ధరలు తగ్గే వరకూ ఉల్లి విక్రయాలు

తాండూరు, న్యూస్‌లైన్: ఉల్లి ధర దిగొచ్చేవరకూ జంటనగరాల్లోని అన్ని రైతు బజారుల్లో కిలో రూ.28 చొప్పున విక్రయాలు కొనసాగిస్తామని ప్రాంతీయ ఉప మార్కెటింగ్ సంచాలకులు(ఆర్‌డీడీఎం) ఈ.మల్లేశం స్పష్టం చేశారు. మంగళవారం ఆయన తాండూరు మార్కెట్ కమిటీని సందర్శించారు. అనంతరం విలేకరులతో మాట్లాడుతూ ఈ ఏడాది జూలై నుంచి ఇప్పటివరకు జంట నగరాల్లోని అన్ని రైతు బజారుల్లో 2,500 క్వింటాళ్లు, మెదక్ జిల్లా (సిద్దిపేట, సంగారెడ్డి), మహబూబ్‌నగర్, నాగర్‌కర్నూల్, నిజామాబాద్ రైతు బజార్లు, మార్కెట్ యార్డుల్లో 500 క్వింటాళ్ల ఉల్లి విక్రయించామని తెలిపారు. కిలో రూ.25-39 ధరకు విక్రయించినట్టు చెప్పారు. ప్రస్తుతం రూ.28లకు కిలో ఉల్లి విక్రయిస్తున్నట్టు వెల్లడించారు. మలక్‌పేట మార్కెట్‌లో బిడ్డింగ్‌లో ధర అధికంగా ఉండటం వల్ల వికారాబాద్, తాండూరు మార్కెట్‌లలో ఇటీవల ఉల్లి విక్రయాలు ఆగిపోయాయని, మరో రెండు రోజుల్లో మళ్లీ ప్రారంభమవుతాయని చెప్పారు.