ధన్‌ఖడ్‌పై అవిశ్వాసం అందుకే..ఖర్గే కీలక వ్యాఖ్యలు

న్యూఢిల్లీ:ఉపరాష్ట్రపతి,రాజ్యసభ చైర్మన్‌ జగ్‌దీప్‌ ధన్‌ఖడ్‌పై అవిశ్వాస తీర్మానం నోటీసు ఇవ్వడంపై కాంగ్రెస్‌ చీఫ్‌,రాజ్యసభలోప్రతిపక్ష నేత మల్లికార్జున ఖర్గే బుధవారం(డిసెంబర్‌11) స్పందించారు. ధన్‌ఖడ్ ప్రభుత్వానికి పెద్ద అధికార ప్రతినిధి అని ఎద్దేవా చేశారు. రాజ్యసభలో గందరగోళానికి ప్రధాన కారణం చైర్మన్‌ ధన్‌ఖడేనన్నారు. 

1952 నుంచి ఇప్పటివరకు ఏ రాజ్యసభ చైర్మన్‌పై అవిశ్వాస తీర్మానం నోటీసులివ్వలేదని వాళ్లంతా సభను హుందాగా ఎలాంటి పక్షపాత వైఖరి లేకుండా నడపడమే ఇందుకు కారణమన్నారు. కాగా, ధన్‌ఖడ్‌కు వ్యతిరేకంగా ప్రతిపక్ష ‘ఇండియా’ కూటమిపార్టీలు మంగళవారం అవిశ్వాస తీర్మానం నోటీసు ఇచ్చాయి. అధికార పక్షానికి కొమ్ముకాస్తున్న ధన్‌ఖడ్‌ను రాజ్యసభ చైర్మన్‌ పదవి నుంచి తొలగించాల్సిందేనని తేల్చిచెప్పాయి. అవిశ్వాస తీర్మానం నోటీసుపై ఇండియా కూటమి పార్టీలైన కాంగ్రెస్, ఆర్జేడీ, టీఎంసీ, సీపీఐ, సీపీఎం, జేఎంఎం, ఆమ్‌ ఆద్మీ, డీఎంకే, సమాజ్‌వాదీ పార్టీలకు చెందిన 60 మంది ఎంపీలు సంతకాలు చేశారు. 

రాజ్యసభ చరిత్రలో చైర్మన్‌పై అవిశ్వాస తీర్మానానికి నోటీసు ఇవ్వడం ఇదే మొదటిసారి. పార్లమెంటరీ ప్రజాస్వామ్యంలో తమ హక్కుల కోసం గట్టిగా పోరాడుతామన్న సందేశం ఇవ్వడానికే అవిశ్వాస తీర్మాన నోటీసు ఇచ్చినట్లు ప్రతిపక్షాలు చెబుతున్నాయి.  ధన్‌ఖడ్‌పై అవిశ్వాస తీర్మాన నోటీసు ఇవ్వడం బాధాకరమే అయినప్పటికీ తప్పడం లేదని కాంగ్రెస్‌ ప్రధాన కార్యదర్శి జైరామ్‌ రమేశ్‌ చెప్పారు. ఆయన అన్ని పరిధులు అతిక్రమించారని, అందుకే నోటీసు ఇచ్చామని తెలిపారు. కాంగ్రెస్‌ ముఖ్యనాయకులపై బీజేపీ ఎంపీలు ఇష్టానుసారంగా నోరుపారేసుకుంటున్నా ధన్‌ఖఢ్‌ పట్టించుకోలేదని విమర్శించారు. 

ఇదీ చదవండి: ధన్‌ఖఢ్‌పై అవిశ్వాసం