● దోపిడీకి పక్కా ప్రణాళికలు ● శ్రమశక్తి సంఘాల ముసుగులో దోచుకునేలా కుట్రలు ● ఉపాధి మేట్లుగా 95 శాతం అనుయాయులే ● వారి చేతుల్లోనే హాజరు, కూలీల డిమాండ్‌

Published Thu, Mar 20 2025 1:57 AM | Last Updated on Thu, Mar 20 2025 1:53 AM

● దోపిడీకి పక్కా ప్రణాళికలు ● శ్రమశక్తి సంఘాల ముసుగులో

వైఎస్సార్‌సీపీ పాలనలో స్వర్ణయుగం

వైఎస్సార్‌ సీపీ హయాంలో ఉపాధి కూలీల సంక్షేమానికి గత సీఎం వైఎస్‌ జగన్‌మోహన్‌న్‌రెడ్డి ప్రత్యేక చొరవ తీసుకున్నారు. రికార్డు స్థాయిలో పనులు కల్పించారు. ఎనన్‌ఐసీ సర్వర్‌తో ప్రతి పనినీ పర్యవేక్షిస్తూ పైసా అవినీతికి తావు లేకుండా చర్యలు చేపట్టారు. శ్రమశక్తి సంఘాలతో కూలీల శ్రమదోపిడీని గుర్తించి వాటిని రద్దు చేశారు. ప్రతి పైసాను కష్టపడిన కూలీల ఖాతాకు చేర్చారు. ఫలితంగా అప్పటికే ఇతర ప్రాంతాలకు వలస వెళ్లిన వారు సైతం స్వగ్రామాలకు చేరుకుని ఉపాధి పనులతో ఎంతో సంతోషంగా జీవించారు. గత ఐదేళ్లపాటు ఎలాంటి కష్టాలు లేకుండా జీవించిన ఉపాధి కూలీలకు ప్రస్తుత కూటమి పాలనలో కష్టాలు తప్పడం లేదు.

ఉపాధి హామీ పేదలకు వరం. వలసల నివారణే దీని లక్ష్యం.. అయితే ఆ ఆశయానికి కూటమి సర్కారు తూట్లు పొడుస్తోంది. ఉపాధి కూలీల కడుపుకొట్టడానికి శ్రమశక్తి సంఘాల పేరుతో పచ్చనేతలు పక్కా ప్రణాళికలు రచించారు. మేట్ల నియామకంలో సీనియారిటీకి తిలోదకాలిచ్చి కూటమి నేతల సిఫార్సులకు పెద్ద పీట వేశారు. ఫలితంగా పచ్చనేతలకు సిరులు.. కూలీలకు ఇక కష్టాలు మిగలనున్నాయి.

కార్వేటినగరం మండలంలో ఉపాధి పనులు చేస్తున్న కూలీలు

చిత్తూరు కలెక్టరేట్‌ : కూటమి అధికారంలోకి వచ్చిన తరువాత గతంలో ఎన్నడూ లేని విధంగా ఉపాధి హామీ పథకంలో అక్రమాలు ఊపందుకున్నాయి. ఎన్ని మార్గాలున్నాయో, అన్ని మార్గా ల్లో ఉపాధి నిధులను తమ జేబుల్లోకి వేసుకునేందుకు పచ్చ నేతలు పక్కా ప్రణాళికలు రచించుకున్నారు. మస్టర్లలో దొంగపేర్లు రాసి సొమ్మంతా సొంత ఖాతాల్లో వేసుకునేందుకు టీడీపీ నాయకులు రంగం సిద్ధం చేశారు. కొత్తగా ఏర్పాటు కాబోతున్న శ్రమశక్తి సంఘాల ముసుగులో పక్కా దోపిడీకి స్కెచ్‌ వేసినట్లు తెలుస్తోంది. ప్రతి 25 నుంచి 50 మంది కూలీలకు ఓ శ్రమశక్తి సంఘం ఏర్పాటు చొప్పున ఈ ప్రక్రియ జిల్లాలో దాదాపు పూర్తికావొస్తోంది. మొత్తం ఏడు అసెంబ్లీ నియోజకవర్గాల్లోని 32 మండలాల్లో యాక్టివ్‌ జాబ్‌కార్డుల సంఖ్య 2.18 లక్షలు కాగా, వీటి పరిధిలో 3.62 లక్షల మంది ఉపాధి కూలీలు నమోదయ్యారు. ఈ లెక్కన జిల్లా వ్యాప్తంగా దాదాపు 11,500 శ్రమశక్తి సంఘాలు కొత్తగా ఏర్పాటు కాబోతున్నాయి.

దోపిడీకే మేట్లు

ఉపాధి నిధులను అందిన కాటికి దోచుకునేందుకు మేట్లు విధానాన్ని కూటమి సర్కారు అమల్లోకి తీసుకొచ్చిందని విమర్శలు వెలువెత్తుతున్నాయి. మేట్లుగా ఎంపికై న వారు కూలీలను ఉపాధి పనులకు తీసుకెళ్లడం, వారి అవసరాల మేరకు ఆన్‌లైన్‌లో డిమాండ్‌ పెంచుకోవడం, హాజరు నమోదు, వేతనాలకు సిఫారసు తదితర పనులను పర్యవేక్షించాల్సి ఉంది. ఈ మొత్తం ప్రక్రియనే టీడీపీ నేతల అక్రమాలకు ఊతమైంది. మస్టర్లలో దొంగ పేర్లు చేర్చి, ఉపాధి కూలీల సొమ్ము కాజేసేలా పక్కా ప్రణాళికను రచించారు. ఆ మేరకు ముందుకు అడుగులు వేస్తున్నారు. మేట్‌గా ఉన్న వారికి వారి పరిధిలోని ఒక్కొక్క కూలీపై రూ.1.50 చొప్పున చెల్లిస్తారు. ఈ లెక్కన జిల్లాలో యాక్టివ్‌గా ఉన్న 2.18 లక్షల మంది కూలీలకుగాను రోజుకు రూ.3.27 లక్షలు మేట్ల ఖాతాలకు చేరుతోంది. 100 రోజులకు రూ.3.27 కోట్లు చెల్లించాల్సి ఉంటుంది. ఈ రకంగా కూలీల శ్రమదోపిడీకి కూటమి సర్కార్‌ తెరలేపింది.

పచ్చనేతలు సూచించిన వారికే పెద్దపీట

జిల్లా సమాచారం

జిల్లాలో యాక్టివ్‌ జాబ్‌కార్డులు : 2.18 లక్షలు

నమోదైన కూలీల సంఖ్య : 3.62 లక్షలు

2024–25 లో పనిదినాల లక్ష్యం : 19,83,401

పూర్తయిన పనిదినాలు : 17,50,438

ఏర్పాటు కాబోతున్న

శ్రమశక్తి సంఘాలు సుమారు : 11,500

దోచుకునేందుకే..

కొత్త కొత్తగా వింత నిర్ణయాలు కూటమి ప్రభుత్వ పాలనలో అమలవుతున్నాయి. ఈ నిర్ణయాలన్నీ మార్పుల కోసం కాదు.. దోచుకునేందుకే. పూటగడవని ఉపాధి కూలీలకు అన్యాయం జరిగితే ఊరుకునేది లేదు. ఉపాధి హామీ పథకాన్ని పకడ్బందీగా అమలు చేయాలి. మేట్లు విధానం రూపంలో ఉపాధి నిధులను పక్కదారి పట్టించేందుకు కుట్రలు చేస్తున్నారు. ఇలాంటి కుట్రలను సహించేది లేదు. ఉపాధి కూలీలకు మెరుగైన సౌకర్యాలు కల్పించాలని మేము డిమాండ్‌ చేస్తుంటే అవి కల్పించకుండా దోపిడీకి స్కెచ్‌ వేయడం అన్యాయం.

– వాడ గంగరాజు,

సీపీఎం జిల్లా కార్యదర్శి, చిత్తూరు జిల్లా

ప్రభుత్వ నిబంధనల మేరకు ప్రతి శ్రమశక్తి సంఘానికి ఓ మేట్‌ను నియమించారు. అయితే స్థానిక టీడీపీ ప్రజాప్రతినిధులు ఒత్తిళ్లకు తలొగ్గిన డ్వామా అధికారులు నిబంధనలను తుంగలో తొక్కి, ఇష్టారాజ్యంగా వ్యవహరిస్తున్నారు. ఉపాధి కూలీల్లో సీనియారిటీకి తిలోదకాలిచ్చి, పచ్చనేతలు సూచించిన వారికే పెద్దపీట వేశారు. ఇలా జిల్లాలోని ప్రతి గ్రామంలోనూ పచ్చనేతలు గుర్తించిన వారే క్షేత్ర సహాయకులు, మేట్లగా చలామణి అవుతున్నారు. ఈ విధానంపై ఉపాధి కూలీల్లో తీవ్ర వ్యతిరేకత వ్యక్తమవుతోంది. పరోక్షంగా టీడీపీ నేతలకు దోచిపెట్టేందుకే మేట్ల వ్యవస్థను కూటమి సర్కార్‌ అమల్లోకి తెచ్చిందని మండిపడుతున్నారు. మండుటెండలో శ్రమించే తమపై వీరి పెత్తనం ఏమిటని కూలీలు అసహనం వ్యక్తం చేస్తున్నారు. అయితే ఇదే విషయాన్ని బాహటంగా ప్రశ్నిస్తే వేతనాల్లో కోత వేస్తారమోననే భయం కూడా కూలీలను వెంటాడుతోంది.