IND vs BAN: ఛాంపియన్స్‌ ట్రోఫీ.. చరిత్రకు అడుగు దూరంలో విరాట్‌ ‍కోహ్లి

స్వ‌దేశంలో ఇంగ్లండ్‌తో వ‌న్డే సిరీస్‌ను క్వీన్ స్వీప్ చేసిన టీమిండియా.. ఇప్పుడు ఐసీసీ ఛాంపియ‌న్స్ ట్రోఫీపై క‌న్నేసింది. ఫిబ్ర‌వ‌రి 19 నుంచి ప్రారంభం కానున్న ఈ మెగా టోర్నీ కోసం భార‌త జ‌ట్టు శ‌నివారం దుబాయ్‌కు ప‌య‌నమైంది.

ఈ మెగా ఈవెంట్ పాకిస్తాన్‌, యూఏఈ వేదిక‌ల‌గా హైబ్రిడ్ మోడ‌ల్‌లో జ‌ర‌గ‌నుంది. భార‌త్ ఆడే మ్యాచ్‌ల‌న్నీ దుబాయ్ వేదిక‌గా జ‌ర‌గ‌నున్నాయి. ఈ టోర్నీలో ర‌న్న‌ర‌ప్‌గా బ‌రిలోకి దిగుతున్న టీమిండియా.. ఈసారి ఎలాగైనా ఛాంపియ‌న్స్‌గా తిరిగిరావాల‌ని ప‌ట్టుద‌ల‌తో ఉంది. ఈ మినీ వ‌ర‌ల్డ్‌క‌ప్‌లో భార‌త్ త‌మ తొలి మ్యాచ్‌లో ఫిబ్ర‌వ‌రి 19న దుబాయ్ అంత‌ర్జాతీయ క్రికెట్ స్టేడియం వేదిక‌గా బంగ్లాదేశ్‌తో త‌ల‌ప‌డ‌నుంది.

స‌చిన్ రికార్డుపై విరాట్ క‌న్ను..
కాగా ఈ మ్యాచ్‌కు ముందు టీమిండియా స్టార్ ప్లేయ‌ర్ విరాట్ కోహ్లి(Virat kohli)ని ఓ అరుదైన రికార్డు ఊరిస్తోంది. బంగ్లాతో మ్యాచ్‌లో కోహ్లి మ‌రో 37 పరుగులు చేస్తే.. వ‌న్డేల్లో అత్యంత‌వేగంగా  14,000 పరుగుల మైలురాయిని అందుకున్న ఆట‌గాడిగా విరాట్ చ‌రిత్ర సృష్టిస్తాడు. ప్ర‌స్తుతం ఈ రికార్డు భార‌త క్రికెట్ దిగ్గ‌జం  సచిన్ టెండూల్కర్ పేరిట ఉంది. స‌చిన్ త‌న‌ 350వ వన్డే ఇన్నింగ్స్‌లో పాకిస్తాన్‌పై ఈ ఫీట్‌ను అందుకున్నాడు.

కోహ్లి ఇప్పటివరకు 285 ఇన్నింగ్స్‌లలో 13963 పరుగులు చేశాడు. స‌చిన్ త‌ర్వాతి స్ధానంలో శ్రీలంక లెజెండ్ కుమార్ సంగక్కర ఉన్నాడు. సంగ్క‌ర 378 ఇన్నింగ్స్‌ల‌లో  14,000 ప‌రుగుల మైలు రాయిని సాధించాడు. ఈ క్ర‌మంలో తొలి మ్యాచ్‌లో ఈ దిగ్గ‌జాల‌ను కోహ్లి అధిగ‌మించే అవ‌కాశ‌ముంది.

అంతేకాకుండా ఈ టోర్నీలో విరాట్‌ మరో 173 పరుగులు సాధిస్తే.. ఐసీసీ ఛాంపియన్స్ ట్రోఫీలో అత్యధిక పరుగులు చేసిన భారత ఆటగాడిగా శిఖర్ ధావన్‌​ రికార్డు కూడా బద్దలు అయ్యే ఛాన్స్ ఉంది. దావన్ ఛాంపియన్స్ ట్రోఫీలో 10 మ్యాచ్‌లు ఆడి 701 పరుగులు చేశాడు. కోహ్లి విషయానికి వస్తే.. 13 మ్యాచ్‌ల్లో 529 పరుగులు చేశాడు. 

అదేవిధంగా కోహ్లి  మరో 263 పరుగులు చేయగలిగితే ఈ టోర్నీలో అత్యధిక పరుగులు చేసిన ఆటగాడిగా వరల్డ్ రికార్డు సృష్టించే అవకాశముంటుంది. ప్రస్తుతం ఈ రికార్డు వెస్టిండీస్ దిగ్గజం క్రిస్ గేల్ పేరిట ఉంది. గిల్ 791 పరుగులతో ఈ టోర్నీలో టాప్ రన్‌స్కోరర్‌గా కొనసాగుతున్నాడు. కాగా ఇంగ్లండ్‌తో జరిగిన ఆఖరి వన్డేలో కోహ్లి హాఫ్‌ సెంచరీ సాధించి తన ఫామ్‌ను తిరిగి అందుకున్నాడు. అదేజోరును ఈ ఐసీసీ ఈవెంట్‌లోనూ కొనసాగించాలని అభిమానులు ఆశిస్తున్నారు.
చదవండి: ENG vs IND: రోహిత్ శ‌ర్మకు బిగ్‌ షాక్‌.. టీమిండియా కెప్టెన్‌గా స్టార్‌ ప్లేయర్‌?