తోడుకోసం వచ్చి.. తిరిగిరాని లోకాలకు

లారీని ఢీకొన్న కారు (ఇన్‌సెట్‌)మృతి చెందిన శరత్‌సాయి

ముద్దనూరు : తన స్నేహితుడికి తోడు కోసం వచ్చి ఓ యువకుడు తిరిగిరాని లోకాలకు వెళ్లాడు. ఆగివున్న లారీని కారు ఢీకొనడంతో ఓ యువకుడు దుర్మరణం చెందగా, మరొకరికి తీవ్ర గాయాలయ్యాయి. ఎస్‌ఐ చంద్రమోహన్‌ తెలిపిన మేరకు వివరాలు ఇలా ఉన్నాయి. ఈ నెల 17న (ఆదివారం) రాత్రి ఎర్రగుంట్లకు చెందిన బాబ్జీ అనే డ్రైవరు ముద్దనూరుకు కారును అద్దెకు తీసుకుని వచ్చారు. ముద్దనూరుకు వచ్చే సమయంలో.. బాబ్జీ తిరిగి ఇంటికి వెళ్లడానికి తోడుగా అదే గ్రామంలోని ఆశ్రమం వీధికి చెందిన శరత్‌సాయి(23)ని పిలుచుకుని వచ్చాడు. శరత్‌సాయి అన్న శశికాంత్‌ కూడా కారులో ముద్దనూరు వచ్చాడు.

ఆదివారం రాత్రి 11.10 గంటలకు ముద్దనూరులో వ్యక్తిని వదిలి తిరిగి ముగ్గురూ కారులో ఎర్రగుంట్లకు బయలుదేరారు. స్థానిక స్టేట్‌బ్యాంక్‌ దాటగానే రోడ్డు పక్కనే నిలిచివున్న లారీని కారు ఢీకొంది. ఈ ఘటనలో డ్రైవరు పక్క సీటులో కూర్చున్న శరత్‌సాయి అక్కడికక్కడే చెందాడు. డ్రైవరు బాబ్జీ చేయి విరిగింది. బాధితుడిని 108 వాహనంలో ప్రొద్దుటూరుకు తరలించారు. కేసు నమోదు చేసి దర్యాప్తు చేస్తున్నట్లు ఎస్‌ఐ తెలిపారు.