హమాస్‌తో కాల్పుల విరమణ ఒప్పందం.. ఆమోదించిన ఇజ్రాయెల్‌ భద్రతా కేబినెట్‌

టెల్‌అవీవ్‌:హమాస్‌తో  కాల్పుల విరమణ ఒప్పందానికి శుక్రవారం(జనవరి17) ఇజ్రాయెల్‌ సెక్యూరిటీ కేబినెట్‌ ఆమోదం తెలిపింది. దీనికి ప్రభుత్వం గ్రీన్‌సిగ్నల్‌ ఇవ్వాలని కేబినెట్‌ సిఫార్సు చేసినట్లు ప్రధాని నెతన్యాహు కార్యాలయం వెల్లడించింది. ఆదివారం నుంచి కాల్పుల విరమణ  ఒప్పందం అమలయ్యే అవకాశాలున్నాయి.

అన్ని రాజకీయ,భద్రతా,మానవతా అంశాలను సమీక్షించిన తర్వాత ఈ ప్రతిపాదిత ఒప్పందాన్ని ఆమోదించాలని సెక్యూరిటీ కేబినెట్‌ ప్రభుత్వానికి సిఫార్సు చేసినట్లు ప్రధాని కార్యాలయం తెలిపింది. ఈ ఒప్పందానికి తుది ఆమోదం తెలిపేందుకు పూర్తిస్థాయి కేబినెట్‌ కూడా తక్షణమే సమావేశమవుతుందని వెల్లడించింది. అమెరికా,ఖతార్‌ మధ్యవర్తిత్వంతో ఇజ్రాయెల్‌-హమాస్‌ మధ్య కాల్పుల విరమణ,బందీల విడుదల ఒప్పంద ప్రక్రియ కొనసాగుతోంది.

ఒప్పందం ప్రకారం హమాస్‌ వద్ద ఉన్న బందీల విడుదలకు ప్రతిగా పాలస్తీనా ఖైదీలను ఇజ్రాయెల్ విడిచిపెట్టనుంది. కొన్ని రోజుల తర్వాత పూర్తిస్థాయిలో యుద్ధాన్ని ముగించనున్నారు. ఇక ఈ ఒప్పందానికి సంబంధించి బందీల కుటుంబాలకు ఇప్పటికే సమాచారం ఇచ్చినట్లు పీఎం ఆఫీసు వెల్లడించింది.

కాగా, 2023 అక్టోబర్‌ 7న ఇజ్రాయెల్‌పై హమాస్‌ చేసిన మెరుపుదాడిలో 1200 మందికి పైగా ఇజ్రాయెల్‌ పౌరులు చనిపోయారు. మరో 250 మందిని హమాస్‌ మిలిటెంట్లు బందీలుగా పట్టుకెళ్లారు. దీంతో హమాస్‌పై ఇజ్రాయెల్‌ భీకరంగా విరుచుకుపడింది. హమాస్‌ అగ్రనేతలు ఇస్మాయెల్‌ హనియా, యహ్యా సిన్వార్‌లను హతమార్చింది. గాజాపై ఇప్పటివరకు చేసిన దాడుల్లో 46వేల మందికిపైగానే పాలస్తానీయులు మృతి చెందినట్లు అంచనాలున్నాయి.