‘జగనన్న ఆరోగ్య సురక్ష’కు విశేష స్పందన

బీపీ పరీక్ష చేయించుకుంటున్న నోడల్‌ అధికారి మురళీధర్‌రెడ్డి

కడప: జగనన్న ఆరోగ్య సురక్ష కార్యక్రమానికి విశేష స్పందన లభిస్తోందని జిల్లా నోడల్‌ అధికారి మురళీధర్‌రెడ్డి పేర్కొన్నారు. సోమవారం మండలంలోని వి.కొత్తపల్లె గ్రామంలో జరుగుతున్న జగనన్న ఆరోగ్య సురక్ష వైద్య శిబిరాన్ని ఆయన తనిఖీ చేశారు. ఈ సందర్భంగా మాట్లాడుతూ రాష్ట్రంలో జరుగుతున్న జగనన్న ఆరోగ్య సురక్ష పనితీరుపై తెలుసుకునేందుకు ప్రభుత్వం అన్ని జిల్లాలకు నోడల్‌ అధికారులను నియమించిందన్నారు.

వైద్యశిబిరానికి వచ్చిన రోగులను అడిగి.. అందుతున్న సేవలను తెలుసుకున్నారు. అనంతరం ఆయన బీపీ చెకప్‌ చేయించుకున్నారు. ఐసీడీఎస్‌ ఆధ్వర్యంలో ఏర్పాటు చేసిన వైఎస్సార్‌ సంపూర్ణ పోషణ స్టాల్స్‌ను పరిశీలించి అక్కడి గర్భవతులకు పండ్లను పంపిణీ చేశారు. ఈ కార్యక్రమంలో ఎంఎస్‌ఓ అర్జున్‌ రావు, ఎంపీడీఓ విజయరాఘవరెడ్డి, తహసీల్దార్‌ వెంకటసుబ్బయ్య, మండల ఉపాధ్యక్షురాలు లీలావతి, సర్పంచ్‌ గంగరాజు, వైద్యులు పాల్గొన్నారు.