ఫార్మాస్యూటికల్స్‌ వృద్ది అంతంతే | Sakshi
Sakshi News home page

ఫార్మాస్యూటికల్స్‌ వృద్ది అంతంతే

Published Fri, Feb 10 2023 8:14 PM

Indian Pharma Market Has Been Estimated To Have Grown By Just 2.3 Percent In January - Sakshi

హైదరాబాద్, బిజినెస్‌ బ్యూరో: భారత ఫార్మాస్యూటికల్స్‌ మార్కెట్‌ 2023 జనవరిలో 2.3 శాతం వృద్ధి చెందింది. 2022 జూన్‌ నుంచి పోల్చితే ఇదే అత్యల్పం కావడం గమనార్హం. గతేడాది గరిష్ట అమ్మకాలు నమోదు కావడం, కాలానుగుణ ప్రభావం ఇందుకు కారణమని ఇండియా రేటింగ్స్, రిసర్చ్‌ తెలిపింది.

ఇప్పటికే ఉన్న ఉత్పత్తులపై తీసుకున్న ధరల పెంపు గత నెలలో మొత్తం మార్కెట్‌ పనితీరుకు కీలకంగా ఉంది. అయితే పరిమాణాలు క్షీణించాయని వివరించింది. ఆల్‌ ఇండియన్‌ ఒరిజిన్‌ కెమిస్ట్స్, డిస్ట్రిబ్యూటర్స్‌ ప్రకారం 2022 జనవరిలో పరిశ్రమ 14.1 శాతం, డిసెంబర్‌లో 10.4 శాతం దూసుకెళ్లింది. గతేడాది ధరలు 5.8 శాతం పెరిగితే, జనవరిలో ఇది 5.9 శాతంగా ఉంది.

కొత్త ఉత్పత్తుల రాక 1.8 శాతం పెరిగింది. 2022లో ఇది 2.8 శాతం. పరిమాణం 5.5 నుంచి 5.4 శాతానికి క్షీణించింది. భారత ఫార్మాస్యూటికల్స్‌ మార్కెట్‌ 2021లో 14.9 శాతం, 2022లో 8 శాతం దూసుకెళ్లింది. 2023–24లో పరిశ్రమ 8–10 శాతం వృద్ధికి ఆస్కారం ఉంది. 2023 జనవరిలో డెర్మటాలాజికల్, గైనకాలాజికల్‌ విభాగం ఔషధాల అమ్మకాలు వరుసగా 11, 10 శాతం పెరిగాయి. విటమిన్స్‌ విక్రయాలు అతి తక్కువగా 0.3 శాతం అధికం అయ్యాయి.    

Advertisement
 
Advertisement
 
Advertisement