లవ్‌ హాస్టల్‌

విక్రాంత్‌ మెస్సే, ‘దంగల్‌’ ఫేమ్‌ శాన్యా మల్హోత్రా జంటగా బాబీ డియోల్‌ ముఖ్యపాత్రలో నటించనున్న నూతన చిత్రాన్ని గురువారం అధికారికంగా ప్రకటించారు. ‘గుర్గావ్‌’ చిత్రదర్శకుడు శంకర్‌ రమణ్‌ దర్శకత్వంలో తెరకెక్కనున్న ఈ చిత్రాన్ని మనీష్‌ ముంద్రాతో కలిసి షారుక్‌ ఖాన్‌ తన నిర్మాణ సంస్థ రెడ్‌ చిల్లీస్‌ పతాకంపై నిర్మించనున్నారు. నార్త్‌ ఇండియాలో జరిగిన  ఘటనల ఆధారంగా ‘లవ్‌హాస్టల్‌’ సినిమాను రూపొందించనున్నారు. వచ్చే ఏడాది మొదట్లో షూటింగ్‌ ఆరంభం కానుంది. ఈలోపు ఈ సినిమాలో నటించనున్న నటీనటులందరూ వర్క్‌షాప్స్‌లో పాల్గొంటారని చిత్రబృందం తెలిపింది. ఊపిరిబిగపట్టే క్రైమ్‌ థ్రిల్లర్‌గా ఈ చిత్రం సాగుతుందని  నిర్మాతలు చెప్పారు.