ద.కొరియాలో విషాదం.. ప్రమాదంలో 179 మంది మృతి

Photo Source : The Japan Times

సియోల్‌: దక్షిణ కొరియాలో విమాన ప్రమాదం పెను విషాదాన్ని నింపింది. ప్రమాదం కారణంగా విమానంలో ప్రయాణిస్తున్న 179 మంది దుర్మరణం చెందారు. కేవలం ఇద్దరు విమాన సిబ్బంది మాత్రమే ప్రాణాలతో బయటపడ్డారు. విమానాశ్రయంలో ఇంకా సహాయక చర్యలు కొనసాగుతున్నాయి. ప్రమాదానికి సంబంధించిన వీడియోలు సోషల్‌ మీడియాలో చక్కర్లు కొడుతున్నాయి. 

వివరాల ప్రకారం.. దక్షిణ కొరియాలోని మువాన్ అంతర్జాతీయ విమానాశ్రయంలో విమానం ప్రమాదం జరిగింది. థాయ్‌ రాజధాని బ్యాంకాక్‌ నుంచి బయల్దేరిన ది జేజు ఎయిర్‌ ఫ్లైట్‌కు చెందిన 7C2216 నంబర్‌ బోయింగ్‌ 737-800 శ్రేణి విమానం ల్యాండ్‌ అవుతూ అదుపుతప్పింది. ఈ క్రమంలో విమానాశ్రయంలోని గోడను ఢీకొని మంటల్లో చిక్కుకొని పేలిపోయింది. విమానం ల్యాండ్‌ కావడానికి ప్రయత్నించిన సమయంలో ల్యాండింగ్‌ గేర్‌ సమస్యతోనే ఈ ప్రమాదం జరిగినట్లు అధికారులు అనుమానిస్తున్నారు.  

మృతుల సంఖ్య 179..
ఈ ప్రమాదం కారణంగా విమానంలో ప్రయాణిస్తున్న 179 మంది మృతిచెందారు. ఇద్దరు సిబ్బంది మాత్రమే ప్రాణాలతో బయటపడ్డారు. విమాన ప్రమాదం జరిగిన సమయంలో మొత్తం 175 మంది ప్రయాణికులు, ఆరుగురు సిబ్బంది విమానంలో ఉన్నారు. మృతులంతా దక్షిణ కొరియాకు చెందిన వారే ఉన్నట్టు సమాచారం. విమానం కేవలం ఇద్దరు థాయ్‌ల్యాండ్‌కు చెందిన దేశస్తులే ఉన్నారని తెలుస్తోంది. 

అయితే, ఈ విమానం అప్పటికే ల్యాండింగ్‌కు యత్నించి విఫలమైందని అధికారులు పేర్కొన్నారు. ఇది నేలపైకి దిగిన తర్వాత రన్‌వే చివరికి వస్తున్న సమయంలో కూడా వేగాన్ని నియంత్రించుకోవడంలో విఫలమైనట్లు చెప్పారు. ఇది ఎయిర్‌పోర్టు గోడను ఢీకొనడంతో విమానంలో నుంచి ఒక్కసారిగా మండిపోయి మంటలు వ్యాపించినట్లు తెలిపారు. దీంతో, ఎయిర్‌పోర్టు వద్ద దట్టమైన పొగ అలుముకుంది.

ఈ విమాన ప్రమాదంపై తాత్కాలిక అధ్యక్షుడు చోయ్‌ సాంగ్‌ మోక్‌ స్పందించారు. తక్షణమే అవసరమైన అన్ని చర్యలు చేపట్టాలని ఆదేశాలు జారీ చేశారు. ఈ మేరకు ఇంటీరియర్‌, ల్యాండ్‌ మినిస్టర్లకు, పోలీసులు, అగ్నిమాపక శాఖకు మార్గదర్శకాలు జారీ చేశారు. ముయాన్‌ అంతర్జాతీయ విమానాశ్రయంలో అన్ని విమానాల రాకపోకలను రద్దు చేశారు.