కోల్‌కతా : ఓ మహిళ అండాశయంలో ఏర్పడిన రెండు భారీ కణతులను విజయవంతగా తొలగించిన వైద్యులు ఆమెకి తిరిగి ప్రాణం పోశారు. వివరాల్లోకి వెళ్తే.. పశ్చిమ బెంగాల్‌లోని నదియా జిల్లాకు చెందిన అర్తి అధీకరీ అనే 60 ఏళ్ల మహిళకు తీవ్రమైన కడుపు నొప్పి రావడంతో ఆమె జూలై 14న జేఎన్‌ఎమ్‌ ఆస్పత్రి లో చేరారు. తొలుత వైద్యులకు ఆమె కడుపు నొప్పికి గల కారణం తెలియరాలేదు. దీంతో ఆమెకు అల్ట్రాసోనోగ్రఫీ పరీక్ష నిర్వహించిన వైద్యులు.. అండాశయంలో రెండు భారీ కణతులు ఉన్నట్టు గుర్తించారు. కణతులు పరిమాణం పెద్దదిగా ఉండటంతో వాటిని తొలగించడానికి తీసుకోవాల్సిన చర్యలపై తొలుత ఆస్పత్రి సిబ్బంది సమీక్ష సమావేశం నిర్వహించింది. ఆపరేషన్‌ కోసం ప్రముఖ గైనకాలజిస్టు, అసిస్టెంట్ ప్రొఫెసర్‌ మ్రిగాంకా మౌలి షా సారథ్యంలో ఓ టీమ్‌ను ఏర్పాటు చేశారు. శనివారం రెండు గంటల పాటు శ్రమించిన మౌలి షా నేతృత్వంలోని వైద్యుల బృందం అర్తి అండాశయంలోని  ఉన్న రెండు భారీ కణతులను విజయవంతగా తొలగించారు. ఆపరేషన్ అనంతరం మౌలి షా మాట్లాడుతూ.. అండాశయం నుంచి తొలగించిన రెండు కణతులు బరువు 35 కిలోల 300 గ్రాముల ఉన్నట్టు తెలిపారు. ఇంత పెద్ద పరిమాణం ఉన్న కణతులను తొలగించడం తమకు ఇదే తొలిసారి అని వెల్లడించారు. ప్రస్తుతం అర్తి పరిస్థితి నిలకడగా ఉందని.. 48 గంటల పాటు పర్యవేక్షణలో ఉంచామని పేర్కొన్నారు.

ఢాకా: గత 40 ఏళ్లుగా నడవడం లేదు.. కూర్చోవలన్నా.. బయటికి వెళ్లాలన్నా ఇతరులపై ఆధారపడాల్సిందే. వింత జబ్బుతో ఒళ్లంతా ట్యూమర్లు.. అతనిని చూస్తేనే చిన్న పిల్లలు దడుసుకుంటున్నారు. అతని కుడి తొడకైన భారీ కణితి నడవలేని స్థితి, కూర్చోలేని పరిస్ధితిని తీసుకొచ్చింది. చావలేక బతకలేక.. కుటుంబానికి భారమైన 53 ఏళ్ల హరూన్‌ పట్వారీ ధీన గాథ ఇది. బంగ్లాదేశ రాజధాని ఢాకాకు 90 మైళ్ల దూరంలో ఉన్న చంద్‌పూర్‌ జిల్లాలోని  నారయణ్‌పూర్‌ అనే మారుమూల గ్రామం హరూన్‌ పట్వారీది. ఇతనికి  భార్య జైతూన్‌ నిసా(49) ఇద్దరు పిల్లలు. ఎలాంటి పనిచేయలేని, కనీసం తన పనైన చేసుకోలేని హరూన్‌ను బతికించడం కోసం ఆ ఇద్దరు పిల్లలు కూలీలయ్యారు. హరూన్‌కు  9 ఏళ్ల వయసు నుంచే శరీరమంతా ట్యూమర్లు రావడం ప్రారంభమయ్యాయి. నిరక్ష్యరాస్యత, పేదరికం అతని వ్యాధిని మరింత ముదిరేలా చేశాయి. అతని తల్లితండ్రులు చేయించిన వైద్యం బెడిసి కొట్టింది. ఒళ్లంతా చిన్న చిన్నగా ఉన్న ట్యూమర్లలో తొడ కున్న ట్యూమర్‌ పెరుగుకుంటూ వచ్చి అతన్ని పూర్తిగా నడవకుండా చేసింది.  33 ఏళ్ల నుంచి అతని బాధను చూస్తున్నానని, అతను ఇలా జీవించడం చూస్తే గుండె తరుక్కుపోతుందని హరూన్‌ భార్య జైతూన్‌ నిసా ఆవేదన వ్యక్తం చేసింది. నాకు ఇలా బ్రతకడం నరకంలా ఉందని, బయటికి వెళ్తే చిన్నారులు భయపడుతున్నారని, దీంతో నేను ఎక్కడికి వెళ్లలేక పోతున్నానని హరూన్‌ తన సమస్యను తెలియజేశాడు. కానీ కొంత మంది యువకులు సాయం చేశారని, కొన్నేళ్లుగా ఆహారం, డబ్బులు ఇస్తూ అండగా నిలిచారన్నాడు. ఇప్పుడు నా స్వశక్తి మీద బతుకాలనుకుంటున్నానని, నాకేదైన సాయం చేయాలని హరూన్‌ విజ్ఞప్తి చేస్తున్నాడు. అండగా నిలిచిన సోషల్‌ మీడియా .. హరూన్‌ ధీనగాథ తెలుసుకున్న మమూన్‌ అనే సామాజిక కార్యకర్త, సోషల్‌ మీడియా వేదికగా విరాళాలు సేకరించారు. అతని ధీన గాథను సోషల్‌ మీడియా ద్వారా ప్రపంచానికి తెలియజేసి అండగా నిలిచారు. అతను వైద్య చికిత్స మాత్రమే అడగడం లేదని, మళ్లీ తిరిగి పనిచేయాలని కోరుకుంటున్నాడని మమూన్‌ పేర్కొన్నారు. ప్రజల నుంచి సానూకూలత వ్యక్తం అవుతోంది. త్వరలోనే అతను మూములు మనిషి అవుతాడని మమూన్‌ తెలపారు.


  అరుదైన శస్త్రచికిత్స చేసిన ప్రభుత్వాసుపత్రి వైద్యులు
 
  కర్నూలు(హాస్పిటల్), న్యూస్‌లైన్ : కాలేయంలో అరుదుగా ఏర్పడే కణతులను కర్నూలు ప్రభుత్వ సర్వజన వైద్యశాల వైద్యులు తొలగించి మహిళకు తిరిగి ప్రాణాలు పోశారు. అనంతపురం జిల్లా చర్లపల్లి గ్రామానికి చెందిన ఇ.సిద్దమ్మ(35) కొంతకాలంగా కడుపునొప్పితో బాధపడుతుండేది. ఇటీవల  నొప్పి తీవ్రం కావడంతో స్థానిక వైద్యుల సూచన మేరకు గత నెల 29న చికిత్స నిమిత్తం కర్నూలు ప్రభుత్వ సర్వజన వైద్యశాలకు  వచ్చారు.
 
 
 జనరల్ సర్జరీ విభాగం ఐదో యూనిట్ వైద్యులు ఆమెను పరీక్షించి కాలేయంలో కణతులు ఏర్పడినట్లు గుర్తించారు. గర్భాశయంపై కూడా ఇదే విధమైన కణతులు కనుగొన్నారు. ఆమెకు అన్ని రకాల వైద్యపరీక్షలు నిర్వహించి సోమవారం ఆపరేషన్ చేసి వాటిని తొలగించారు.
 
 ఈ విషయమై ప్రొఫెసర్ డాక్టర్ ఎండీ జిలానీ మాట్లాడుతూ లివర్, గర్భసంచిపైన హైడాటిడ్ సిస్ట్‌లు చాలా అరుదుగా ఏర్పడుతుంటాయన్నారు. కలుషితమైన కూరగాయలు సరిగ్గా శుభ్రం చేయకుండా, సరిగ్గా ఉడికించకుండా తినడం వల్ల ఇలాంటి సమస్యలు వస్తాయన్నారు. కాలే యం వద్ద రెండు, గర్భాశయం వద్ద ఒక కణతిని తొలగించినట్లు చెప్పారు. ఆపరేషన్ చేసిన వారిలో అసిస్టెంట్ ప్రొఫెసర్ డాక్టర్ రామకృష్ణనాయక్, పీజీ డాక్టర్ మూర్తి ఉన్నట్లు ఆయన తెలిపారు.