సైఫ్‌అలీఖాన్‌పై దాడి చేసిన వ్యక్తి అరెస్టు

ముంబయి: బాలీవుడ్‌ నటుడు సైఫ్‌అలీఖాన్‌పై అతడి ఇంట్లోనే దాడికి పాల్పడ్డ వ్యక్తిని పోలీసులు పట్టుకున్నారు. దాడి చేసిన వ్యక్తిని ఆకాష్‌ కైలాష్‌ కన్నోజియా(31)గా గుర్తించారు. ఛత్తీస్‌గఢ్‌లోని దుర్గ్‌ రైల్వేస్టేషన్‌లో ఆకాష్‌ను అరెస్టు చేసినట్లు సమాచారం. ముంబై-హౌరా జ్ఞానేశ్వరి ఎక్స్‌ప్రెస్‌లో దుర్గ్‌ రైల్వేస్టేషన్‌కు చేరుకోగానే ఆకాష్‌ను శనివారం(జనవరి18) మధ్యాహ్నం రెండు గంటలకు అదుపులోకి తీసుకున్నట్లు రైల్వే ప్రొటెక్షన్‌ఫోర్స్‌(ఆర్పీఎఫ్‌) పోలీసులు తెలిపారు.

ముంబయి పోలీసులు ఇచ్చిన సమాచారంతో ఆకాష్‌ను ఆర్పీఎఫ్‌ పోలీసులు పట్టుకున్నారు. ప్రస్తుతం అతను ఆర్పీఎఫ్‌ పోలీసుల అదుపులోనే ఉన్నాడు. దుండగుడిని తీసుకురావడానికి ముంబై నుంచి పోలీసుల బృందం దుర్గ్‌కు బయలుదేరింది.  ఆర్పీఎఫ్‌ పోలీసులు అడ్డగించి ఎక్కడికి వెళ్తున్నావ్‌ అని అడగ్గాతొలుత నాగ్‌పూర్‌ అని చెప్పిన ఆకాష్‌ తర్వాత బిలాస్‌పూర్‌ అని మాట మార్చడంతో వారి అనుమానం బలపడింది.  

గురువారం తెల్లవారుజామున 2.30 గంటలకు ముంబై బాంద్రా ప్రాంతంలోని సైఫ్‌ ఇంట్లోనే అతడిపై దాడి జరిగింది. అర్ధరాత్రి చోరీకి యత్నించిన దుండగుడిని అడ్డుకునేందుకు ప్రయత్నించగా సైఫ్‌పై కత్తితో దాడి చేసి పారిపోయాడు. అనంతరం తీవ్ర గాయాలతో సైఫ్‌ లీలావతి ఆస్పత్రిలో చేరారు. అనంతరం సైఫ్‌కు సర్జరీ చేసిన వైద్యులు అతడి శరీరం నుంచి కత్తి ముక్కను బయటికి తీశారు. ప్రస్తుతం ఐసీయూ నుంచి బయటపడ్డ సైఫ్‌ అలీఖాన్‌ జనరల్‌ వార్డులోనే చికిత్స పొందుతున్నారు. ఆయనను మరో మూడు రోజుల్లో డిశ్చార్జ్‌ చేస్తామని లీలావతి ఆస్పత్రి వైద్యులు తెలిపారు.

సైఫ్‌అలీఖాన్‌ తమ కుమారుడి కేర్‌టేకర్‌ను కాపాడేందుకే దుండుగుడితో పోరాడి గాయాల పాలయ్యారని ఆయన సతీమణి బాలీవుడ్‌ నటి కరీనాకపూర్‌ తెలిపారు. దుండగుడు ఆవేశంగా తన భర్తను పొడిచాడని  అందుకే తీవ్ర గాయాలయ్యాయని చెప్పారు. దాడి అనంతరం తాను భయాందోళనలకు గురయ్యానని, తన సోదరి కరిష్మాకపూర్‌తో కలిసి ఆమె ఇంటికి వెళ్లిపోయానని కరీనా తెలిపారు.