Ranji Trophy 2024-25: నిరాశపరిచిన కేఎస్‌ భరత్‌.. ఆంధ్ర జట్టు ఓటమి

కేఎస్‌ భరత్‌(ఫైల్‌ ఫొటో)

నాగ్‌పూర్‌: రంజీ ట్రోఫీ దేశవాళీ క్రికెట్‌ టోర్నీ సీజన్‌ను ఆంధ్ర జట్టు ఓటమితో ఆరంభించింది. మాజీ చాంపియన్‌ విదర్భ జట్టుతో సోమవారం ముగిసిన గ్రూప్‌ ‘బి’ తొలి రౌండ్‌ లీగ్‌ మ్యాచ్‌లో ఆంధ్ర జట్టు 74 పరుగుల తేడాతో పరాజయం పాలైంది.

​కాగా 318 పరుగుల లక్ష్యాన్ని ఛేదించడానికి బరిలోకి దిగిన ఆంధ్ర జట్టు రెండో ఇన్నింగ్స్‌లో 86.4 ఓవర్లలో 243 పరుగులకు ఆలౌటైంది. ఓవర్‌నైట్‌ స్కోరు 79/1తో చివరి రోజు ఆట కొనసాగించిన ఆంధ్ర జట్టు ఒకదశలో ఒక వికెట్‌ నష్టానికి 177 పరుగులతో పటిష్టంగా కనిపించింది. అయితే ఓపెనర్‌ అభిషేక్‌ రెడ్డి (78; 5 ఫోర్లు, 1 సిక్స్‌), షేక్‌ రషీద్‌ (74; 7 ఫోర్లు) 12 పరుగుల వ్యవధిలో అవుటవ్వడంతో ఆంధ్ర జట్టు పతనం మొదలైంది.

శశికాంత్‌ కాస్త పోరాడినా
వీరిద్దరు పెవిలియన్‌ చేరుకున్నాక వచ్చిన ఇతర బ్యాటర్లెవరూ క్రీజులో కుదురుకోలేకపోయారు. కెప్టెన్‌ రికీ భుయ్‌ (26; 1 ఫోర్, 1 సిక్స్‌), శశికాంత్‌ (25; 2 ఫోర్లు, 1 సిక్స్‌) కాస్త పోరాడినా...  కేఎస్‌ భరత్‌ (2), అశ్విన్‌ హెబర్‌ (3) నిరాశపరిచారు. విజయ్‌ (0), లలిత్‌ మోహన్‌ (0), సత్యనారాయణ రాజు (0) డకౌట్‌ అయ్యారు.

చివరి వికెట్‌గా శశికాంత్‌ వెనుదిరిగాడు. విదర్భ జట్టు బౌలర్లు ఆదిత్య థాకరే (4/47), హర్ష్‌ దూబే (4/69), అక్షయ్‌ వాఖరే (2/71) ఆంధ్ర జట్టు పతనాన్ని శాసించారు. ఈ గెలుపుతో విదర్భ జట్టుకు ఆరు పాయింట్లు లభించాయి. ఈనెల 18 నుంచి జరిగే తమ తదుపరి మ్యాచ్‌లో గుజరాత్‌ జట్టుతో ఆంధ్ర జట్టు ఆడుతుంది.

చదవండి: మళ్లీ శతక్కొట్టాడు: ఆసీస్‌తో టెస్టులకు టీమిండియా ఓపెనర్‌గా వస్తే!