‘సారూ.. మంచిగ చెప్పిండ్రు..' అంద‌రు మూడు తోవల పోతున్నరు!

సాక్షి, ఆదిలాబాద్‌: ‘రాం రామే.. రాజన్న. ఏం సంగతే. ఇయ్యల్ల పొద్దెక్కుతున్న ఓళ్లస్తలేరు.. సలిగూడ రెండొద్దుల సంది జరంత ఎక్కనే ఉన్నదే. గిలాసాల గింత గరం గరం చాయ్‌ వొయ్యే..’ అంటూ భోజన్న పక్క టేబుల్‌ మీద ఉన్న న్యూస్‌పేపర్‌ను తీసుకుని బెంచీ మీద కూసున్నడు.

‘ఏం జెప్పుమంటవే.. మొన్న రెండ్రోజులుగ రెండు పార్టీలోళ్లు దావత్‌ ఇచ్చి పోయిండ్రు గదనే.. నిన్న రాతిరి ఇగ ఈ పార్టోళ్లు గూడ మందు పంపినుండే. అది తాగుడు ఒడిసే సరికి రాతిరి బారా ఏక్‌ బజే అయ్యిందే. ఇంటికోయి బుక్కెడుబువ్వ గూడ తినలేదే. పండేసరికి రెండైంది. ఇగ నాకంటే హోటలు తీసుడు ఉంటదని పొద్దుగల్లనే లేసిన. మనోళ్లకు ఇంక రాతిరిది దిగనట్లున్నదే..’ అని హోటల్‌ రాజన్న రాతిరి జరిగిన ముచ్చట చెప్పిండు.

‘ఆవే భోజన్న.. నాకు తెల్వక అడుగుతున్న. ఏ పార్టోళ్లచ్చినా మనూళ్లే మస్తు పబ్లికు అస్తున్నరు.. అందరికీ జై గొడుతున్నరు.. ఆడోళ్లు మంగళారతులు పడుతున్నరు. ఆఖిరికి యాడికోతదో.. ఓళ్లను గెలిపిస్తరోనే..!’ అని పాలు మరగవెట్టుకుంట మల్ల రాజన్ననే అన్నడు.

‘అరె.. నువ్వు గమ్మతు మాట్లాడుతవేందే రాజన్న.. ఇగ ఊళ్లేకు పెద్దమనిషి అచ్చినంక సూడతందుకై న ఊరోళ్లు రారాయే.. అందరితోని మంచిగుండాల్నె బాపు. రేపు ఓళ్లు గెలుస్తరో తెల్వది.. ఓళ్లతోని పనివడతదో తెలుస్త దాయే..’ అని భోజన్న చెప్పుకచ్చిండు. ఇంతల.. నిర్మలక్కడికెళ్లి బైకు మీద గంగాధర్‌ సార్‌ అచ్చిండు. రాజన్న హోటల్‌ కాడ బండి ఆపి.. ‘ఏం భోజన్న నమస్తే.. ఏమంటుండు మన రాజన్న. మనూళ్లే గాలి ఎటున్నదే మరి..?’ అనుకుంట అచ్చి బెంచీ మీద కూసున్నడు.

‘ఏమో సార్‌.. ఈసారి ఓట్లల ఎటూ చెప్పస్త లేదు. మనూరోళ్లు ఓళ్లకు ఓట్లు గుద్దతరో తెలుస్తలేదు. అన్ని పార్టీలకు తిరుగుతున్నరు. అందరికాడికి పోతున్నరు. ఏమిచ్చినా తీసుకుంటున్నరు..’ అని భోజన్న చెప్పిండు. ‘సార్‌.. మనూళ్లే గాలి ఎటుంటదో చెప్పలేం గన్ని.. గ కేసీయారు, రేవంతంరెడ్డి, ప్రియాంకగాంధీ, మోదీ సారు.. గీళ్లంతా గాలి మోటర్లల మస్తు అస్తున్నరు. మనక్కడ బాగ దిరుగుతున్నరు. దినాం టీవీలల్ల కనవడే పెద్ద పెద్దోళ్లు మన కండ్లముంగట కనిపించే సరికి గమ్మతనిపిస్తుంది. గిట్ల ఎప్పుడు రాలే సారు. పార్టీల ముచ్చటేందో గన్ని.. గ పెద్దోళ్లను సూడతందుకే మస్తుమంది పోతున్నరు.’ అని రాజన్న ఉడుకుతున్న చాయ్‌ను కలుపుకుంట ముచ్చట పెట్టిండు.

‘ఆ.. ఏమున్నది రాజన్న ఎన్నికలన్నంక ఓళ్ల పార్టీని గెలిపించుకునేతందుకు ఆళ్లు అస్తనే ఉంటరు. యాడనో ఢిల్లీల ఉండేటోళ్లు.. మన గల్లీ కాడిదాకా ఏంటికస్తరంటవ్‌..? ఓట్ల కోసమే గదా. ఈసారి మన రాష్ట్రంల ఎన్నికలు ఓళ్లకో ఒక్కళ్లకు అన్నట్లు లేవు. అందుకు గ పెద్దలీడర్లు అస్తున్నరు..’ అని గంగాధర్‌ సార్‌ చెప్పిండు.

‘సార్‌.. మనూరి సంగతి ఇడిసిపెట్టుండ్రి.. మన జిల్లల గాలి ఎటుంటది.. ఓళ్లు గెలిసేటట్టున్నరు..’ అని అప్పుడే చేసిన గోల్డన్‌ చాయ్‌ సార్‌ చేతికందిస్తూ రాజన్న అడిగిండు. ‘ఏమో.. రాజన్న మనూళ్లే ఉన్నట్లనే జిల్లాల గూడ గదే ముచ్చటున్నది. ఓళ్లకేం చెప్పస్తలేదు. అన్ని పార్టీలోళ్లు మస్తు తిరుగుతున్నరు. మస్తు కర్సువెడుతున్నరు. అన్ని నియోజకవర్గాలల్ల ఓట్లు ఎటువడుతయో ఇప్పుడైతే చెప్పుడు కష్టంగనే ఉన్నది. ఏ పార్టీకాపార్టీ గట్టిగనే కష్టపడుతున్నయ్‌. సగం, సగం చెబుదామంటే.. మూడో పార్టీ గూడ నేనేం తక్కువనా.. అన్నట్టున్నది. ఓళ్లు గెల్సినా గొన్ని ఓట్లతోనే గెలుస్తరనైతే అంటున్నరు..’ అని గంగాధర్‌ సార్‌ వివరించిండు.

ఇంతలో.. రాజన్న హోటల్‌ కాడికి నర్సయ్య అచ్చిండు. ‘సార్‌.. మీరన్ని తెల్సినోళ్లు. దినాం నిర్మల్ల సార్లతోని తిరుగుతరు గదా.. మరి ఏ పార్టీవోల్లకు ఓటేస్తే మంచిదంటరు..’ అని నర్సయ్య అడిగిండు. ‘సూడు నర్సన్న.. ఓటనేది ఒకళ్లు చెప్తే ఏసేది గాదు. మనమే మంచిగ ఆలోచించుకుని ఏయాలే. ఇయ్యల్ల ఏ పార్టీ ఏమంటున్నది.. ఏ అభ్యర్థి ఏం జెపుతున్నడు.. అన్నది సూడాలె. గాలి ఎటుంటే అటు పోవుడు గాదు. మన మంచిచెడ్డలకు, మన పిల్లగాండ్ల కోసం పనికొచ్చెటోళ్లకు ఓటేయ్యాలె. సూడు.. ఇప్పుడు నిల్సున్నోళ్లల నీకు సై అనిపించినోళ్లకు ఓటేయ్‌. నేను జెప్పినోళ్లకో.. ఇంకొక్కళ్లు చెప్పినోళ్లకో ఓటేసుడు కరెక్టు గాదు. నీది నువ్వే ఆలోచించాలె. అసలైన పనిమంతుడికి ఓటెయ్యాలె..’ అని గంగాదర్‌ సార్‌ వివరించిండు. ఆయన మాట్లాడినంత సేపూ.. రాజన్న హోటల్‌ కాడ ఉన్నోళ్లందరూ మంచిగ ఇన్నరు.

‘సారు.. మంచిగ చెప్పిండ్రు. ఇయ్యళ్ల పైసలిస్తుండ్రని, మందు పోస్తున్నరని ఆశ పడితే.. ఐదేండ్ల ముచ్చట ఉత్తదే అయితది..’ అని నర్సన్న రెండు చేతులు జోడించిండు. ఇంతలనే బడికి టైం అయితుందని.. గంగాధర్‌ సార్‌ బండి తీసుకుని వాళ్లందరికీ రాంరాం చెప్పి బడికి పోయిండు. ఇగ అక్కడునోళ్లందరు మల్ల రోజటి లెక్కనే ఊరి కాడికెళ్లి మొదలువెడితే.. పట్నం దాకా రాజకీయాల ముచ్చట్ల పడ్డరు.