‘రత్నగిరి...చివరాఖరికి..’పై జిల్లా యంత్రాంగం సీరియస్‌

‘రత్నగిరి...చివరాఖరికి..’పై జిల్లా యంత్రాంగం సీరియస్‌

అన్నవరం దేవస్థానంపై సోమవారం

సమీక్షించనున్న జిల్లా కలెక్టర్‌ షణ్మోహన్‌

అన్నవరం: రాష్ట్రంలోని ప్రముఖ పుణ్యక్షేత్రాలకు ఇంటరాక్టివ్‌ వాయిస్‌ రెస్పాన్స్‌ సిస్టమ్‌ (ఐవీఆర్‌ఎస్‌) ద్వారా భక్తుల అభిప్రాయాల ఆధారంగా ఇచ్చిన ర్యాంకుల్లో అన్నవరం దేవస్థానం చివరాఖరు ఏడో ర్యాంకు రావడంపై జిల్లా యంత్రాంగం సీరియస్‌గా తీసుకుంది. జిల్లాలో గల ఏకై క పెద్ద పుణ్యక్షేత్రమైన అన్నవరంలోని శ్రీవీర వేంకట సత్యనారాయణ స్వామివారి దేవస్థానం రాష్ట్రంలో చివరి ర్యాంకు రావడంపై శుక్రవారం సాక్షి దినపత్రికలో ‘ ‘రత్నగిరి ..చివరాఖరికి...’ శీర్షికన వార్త ప్రచురితమైన విషయం తెలిసిందే. ఆ వార్తలో ఏడో ర్యాంకు రావడానికి దారితీసిన పరిస్థితులను కూడా ప్రస్తావించడం జరిగింది. దీనిపై జిల్లా కలెక్టర్‌ షణ్మోహన్‌ స్పందించారు. అతి తక్కువ సమయంలో దేవస్థానం పరిస్థితి ఎందుకిలా దిగజారిందనే దానిపై దేవస్థానం అధికారులతో స్వయంగా జిల్లా కలెక్టర్‌ షణ్మోహన్‌ సోమవారం చర్చించనున్నారు. ఈ మేరకు అన్నవరం దేవస్థానంలో సమావేశం ఏర్పాటు చేశారు. దీంతో బాటు దేవస్థానం ఆర్థిక పరిస్థితి గతంలో ఎన్నడూ లేని విధంగా దిగజారడంపైన కూడా చర్చించనున్నారు. వీటితో బాటు ఏ విధమైన చర్యలు తీసుకుంటే దేవస్థానానికి తిరిగి పూర్వ వైభవం వస్తుందనే దానిపై కూడా చర్చించనున్నారు. సిబ్బంది పనితీరుపై సమీక్షించనున్నారు. దేవస్థానం చైర్మన్‌ ఐవీ రోహిత్‌, ఈఓ వీర్ల సుబ్బారావు ఇతర అధికారులు కూడా పాల్గొంటారని దేవస్థానం వర్గాలు తెలిపాయి.

1/1

‘రత్నగిరి...చివరాఖరికి..’పై జిల్లా యంత్రాంగం సీరియస్‌