తమిళనాడు 674/6 డిక్లేర్డ్‌

న్యూఢిల్లీ: ప్రతిష్టాత్మక రంజీ ట్రోఫీలో భాగంగా ఢిల్లీతో జరుగుతున్న మ్యాచ్‌లో తమిళనాడు భారీ స్కోరు చేసింది. గ్రూప్‌ ‘డి’లో భాగంగా జరిగిన పోరులో తమిళనాడు 674/6 వద్ద తొలి ఇన్నింగ్స్‌ డిక్లేర్‌ చేసింది. టీమిండియా ప్లేయర్‌ వాషింగ్టన్‌ సుందర్‌ (269 బంతుల్లో 152; 19 ఫోర్లు, ఒక సిక్సర్‌) భారీ సెంచరీతో కదం తొక్కగా... ప్రదోష్‌ రంజన్‌ పాల్‌ (117; 13 ఫోర్లు) శతకం చేశాడు. 

అంతకుముందు ఓపెనర్‌ సాయి సుదర్శన్‌ (213; 25 ఫోర్లు, ఒక సిక్సర్‌) కూడా ద్విశతకం నమోదు చేసుకోవడంతో తమిళనాడు భారీ స్కోరు చేయగలిగింది. నారాయన్‌ జగదీశన్‌ (65), సిద్ధార్థ్‌ (66 నాటౌట్‌) అర్ధసెంచరీలతో రాణించారు. ఢిల్లీ బౌలర్లలో నవ్‌దీప్‌ సైనీ, హిమాన్షు చౌహాన్‌ చెరో రెండు వికెట్లు  పడగొట్టారు. ఓవర్‌నైట్‌ స్కోరు 379/1తో శనివారం తొలి ఇన్నింగ్స్‌ కొనసాగించిన తమిళనాడు జట్టు ఆడుతూ పాడుతూ పరుగులు రాబట్టింది. 

అనంతరం తొలి ఇన్నింగ్స్‌ ప్రారంభించిన ఢిల్లీ... రెండో రోజు ఆట ముగిసే సమయానికి 16 ఓవర్లలో వికెట్‌ నష్టపోకుండా 43 పరుగులు చేసింది. సనత్‌ సాంగ్వాన్‌ (23 బ్యాటింగ్‌), హర్‌‡్ష త్యాగీ (15 బ్యాటింగ్‌) క్రీజులో ఉన్నారు. చేతిలో 10 వికెట్లు ఉన్న ఢిల్లీ... ప్రత్యర్థి తొలి ఇన్నింగ్స్‌ స్కోరుకు ఇంకా 631 పరుగులు వెనుకబడి ఉంది.