష్ట్రం కోసం పోరాడుతున్న తిప్రా (త్రిపుర ఇండిజినస్‌ ప్రోగ్రెసివ్‌ రీజనల్‌ అలయన్స్‌) మోతా ఈసారి పార్టీగా రూపాంతరం చెందింది. బీజేపీతో పొత్తు ప్రయత్నాలు విఫలం కావడంతో ఒంటరిగానే రంగంలోకి దిగి పోటీని ముక్కోణంగా మార్చేసింది. అధికార బీజేపీ కూటమికి గట్టి సవాలు విసురుతోంది. మూలవాసులైన గిరిజనులకు ప్రత్యేక రాష్ట్రంగా గ్రేటర్‌ తిప్రాలాండ్‌ను సాధిస్తామన్న మోతా హామీ ఎస్టీలను విపరీతంగా ఆకట్టుకుంటోంది. ముఖ్యంగా గత ఎన్నికల్లో ఐపీఎఫ్‌టీతో పొత్తు ద్వారా బీజేపీ కొల్లగొట్టిన గిరిజన ఓట్లు ఈసారి చాలావరకు మోతావైపు మళ్లే సూచనలు కన్పిస్తున్నాయి. గిరిజనుల్లోని లెఫ్ట్‌ ఓటు బ్యాంకుకూ మోతా గండి కొట్టేలా ఉంది. త్రిపురలో గిరిజన ప్రాబల్యం ఎక్కువ. మొత్తం 60 అసెంబ్లీ స్థానాల్లో 20 వారికి రిజర్వయ్యాయి. అంతేగాక మరో 23 గిరిజనేత స్థానాల్లోనూ 10 శాతానికి పైగా ఉన్న ఎస్టీలు అక్కడా నిర్ణయాత్మకంగానే ఉన్నారు. 2018లో బీజేపీ కూటమి 20 ఎస్టీ సీట్లలో ఏకంగా 17 స్థానాలను దక్కించుకుంది! అలా బీజేపీ కూటమికి అధికారంలోకి రావడంలో కీలకంగా మారిన గిరిజన ఓట్లరు ఈసారి టిప్రా మోతాకే ఓటేస్తామని బహిరంగంగానే చెబుతున్నారు. ఈ సీట్లలో ముఖ్యంగా గిరిజనులు 60 శాతానికి పైగా ఉన్న 12 చోట్ల మోతాకు విజయావకాశాలు అధికంగా కన్పిస్తున్నాయి. 50–60 శాతం మధ్య ఉన్న 5 స్థానాల్లో మోతా గట్టి పోటీ ఇవ్వనుండగా 50 శాతాం కంటే తక్కువగా ఉన్న మిగతా మూడు చోట్ల ముక్కోణ పోరు జరిగేలా కన్పిస్తోంది. ఎలా చూసినా బీజేపీ కూటమికి ఈ 20 సీట్లలో ఈసారి రెండు మూడు సీట్లకు మించి దక్కకపోవచ్చని అంచనా. దీనికి తోడు గిరిజన ప్రాబల్యమున్న 23 గిరిజనేతర అసెంబ్లీ స్థానాల్లో కూడా మోతా ఏకంగా 22 చోట్ల పోటీకి దిగడం బీజేపీకి నిద్ర లేకుండా చేస్తోంది. బీజేపీ కూటమి 12 నుంచి 15 సీట్లు కోల్పోయి హంగ్‌ అసెంబ్లీ ఏర్పడవచ్చని అంచనా. 10 నుంచి 15 సీట్లు గెలిచేలా కన్పిస్తున్న మోతా కింగ్‌మేకర్‌ అయ్యే అవకాశం లేకపోలేదంటున్నారు. ఓట్ల చీలికపైనే లెఫ్ట్‌ ఆశలు గత ఎన్నికలఓల 42 శాతానికి పైగా ఓట్లు సాధించినా సీట్ల లెక్కలో వెనకబడ్డ సీపీఎం, ఈసారి ఓట్ల చీలికపై బాగా ఆశలు పెట్టుకుంది. బీజేపీ–ఐపీఎఫ్‌టీ కూటమిని ఓడించేందుకు శత్రుత్వాన్ని పక్కన పెట్టి కాంగ్రెస్‌తో జట్టు కట్టింది. 20 గిరిజన సీట్లతో పాటు 22 గిరిజనేతర స్థానాల్లో బీజేపీ ఓటు బ్యాంకుకు మోతా గండికొట్టనుండటం సీపీఎం–కాంగ్రెస్‌ కూటమికి కలిసొచ్చేలా కన్పిస్తోంది. దీనికి తోడు 2.5 లక్షల ఉద్యోగాలు తదితర హామీలతో యువతను ఆకట్టుకునే ప్రయత్నం చేస్తోంది. కాకపోతే కాంగ్రెస్‌ ఓటర్లలో చాలామంది పొత్తును గౌరవించి సీపీఎం అభ్యర్థులకు ఓటేసేందుకు సిద్ధంగా లేరు. ఏడు దశాబ్దాల వైరాన్ని, అధికారంలో ఉండగా తమపట్ల సీపీఎం అనుసరించిన అణచివేత ధోరణిని మర్చిపోలేమని స్పష్టంగా చెబుతున్నారు. అయితే ముస్లింల్లో అత్యధికులు లెఫ్ట్‌ వైపే మొగ్గుతున్నారు. బీజేపీ.. అభివృద్ధి మంత్రం 2018లో బీజేపీ అభివృద్ధి నినాదాన్ని జనం నమ్మడంతో ఆ పార్టీ ఏకంగా 43 శాతం ఓట్లు సాధించింది! ఆశించిన అభివృద్ధి కనిపించలేదన్న అసంతృప్తి జనాల్లో ఉంది. శాంతిభద్రతలు క్షీణించాయన్నది మరో పెద్ద ఆరోపణ.అయితే మరోసారి బీజేపీకి అవకాశం ఇచ్చి చూస్తామంటున్న వారి సంఖ్యా ఎక్కువగానే ఉంది. పీఎం ఆవాస్‌ యోజన మొదలుకుని కిసాన్‌ సమ్మాన్‌ నిధి దాకా పలు కేంద్ర పథకాల లబ్ధిదారులు ఎక్కువగానే ఉన్నారు. వీరిలోనూ మహిళల సంఖ్య ఎక్కువ. వారు మళ్లీ బీజేపీకే ఓటేస్తామంటున్నారు. పైగా సీఎం మాణిక్‌ సాహాకు ప్రజల్లో మంచి పేరుంది. కానీ 9 నెలల క్రితం దాకా సీఎంగా ఉన్న బిప్లబ్‌ దేబ్‌ పట్ల జనంలో ఉన్న వ్యతిరేకత బీజేపీకి నష్టం చేసేలా కన్పిస్తోంది. పైగా 2018లో గిరిజనుల్లో మంచి ఆదరణతో 8 సీట్లు సాధించిన భాగస్వామ్య పార్టీ ఐపీఎఫ్‌టీ ఆ తర్వాత అధ్యక్షుడు ఎన్‌.సి.దేబ్‌బర్మ మృతితో బాగా బలహీనపడింది. దాంతో బీజేపీ ఈసారి ప్రభుత్వ పథకాలనే నమ్ముకుని వాటిపై భారీ ప్రచారంతో హోరెత్తిస్తోంది. రాష్ట్రమంతటా కాషాయ జెండాలే ఎగురుతున్నాయి! ఎక్కడికక్కడ పోలింగ్‌ బూత్‌ కార్యాలయాలు తెరిచి తమ నేతలు, కార్యకర్తలను ఓటర్లతో నిత్యం టచ్‌తో ఉంచుతూ అధికార పార్టీ పక్కా ప్రణాళిక ప్రకారం ముందుకు పోతోంది. హిందువుల్లో అత్యధికులైన బెంగాలీలు, ఎస్టీల్లో ఎగువ కులాల వారు బీజేపీ వైపే మొగ్గుతున్నారు. ఇక గిరిజన స్థానాల్లోని బెంగాలీలు బీజేపీకి, ముస్లింలు సీపీఎంకు జై కొడుతున్నారు. – సాక్షి, నేషనల్‌ డెస్క్‌

న్యూఢిల్లీ: ఫిబ్రవరి 16న జరగనున్న త్రిపుర అసెంబ్లీ ఎన్నికలకు బీజేపీ 54 మంది అభ్యర్థుల జాబితాను ప్రకటించింది. ఇందులో కేంద్ర మంత్రి ప్రతిమా భౌమిక్‌ పేరు కూడా ఉన్నారు. ఆమె ధన్‌పూర్‌ నుంచి, సీఎం మాణిక్‌ సాహా బోర్డోవాలి నుంచి బరిలో దిగుతున్నారు. ఇండిజినస్‌ పీపుల్స్‌ ఫ్రంట్‌ ఆఫ్‌ త్రిపుర(ఐపీఎఫ్‌టీ)తో సీట్ల సర్దుబాటు ఖరారైందని సాహా చెప్పారు. బీజేపీ 55 చోట్ల, ఐపీఎఫ్‌టీ 5 స్థానాల్లో పోటీ చేస్తాయన్నారు. అసెంబ్లీలోని 60 సీట్లకు 2018 ఎన్నికల్లో బీజేపీ, ఐపీఎఫ్‌టీ 43 స్థానాలను గెలుచుకున్నాయి. మరోవైపు విపక్ష సీపీఎం, కాంగ్రెస్‌ కలిసి పోటీ చేయాలని నిర్ణయించుకున్నాయి.

అగర్తల: త్రిపుర అసెంబ్లీ ఎన్నికలకు అభ్యర్థులను ప్రకటించింది అధికార బీజేపీ. మొత్తం 60 స్థానాలకు 48 చోట్ల అభ్యర్థులను ఖరారు చేసి జాబితా విడుదల చేసింది. మిగతా 12 స్థానాల్లో పోటీ చేసే వారి పేర్లను త్వరలోనే ప్రకటించనుంది. సీఎం మాణిక్ సాహా మరోసారి టౌన్‌ బోర్డోవలి నియోజకవర్గం నుంచే పోటీ చేయనున్నారు. కేంద్రమంత్రి ప్రతిమ భౌమిక్ ధన్‌పుర్ స్థానం నుంచి బరిలోకి దిగుతారు. రాష్ట్ర బీజేపీ అధ్యక్షుడు రాజీవ్ భట్టాచార్జీ బనమాలిపుర్ నుంచి పోటీ చేస్తారు. బీజేపీ కేంద్ర ఎన్నికల కమిటీ సమావేశమైన మరునాడే త్రిపుర అభ్యర్థుల జాబితా విడుదల కావడం గమనార్హం. పార్టీ జాతీయ అధ్యక్షుడు జేపీ నడ్డా అధ్యక్షతన ఈ భేటీ జరిగింది. కమిటీలో సభ్యులుగా ఉన్న ప్రధాని మోదీ, కేంద్ర హోంమంత్రి అమిత్ షా, రక్షణమంత్రి రాజ్‌నాథ్ సింగ్ కూడా ఈ సమావేశంలో పాల్గొన్నారు. త్రిపుర అసెంబ్లీ ఎన్నికలు ఫిబ్రవరి 16న జరగనున్నాయి. మార్చి 2న కౌంటింగ్ నిర్వహించి ఫలితాలు ప్రకటిస్తారు. జనవరి 18నే ఎన్నికలకు సంబంధించిన నోటిఫికేషన్‌ను కేంద్ర ఎన్నికల సంఘం విడుదల చేసింది. నామినేషన్ల ప్రక్రియ ఈనెల 21న ప్రారంభమైంది. జనవరి 30న ముగుస్తుంది. నామినేషన్ల ఉపసంహరణకు ఫిబ్రవరి 2వరకు గడువు ఉంది. చదవండి: బోర్డర్‌లో రెచ్చిపోతున్న చైనా.. నివేదికలో పలు సంచలన అంశాలు

న్యూఢిల్లీ: 2023లో తొలి భాగంలో.. మూడు రాష్ట్రాల అసెంబ్లీ ఎన్నికల షెడ్యూల్‌ను ప్రకటించింది కేంద్ర ఎన్నికల సంఘం. ఈశాన్య రాష్ట్రాలైన నాగాలాండ్‌, మేఘాలయా, త్రిపురలకు ఎన్నికల తేదీలను ప్రకటించింది. ఒకే దఫాలో ఈ మూడు రాష్ట్రాల ఎన్నికలు నిర్వహించనున్నట్లు బుధవారం మధ్యాహ్నం పాత్రికేయ సమావేశం నిర్వహించి.. వివరాలను వెల్లడించారు సీఈసీ రాజీవ్‌ కుమార్‌. మొత్తం 60 అసెంబ్లీ నియోజకవర్గాలు ఉన్న నాగాలాండ్‌కు ఫిబ్రవరి 27వ తేదీన ఎన్నికలు జరగనున్నాయి. మొత్తం 13,09, 651 మంది ఓటర్లు ఉన్నారు అక్కడ. అందులో 59 స్థానాలు ఎస్టీ కేటాయింపు కాగా, జనరల్‌ కేటగిరీ ఒక్క స్థానానికే ఉంది.  ఇక 12 జిల్లాలతో 60 అసెంబ్లీ నియోజకవర్గాలు ఉన్న మేఘాలయా అసెంబ్లీకి ఫిబ్రవరి 27వ తేదీన ఎన్నికలు నిర్వహించనున్నారు. మొత్తం 21,61,129 ఓటర్లు ఉన్నారు అక్కడ. 55 స్థానాలు ఎస్టీ, జనరల్‌ కోటాలో 5 అసెంబ్లీ స్థానాలు ఉన్నాయి. ఎనిమిది జిల్లాలు.. 60 స్థానాలు ఉన్న త్రిపుర అసెంబ్లీకి ఫిబ్రవరి 16వ తేదీన అసెంబ్లీ ఎన్నికలు నిర్వహించనున్నారు. మొత్తం 28,13,478 మంది ఓటర్లు ఉన్నారు అక్కడ. ఇక్కడ 30 జనరల్‌, ఎస్సీ 10, ఎస్టీ 20 స్థానాలు ఉన్నాయి.  Voting for Assembly elections in Tripura to be held on February 16 & in Nagaland & Meghalaya on February 27; results to be declared on March 2.#AssemblyElections2023 https://t.co/V8eOZvhc5g pic.twitter.com/rRNKWeNjUq — ANI (@ANI) January 18, 2023 మొత్తం 180 స్థానాలకు జరగబోయే ఎన్నికల కోసం 9,125 పోలింగ్‌ స్టేషన్లు ఏర్పాటు చేయనున్నట్లు సీఈసీ రాజీవ్‌ కుమార్‌ ప్రకటించారు. మార్చి 2వ తేదీన మూడు రాష్ట్రాల ఎన్నికల ఫలితాలను ప్రకటించనున్నారు. ప్రస్తుతం ఈ మూడు రాష్ట్రాల్లో బీజేపీ అధికారంలో కొనసాగుతోంది. త్రిపుర (Tripura)లో మాణిక్‌ సాహా నేతృత్వంలోని ప్రభుత్వం, మేఘాలయా, నాగాలాండ్‌సంకీర్ణ ప్రభుత్వంలో భాగంగా ఉంది బీజేపీ. నాగాలాండ్, మేఘాలయ, త్రిపుర అసెంబ్లీల ఐదు సంవత్సరాల పదవీకాలం వరుసగా మార్చి 12, మార్చి 15, మార్చి 22వతేదీల్లో ముగియనుంది. మార్చి నెలాఖరులోగా మూడు ఈశాన్య రాష్ట్రాల్లో కొత్త అసెంబ్లీలను ఏర్పాటు చేయాల్సి ఉంది. గత వారం.. మూడు ఈశాన్య రాష్ట్రాల్లో పర్యటించి రాజకీయ పార్టీలు, రాష్ట్ర, కేంద్ర భద్రత, పౌర అధికారులతో వరుస సమావేశాలు నిర్వహించింది.  రాజకీయ పార్టీలు, స్థానిక యంత్రాంగం, పోలీసు సిబ్బంది అభిప్రాయాలు తీసుకుంది. ఈ మేరకు పక్కాగా ఎన్నికల షెడ్యూల్‌ విడుదల చేస్తున్నట్లు కేంద్రం ఎన్నికల సంఘం ప్రకటించింది. There are more than 62.8 lakh electors combined in Nagaland, Meghalaya & Tripura including - 31.47 lakh female electors, 97,000 80+ voters, and 31,700 PwD voters. Over 1.76 lakh first-time voters to participate in the elections in 3 states: CEC Rajiv Kumar pic.twitter.com/xnDne8TjQ1 — ANI (@ANI) January 18, 2023

న్యూఢిల్లీ: సున్నా నుంచి శిఖరానికి(శూన్య టు శిఖర్‌) బీజేపీ చేరుకుందంటూ త్రిపుర గెలుపును ప్రధాని నరేంద్ర మోదీ కొనియాడారు. కేంద్రానికి వ్యతిరేకంగా చేస్తున్న ప్రచారానికి త్రిపుర అసెంబ్లీ ఎన్నికల్లో బీజేపీ అద్భుత ప్రదర్శనే సమాధానమని ఆయన పేర్కొన్నారు. మూడు ఈశాన్య రాష్ట్రాల ఫలితాల అనంతరం బీజేపీ నూతన ప్రధాన కార్యాలయంలో పార్టీ కార్యకర్తల్ని ఉద్దేశించి ప్రధాని ప్రసంగించారు. కాంగ్రెస్‌ పార్టీ గతంలో ఎన్నడూ లేని స్థాయికి క్షీణించిందని ఆయన ఎద్దేవాచేశారు. పలు రాష్ట్రాల్లో విజయాల దిశగా పార్టీని నడిపిస్తూ బీజేపీ అధ్యక్షుడు అమిత్‌ షా ముందుకెళ్తున్నారని, బీజేపీ విజయాలకు ఆయనే సూత్రధారని ప్రధాని పేర్కొన్నారు. త్రిపురలోని 25 ఏళ్ల లెఫ్ట్‌ ప్రభుత్వాన్ని బీజేపీ కూలదోసిందని, పార్టీ కార్యకర్తల శ్రమ వల్లే దేశ వ్యాప్తంగా బీజేపీ మర్రిచెట్టులా విస్తరించిందని, వారికే ఈ విజయం అంకితమని మోదీ అన్నారు. ఈశాన్య రాష్ట్రాల సమస్యల్ని పరిష్కరించేందుకు గత నాలుగేళ్లుగా కేంద్ర మంత్రులు ఎన్నో రాత్రులు అక్కడ గడిపారని గుర్తుచేవారు. వాస్తు శాస్త్రంలో ఈశాన్యం ఎంతో ముఖ్యమైన స్థలమని,.. ప్రస్తుతం అక్కడ ఎక్కువ రాష్ట్రాల్లో బీజేపీ అధికారంలో ఉందని.. ఆ రాష్ట్రాలు దేశాన్ని అభివృద్ధి పథంలోకి నడిపిస్తున్నాయని చెప్పారు. త్రిపురలో ధనబలంతో గెలిచారన్న లెఫ్ట్‌ విమర్శలపై స్పందిస్తూ.. ఓటమిని ప్రతిపక్షాలు క్రీడాస్ఫూర్తితో తీసుకోవడం లేదని విమర్శించారు. పంజాబ్‌ ముఖ్యమంత్రి అమరీందర్‌ సింగ్‌(కాంగ్రెస్‌) గురించి మాట్లాడుతూ ఆయన స్వతంత్ర సైనికుడని పేర్కొన్నారు. ప్రసంగం ప్రారంభానికి ముందు వివిధ రాష్ట్రాల్లోని రాజకీయ హింసలో ప్రాణాలు కోల్పోయిన బీజేపీ కార్యకర్తల మృతికి ప్రధాని మౌనం పాటించారు. పశ్చిమ బెంగాల్, కేరళ, కర్నాటకల్లో రాజకీయ హింసకు బీజేపీ కార్యకర్తలు బలయ్యారని, ఇప్పుడు ఒడిశాలో కూడా దాడులు జరుగుతున్నాయని ఆయన ఆరోపించారు.   మోదీ విధానాలకు ఆమోద ముద్ర ఎన్నికల ఫలితాలపై అమిత్‌ షా త్రిపురలో బీజేపీ గెలుపు, నాగాలాండ్, మేఘాలయలో మెరుగైన ప్రదర్శనను ప్రధాని నరేంద్ర మోదీ విధానాలకు ప్రజామోదంగా బీజేపీ అధ్యక్షుడు అమిత్‌ షా అభివర్ణించారు.  ఎన్నికల ఫలితాల అనంతరం అమిత్‌ షా మీడియాతో మాట్లాడుతూ.. ‘ఈ గెలుపు చరిత్రాత్మకం. నాతో పాటు కోట్లాది మంది బీజేపీ కార్యకర్తలకు ఆనందకరమైన రోజు. ఈశాన్య రాష్ట్రాల అభివృద్ధికి ప్రధాని మోదీ ప్రత్యేకంగా కృషి చేశారు. ఆయన పనితీరు, అభివృద్ధికి ఈశాన్య రాష్ట్రాల ప్రజలు ఆమోద ముద్ర వేశారు’ అని చెప్పారు.

త్రిపుర ముఖ్యమంత్రిగా వరుసగా 20 ఏళ్లు కొనసాగి పదవి నుంచి వైదొలుగుతున్న మార్క్సిస్ట్ నేత మాణిక్ సర్కార్ రెండు విషయాల్లో చరిత్రకెక్కారు. దేశంలో ‘అతి పేద’ సీఎం మాణిక్ అని ఆయన ఎన్నికల అఫిడవిట్ వెల్లడించింది. పశ్చిమ బెంగాల్ సీఎంగా 34 ఏళ్లకు పైగా పనిచేసిన జ్యోతి బసు తర్వాత రెండు దశాబ్దాలు ఈ పదవి నిర్వహించిన సీపీఎం నేతగా మాణిక్దే రికార్డు. 49 ఏళ్ల వయసులో ఆయన 1998లో సీఎం పదవి చేపట్టారు. 1960ల చివర్లో త్రిపుర కాంగ్రెస్ సర్కారుకు వ్యతిరేకంగా విద్యార్థిగానే ఉద్యమించి కమ్యూనిస్ట్ పార్టీలో చేరారు. ప్రజా పోరాటాలకే అంకితమై సీపీఎం విస్తరణకు చేసిన కృషి ఫలితంగా 1972లో 23 ఏళ్లకే త్రిపుర సీపీఎం రాష్ట్ర కమిటీ సభ్యుడయ్యారు. 49 ఏళ్లకే సీపీఎం పొలిట్బ్యూరో సభ్యుడయ్యాక ముఖ్యమంత్రి పదవి సర్కార్కే దక్కింది. సొంత ఇల్లు లేని ఆయన తన ముత్తాతకు చెందిన అతి చిన్న ఇంట్లోనే ముఖ్యమంత్రిగా నివసించడం విశేషం. సొంత కారు లేకపోవడమేగాక, సీఎంగా తనకు వచ్చే జీతం మొత్తాన్ని పార్టీకే ఇచ్చి, పార్టీ నెలనెలా అందించే రూ.5000తోనే సరిపెట్టుకుంటున్నారు. సెంట్రల్ సోషల్ వెల్ఫేర్ బోర్డు ఉద్యోగిగా 2011లో పదవీ విరమణ చేసిన ఆయన భార్య పాంచాలీ భట్టాచార్య భర్త మాదిరిగానే నిరాడంబర జీవితం గడపుతున్నారు. సీఎం భార్య అయినా ఎలాంటి భద్రత లేకుండా రాజధాని అగర్తలాలో ఆమె రిక్షాలో ప్రయాణించడం నగర ప్రజలందరికీ తెలిసిన విషయమే. సీఎం అయ్యాక కూడా నగరంలో ఉదయం నడకకు మాణిక్ బయల్దేరడంతో భద్రతా సిబ్బంది పాంచాలికి విషయం చెప్పగానే ఆమె భర్త కోసం ట్రెడ్‌మిల్ కొని ఇంటికి తెచ్చారు. ‘‘ నా కళ్లజోడు ఖరీదు రూ.1800. చెప్పులు చాలా చౌక. అయినా నీటుగా కనిపిస్తానంటే విలాసవంతమైన వస్తువులు వాడతానని అనుకోవద్దు,’’ అని మాణిక్ చెప్పిన మాటలు అక్షరాలా నిజం. రోజూ ఓ చార్మినార్ సిగరెట్ ప్యాకెట్, చిన్న ప్యాకెట్ నస్యం ఉంటే చాలనీ, ఐదువేల రూపాయలకు తోడు తన భార్య పించనుతో అవసరాలు తీరిపోతున్నాయని ఓ ఇంటర్వ్యూలో సర్కార్ వెల్లడించారు.  వరుసగా నాలుగు అసెంబ్లీ ఎన్నికల్లో సీపీఎంను అధికారంలోకి తెచ్చిన మాణిక్ నాయకత్వం ఇరవై ఏళ్ల తర్వాత నిరుద్యోగం, అభివృద్ధి లేకపోవడం వంటి కారణాల వల్ల ముఖ్యమంత్రి పదవి నుంచి దిగిపోవాల్సివచ్చింది. (సాక్షి నాలెడ్జ్ సెంటర్)

సాక్షి, న్యూఢిల్లీ: పశ్చిమ బెంగాల్‌ రాష్ట్రానికి 2011లో జరిగిన అసెంబ్లీ ఎన్నికల్లో 34 ఏళ్ల సీపీఎం ఎదురులేని పాలనకు చరమగీతం పాడుతూ తృణమూల్‌ కాంగ్రెస్‌ ఎలాగైతే అఖండ విజయం సాధించిందో ఈ రోజున అదే మార్క్సిస్టుల కంచుకోటను బద్దలుగొట్టి త్రిపుర అసెంబ్లీ ఎన్నికల్లో భారతీయ జనతా పార్టీ అఖండ విజయం సాధించింది. తద్వారా  రాష్ట్ర రాజధాని అగర్తలా లాంటి నగరాల్లో బెంగాలీలు ఎక్కువగా ఉండడంతో త్రిపురలోకి పార్టీని విస్తరించాలనుకున్న తృణమూల్‌ కాంగ్రెస్‌ నేత మమతా బెనర్జీ ఆశలను కూడా గండికొట్టింది.  ఇది బీజేపీకి ఎంతటి సైద్ధాంతిక విజయమో, సీపీఎం పార్టీకీ అంతే సైద్ధాంతిక పరాజయం కూడా. దేశంలోనే అత్యంత పేద ముఖ్యమంత్రిగా, నిజాయితీపరుడైన నేతగా 20 ఏళ్లపాటు ముఖ్యమంత్రిగా కొనసాగిన మాణిక్‌ సర్కార్‌ ప్రభుత్వాన్ని ఓడించడం మాటలు కాదు. ఇందులో భారతీయ జనతా పార్టీ సాగించిన విస్తత ఎన్నికల ప్రచారంతోపాటు సీపీఎం ప్రభుత్వం అపజయాలు అన్నే ఉన్నాయి. ఇదివరకే అస్సాం, మణిపూర్, మేఘాలయ రాష్ట్రాలో కాషాయ జెండాను ఎగురవేసిన భారతీయ జనతా పార్టీ రెట్టించిన ఉత్సాహంతో ఎలాగైన సీపీఎంను ఓడించాలనే రాజకీయ సైద్ధాంతిక కసితో 2017, మార్చి నుంచే త్రిపురలో ఎన్నికల ప్రచారానికి శ్రీకారం చుట్టింది. ప్రధాన మంత్రి నరేంద్ర మోదీ, పార్టీ అధ్యక్షుడు అమిత్‌ షా సహా పలువురు పార్టీ జాతీయ నాయకులు పలుసార్లు చిన్న రాష్ట్రమైన త్రిపురలో ఉధృతంగా ప్రచారం సాగించారు. బీజీపీలో సంఘ్‌ పరివార్‌లో భాగమైన ఆరెస్సెస్‌ ఎన్నికల విజయానికి క్షేత్రస్థాయిలో అవసరమైన రంగాన్ని ముందుగానే సిద్ధం చేసి ఉంచింది. బీజేపీ రంగప్రవేశం చేసి రాష్ట్రంలో గిరిజనులు, గిరిజనేతరుల మధ్యనున్న సామాజిక విభేదాలను సొమ్ము చేసుకునేందుకు తీవ్రంగా కృషి చేసింది. రాష్ట్రం అభివద్ధి చెందాలంటే అది కేంద్రంలో అధికారంలో ఉన్న తమ పార్టీ ప్రభుత్వం వల్లనే అవుతుందని ప్రజలకు ఆశ చూపించింది. 1980, 1990 దశకంలో అంతర్గత సంఘర్షణల నుంచి రాష్ట్రాన్ని వెలుపలికి తీసుకరావడంలో, అత్యంత వివాదాస్పదంగా తయారైన ‘సాయుధ దళాల ప్రత్యేకాధికారాల చట్టం’ను త్రిపుర రాష్ట్రం నుంచి ఉపసంహరించడంలో విజయం సాధించినందున మాణిక్‌ సర్కార్‌ తిరుగులేని నాయకుడిగా ఇంతకాలం రాష్ట్రంలో కీలక పాత్ర పోషించారు. అయితే సర్కార్‌ ప్రభుత్వం అవినీతి ఆరోపణల్లో కూరుకుపోయింది. సర్కార్‌ ప్రభుత్వం నియామకాలు చెల్లవంటూ సుప్రీం కోర్టు తీర్పు చెప్పడంతో కొన్ని వేల మంది టీచర్లు రోడ్డున పడ్డారు. అవినీతి జరిగిందన్న కారణంగానే ఆ నియామకాలను కోర్టు కొట్టివేసింది. రోజ్‌ఫండ్‌ చిట్‌ఫండ్‌ కుంభకోణం బెంగాల్‌ నుంచి త్రిపుర వరకు వ్యాపించింది. ఇందులో పెట్టుబడులు పెట్టిన వేలాది సామాన్యులు నష్టపోయారు. దేశంలోనే అత్యధికంగా నిరుద్యోగులు త్రిపురలో ఉన్నారు. ఈ సమస్యను ఎదుర్కోవడంలో కూడా సీపీఎం ప్రభుత్వం ఘోరంగా విఫలమైంది. రాష్ట్రంలో ఆర్థిక అభివృద్ధిని సాధించి చూపిస్తామని, యువతకు తప్పకుండా ఉద్యోగాలిస్తామంటూ బీజేపీ చేసిన ప్రచారానికి యువత మొగ్గు చూపింది. ‘స్వయంప్రతిపత్తి కలిగిన జిల్లా మండలి’ పరిధిలోని ప్రాంతాల్లో గిరిజన తెగల్లో ప్రభుత్వం పట్ల పెరుగుతున్న వ్యతిరేకతను కూడా మాణిక్‌ సర్కార్‌ పట్టించుకోలేదు. తరచూ బంగ్లాదేశ్‌ నుంచి అక్రమంగా వలసవచ్చిన వారుగా ముద్రకు గురవుతున్న బెంగాలీ భాష మాట్లాడే ప్రజలు, తామే ఆదిమ జాతిగా చెప్పుకునే గిరిజనుల మధ్య జరుగుతున్న గొడవలనూ ఆయన పట్టించుకోలేదు. దాంతో 2013 అసెంబ్లీ ఎన్నికల్లో కేవలం 0.46 శాతం ఓట్లు సాధించి ఒక్క సీటులో కూడా గెలవని ‘త్రిపుర పీపుల్స్‌ ఫ్రంట్‌’  ఈసారి ఏకంగా తొమ్మిది సీట్లకు పోటీ చేసి ఎనిమిది సీట్లను గెలుచుకుంది. మాణిక్‌ సర్కార్‌ ప్రభుత్వం గిరిజనులకు వ్యతిరేకమని, బెంగాలీ మాట్లాడే ప్రజల పక్షమని ప్రచారం ద్వారా నమ్మించడంలో కూడా బీజేపీ విజయం సాధించింది. తద్వారా గిరిజనులను ఆకట్టుకుంది. పేదల పక్ష పార్టీకి చెప్పుకునే సీపీఎం ప్రభుత్వం పేదలైన గిరిజనుల కోసం ఏమీ చేయలేకపోయిందన్న భావం వారిలో ఎక్కువగా ఈసారి కనిపించింది. అందుకని త్రిపుర ప్రజలు బీజేపీని గెలిపించారనడం ఎంత సమంజసమో, సీపీఎంను ఓడించారనడం కూడా అంతే సమంజసం. (సాక్షి వెబ్‌ ప్రత్యేక కథనం)

అగర్తలా: ఈశాన్య రాష్ట్రాల్లో ఆధిపత్యం కోసం ప్రయత్నిస్తున్న బీజేపీ..  ఈసారి త్రిపురలో అధికారం కోసం తీవ్రంగా శ్రమిస్తోంది. ఈ రాష్ట్రం కోసం ‘కాంగ్రెస్‌ ముక్త భారత్‌’ విధానాన్ని మార్చుకుని.. ‘కమ్యూనిస్ట్‌ ముక్త త్రిపుర’ నినాదంతో దూసుకెళ్తోంది. 1972లో త్రిపుర ఏర్పాటైనప్పటినుంచి తొలిసారిగా ‘లెఫ్ట్‌–రైట్‌’ మధ్య పోటీ నెలకొందని ‘పీపుల్స్‌పల్స్‌’ సంస్థ జరిపిన సర్వేలో వెల్లడైంది.   ప్రతి ఊరూ వామ‘పక్ష’మే దేశవ్యాప్తంగా కమ్యూనిస్టుల ప్రాభవం తగ్గుతున్నా వారికి కంచుకోటలా ఉన్న రాష్ట్రాల్లో త్రిపుర చాలా కీలకమైనది. చిన్న రాష్ట్రమైనా 4 దశాబ్దాలుగా (1988–92 దఫా మినహా) అధికారంలో ఉండటంతో ఇంటింటికీ వేళ్లూనుకుపోయిన పరిస్థితి. అన్ని ప్రభుత్వ, ప్రైవేటు సంస్థల్లో వామపక్ష ఉద్యోగ, ఉపాధ్యాయ, కార్మిక సంఘాలదే పైచేయి. ‘ఎర్ర’కోటలో కమ్యూనిస్టులను ఎదుర్కొనేందుకు ఇన్నాళ్లుగా కాంగ్రెస్‌ చాలా ప్రయత్నించింది. త్రిపురలో రెండే వర్గాలుంటాయి. ఒకటి సీపీఎం అనుకూల వర్గం (దాదాపు 60%), రెండోది వ్యతిరేక వర్గం (మిగిలిన 40%).   సీపీఎంను దెబ్బతీస్తూ.. త్రిపురలో బెంగాలీల జనాభా ఎక్కువ. దీనికితోడు కొంతకాలంగా త్రిపురలో గిరిజన తెగల మధ్య (సీపీఎం అనుకూల, వ్యతిరేక వర్గాల మధ్య) ఘర్షణాత్మక వాతావరణం నెలకొంది. ఇన్నిసార్లు మద్దతిస్తున్నా కాంగ్రెస్‌కు అధికారం దక్కకపోవటంతో సీపీఎం వ్యతిరేక వర్గం ప్రత్యామ్నాయం కోసం ఎదురుచూసింది. ఈ నేపథ్యంలో అధికార వ్యతిరేక వర్గాన్ని తనకు అనుకూలంగా మార్చుకునేందుకు మూడేళ్ల క్రితమే ప్రయత్నాలు మొదలెట్టింది. 25 ఏళ్లుగా అధికారంలో ఉన్న సీపీఎంపై ప్రభుత్వ వ్యతిరేకతను, రాష్ట్రం వెనుకబాటుతనాన్ని ప్రచారాస్త్రాలుగా మలచుకుంది. కమ్యూనిస్టులకు బలమైన అండగా నిలుస్తున్న కార్మిక, ఉపాధ్యాయ, ఉద్యోగ సంఘాలకు గాలం వేసేందుకు.. ‘అధికారంలోకి వస్తే ఏడో వేతనసవరణ అమలుచేస్తాం’ అని హామీ ఇచ్చింది. దీని ప్రభావం రాష్ట్రంలోని లక్షన్నర మంది ఉద్యోగులపై, వారి కుటుంబాలపై సానుకూల ప్రభావం చూపవచ్చని పీపుల్స్‌ పల్స్‌ వెల్లడించింది. అటు, బెంగాలీలు, గిరిజనులను, ప్రభుత్వ అనుకూల వర్గాలను తమకు అనుకూలంగా మార్చుకునేందుకు ప్రయత్నిస్తోంది. ఎన్నడూ లేనంతగా త్రిపురలో ప్రముఖులతో ప్రచారం నిర్వహిస్తూనే.. ఇంటింటికి చేరువవుతోంది. అయితే విజయంపై ధీమా వ్యక్తం చేస్తున్నప్పటికీ బలమైన కమ్యూనిస్టు కోటను ఈ ఒక్క ప్రయత్నంలోనే దెబ్బకొట్టలేరని పీపుల్స్‌ పల్స్‌ తెలిపింది. ఈసారికి ప్రధాన ప్రతిపక్షం హోదా దక్కవచ్చని అభిప్రాయపడింది. అధికారం మాదే ఈ ఎన్నికల్లో త్రిపురలో ప్రభుత్వాన్ని ఏర్పాటుచేస్తామని బీజేపీ జాతీయాధ్యక్షుడు అమిత్‌ షా చెప్పారు. 20వ బీజేపీ పాలిత రాష్ట్రంగా త్రిపుర మారనుందని ఆయన అగర్తలాలో సోమవారం పేర్కొన్నారు. పార్టీ మేనిఫెస్టోను పూర్తిగా అమలుచేసి రాష్ట్రాభివృద్ధికి పాటుపడతామని ఓటర్లకు భరోసానిచ్చారు. మణిపూర్, అస్సాంలలోనూ గతంలో ఒక్కసీటు కూడా లేని పరిస్థితినుంచి ఏకంగా అధికారాన్ని అందుకున్న విషయాన్ని మరిచిపోవద్దన్నారు.  


 
 అగర్తల: త్రిపుర అసెంబ్లీలో స్పీకర్‌ పరువు పోయినంతపనైంది. ఆయన అధికార దండాన్ని తీవ్ర ఆగ్రహంతో ఓ తృణమూల్‌ కాంగ్రెస్‌ ఎమ్మెల్యే ఎత్తుకెళ్లిపోయాడు. ఆయన డిమాండ్‌కు స్పీకర్‌ అనుమతించలేదని మండిపడుతూ ఏకంగా సభ పూర్తి హక్కులు స్పీకర్‌ వే అని చెప్పేందుకు ఆయన టేబుల్‌ పై ఉంచే అధికారిక దండాన్ని ఎత్తుకెళ్లి సభలో ఇతర ఎమ్మెల్యేలను కూడా పరుగులు పెట్టించాడు. చివరికి మార్షల్స్‌ అడ్డుకొని దానిని తీసుకొని తిరిగి యథాస్థానంలో ఉంచారు.
 
 ఇలాంటి ఘటన జరగడం ఇది త్రిపుర అసెంబ్లీలోనే ఐదోసారి. త్రిపుర అసెంబ్లీలో ప్రస్తుతం అటవీశాఖ, గ్రామీణాభివృద్ధిమంత్రి నరేశ్‌ జమాతియ లైంగిక దాడికి పాల్పడ్డాడనే అంశంపై చర్చ జరగాలనే డిమాండ్‌ మార్మోగుతోంది. విపక్ష పార్టీలైన కాంగ్రెస్‌, టీఎంసీ నరేశ్‌ జమాతియాను తొలగించాలని డిమాండ్‌ చేస్తున్నాయి. ఈ అంశంపై సభలో చర్చ జరగాలని డిమాండ్‌ చేశాయి. అందుకు స్పీకర్‌ నిరాకరించాడు. దీంతో చిర్రెత్తిపోయిన తృణమూల్‌ ఎమ్మెల్యే సుదీప్‌ రాయ్‌ బర్మాన్‌ వేగంగా స్పీకర్‌ వద్దకు దూసుకెళ్లి ఆయన అధికారిక దండాన్ని తీసుకొని పరుగెత్తడం ప్రారంభించారు.
 
 ఆయనను పట్టుకునే ప్రయత్నం ఎవరు చేసినా దొరకలేదు. తలుపులు తీసుకొని ఆయన బయటకు వెళ్లిపోయారు. అయితే, అనంతరం మార్షల్స్‌ వెళ్లి దానిని తీసుకున్నారు. రాయ్‌ బర్మాన్‌ చాలా సీనియర్‌ నేత. ఆయన గతంలో విపక్ష నేతగా కూడా పనిచేశారు. ఈ ఘటనపై స్పీకర్‌ రమేంద్ర చంద్ర దేబ్‌నాథ్‌ తీవ్ర అసహనం వ్యక్తం చేశారు. ‘ఈ ఘటన చాలా సిగ్గుగా భావిస్తున్నాను. రాయ్‌ చాలా సీనియర్‌ నేత. ఇలాంటి చర్యలతో ఆయన జూనియర్లకు ఏ సందేశం ఇవ్వాలనుకుంటున్నారు’ అని మండిపడ్డారు. తన విజ్ఞప్తిని స్పీకర్‌ పట్టించుకోవాలనే ఇలా చేసినట్లు రాయ్‌ వివరణ ఇచ్చారు.