Aus Vs Pak: నా రికార్డు బ్రేక్‌ చేసే సత్తా అతడికే ఉంది: ఆసీస్‌ దిగ్గజ బౌలర్‌

Published Tue, Jan 2 2024 10:27 AM | Last Updated on Tue, Jan 2 2024 11:28 AM

Aus Vs Pak Hope He Goes Past Me: McGrath Pick To Surpass Him Test wickets Tally - Sakshi

గ్లెన్‌ మెగ్రాత్‌

Australia vs Pakistan, 3rd Test: ఆస్ట్రేలియా ఆఫ్‌ స్పిన్నర్‌ నాథన్‌ లియోన్‌ ఆట తీరుపై బౌలింగ్‌ దిగ్గజం గ్లెన్‌ మెగ్రాత్‌ ప్రశంసలు కురిపించాడు. ఆసీస్‌ తరఫున తాను నెలకొల్పిన రికార్డును బద్దలు కొట్టగల సత్తా లియోన్‌కు ఉందన్నాడు. కాగా పాకిస్తాన్‌తో సొంతగడ్డపై టెస్టు సిరీస్‌ను 2-0తో సొంతం చేసుకున్న కంగారూ జట్టు.. నామమాత్రపు ఆఖరి మ్యాచ్‌కు సిద్ధమైంది.

ఆమె జ్ఞాపకార్థం ‘పింక్‌’ టెస్టు నిర్వహణ
ఇరుజట్ల మధ్య బుధవారం (జనవరి 3) నుంచి ‘పింక్‌ టెస్టు’ ఆరంభం కానుంది. సిడ్నీ క్రికెట్‌ గ్రౌండ్‌ ఇందుకు వేదిక. కాగా బ్రెస్ట్‌ క్యాన్సర్‌తో మరణించిన గ్లెన్‌ మెగ్రాత్‌ సతీమణి జ్ఞాపకార్థం ప్రతి ఏడాది పింక్‌ టెస్టును నిర్వహించడం ఆనవాయితీగా వస్తోంది. ఇందులో భాగంగా సిడ్నీలో తాజాగా జరుగనున్న మ్యాచ్‌ 16వది.

ఈ టెస్టు సందర్భంగా మెగ్రాత్‌ ఫౌండేషన్‌ విరాళాల సేకరణ చేపట్టనుంది. ఈ సందర్భంగా గ్లెన్‌ మెగ్రాత్‌ ప్రసంగిస్తూ.. నాథన్‌ లియోన్‌ బౌలింగ్‌ నైపుణ్యాలను కొనియాడాడు. ‘‘ప్రతి రికార్డును ఎవరో ఒకరు బ్రేక్‌ చేస్తారు. ఒకవేళ లియోన్‌ నన్ను దాటేస్తే అంతకంటే సంతోషం ఉండదు. అతడు అసాధారణ బౌలర్‌.

అలా అయితే అతడికి తిరుగే ఉండదు
లియోన్‌కు ఆల్‌ ది బెస్ట్‌. ఒకవేళ నాతో పాటు షానో(షేన్‌ వార్న్‌) రికార్డును కూడా అధిగమిస్తే అతిడికి తిరుగే ఉండదు. లియోన్‌ బౌలింగ్‌ నైపుణ్యాలు అద్భుతం. పరిస్థితులకు తగ్గట్లుగా ఆడటం అతడికి అలవాటు’’ అని మెగ్రాత్‌ పేర్కొన్నాడు.

కాగా ఆస్ట్రేలియా తరఫున అత్యధిక వికెట్లు పడగొట్టిన ఫాస్ట్‌ బౌలర్‌గా గ్లెన్‌ మెగ్రాత్‌ ఘనత సాధించాడు. నేటికీ అతడి రికార్డు చెక్కుచెదరకుండా ఉంది. ఆసీస్‌ తరఫున 124 టెస్టులు ఆడిన రైటార్మ్‌ పేసర్‌ మెగ్రాత్‌ 563 వికెట్లు తీశాడు.

500 వికెట్ల క్లబ్‌లో నాథన్‌ లియోన్‌
మరోవైపు.. ఆఫ్‌ స్పిన్నర్‌ నాథన్‌ లియోన్‌ ఇటీవలే 500 వికెట్ల క్లబ్‌లో చేరాడు. పాకిస్తాన్‌తో పెర్త్‌ టెస్టు సందర్భంగా ఈ మైలురాయిని చేరుకున్నాడు. తాజా పింక్‌ టెస్టుకు ముందు అతడి ఖాతాలో మొత్తంగా 505 వికెట్లు ఉన్నాయి.

సుమారు మరో నాలుగేళ్ల పాటు టెస్టు క్రికెట్‌ ఆడే సత్తా ఉన్న లియోన్‌ ఇంకో 59 వికెట్లు తీస్తే .. ఆసీస్‌ తరఫున అత్యధిక వికెట్లు తీసిన ఓవరాల్‌ బౌలర్ల జాబితాలో మెగ్రాత్‌ను అధిగమిస్తాడు. ఇదిలా ఉంటే.. ఆసీస్‌ దిగ్గజ దివంగత స్పిన్నర్‌ షేన్‌ వార్న్‌ టెస్టుల్లో 708 వికెట్లు తీసి ఎవరికీ అందనంత ఎత్తులో ఉన్నాడు.